Masabaahu da iliidaada⁄aru sadaaka
27
1 Iliitleemu gi kaay sa Musaa tuba, “Boo⁄imisi masabaahu hari bangasay gu khaimoo gu lawau. Masabaahutee tlederuũ kosi ti fuuti fanqu haa nusuu, hiitlakhwaruũ kosi ti fuuti fanqu haa nusuu, qadoo dosi rawaa khuꞌusa ti fuuti cigahha haa nusuu. 2 Slime, boo⁄imisi khadami cigahha hari sahaabu sa soomaiĩ cigahha gu masabaahutee. Kila khadaã lugu ilanuunuꞌusida sooma lenge gu masabaahutee, haa masabaahutee laga maakhada hari ⁄aray. 3 Boo⁄imisi khooslay goõ gu masabaahutee hari ⁄aray. Khooslaykee ti ⁄alalee guri babaciru ⁄ura, beleesaaee, lagabaaee guri hitimisu, waaloo da sikhimi dari waaliiliru fuꞌumay haa idadu guri gatlinay aslaa. 4 Kara, boo⁄imisi baakuu hari ⁄aray sa masabaahutee. Slime, boo⁄imisi urungaa cigahha hari ⁄aray sa soomaiĩ cigahha gu baakutee. 5 Baakutee laga hiilu⁄uda hari biraa gu khansu gu masabaahu, dadee tla⁄aã gu masabaahuteesii. 6 Slime, boo⁄imisi sangiidimaiĩ gu khaimoo gu lawau sari geregedaraa masabaahutee, haa ligi maakhada hari ⁄aray. 7 Sangiidimaiĩ hhakee digii lu⁄umina daqa urungaa gu waaree hari tluntlubabu gu masabaahutee, qatlay gu geregedaraa dosi. 8 Boo⁄imisi masabaahutee hari bangasay, gi konta qurumbu waꞌay kosii. Boo⁄imisiyee naraꞌa, idoo sugwaa ilii laqami gooay ilaꞌaaꞌatisa dosi, rawaa gu onke.”Efeenaa da hemaa daa tlintiꞌisi
9 Iliitleemu gi ilakoomi kaawa sa Musaa tuba, “Boo⁄imisi efeenaa sa hemaa daa tlintiꞌisi. Hari bara da wayee da efeenatee da wane pasiyayuu, boo⁄imisi hari kitambalaluu gu ⁄abakwi poy daa hhutli. Pasiyayuu hhakee hari baratee leẽ konee tlederuũ gu fuuti miyaa leẽ haa mibeeri kooani. 10 Pasiyayuu hhakee digiti ooyi rawaage ha unguruꞌu mibeeri cada haa caqalaqaatisimaiĩ mibeeri cada, daa boo⁄imisi hari ⁄aray. Slime, qolondaaee gu unguruꞌukee haa batlinqisay haa horongonay gonkoinaa boo⁄imisaki hari feesa, wanee rawaa gu unguruꞌukeesii. 11 Nama teesaaqay leẽ, hari bara da goraa da efeenatee da wane pasiyayuu gu koomee tlederuũ gu fuuti miyaa leẽ haa mibeeri kooani, haa unguruꞌu mibeeri cada haa caqalaqaatisimaiĩ mibeeri cada daa boo⁄imisi hari ⁄aray. Inkoo, qolondaaee haa horongonay gu feesa wanee rawaa gu unguruꞌukeesii. 12 Bara da ilacindoo gu biraa gu efeenatee konte pasiyayuu gu koomee tlederuũ gu fuuti mibeeri lahhoꞌo haa lahhoꞌo. Slime, konte unguruꞌu gosi mibi haa caqalaqaatisimaiĩ kosi mibi. 13 Hari bara da ilacindoo gu rawaa, doó iliibiifiꞌisiye letu, efeenatee konte hiitlakhwaruũ gu fuuti mibeeri lahhoꞌo haa lahhoꞌo. 14 Pasiyayuu wanee hari bara leẽ da kaꞌafu, konee tlederuũ gu fuuti mibeeri cada haa cada haa nusuu. Unguruꞌu gu pasiyayuu hhakee wanee tami haa caqalaqaatisimaiĩ koina tami. 15 Nama teesaaqay leẽ, hari bara da cadii da wane pasiyayuu gu koomee tlederuũ gu fuuti mibeeri cada haa cada haa nusuu, sliimaa haa unguruꞌu gosi tami haa caqalaqaatisimaiĩ koina tami.
16 Kaꞌafu gurii dawaraa efeena da hemateesii, qaasii pasiyaa da hiilooi daga boo⁄imisiye hari puteeri gu kalay gu qancaru raw pahha, gu daahhiya, gu daa⁄adu haa puteeri gu ⁄abakwi poy daa hhutli haa dagagi hambuhambuudisi naraꞌa. Slime, pasiyatee kwanda gi konte tlederuũ gu fuuti mibeeri tami, haa kwanda dagay taareeiye unguruꞌu cigahhage gu koomee caqalaqaatisimaiĩ cigahha. 17 Unguruꞌu goõ gu niini⁄ida da hematee da iliislaslaw, kwanda dugu khiidine hari qolondaaee haa horongonay daa boo⁄imisi hari feesa. Slime, unguruꞌukee kwanda gi kone caqalaqaatisimaiĩ kosi daa boo⁄imisi hari ⁄aray. 18 Efeenatee maa konta tlederuũ gu fuuti miyaa leẽ haa mibeeri kooani, haa hiitlakhwaruũ gu fuuti mibeeri fanqu haa kooani. Slime, pasiyayuu hhakee gu efeenatee, daa boo⁄imisi hari puteeri gu ⁄abakwi poy daa hhutli naraꞌa, maa konay qadoo da rawaa khuꞌusa fuuti fanqu haa nusuu haa caqalaqaatisimaiĩ kosi daa boo⁄imisi hari ⁄aray. 19 Khooslay goõ daroó yondiidiye hemateesii, sliimaa haa kikau kosi goõ, haa kikau hhakee see gu pasiyayuu gu efeena da iliislaslaw, digimaati boo⁄imisi hari ⁄aray.
Du⁄iya sa kalagaa da caaꞌasoo
(Gimba gu Walaawi 24:1-4)
20 Ugu ilafahhe Waisraeeli, sugwaa leehhisiyee du⁄iya da hhoi da seyituuni sari ooyisaraa caaꞌasoo, damay cencuudi. Caaꞌasotee, ma oodi balalu sliimaa. 21 Waꞌay gu Hemateesii da Iliislaslaw, ilaciyaa haa pasiyaa doó hiideehha hhapalooee haa Sandikoo da ila⁄imbidu, Haruuni haa yaꞌay kosi khuꞌunay, caaꞌasotee ooda pandaa da Taataa Iliitleemuge tlaatleesa da khwayaingo sa heetlawa naqatloo. Haã ti ilakaawa gi akhamisiyee koraraa haa koraraa goóba hiifaakoo, tla⁄aã gu Waisraeelige daqa laqwaloo haa laqwaloo goõ daa khoca.”