Hemaa daa tlintiꞌisi
26
1 Taataa Iliitleemu gi kaay sa Musaa tuba, “Hiicataraa da gimbakee sliimaa, boo⁄imisa Daqa daa Tlintiꞌisi hari pasiyayuu mibi gu ⁄abakwi poy daa hhutli. Pasiyayuu hhakee tlemakina hari puteeri gu kalay gu qancaru raw pahha, gu daahhiya haa kalay gu daa⁄adu. Slime tlemakina hari hhabahhabinay gu makay, uma gooina na makeruubi gu koomee hhababee gu malayika pahha slaqamisee, yondu gu heedi gu khua pahha hirimaamidu naraꞌa. 2 Kila pasiyaa konte tlederuũ gu fuuti mibeeri cigahha haa cada, haa hiitlakhwaruũ koina konee fuuti lahhoꞌo. Pasiyayuu hhakee gonkoinaa konee piimoo leẽ. 3 Pasiyayuu kooani ilanuunuꞌusakini daqa lenge, ma kaꞌaã leẽ tleehhidi. Nama teesaaqay leẽ laqe, daqa hhakee see wakinay gu kooani. 4 Da hheꞌesi, laboo⁄imisiday horongonay hari dahhamu gu kalay gu qancaru raw pahha, qwasa⁄a da pasiyaa da hiifaakooge kaꞌaã gu pandaage. Slime teesaaqay leẽ laqa, daqa kaꞌaã gu hiifaakoo gu pasiyaa da cadii. 5 Boo⁄imisa horongonay mibeeri kooani pasiyaa da pandaage, haa horongonay waku mibeeri kooani daqa pasiyaa da cadiige, horongonaykee goõ hingi iliifookimidiyee gonkoinaa. 6 Kara, boo⁄imisi batlinqisaaee mibeeri kooani hari sahaabu, ma ilanuunuꞌusidi naraꞌa kaeeri hhakee gu cada gu pasiyayuu, hematee ma idoo leẽ tleehhiti.”7 Slime, Taataa Iliitleemu gi kaay sa Musaa tuba, “Boo⁄imisa pasiyayuu mibi haa leẽ hari quubu gu aaraa, ma hemaa tleehhidiri sa ilakhupisaraa da Daqatee daa Tlintiꞌisi. 8 Pasiyayuu hhakee konee tlederuũ gu fuuti mibeeri cigahha haa kooani, haa hiitlakhwaruũ gu fuuti lahhoꞌo. Pasiyayuu hhakee gonkoinaa konee piimoo leẽ. 9 Ilanuunuꞌusi pasiyayuu hhakee kooani daqa lenge haa hhakee see gu lahhoꞌo ilanuunuꞌusaki daqa lenge. Pasiyaa da lahhoꞌo qwasa⁄aka waa cada pandaa da hemateesii. 10 Da hheꞌesi, laboo⁄imisida horongonay mibeeri kooani khansu gu pasiyaa da hiifaakoo kaꞌaã gu pandaage. Slime, teesaaqay leẽ laqe, daqa kaꞌaã gu hiifaakoo gu pasiyaa da cadii. 11 Kara, boo⁄imisi qolondaaee mibeeri kooani gu ⁄aray, haa gii lu⁄uminta qolondaaee hhakee daqa horongonaykeesii, ma ilanuunuꞌusidi kaeeri hhakee cada gu pasiyayuu, ma hemaa leẽ tleehhiti. 12 Inkoo, kaꞌakira gu pasiyaa da hemaa sliimaa haa nusukira gu pasiyaa diĩ meti, digii taareeiye hari bara da aluũ gu Daqatee daa Tlintiꞌisi. 13 Pasiyayuu gu hemaa gumaa meetee himaa konay tlederuũ gu fuuti leẽ haa nusuu hari bara leẽ haa fuuti leẽ haa nusuu hari bara da cadii. Teesaaqay, kaꞌaã gumaa meeta dugumaa hiitaareei bareemoo goõ gu Daqatee daa Tlintiꞌisi, dagama ilakhupisi. 14 Boo⁄imisi ilakhupisimoo gu hemaa, hari faloo gu gondadee, daa maakhi hari kalay gu daa⁄adu. Kara rawaa kosii la hiihhafida ilakhupisimoo waku gu naaꞌaru, ga boo⁄imiside hari faloo gu naꞌanari gu makay.
15 Boo⁄imisi bangasay gu lawau sari qadidisa Daqa daa Tlintiꞌisi. 16 Kila bangasiya konte tlederuũ gu fuuti mibi haa kooani haa hiitlakhwaruũ gu fuuti cada haa nusuu. 17 Slime, kila bangasiya konte eaa cada sa ilanuunuꞌumisu daqa lenge. Nama teesaaqay leẽ, boo⁄imisi bangasay goõ gu Daqa daa Tlintiꞌisi. 18 Teesaaqay, laboo⁄imisida bangasay mibeeri cada sa bara da wayee gu Daqa daa Tlintiꞌisi. 19 Slime, boo⁄imisi hari feesa caqalaqaatisimaiĩ mibeeri cigahha gu qamidu biraa gu bangasaykeesii. Kila bangasiya slayde caqalaqaatisimaiĩ cada, leẽ qaasi biraa gu eea lenge haa gu caduu eea da cadiige. 20 Kara, boo⁄imisi bangasay wakinay mibeeri cada sa bara da goraa gu Daqa daa Tlintiꞌisi. 21 Slime, boo⁄imisi caqalaqaatisimaiĩ mibeeri cigahha hari feesa, caqalaqaatisimaiĩ cada biraa gu bangasiya lenge. 22 Da hheꞌesi, laboo⁄imisida bangasay lahhoꞌo sa bara da aluũ, dari ilacindoo gu biraa waara gu Daqa daa Tlintiꞌisi. 23 Slime, boo⁄imisi bangasay wakinay cada sa soomaiĩ hhakee gu hemaa guri bara da aluũ waaree. 24 Soomaiĩ hhakeesii gu cadage, kwanda da qadidisiye bangasay cada, tlaatleesa da hhapeego rawaa naqatloo. Slime, rawaage digiti ilanuunuꞌusiye daqa urunga lenge. Teesaaqay leẽ laqe, daqa soomaiĩ hhakeesii. 25 Teesaaqay, da wanee bangasay dagati haa caqalaqaatisimaiĩ mibi haa lahhoꞌo da boo⁄imisiye hari feesa. Kila bangasiya kwanda saga qaaside biraage caqalaqaatisimaiĩ cada.
26 Slime, boo⁄imisi gompaai kooani gu lawau sa bangasay guri bara leẽ da Daqa daa Tlintiꞌisi. 27 Kara, boo⁄imisi gompaai wakinay kooani sa bangasay guri bara da cadii waaree da Daqa daa Tlintiꞌisi, haa kooani sa bangasay guri aluũ gu Daqateesii waara, hari bara da ilacindoo gu biraa. 28 Gompay gu tla⁄aã gu Daqatee, kwanda giicatiye hari tla⁄aã gu bangasay gu Daqatee, barataa, bara da cadii naqatloo. 29 Bangasay haa gompaai hhakee maakhaki hari sahaabu, haa boo⁄imisi urungaa gu sahaabu, ligii tluhhumisida bangasayge haa gompaaige sa oowa dooina.
30 Boo⁄imisi Daqatee daa Tlintiꞌisi naraꞌa, idoo sugwaa ilii laqami gooay ilaꞌaaꞌatisa dosi, rawaa gu onke.
31 Boo⁄imisi pasiyaa hari puteeri gu kalay gu qancaru raw pahha, gu daahhiya, gu daa⁄adu haa gu ⁄abaaku poy daa hhutli naraꞌa. Hari puteeri hhakee, pasiyatee laga tlemida naraꞌa hhabihhabinaaee gu makeruubi gu koomee hhababeerii malayika pahha, daa boo⁄imisi hari qeeraa gu fundi. 32 Da hheꞌesi, pasiyatee laga hiitaareeꞌeda daqa qolondaaee daa boo⁄imisi hari sahaabu daqa unguruꞌu cigahhage gu khaimoo gu lawau, daa maakhi hari sahaabu, haa daa qadidimisi caqalaqaatisimaiĩ cigahhage gu feesa. 33 Ugu lagay taareeꞌeda pasiyatee daqa qolondaaee hhakiray. Da hheꞌesi, lagaraa khayda teꞌesii waꞌayge Sandikotira da Ilatlatlaw gu gimba, laga qaasida hari aluũ gu pasiyatee teꞌesii waꞌayge. Pasiyatee hiideehheda Daqa daa Tlintiꞌisi haa Daqa daa Tlintiꞌisi Hari Khisla. 34 Teꞌesii waꞌay gu Daqa daa Tlintiꞌisige Hari Khisla la qaasida ilakhupisimoo gu ilamooyiru tlakwaroo rawaa gu Sandikoo da Ilatlatlawge. 35 Qaasi meesaa hari khooroo gu pasiyatee, hari bara da goraa gu Daqatee. Kara, kalagaa da caaꞌasoo qaasaka hari bara da wayee gu Daqatee, tluntlubaa da meesateesii.
36 Sa afamaraa gurii guuma hemaage, boo⁄imisi pasiyaa da hiilooi hari puteeri gu kalay gu qancaru raw pahha, gu daahhiya, gu daa⁄adu haa puteeri gu ⁄abakwi poy daa hhutli haa daa hambuhambuudisi naraꞌa. 37 Slime, pasiyatee dagamay taareei, kwanda ga boo⁄imiside unguruꞌu kooani gu lawau haa ligi maakhada hari sahaabu. Unguruꞌukee konee qolondaaee gu sahaabu haa kila unguruiya konte caqalaqaatisimoo leẽ daa boo⁄imisi hari ⁄aray.”