Ou gu baloo da Sabaato
35
1 Da hheꞌesi, Musaa gii kurunkuri marimariya goõ da Waisraeeli sigigi kaay tuba, “Hiĩ na gimba Taataa Iliitleemu dangwaani ilakaay unkuray magu yonditiri. 2 Hari balalu lahhoꞌo ha yonditay yondu googuna. Teesaaqay see, baloo da fanqu ti Sabaato, baloo da hiifiifisa daa tlintiꞌisi sa Taataa Iliitleemu. Heedi gu yondiida baloteesii kwanda dugu gaasiye. 3 Baloteesii da Sabaatoge hhanti hamisiday aslaa, daqeemoo gonge maraai kokunay.”Sadaaka sa tlehhinay gu Hemaa daa Tlintiꞌisi
4 Da hheꞌesi, Musaa gi kaay sa marimariya goõ da Waisraeeli tuba, “Hiĩ na gimba giyaani ilafahhi Taataa Iliitleemu, unkuray magu yonditiri tuba, 5 hadisa sadaaka sa Taataa Iliitleemu, daqa idadu ga konteego. Kila heedi hadisiye hari muuna gu cabuuma sadaaka sa Taataa Iliitleemu. Hadimisa sahaabu, feesa, ⁄aray, 6 puteeri gu kalay gu qancaru raw pahha, gu daahhiya haa gu daa⁄adu, qayroo gu ⁄abakwi poy daa hhutli, quubu gu aaraa, 7 faloo gu bee⁄u daa maakhi kalay gu daa⁄adu, faloo gu makay gu tlawa da didiri, bangasay gu lawau, 8 du⁄iya da miseyituuni sa ooyisa da korobooyii, idadu gu hiirooga sa du⁄iya da makhanay haa ubaanii gu kooma tafu gu hhou, 9 tle⁄eẽ gu kaari gu sohaamu haa tle⁄eẽ wakinay gu kaari sa tlemaraa qayriya daa ilakhupisidi muunaiĩ gu hhapalooay haa sa curuqu gu muunaiĩ.
Khooslay sa Hemaa daa Tlintiꞌisi da Taatlaa Iliitleemu
10 Inkoo, kila heedi gu kooma caahhamuu gu yondu waku tla⁄aã googunay, yaa khaye ma boo⁄imisi idadu goõ daani ilakaay ha Taataa Iliitleemu. 11 Yondukee ti boo⁄imisu gu Daqa daa Tlintiꞌisi sliimaa haa hemaa dosi, ilakhupisimoo gosi haa pasiyaa dosi, batlinqisay gosi, bangasay gosi, gompaai kosi, unguruꞌu gosi haa caqalaqaatisimaiĩ koina, 12 Sandikoo da ila⁄imbidu sliimaa haa sangiidimaiĩ kosi haa ilakhupisimoo gu ilamooyiru tlakwaroo haa pasiyaa da Daqa daa Tlintiꞌisi, 13 meesaa sliimaa haa sangiidimaiĩ kosi haa khooslay gosi goõ haa mukaatee daa tlintiꞌisi sa Iliitleemu, 14 kalagaa da iliiqamidu caaꞌasoo daa boo⁄imisi hari sahaabu haa khooslay gosi goõ, caaꞌasoo dosi haa du⁄iya sa ooyimisu gu caaꞌasoo, 15 masabaahu da iliieehhimisu ubaanii sliimaa haa sangiidimaiĩ kosi, du⁄iya da makhanay, ubaanii gu kooma tafu gu hhou haa pasiyaa da daqa darii dawaraa Daqa daa Tlintiꞌisige, 16 masabaahu da iliidaada⁄aru sadaaka sliimaa haa baakuu da ⁄aray, unguruꞌu gosi haa khooslay gosi goõ, beseeni haa kitiĩ gosi, 17 pasiyayuu gu efeenaa sliimaa haa unguruꞌu gosi haa caqalaqaatisimaiĩ koina, slime haa pasiyaa da kaꞌafu gu efeenaa, 18 kikau sa Daqa daa Tlintiꞌisi haa sa efeenaa haa hhagumeerii kosi, 19 haa qayroo daa hambahambuudisi sa yondu gu Daqa daa Tlintiꞌisi, qayroo daa tlintiꞌisi sa hhapalooay Haruuni haa qayroo sa yaꞌay kosi, qatlay gi ilii yondiidiyee yondu gu hhapalooaisoo.”
Hida yaa leehhimisiyay sadaaka dooina
20 Da hheꞌesi, marimariya goõ da Waisraeeli gi waauti pandaa da Musaago. 21 Kila heedi daa muunaboo⁄eesi ha dugugi ila⁄upi ha muuna gosi gi hadisi slagumu sa Taataa Iliitleemu, sa yondu gu Hemaa da Iliislaslaw, haa sa yondu gosi goõ haa sa qayroo daa tlintiꞌisi. 22 Teesaaqay, hida goõ gwaa koomee muunaiĩ gu cabuuma, hhawatee haa tigay hiraagi khayri idadu paslaapasloo gu sahaabu, namiray gu eaa, petatuu haa khooslay goõ gu ⁄alaa. Hida hhakee gi hadisiri idadu paslaapasloo gu khooslay gu sahaabu sadaaka da waratlaysa daqa Taataa Iliitleemuge. 23 Kila heedi hiraagi khay idadu giyaa kone, taqay da puteeri gu qancanari raw pahha, gu daahhiya, gu da⁄adani haa puteeri gu ⁄abakwi poy, baku quubu gu aaraa, baku faloo gu gondadee daa maakhi hari kalay gu daa⁄adu. 24 Hhakira gwaay dahhasee hadisa sadaaka da feesa baku ⁄aray giraagi khayri sa Taataa Iliitleemu. Kara kila heedi gwaa kooma bangasay gu lawau giraagi khay. 25 Tigay goõ gwaa koomee caahhamuu gu hhutloo hiraagi khayri idadu giyaa hhutliri hari puteeri gu qancanari raw pahha, gu daahhiya, gu da⁄adani ha puteeri gu ⁄abakwi poy. 26 Kara tigay goõ gwaa komee caahhamuu gu hhutloo gi hhutliri quubu gu aaraa. 27 Gaduũ hiraagi khayri tle⁄eẽ gu sohaamu haa tle⁄eẽ wakinay sari tlemaraa qayriya daa ilakhupisidi muunaiĩ gurugendi naqatloo haa curuqu gu muunaiĩ. 28 Slime hiraagi khayri rogimaa haa du⁄iya da miseyituuni sa caaꞌasoo, sa du⁄iya da makhanay haa sa ubaanii gu tafu hhou. 29 Waisraeeli goõ tigay haa hhawatee gwaa arimee ti naraꞌa hadisa idadu gi konee, sa yondu hiĩ Taataa Iliitleemu giyaa ilafahhi Musaa duguma yondiidi, hiraagi khayri idadu hhakee hari muunaiĩ koina, sadaaka pahha sa hadisaraa sa Taataa Iliitleemu.
Tlehhidiisee gu tleehhinay gu Hemaa daa Tlintiꞌisi
30 Da hheꞌesi, Musaa gi kaay sa Waisraeeli tuba, “Yuꞌudiyaa, Taataa Iliitleemu hingii leehhi Besaleeli nanku Uurii, okookoo gu Huuri, gu kabiraa da Yuuda. 31 Ina guũ hacisi Muuna gu Iliitleemu, ma sugu hadisi caahhamuu, hiidahhasa haa waaway yondu sliimaage gu fundadaisoo, 32 ma baraslay haa ma yondiidi yondu gu dakoo haa gu sapoo sahaabu, feesa haa ⁄aray. 33 Kara, suguũ hadisi caahhamuu gu kereꞌemisu tle⁄eẽ gu kaari sari tlemaraa, dakoo bangasay sa yondu paslaapasloo gu fundadaisoo. 34 Iliitleemu hiĩ hadisi sa ina haa Oholiyaabu nanku Ahisamaaki, gu kabiraa da Daani, hiidahhasa ma caacaahhamisi hida wakinay. 35 Slime ina sigiĩ hadisi caahhamuu gu yondu paslaapasloo goõ, doó yondiidiye ha fundadaa goó baraslaslawee, yondu gu hambuhambuudimisu hari kalay gu qancaru raw pahha, gu daahhiya, gu daa⁄adu haa kalay gu ⁄abaaku poy, gonkoinaa yaa fundadaa haa khamaslaslaa da baraslaslaw yondu gu cirihhimaa.