Tlintiꞌisa haa maakha du⁄iya Haruuni haa yaꞌay kosi yondu gu hhapalooeege
(Gimba gu Walaawi 8:1-36)
29
1 Qatlay gamaa ilii tlintiꞌiside Haruuni haa yaꞌay kosi gigi maakhaday du⁄iya, ma sini yondiidiri hhapalooee pahha, taqay laqe. Ugu oyii karaamoo gu kahha hii⁄atla haa gondadee cada, daa hiitlupidi gubasli sletu lensee. 2 Kara, la hiiooda gubaraa daa niqisigo gu ganoo doóba iliiqaasa hamiira, boo⁄imisi mukaatee haa mandaasi daa tlada⁄asi hari du⁄iya. Idadu hhanki gonkoinaa digi boo⁄imisiye hari gubaraa gu niqimee gu ganoo. 3 Mukaatetee haa mandaasitee laga qaasida kapuu lenge, ligiraa khayda sliimaa haa karaamokee haa gondadee hhakee gu cada. 4 Slime, Haruuni haa yaꞌay kosi ligiraa khayda afamaraa gu Hemaa da Iliislaslawge, haa gigi hhuncida hari maꞌay. 5 Slime, ugu la hiiooda qayroo hhakira gu hhapalooaisoo ligi daamisida sa Haruuni, kanchotira, jurungitira da qayriyatira daa ilakhupisidi muunaiĩ gurugendi naqatloo haa qayriyatee loi sliimaa haa curuqukira gu muunaiĩ. Sugu khiidinte qayriyatee hari coo⁄aykira, daa hhutli naraꞌa. 6 Kara, ugu sugu khiidinte saga gosii kitambalatira da saga haa suguu qaaside rawaa gu kitambalateesii hhamakira daa tlintiꞌisi gu baatiya da sahaabu. 7 Da hheꞌesi, la hiiooda du⁄iyatira da makhanay da miseyituuni, laga hiituutuquda saga gosii Haruuni. 8 Qatlay, giroo iliikhayde yaꞌay gu Haruuni kaꞌafu gu hemaage, sigi daamiside kanchachuu koina. 9 Slime, ugu qaasi Haruuni haa yaꞌay kosi yondu gooii, sigi khiidindinte coo⁄aai haa sigii lu⁄uminte kofiyayuu koina sagainge. Teesaaqay, hari ilakaawa da ibiida taysa naqatloo, yondu gu hhapalooaisoo ti kooina tleehhidi.Inay ligi ilii qamita dabaiĩ sa yondukee. 10 Awukira luguraa khayda pandaa da Hemaa da Iliislaslawge. Teꞌesii, Haruuni haa yaꞌay kosi hiiqamidiyay dabaiĩ koina rawaa gu saga gu awukeesii. 11 Da hheꞌesi, awukee lugu isa hiiquutliday pandaa da Taataa Iliitleemuge, teꞌesii kaꞌafu gu Hemaa da Iliislaslawge. 12 Ugu la hiiooda ceedee coko⁄u da awukee haa laga maakhada hari dinca doogu khadami gu soomaiĩ gu masabaahuteesii. Ceedee diĩ meti laga tuutuquda masabaahuge, daqa dosi dari biraa. 13 Da hheꞌesi, ugu la hiiooda maslambaariya goõ doó ilaslaaba waqanqatee, daꞌaayee haa gwadiisiyoo, gonkoinaa ligi da⁄ada hari aslaa rawaa gu masabaahuge. 14 Teesaaqay see, fuꞌumay, waqanqatee haa fala da awukee, ligi da⁄a kayda kenga gu kambiige. Haã ti sadaaka da ilamooyiru tlakwaroo tleehhita.
15 Slime, oyii bee⁄imoo leẽ tla⁄aã gu bee⁄ukiray gu cada, Haruuni haa yaꞌay kosi hiiqamidiyee dabaiĩ koina rawaa gu saga gosii. 16 Da hheꞌesi, lugu isa hiiquutliday bee⁄imokee haa la hiiooda ceedee dosi, laga hitimisida bareemoo goõ gu masabaahutee. 17 Bee⁄imokee fuꞌumay kosi ligi qutlita ⁄aaraiĩ haa ⁄aaraiĩ. Kara, ilahhunci waqanqatee kosi sliimaa haa tankeebay, ligi qaasida sliimaa haa ⁄aaraiĩ wakinay haa saga gosi rawaa gu masabaahuge. 18 Da hheꞌesi, fuꞌumay goõ gu bee⁄imokee ligi da⁄ada aslaage teꞌesii rawaa gu masabaahuge. Haã na sadaaka da da⁄araa sa Taataa Iliitleemu. Tafu gu hhou gu sadaakatee hinoó muunaboo⁄eesida ana, Taataa Iliitleemu.
19 Kara, ugu oyii bee⁄imokira gu caduu, Haruuni haa yaꞌay kosi hiiqamidiyee dabaiĩ koina rawaa gu saga gosii. 20 Da hheꞌesi, lugu isa hiiquutlida bee⁄imokee haa la hiiooda ceedee dosi coko⁄u, Haruuni haa yaꞌay kosi ligi maakhada ceedetee cinaanaa gu eaa koinay gu ⁄uyage, dugunimaiĩ gu dabaiĩ koinay gu ⁄uyage haa dugunimaiĩ gu yeꞌeeroo koinay gu ⁄uyage. Ceedee diĩ meti laga hitimisida bareemoo goõ niini⁄ida da masabaahutee. 21 Slime, ugu loo hiiooda ceedee coko⁄o da rawaa gu masabaahuge waara, sliimaa haa du⁄iyatira da makhanay, laga hitimisida daqa Haruunige haa qayroo kosi, haa daqa yaꞌay kosii haa qayroo koina. Hari amotee, ina haa yaꞌay kosi sliimaa haa qayroo koina digimaati tlintiꞌisi daqa dooii.
22 Kara, ugu la hiiooda du⁄iya da bee⁄imokee, cigaraã dosaa, maslambaariya goõ doó ilaslaaba waqanqatee, daꞌaayee haa gwadiisiyoo sliimaa haa tlaana da ⁄uya. Bee⁄imokee ti bee⁄imoo sa tlintiꞌisa hari makhanay du⁄iya hhapalooee daa qaasi sa yondu gu Iliitleemu. 23 Daqa kaputeesaa da kooma mukaatee doóba hiirooga haa hamiira da pandaa dooii waara ana, Taataa Iliitleemu, oyii mukaatee haa mandaasi daa tlada⁄asi hari du⁄iya haa mukaatimoo gu coko⁄u gu coohhu. 24 Idadu hhanki goõ taatahhaki dabaiĩ gu Haruunige haa yaꞌay kosi. Slime, inay gi waratlaysiyee rawaage, maga hadisiri sa Taataa Iliitleemu sadaaka da waratlaysa pahha. 25 Da hheꞌesi, idadu hhakee ligii ooda kara dabaiĩ koinaa, ligi da⁄ada hari aslaa rawaa gu masabaahuge sliimaa haa sadaakatira da da⁄araa hari aslaa. Eehha gosi, ma tafu gu hhou tleehhidi gu muuna boo⁄eesa ana, Taataa Iliitleemu. Hatee ti sadaaka daa hadisi pandaa da Taataa Iliitleemuge hari amoo da aslaa.
26 Kara, ugu la hiiooda kiya da bee⁄imokee gu tlintiꞌisa da Haruuni hari amoo da makhanay du⁄iya, hagagi hadisida sadaaka da waratlaysa pahha rawaage sa ana, Taataa Iliitleemu. Kiyatee toogu tleehhita. 27 Slime, ugu la tlintiꞌisida hari du⁄iya daqeemoo cada gu bee⁄imoo daa hadisi sadaaka sa tlintiꞌisa da hhapalooay Haruuni haa yaꞌay kosi. Daqeemoo hhakee ti kiyatira daa waratlaysi rawaage haa yaaee daa tlintiꞌisi pandaa dooii sa inay ma ⁄aginiri. 28 Teesaaqay, balalu sliimaa Waisraeeli, qatlay gi ilii hadimisiyee sadaaka dooinaa da qasaw sa ana, Taataa Iliitleemu, Iliitleemu gooina, daqeemoo hhakee gu sadaakatee guti Haruuni haa yaꞌay kosi, ma ⁄aginiri.
29 Qatlay Haruuni gimaa iliihhane, qayroo kosi daa tlintiꞌisi gu hhapalooaisoo digimaati taatahhi sa leẽ gu laqwaloo dosi. Ina gimaati daamisi, baloo dugumaa ilii maakhiye du⁄iya haa dugumaa ilii qaasiye sa yondu gu Iliitleemu kilesi. 30 Nanku Haruuni hiĩ gumaa hiiowa daqa da taataa gosi, gi hhapalooay gu didiru tleehhidi, kwanda gimaa daamisiye qayroo hhakee balalu fanqu, gimaa iliidaye waꞌay gu Hemaa da Iliislaslaw, ma yondiidi Daqa daa Tlintiꞌisige Hari Khisla.
31 Musaa, ugu la hiiooda fuꞌumay gu bee⁄imokee gu tlintiꞌisa haa ligii qaasida Daqa daa Tlintiꞌisige. 32 Da hheꞌesi, ligi hadisida sa Haruuni haa yaꞌay kosi, ma ⁄aginiri fuꞌumay gu bee⁄imoo sliimaa haa mukaatee daa meti kapuuge, teꞌesii afamaraa gu Hemaa da Iliislaslawge. 33 Inay kilesi na ⁄aginay fuꞌumay hhakee haa mukaatetee daraa yondiidi sa qaasa dooina yonduge haa sa tlintiꞌisa dooina sa yondukee. Teesaaqay see, heedi lensee ⁄aginaaba fuꞌumay haa mukaatetee, sa gimba dagaati tlintiꞌisi sa ana, Iliitleemu. 34 Bere, fuꞌumiya baku mukaatee lensee meeti heetlawa naqatloo, kwanda gi da⁄ade aslaage. Etaa, digi hhanti ⁄agina, sa gimba digaati tlintiꞌisi.
35 Teesaaqay gana ilii yondita idadu sliimaa sa Haruuni haa yaꞌay kosi, idoo gwaa ilii ilafahhi gooay. Musaa, ugu la hiiooda balalu fanqu, inay ligi qaasidi yonduge. 36 Kila baloo kwanda ga gaaside awu, ma sadaaka da ilamooyiru gu tlakwaroo dooina tleehhidi. Hari amotee ha ilabuuslida masabaahu see, laga maakhada du⁄iya, maga tlintiꞌisidi sa yondu gooi. 37 Teesaaqay laqe balalu sliimaa, masabaahutee da ilagaamisu laga tlintiꞌisida, balalu fanqu ti amoolaa hiifakiyay. Qariqaaqari goo ilii teesaaqay laqade, hagoo asu tlintiꞌisida hari khisla haa kila idoo da nangusa masabaahutee dagati tlintiꞌisi sa Iliitleemu.
Sadaaka da balalu sliimaa
(Faadoo 28:1-8)
38 Inkoo, kila baloo, sadaaka ga hadimiside rawaa gu masabaahuge na nahaã; hadisi ⁄ambeenimaiĩ cada gu koomee kori leẽ. 39 Hari heetlawa isahiiquutli ⁄ambeenimoo leẽ haa hari khwayaiĩ ⁄ambeenimoo gu caduu. 40 Sliimaa haa ⁄ambeenimoo gu pandaa, ugu la hadisida sadaaka kiloo leẽ gu gubaraa gu niqimee gu ganoo. Gubarakee lugu ilagaasida haa liita leẽ da du⁄iya da hhoi da miseyituuni. Slime, sadaaka da kitahhuge, lugu ilagaasida sliimaa haa liita leẽ da difaay. 41 ⁄ambeenimokee gu caduu, slime lugu hadisida sadaaka sliimaa haa sadaaka da baruũ haa sadaaka da kitahhu, idoo gaã ilii laqadi gooay daqa hikiray gu heetlawa. Tafu gu hhou gu sadaakatee doó hadisiye daqa dooii, ana Taataa Iliitleemu, hari amoo da da⁄araa aslaage, hini muunaboo⁄eesida.
42 Balalu sliimaa, ugu haa laqwaloo doogu goõ daa khoca kwanda ga ilakontee hadimisu sadaakati da da⁄araa aslaage, daqa dooii ana, Taataa Iliitleemu, teꞌesii afamaraa gu hiidawaraage Hemaa da Iliislaslawge. Teꞌesii na daqa hangu ilii slaslayne haa unkuray, hagi gimbuusa haa unkuray. 43 Teꞌesii na daqa hangu ilii slaslayne haa Waisraeeli. Kara, ⁄uuru gu wanqamee dooi ⁄isina Hematee da Iliislaslaw dagama tlintiꞌisi. 44 Hematee da Iliislaslaw haa masabaahu, ana hagi ⁄isima ma daqeemoo daa tlintiꞌisi tleehhidiri. Slime, Haruuni haa yaꞌay kosi hagi tlintiꞌisa, ma sini yondiidiri yondu gu hhapalooaisoo. 45 Ana gani ilii ibiida tla⁄aã gu Waisraeelige, ana Iliitleemu gooina tleehhida. 46 Teꞌesii, inay gini iliicaahhiyay tuba, ana na Looimoo gu Goõ, Iliitleemu gooina, gwaa hiica⁄asu inay hhapee da Misirigo, ana ma ibiidi tla⁄aã gooinay. Ana na Taataa Iliitleemu gooina.