Sadaaka da Daqa daa Tlintiꞌisi da Iliitleemu
25
1 Qatlaykii, Taataa Iliitleemu gi kaay sa Musaa tuba, 2 “Kaay sa Waisraeeli goõ ubee, sinaa leehhisiyee sadaaka. Sadaaka da kila heedi gu slaꞌa hadisa hari muuna gosi daga ooye. 3 Sadaaka ga ooyintee daqa dooinaa na nahaã;sahaabu, feesa, ⁄aray,
4 puteeri gu kalay gu qancaru raw pahha, gu daahhiya haa gu daa⁄adu, qayroo gu ⁄abakwi poy daa hhutli, quubu gu aaraa,
5 faloo gu bee⁄u daa maakhi kalay gu daa⁄adu, faloo gu makay gu tlawa da didiri, bangasay gu lawau,
6 du⁄iya da miseyituuni sa ooyisa da korobooyii, idadu gu hiirooga sa du⁄iya da makhanay, haa ubaanii gu kooma tafu gu hhou.
7 Slime, tle⁄eẽ gu kaari na sohaamu, haa tle⁄eẽ wakinay sa tlemaraa qayriya daa ilakhupisidi muunaiĩ gu hhapalooay gurugendi naqatloo haa sa curuqu gu muunaiĩ.
8 Kara, Waisraeeli sini boo⁄imisiyee ana Daqa daa Tlintiꞌisi, ma hiidahhasi ibinaa tla⁄aã gooinay. 9 Boo⁄imisakana haa khooslay gosi goõ, ilaꞌaaꞌaatisa da idadu sugu laqaaqame ugu.
Sandikoo da Ila⁄imbidu
10 Waisraeeli boo⁄imisiyee sandikoo hari bangasay gu khaimoo gu lawau, da kooma tlederuũ gu fuuti tami haa inchi gweleti, hiitlakhwaruũ kosi fuuti cada haa inchi tami, slime tlederuũ kosi rawaa khuꞌusa ti fuuti cada haa inchi tami. 11 Sandikotee laga maakhada sahaabu daa ilabuusli, hari waꞌay haa hari khooroo see. Slime, sagagi boo⁄imisida khansu gu sahaabu gu niini⁄ida bareemoo goõ. 12 Ugu la saga boo⁄imisida urungaa cigahha gu sahaabu haa gigi khiidiidintay yeꞌeeroo kosii cigahhage, urungaa cada hari bara leẽ haa cada hari bara da cadii. 13 Kara, boo⁄imisi sangiidimaiĩ gu khaimoo gu lawau haa ligi maakhada hari sahaabu. 14 Sangiidimaiĩ hhakee ligii lu⁄uminta urungaa hhakeesii gu sahaabu gu waaree hari bareemoo cada gu sandikotee sari geregediru sandikotee. 15 Balalu sliimaa, sangiidimaiĩ hhakee ti meetiyay urungaa hhakeesii, digimaa hhanti baci. 16 Qatlay sandikotee dagoo ilii hheꞌesiye, ugu loo qaasida ilakaawatee da mibi waꞌay gu sandikoteesii da ilatlatlaw sugoo hadise ugu.
17 Teꞌesii, ugu laboo⁄imisida ilakhupisimoo gu ilamooyiru tlakwaroo doogunaa hari sahaabu daa ilabuusli, tlederuũ kosi fuuti tami haa inchi gweleti, hiitlakhwaruũ kosi fuuti cada haa inchi tami. 18 Kara, ugu laboo⁄imisida sanaamamuu cada gu makeruubi gu koomee hhababeeraa hari sahaabu daa sapi, ligi qaasida kengaiĩ cadage gu ilakhupisimokeesii gu ilamooyiru tlakwaroo. 19 Ugu boo⁄imisi keruubi leẽ lugu qaasida hari khansuki kara keruubi gu caduu hari khansu gu caduu gu ilakhupisimokee gu ilamooyiru tlakwaroo, ligi idoo leẽ tleehhidisida haa ilakhupisimokee soomaiĩ cadage. 20 Makeruubitee hiitlaaꞌasiyay hhababee koina rawaage haa hingigi nangumisiyay, ma ilakhupisiri ilakhupisimokee gu ilamooyiru tlakwaroo. Pandadu koina hingiti iliifookimidiyay haa gi khuꞌunay ilakhupisimokee. 21 Ugu la qaasida waꞌay gu sandikoteesii khongoroꞌosaykee cada daa iliihandikimi ilatlatlaw mibi sugu hadise ana. Kara, la qaasida ilakhupisimokee rawaa gu sandikoteesii. 22 Teꞌesii na daqa hanguni iliislaslayna haa ugu, haa rawaa gu ilakhupisimokeesaa gu tla⁄aã gu makeruubiteesii gu cada da rawaa gu Sandikoteesii waara da Ilatlatlawge, ana gani ilii gimbuusa haa ugu, sugu hadisa ilakaawa doy goõ sa Waisraeeli.”
Meesaa da mukaatee daa hadisi ha Iliitleemu
23 Kara, Iliitleemu gi kaay sa Musaa tuba, “Boo⁄imisi meesaa hari bangasay gu khaimoo gu lawau, tlederuũ kosi fuuti tami, hiitlakhwaruũ kosi fuuti leẽ haa inchi lahhoꞌo, qadoo dosi rawaa khuꞌusa fuuti cada haa inchi tami. 24 Meesatee laga maakhada hari sahaabu daa ilabuusli. Slime sagagi boo⁄imisida khansu gu sahaabu gu niini⁄ida bareemoo goõ. 25 Slime, boo⁄imisi bangasiya da coohhi da kooma hiitlakhwaruũ gu ilakhua da inchi tami. Bangasiyatee saga boo⁄imiside khansaiĩ daa tlemi hari sahaabu niini⁄ida da bareemoo goõ. 26 Boo⁄imisi urungaa cigahha gu sahaabu sa meesatee, ilanuunuꞌusi urungaa hhakee soomaiĩ kosii cigahhage, leẽ daqa kila yaaee lenge. 27 Urungaa hhakee ilaciyaa wanee haa bangasiyatira da coohhi, ma daqa tleehhidiri da iliilu⁄umiru sangiidimaiĩ guri geregediru meesa. 28 Boo⁄imisi sangiidimaiĩ hhakee hari khaimoo gu lawau haa maakhaki sahaabu, sari geregediru meesa. 29 Kara, boo⁄imisi khooslay hari sahaabu daa ilabuusli. Khooslaykee ti saananuu, ⁄atisaaee, lagabaaee, qulu⁄umbaaee haa dehheeri sa iliiesidu sadaaka da kitahhu. 30 Balalu sliimaa, pandaa dooii laqaasida mukaatee daa tlintiꞌisi meesateesii.
Kalagaa da iliiqamidu caaꞌasoo
31 Boo⁄imisi kalagaa hari sahaabu daa ilabuusli, sa iliiqamidu caaꞌasoo. Kalagatee lagati boo⁄imisida gonkosaa hari pencerehhemiya leẽ da sahaabutee, sira dosi haa khaimoo gosi idoo leẽ tleehhidiye, qulu⁄umbaaee kosi, kukeenoo kosi haa humbalaalay gosi. 32 Elemu lahhoꞌo yaa hiica⁄iyee tluntlubabu gu kalagateesaa, elemu tami hari bara leẽ haa elemu tami hari bara da cadii. 33 Daqa kila eleemage, da wane qulu⁄umbaaee tami gu humbalaalay gu khaimoo waku slanqasa, doó eteedine muloosi. 34 Rawaa gu kalagateesii yoo wanay qulu⁄umbaaee cigahha gu humbalaalay gu khaimoo gu muloosi slaqamisee, sliimaa haa kukeenoo kosi haa humbalaalay gosi. 35 Kila daqa daa iliiwane ilagaasa da elemu cada kalagateesii daa wana kukuniya leẽ, kukuniya da cada ilagaasa da cadage da elemu gu cada, kukuniya da tami ilagaasa da tamige da elemu gu tami. Gonkoinaa ti elemu lahhoꞌo. 36 Kukeenoo hhakee haa elemu kosi goõ idoo leẽ tleehhidiyay daqa kalagateesii da iliiqamidu caaꞌasoo, gonkoinaa digiti sapi sahaabu daa ilabuusligo.
37 Kara, boo⁄imisi caaꞌasoo fanqu laga ooyisida haa lagaqaasida rawaa gu kalagateesii, ma hiicaaꞌasidi pandaa da kalagateesii. 38 Slime, boo⁄imisi mukaasaaee gurii segidu puteeri kosi haa saananuu kosi hari sahaabu daa ilabuusli. 39 Kalagatee haa idadu hhakee kosi goõ ti boo⁄imisaki hari kiloo mibeeri tami haa kooani gu sahaabu daa ilabuusli. 40 Khuꞌumi, idadu hhakee goõ boo⁄imisaki naraꞌa, idoo sugwaa ilii laqami gooay ilaꞌaaꞌatisa dosi, rawaa gu onke.”