Fundadaa sa tlehhinay Hemaa daa Tlintiꞌisi da Taataa Iliitleemu
31
1 Da hheꞌesi, Taataa Iliitleemu gi kaay sa Musaa tuba, 2 “Yuꞌudiyaa, ana hangii leehhi Besaleeli nanku Uurii, okookoo gu Huuri, gu kabiraa da Yuuda, 3 haa haguũ hacisi Muuna gu Iliitleemu, ma sugu hadisi caahhamuu, hiidahhasa haa waaway yondu sliimaage gu fundadaisoo, 4 ma baraslay haa ma yondiidi yondu gu dakoo haa gu sapoo sahaabu, feesa haa ⁄aray. 5 Kara, suguũ hadisi caahhamuu gu kereꞌemisu tle⁄eẽ gu kaari sari tlemaraa, dakoo bangasay sa yondu paslaapasloo gu fundadaisoo. 6 Slime sugungii leehhi Oholiyaabu nanku Ahisamaaki, gu kabiraa da Daani, ma yondiidi sliimaa haa ina. Slime haã hadisi caahhamuu gu didiri sa fundadaa, ma yondiidiri yondu paslaapasloo, inay ma boo⁄imisiri khooslay goõ, idoo hagwaa ilii ilakaay gooay ugu digima boo⁄imisi. 7 Khooslaykee ti Hemaa da Iliislaslaw, Sandikoo da Ilatlatlaw haa ilakhupisimoo gu ilamooyiru tlakwaroo rawaa kosii, sliimaa haa khooslay goõ gu Hemaa; 8 meesaa haa khooslay gosi, kalagaa da caaꞌasoo da sahaabu daa ilabuusli haa khooslay gosi, haa masabaahu da iliieehhimisu ubaanii; 9 masabaahu da iliidaada⁄aru sadaaka haa khooslay gosi, beseeni da maꞌay haa kitiĩ gosi, 10 qayroo daa hambahambuudisi hhoinay daa tlintiꞌisi gu hhapalooay Haruuni, haa qayroo gu yaꞌay kosi qatlay gi iliiyondiidiyee yondu gu hhapalooaisoo. 11 Slime du⁄iya da makhanay da tafu hhoi haa ubaanii gu tafu hhou sa Daqa daa Tlintiꞌisi. Idadu hhakee goõ digiti boo⁄imisi idoo hagwaa ilii ilakaay gooay ugu.”Sabaato baloo da hiifiifisa
12 Da hheꞌesi, Taataa Iliitleemu gi kaay sa Musaa tuba, 13 “Kaay sa Waisraeeli ubee, ‘Unkuray kwanda ga iliiqaasidee sariyaa da Sabaato doy, sa gimba hiĩ na laqaru tla⁄aã gooii haa unkuray, sa laqwaloo dooguna goõ daa khoca, ma caahhadiri tuba, ana Taataa Iliitleemu na ina nangoó ilabuuslida unkuray. 14 Unkuray kwanda ga iliikontee sariyaa da baloo da Sabaato harii fiifisa, sa gimba dagaati tlintiꞌisi daqa doogunay. Heedi gumaa slasla⁄eedeesa balootee hari yondiida yondu, kwanda dugu gaasiyee haa duguti paslisi segenge daqa hida kosaa. 15 Unkuray ha yonditay yondu googuna qoomay gu balalu lahhoꞌo. Teesaaqay see, baloo da fanqu ti baloo da Sabaato da hiifiifisa, ti baloo doy daa tlintiꞌisi. Heedi gumaa yondiida yondu baloteesii kwanda dugu gaasiye. 16 Sa gimbakee, Waisraeeli hiti sirakonay sariyaa da Sabaato, laqwaloo dooinay goõ daa khoca, ti ila⁄imbidu gu koraraa haa koraraa goóba hiifaakoo. 17 Gimbaki hiti laqaru tleehhidi tla⁄aã gooii haa Waisraeeli koraraa haa koraraa goóba hiifaakoo, sa gimba qoomay gu balalu lahhoꞌo, ana Taataa Iliitleemu haa tleehhi raw haa hhapee, baloo da fanquge hagii fiifisi haa hagi hhaꞌaluudi.’ ”
18 Taataa Iliitleemu giyaa ilii hheꞌesi cocoꞌomoo haa Musaa oõ gu Sinaayige, gi hadisi sa Musaa khongoroꞌosay cada gu tle⁄eẽ gu ilatlawa. Ina Iliitleemu naa handikimi ilakaawatira hari daba gosi ina loi.