Qayroo gu hhapalooee
28
1 Da hheꞌesi, Taataa Iliitleemu gi kaay sa Musaa tuba, “Haraa khayde daqa dooii Haruuni hhia googu sliimaa haa yaꞌay kosi; Nadaabu, Abiihu, Eleyasaari haa Itihhamaari. Inay giyaa hiileehhi tla⁄aã gu Waisraeeligo sinima yondiidiri yondu gu hhapalooaisoo. 2 Ugu hirimaamidi sa Haruuni hhia googu qayroo daa tlintiꞌisi gu hhapalooaisoo, duguma daareesi haa duguma muriidi. 3 Ugu teesaaqay laqe, hari amoo da kaawaraa sa hida goõ gu koomee caahhamuu gu hirimaamidu qayroo, hhaã gaã pihhi waaway yondukeesii, ma hirimaamidiri qayroo hhakee sa Haruuni. Ina ma dugu tlintiꞌisi hari amoo da makhanay du⁄iya, sinima yondiidi yondu gu hhapalooaisoo. 4 Inkoo, inay sigi kaade, ma hirimaamidiri idadu da hhankaa gooay; curuqu gu muunaiĩ, qayriya daa ilakhupisidi muunaiĩ gurugendi naqatloo, jurungii, kanchoo daa hambuhambuudisi, kitambalaa da hiitaaga sagage haa coo⁄ay. Qayroo hhakee daa tlintiꞌisi gu hhapalooaisoo digi hirimaamidiye sa Haruuni hhia googu haa yaꞌay kosi, ma sini yondiidiri yondu gu hhapalooaisoo. 5 Hida hhakee goó hirimaamidee, sigi kaade ma hiioyiri puteeri gu kalay gu sahaabu, gu qancaru raw pahha, daahhiya, gu daa⁄adu haa qayru gu ⁄abaaku poy, gi hambuhambuudisiyay.Citaa
6 Slime, inay hirimaamidiyee sa hhapalooay gu didiru qayriya daa ilakhupisidi muunaiĩ gurugendi naqatloo hari puteeri gu koomee kalay gu sahaabu, gu qancaru raw pahha, gu daahhiya, gu daa⁄adu haa puteeri gu ⁄abakwi poy daa hhutli naraꞌa, yondu gu heedi goó hambuhambuudisa hari khisla. 7 Qayriyatee da muunaiĩ konte hhagumeerii cada, daa hirimaamidi soomaiĩ kosii gu cadage, guri khiidiru kwahhuge. 8 Coo⁄ay gu khiriĩ daa boo⁄imisi naraꞌa, hiĩ gu idoo leẽ tleehhida haa qayriyatee daa ilakhupisidi muunaiĩ gurugendi naqatloo. Coo⁄aykee, duguti boo⁄imisi hari puteeri gu koomee kalay gu sahaabu, gu qancaru raw pahha, gu daahhiya, gu daa⁄adu haa puteeri gu ⁄abakwi poy daa hhutli naraꞌa.
9 Da hheꞌesi, la hiiooda tle⁄eẽ gu kaari cada doó eteedine sohaamu, haa gi handikinta rawaa koinay umaiĩ gu yaꞌay gu Waisraeeli. 10 Umaiĩ lahhoꞌo handikimi tlaa⁄u lenge, haa wakinay lahhoꞌo guũ meetee tlaa⁄u gu caduuge. Umaiĩ hhakee handikimaki, idoo hingaa ilii sirakomamidiri laqwalooge. 11 Handikimi umaiĩ hhakee gu yaꞌay gu Waisraeeli rawaa gu tle⁄eẽ hhakeesii gu cada ubee, khafidiisay gu tle⁄eẽ pahha, idoo giyoo iliikhaafiye chapaa. Da hheꞌesi, tle⁄eẽ hhakee gu kaari ligii lu⁄uminta hiikhangaꞌasa da sahaabuge. 12 Tle⁄eẽ hhakee gu cada ligi ilakhita hhagumeerii hhakeesii gu kwahhuge, qayriyatiray da ilakhupisa muunaiĩ. Tle⁄eẽ gu kaari tleehhidiyee gu hiislaslaw sa Waisraeeli. Hari amotee, Haruuni magi geregedimi umaiĩ hhakee kwahhu kosii, gimba gu hiislaslaw pahha pandaa da Taataa Iliitleemuge. 13 Qatlay ga ilii boo⁄imiside idadu hhakee hari sahaabu sa hiikhangaꞌasa da tle⁄eẽ hhakee, 14 boo⁄imisi heeleꞌesay cada hari sahaabu daa ilabuusli naraꞌa, daa hhutli hhagumoo pahha. Heeleꞌesaykee lu⁄akuu waꞌay gu idadu hhakeesii daa hiikhangaꞌasi hari sahaabu digigi siikhidisi hari hhagumoo.”
Curuqu gu muunaiĩ
15 Iliitleemu gi kaay sa Musaa tuba, “Boo⁄imisi curuqu gu muunaiĩ sari kereꞌemisu gimba. Boo⁄imisaku naraꞌa yondu gu heedi goó hambuhambuudisa hari khisla, idoo daa ilii boo⁄imisi gooay qayriya daa ilakhupisidi muunaiĩ gurugendi naqatloo hari puteeri gu koomee kalay gu sahaabu, gu qancaru raw pahha, gu daahhiya, gu daa⁄adu, haa puteeri gu ⁄abakwi poy daa hhutli naraꞌa. 16 Curuqukee dugu boo⁄imisiye hari dahhamukira gu puteeri da qwasa⁄iye waa cada, kone bareemoo cigahha gu koomee tlederuũ haa hiitlakhwaruũ leẽ gu inchi gweleti. 17 Curuqukee duguti tlemiye hari slaahhadisa cigahha da tle⁄eẽ gu kaari. Slaahhadisa da pandaa konte tle⁄eẽ doó eteedine akiiki, yakuuti da qalamaasiya, topaasi haa alimaasi da daa⁄adi. 18 Slaahhadisa da cada konte tle⁄eẽ doó eteedine sumariidi, yakuuti samaawi haa alimaasi. 19 Slaahhadisa da tami konte tle⁄eẽ doó eteedine yakinto, akiiki da daa⁄adi haa ametiisito. 20 Slaahhadisa da cigahha konte tle⁄eẽ doó eteedine kirisoliito, sohaamu haa yaasipi. Tle⁄eẽ hhakee gonkoinaa, digitii lu⁄umine hiikhangaꞌasa da sahaabuge. 21 Inkoo, tle⁄eẽ hhanki mibi haa cada ti sa umaiĩ gu yaꞌay gu Israeeli, hhaã gu mibi haa cada gu kabiraa mibi haa cada da Israeeli. Kila tlaa⁄u duguti iliislangaaine capaa pahha, kona uma leẽ gu kabiraa mibi haa cada da Israeeli.
22 Curuqukee gu muunaiĩ sugu boo⁄imiside heeleꞌesay gu sahaabu daa ilabuusli naraꞌa, daa hhutli hhagumoo pahha. 23 Slime, boo⁄imisi urungaa cada gu sahaabu sa curuqukee gu muunaiĩ haa ilanuunuꞌusi urungaa hhakee soomaiĩ cadage gu rawaa gu curuqukeesii. 24 Heeleꞌesaykee gu cada gu sahaabu khiidimaki daqa urungaa hhakeesii gu soomaiĩ gu curuqukee gu muunaiĩ. 25 Cinaanaa hhakee gu cada gu heeleꞌesay gu sahaabu ilanuunuꞌusaki daqa hiikhangaꞌasa cadage gu sahaabu. Teesaaqay, magi ilakufidi haa kaeeri gu kwahhu gu qayriyatee da ilakhupisa muunaiĩ gurugendi naqatloo bara da pandaa. 26 Da hheꞌesi, boo⁄imisi urungaa cada gu sahaabu haa ligii lu⁄uminta soomaiĩ cadage gu biraa, khansu gosii gu waara hari bara da waꞌay gu curuqukee gu muunaiĩ, ilaciyaa haa qayriyatee da muunaiĩ. 27 Kara, boo⁄imisi urungaa wakinay cada gu sahaabu, haa ilanuunuꞌusaki pandaage soomaiĩ gu biraage gu kwahhu gu qayriyateesii da muunainge, daqa hingoo ilii ilagaaside rawaa gu coo⁄ay gu khiringe gu curuqukee, daa hambuhambuudisi naraꞌa. 28 Inay gi khiidinee urungaa gu curuqukee gu muunaiĩ sliimaa haa urungaa gu qayriyatee hari hhagumoo gu qancaru raw pahha. Curuqukee duguma ilakufi rawaa gu coo⁄aykeesii gu khiriĩ, ma may darakha, hingigi mamay haa qayriyatee da muunaiĩ.
29 Qatlay sliimaa, Haruuni gi iliidaye Daqa daa Tlintiꞌisige Hari Khisla, geregedi umaiĩ hhakira gu Waisraeeli muuna gosii rawaa gu curuqukeesii gu muunaiĩ gu kereꞌemisu gimba. Hari amotee, balalu sliimaa Haruuni himaatii slaslaaslay sa Taataa Iliitleemu. 30 Slime, ugu qamidii tle⁄eẽ gu kaari doó eteedine Uriimu haa Tumiimu waꞌay gu curuqukeesii gu muunaiĩ. Balalu sliimaa, qatlay Haruuni gi iliidaye waꞌayge pandaa da Taataa Iliitleemu, tle⁄eẽ hhakee giti geregedi rawaa gu muunaiĩ kosii wanee. Teesaaqay, Haruuni hiidahhasi kereꞌemisu gimba gu Waisraeeli pandaa da Taataa Iliitleemuge.”
Citaa wakinay gu hhapalooay
31 Iliitleemu gi ilafahhi Musaa tuba, “Hirimaamidi jurungii da kalay gu qancaru raw pahha, da daasaraa hari waꞌay gu qayriya daa ilakhupisidi muunaiĩ gurugendi naqatloo. 32 Jurungitee, tla⁄antla⁄a saga cihhide mucu sa hiilu⁄a saga. Daqatee da isa niini⁄idisaka hari dahhamu gu coohhu daa hambahambuudisi, ma maydi feehhida, yondu gu heedi gu khua hhutloo naraꞌa. 33 Qwasa⁄a dosii da biraage, niini⁄ida da bareemoo goõ gu jurungitee, hambuhambuudisi idadu wakinay gu ⁄aamu gu komamanga slaqamisee hari puteeri gu qancanari raw pahha, gu daahhiya haa puteeri gu da⁄adani. Slime, tla⁄antla⁄a gu komamangatee qamidii emberekay daa boo⁄imisi hari sahaabu. 34 Teesaaqay, emberekay haa komamanga daa boo⁄imisi hari sahaabu, hingi sirakomamidi niini⁄ida da qwasa⁄a da jurungiteesii. 35 Haruuni kwanda gi daasiye jurungitee yondu gosii gu hhapalooaisoo. Afoo da emberekaykee daga akhasi, qatlay ina gi iliiday waꞌayge haa gi iliica⁄iye khoorooge Daqa daa Tlintiꞌisigo pandaa da Taataa Iliitleemuge, ma hhanti gwaai.
36 Da hheꞌesi, boo⁄imisi saanii hari sahaabu daa ilabuusli haa handikimi rawaa kosii gimbaki, idoo doó ilii handikine gooay chapaa: hiĩ hanguti tlintiꞌisi sa taataa iliitleemu. 37 Ugu oyii saanitee khiidimaka pandaa da kitambalateesii daa niini⁄idisi saga gosii, hari hhagumoo gu qancaru raw pahha. 38 Da hheꞌesi, qatlay sliimaa Haruuni kwanda gi ilakone daamisu baatiyatee pandaca⁄ay gosii, ma geregedi tlakwarotaꞌa da Waisraeeli, qatlay giyoó ilii hadimisiye idadu goõ gu sadaaka daa tlintiꞌisi daqa Iliitleemuge. Balalu sliimaa saanitee kwanda gi pandaca⁄ayge wante, Taataa Iliitleemu ma ⁄imba sadaaka dooina.
39 Ugu boo⁄imisi sa Haruuni kanchotee hari kitambalaa da ⁄abaakwi poy. Slime, hambuhambuudisi kitambalatee da hiitaaga sagage hari kitambalaa da ⁄abaakwi poy haa coo⁄ay daa tlemi naraꞌa, yondu gu heedi gu khua hambahabuudimisa. 40 Slime, ugu hirimaamidi sa yaꞌay gu Haruuni, kanchachuu, coo⁄aai haa kofiyayuu. Inay digima daareesi haa digima muriidi.
41 Qariqaaqari, Haruuni haa yaꞌay kosi sigi daamiside qayroo hhakee. Slime, maakhaki du⁄iya da miseyituuni sagaiĩ koinay, haa qaasaki yonduge, tlintiꞌisaki, ma sini yondiidiri ana hhapalooee pahha. 42 Slime, inay sigi hirimaamite qayroo gu waꞌay hari kitambalaa da ⁄abaakwi poy sa ilakhupisa da slaqoo koina, tlaatleesa da khiringo, tlanu naqatloo. 43 Haruuni haa yaꞌay kosi kwanda gi daamisiye qayroo hhakee gu waꞌay qatlay gi iliigunee Hemaa da Iliislaslawge, baku gi ilii daadaausiye ilaciyaa haa masabaahu, ma yondiidiri Daqateesii daa Tlintiꞌisige. Hari amotee, inay yondiidiyaaiiba tlakwaroo hari amoo da laqaru slaꞌay gooina, ba⁄atii kaka⁄iyay. Haã ti ilakaawa da ibiida taysa naqatloo daqa Haruunige haa laqwaloo dosi.