Sanaamuu gu damaa da sahaabu
32
1 Hida giyaa iliianiri Musaa yaanii kaai hari khisla hii⁄eeta onko, gii kurunkuridiri daqa Haruunige haa sugugi kaayri tuba, “Aare sandi boo⁄imiside iliitleemamee gundiri giyaadee dandiray, sa gimba heedikira Musaa gwaa hiica⁄asu dandiray hhapee da Misirigo, hhidina idoo duguũ slaydi yade.”2 Haruuni gigi ilaki⁄isi tuba, “Babacimaa namiray gu sahaabu eaa gu tigay kokunaa, daqa yaꞌay kokunaa gu hhawatee haa daqa sagameeru googunaa, sinaa leehhisidee.” 3 Teesaaqay, hida goõ yaagi babaciniri namiray gu sahaabu eaa koinaa, giraagi khayri daqa Haruunige. 4 Haruuni gigi ooyi idadu hhakee sugwaani leehhisiri, gigii niiri⁄idisi aslaage haa gigi boo⁄imisi sanaamuu da damaa hari sikhima. Da hheꞌesi, hida hhakee gi kaayri tuba, “Ye hida gu Israeeli, hiĩ na iliitleemu goori gundaa hiica⁄asu hhapee da Misirigo.”
5 Haruuni giyaa ilii arimi gimba gungii ca⁄u, gi tleehhi masabaahu pandaa da sanaamuu gu damateesii, gi kaay tuba, “Heetlaalee yoo losona sa Taataa Iliitleemu.” 6 Heetlaalee dosii hida gii tlayri hari tumpaatumpu, gi hadisiri sadaaka da da⁄araa haa sadaaka da qasaw. Qariqaaqari hida gi ibiidiri sa ⁄agoo haa kitahhu difaay, da hheꞌesi gi qadimidiri haa gi seehhuusiri.
7 Taataa Iliitleemu gi kaay sa Musaa tuba, “⁄eetii ciraai hhapeege, sa gimba hida koku gaay ca⁄asidi hhapee da Misirigo, hingii papa⁄eedeesiri inay kilakoina. 8 Inay hinti mayri ciraai amotira giyaa ilafahhi, gi boo⁄imisiri sanaamuu gu kalay gu damaa hari sikhima, sagagi keebeeꞌemidiri haa sagagi hadisiri sadaaka kakaanay tuba, ‘Ye Israeeli, hiĩ na iliitleemu goori gundaay ca⁄asu hhapee da Misirigo.’ ”
9 Kara, Taataa Iliitleemu gi kaay sa Musaa tuba, “Ana hagiĩ arimi hida hhanki, gu lou inay ti hida gwaa sagaiĩ karaarahhee. 10 Inkoo, hani hhanti koisida tlaatlahhasa, hani mayde ana magi hhamisi inay hari qupidaa gu dihhi. Da hheꞌesi, ana hagu laqa ugu, ma hida gu didiri tleehhiti.”
11 Teesaaqay see, Musaa gi tlaatlaqasi Taataa Iliitleemu, Iliitleemu gosi kakaana tuba, “Ye Taataa Iliitleemu, qupidaa koku gu hhanti dihhi, daqa hida kokuu gaay ca⁄asidi hhapee da Misirigo, harii dahhasa da didiri haa hari daba gu koomaa ⁄uuru! 12 Bere teesaaqay laqada, gu lou, Wamisiri kaayiyay tuba, ‘Giyaatii ca⁄asi hari piimaa da tlakwi, magi cu⁄i onke haa magi hhamisi sumuku inay khooroogo.’ Fookidaayuu qupidaa kokwaa gu dihhigo haa gi mayda piimaa doogu da hhamisaraa hida koku. 13 Slayii yondimiisee doogu, Aburahaamu, Isaaka haa Israeeli,a saa seelinti hari muuna googu ugu loi, kakanta tuba, ‘Laqwaloo doogu hagamaatii tlakhweesa hari khisla, ubee tica⁄eerii pahha rawge, ana sigi hadisa laqwaloo doogu hhapeti goõ sigaay fadidi, ma aalimee dooina tleehhiti koraraa haa koraraa gooba hiifaakoo.’ ” 14 Teꞌesii, Taataa Iliitleemu sigigi ⁄awaarimi inay, gii fooki tlakwarotira giyaa kaay tuba gi yondiidi daqa hida kosii.
15 Da hheꞌesi, Musaa yaagii ⁄eeti onko, yaa kona khongoroꞌosay cada gu tle⁄eẽ gu ilatlatlaw dabaiĩ kosii, digaani iliihandikimi ilakaawa da Iliitleemu bareemoo goõ. 16 Khongoroꞌosaykee yaati yondu gu Iliitleemu ina loi. Kara, handikaa yaati handikaa da Iliitleemu, giyaa naanahhami khongoroꞌosay keesii.
17 Yosuuwa giyaa iliiakhasi afoo da hida maahhaminay, gi kaay sa Musaa tuba, “Kambiige wanta maahhoo da qwatla.”
18 Teꞌesii, Musaa gugi ilaki⁄isi tuba, “Ti afoo da kaba⁄araa gooba, kara ti afoo da kaba⁄amuu gooba, ti afoo da hida gu raaꞌaaꞌamee hagani akhaakhamisa.”
19 Musaa giyaa iliidaadaauusi kambiige, gi arimi sanaamutira da damaa haa hida seehhuusiyay. Teꞌesii, Musaa gi qupidi hari khisla, gi iliicakhadimi hhapeege khongoroꞌosaykira gu tle⁄eẽ gwaa dabaiĩ kosii waaree, gigi cu⁄i pencerehhemay haa pencerehhemay yaqay biraa gu onke. 20 Ina gii oyi sanaamu da damatira giyaa boo⁄imisiri haa gigi da⁄i aslaage. Da hheꞌesi, gigi saadimi gi gubara tleehhiti ceceiya pahha, ceceiyatee gigii kuꞌusi maꞌayge haa gi ⁄uureesi Waisraeeli ma kitahhaniri maꞌay hhakee.
21 Musaa gi maasi Haruuni tuba, “Hida hhanki gunti malee laqiri ugu, haa gigii guumisidi, ma yondiidiri tlakwaroo da didiri taqaaqay?”
22 Haruuni gugi ilaki⁄isi tuba, “Ye looimoo goy, haguũ firimi hhanti qupita. Ugu khuꞌuda idoo hida hhanki gu iliislaahhi yondiidu tlakwaroo. 23 Inay siniĩ kaayri ana tuba, ‘Sandi boo⁄imiside iliitleemamee gundiri giyaadee, sa gimba heedikira Musaa, gundaay ca⁄asu dandiray hhapee da Misirigo, hhidina idoo duguũ slaydi.’ 24 Teesaaqay ana sigigi kaay ambee, ‘Heedi gu kooma idoo daa boo⁄imisi hari sahaabu giyaa baciye.’ Da hheꞌesi, sinigi hadimisiri sahaabukee, ana hagugii khwakhwahhi aslaage, teꞌesii yaagii ca⁄adi sanaamuu da damatee!”
25 Musaa gi arimi hida hhanki yaa sisaasiꞌiyay amoo da Iliitleemu, sa gimba Haruuni gingii geemay ma siꞌiri. Teesaaqay ti idoo da qasaasaw tleehhidiyay pandaa da fa⁄ayaa dooinay. 26 Da hheꞌesi, Musaa gi qadidi kaꞌafu gurii dawaraa kambiige, gi kaay tuba, “Heedi guri bara da Taataa Iliitleemu waara, yaa khaye hari bara dooii.” Yaꞌay goõ gu Laawi yaagii kurunkuridiri sliimaa pandaa dosii.
27 Ina sigigi kaay tuba, “Looimoo Iliitleemu, Iliitleemu gu Waisraeeli, kakaakana tuba, ‘Kila heedi hiikhiidiye pangaa gosi khiringe niini⁄imidiye kambiige bareemoo sliimaa, kaꞌafu lengo kaꞌafu gu caduu naqatloo. Kila heedi gaasiye hiidayuumimoo gosi, danaꞌa gosi haa heedi gu ilaciyaa gosii waara.’ ” 28 Yaꞌay gu Laawi gi laqiri, Musaa gooay idoo giĩ ilii ilafahhi inay. Balotee yaa kaka⁄iri hida elefu tami. 29 Da hheꞌesi, Musaa gi kaay tuba, “Letuti unkuray danguũ qaasi yonduge, ma yonditiri sa Taataa Iliitleemu, sa gimba haã siꞌidiriiba cu⁄uduũ gimati yaꞌay kokuna see baku hiidayuumaa dooguna. Iliitleemu ⁄aafiye unkuray letuti loi.”
30 Heetlaalee dosii, Musaa gi kaay sa hida tuba, “Haã yonditiri tlakwaroo da didiri! Teesaaqay see, inkoo ana ha ilii hadakaw Taataa Iliitleemu, rawaa gu onke, bere hiniila⁄imbi firoo doy, ilamooyna tlakwaroo dooguna.”
31 Teesaaqay Musaa gi ki⁄i daqa Taataa Iliitleemuge, haa sugugi kaay tuba, “Hida hhanki hiĩ yondiidiri tlakwaroo da didiri! Inay singiigii boo⁄imisiri iliitleemamee gu sahaabu. 32 Teesaaqay see, inkoo hagu tlaatlaqasa ilamooyimaki tlakwaroo dooina. Bere hagi ilamooyintaaba, kwahhe uma goy kitaabuu gaa iliihandakinti umaiĩ gu hida.”b
33 Taataa Iliitleemu, gi kaay sa Musaa tuba, “Heedi guũ yondiidu tlakwaroo pandaa dooii haguni baca kitaabuu gooaa. 34 Inkoo taa⁄a hida hhanki hagirigiyate daqa suguũ ilii kaayi naqatloo, ina malayika goy sugu giyaadi ugu Musaa. Teesaaqay see, baloo gamaa iliikhawe, hagimaa ⁄agitima inay sa tlakwaroo dooina.”
35 Teꞌesii, Taataa Iliitleemu, gi ⁄agitimi hida hari ga⁄ay gu dihhu, sa gimba yaa boo⁄imisiri sanaamuu da damaa, hatira daa boo⁄imisi ha Haruuni.