Masabaahu da iliieehhimisu ubaanii
30
1 Boo⁄imisi masabaahu hari bangasay gu lawau, ma daqa da iliieehhimisu ubaanii tleehhiti. 2 Masabaahutee konte tlederuũ gu fuuti leẽ haa nusuu, hiitlakhwaruũ kosi fuuti leẽ haa nusuu, qadoo dosi rawaa khuꞌusa konte fuuti tami. Khadami kosi ti idoo leẽ tleehhidiyee haa masabaahutee. 3 Ugu maakhi sahaabu daa ilabuusli daqa da rawaa da masabaahutee, bareemoo kosi goõ gu tluntlubabu haa khadami kosi. Slime, saga boo⁄imiside khansu gu sahaabu gu niini⁄ida bareemoo goõ. 4 Da hheꞌesi, boo⁄imisi urungaa cada gu sahaabu, ligi ilanuunuꞌusida khansukeesii, leẽ sa bara leẽ haa waka sa bara da cadii da masabaahutee, ma ooyiri sangiidimaiĩ guri geregediru masabaahutee. 5 Sangiidimaiĩ hhakee boo⁄imisaki hari bangasay gu lawau, haa maakhaki hari sahaabu. 6 Masabaahutee qaasaka pandaa da pasiyatiray da pandaa da Sandikoo da Ilatlatlawge waara, da pandaa da ilakhupisimoo gu ilamooyiru tlakwaroo gu rawaa gu Sandikoteesii waara. Teꞌesii na daqa hangu iliislaslayne haa ugu.7 Balalu sliimaa, hari heetlawaa Haruuni giyoó ilii dadaye sa ilakhuukhuꞌusa da ooyimisu gu caaꞌasoo da waara teꞌesii, ina hiti ilaeehhimisi ubaanii gu kooma tafu gu hhou hari khisla rawaa gu masabaahuteesii. 8 Kara, ina hari khwayaiĩ hiti ilaeehhimisi ubaanii, qatlay gi iliiooyimisiye caaꞌasoo pandaa da Taataa Iliitleemuge. Balalu sliimaa sadaakati da ilaeehhimisu kwanda daga hadimisiye ha laqwaloo dooguna goõ daa khoca. 9 Masabaahuteesii, etaa hamaa hhanti ilaeehhisida ubaanii waku daaba tlintiꞌisa. Kara, ugu hhanti hadisida sadaaka da da⁄araa aslaage ma sadaaka da baruũ see. Slime, hhantii eesida sadaaka da kitahhu rawaa kosii. 10 Kila kori waa leẽ, Haruuni kwanda gi hadisiye sadaaka da ilagaamisu rawaa gu khadami gu masabaahuteesii sa ilabuusla dosi. Ilagaamisuki giyoóti yondiidi hari sadaaka da ilamooyiru tlakwaroo da laqwaloo dooina goõ daa khoca. Daqatee da masabaahu dagaati tlintiꞌisi hari khisla daqa dooii, Taataa Iliitleemu.”
Feesa baku sahaabu sa Daqa daa Tlintiꞌisi
11 Taataa Iliitleemu gi kaay sa Musaa tuba, 12 “Qatlay ga iliifate Waisraeeli, kila heedi, ina loi buiye idoo da ilaki⁄isa sa ibinaa dosi daqa dooii ana, Taataa Iliitleemu. Teesaaqay laqa, dama may hiica⁄a sagadahha tla⁄aã gooinay qatlay gu faadoo dooinay. 13 Kila heedi da faadiye kwanda gi buiye daqa dooii ilakhua da giraamu lahhoꞌo gu feesa baku sahaabu ilakhua da giraamu kooani haa nusuu sa Daqa daa Tlintiꞌisi. Haã na sadaaka dosi gi hadisiye sa ana, Taataa Iliitleemu. 14 Kila heedi da faadiye gu kooma koraraa mibeeri cada baku hiicata da koraraa hhakee, kwanda sini hadimisiye sadaakatee ana, Taataa Iliitleemu. 15 Hindaqeeri hhanti hadimisiyay sadaaka hiicata da sadaaka daa ilakhui, ma kwaeeli see hhanti hadimisiyay biraa gu nusuu gu ilakhuatee giraamu lahhoꞌo gu feesa baku sahaabu, qatlay ga iliihadimisidee sadaakatee da Taataa Iliitleemu sa ilagaamisu gu ibinaa dooguna daqa dooii ana, Taataa Iliitleemuge. 16 Ugu la ooda feesatee da ilagaamisu dabaiĩ gu Waisraeeligo, haa luguri yonditay yondu gu Hematee da Iliislaslaw. Kara, feesatee ti sa hiislawaraa dooina Waisraeeli pandaa da Taataa Iliitleemuge sa ilagaasa da ibinaa dooguna.”
Beseeni da ⁄aray dari hhuncidaa
17 Taataa Iliitleemu gi kaay sa Musaa tuba, 18 “Boo⁄imisi beseeni dari hhuncidaa hari ⁄aray da kooma kitiĩ gu ⁄aray. Beseenitee laga qaasida tla⁄antla⁄a gu Hemaa da Iliislaslawge haa masabaahu, haa eesii maꞌay waꞌay kosii. 19 Haruuni haa yaꞌay kosi, maꞌay hhakee giri hhunciyay yeꞌeeroo koina haa dabaiĩ koina. 20 Qatlay inay giyoó ilii hiigunee Hemaa da Iliislaslawge, kwanda hingi hhunciyee hari maꞌay, ma hhanti kaka⁄iri. Slime, qatlay giyoó iliisatiyee masabaahu, ma sini hadisiri ana, Taataa Iliitleemu sadaaka doó da⁄iye hari aslaa, 21 inay kwanda gi hhunciyee dabaiĩ haa yeꞌeeroo koina, ma mayri kaka⁄u. Balalu sliimaa, Haruuni haa laqwaloo dosi haa laqwaloo haa laqwaloo goõ daa khoca, hiĩ na ou gooina tleehhidi.”
Du⁄iya da makhanay
22 Da hheꞌesi, Taataa Iliitleemu gi kaay sa Musaa tuba, 23 “Ugu oyii idadu hhanki gu hhoi hari khisla; manemaanea da maꞌay kiloo lahhoꞌo, mudalasiini gu kooma tafu gu hhou kiloo tami haa hhacinuu gu tafu hhou kiloo tami. 24 Slime oyii du⁄iya da miseyituuni liita cigahha haa mudalasiini waku kiloo lahhoꞌo. Piimaaee hhakee goõ digiti piimine da iliiwane gooay piimaaee gu hematee daa tlintiꞌisi. 25 Hari idadu hhakee, boo⁄imisi du⁄iya daa tlintiꞌisi, roogakay naraꞌa heedikaꞌa pahha gu khua boo⁄imisu du⁄iya da kooma tafu gu hhou hari khisla. Hatee na du⁄iya daa tlintiꞌisi tleehhita da kooma ⁄uuru gu Iliitleemu. 26 Da hheꞌesi, du⁄iyatee lagari maakhada Hematee da Iliislaslaw, Sandikoo da Ilatlatlaw, 27 meesaa haa khooslay gosi goõ, kalagaa da caaꞌasoo haa khooslay gosi goõ, masabaahu da iliieehhimisu ubaanii, 28 masabaahu da iliidaada⁄aru sadaaka aslaage haa khooslay gosi goõ, beseeni haa kitiĩ gosi. 29 Khooslaykee goõ lugu tlintiꞌisida sumuku sa Iliitleemu. Idoo da nangusa khooslaykee dagati tlintiꞌisi sa Iliitleemu.
Du⁄iya haa ubaanii
30 Slime, ugu la maakhada du⁄iya Haruuni haa yaꞌay kosi, haa ligi tlintiꞌisida, ma sini yondiidiri ana yondu gu hhapalooaisoo.
31 Ugu la kaada sa Waisraeeli ubee, ‘Haã ti du⁄iya doy tleehhita daa tlintiꞌisi da kooma ⁄uuru gu Iliitleemu daqa laqwaloo doogunay goõ daa khoca. 32 Du⁄iyati haga hhanti hiituutuquda slaqwa da heedi lenseege, haa hhanti boo⁄imisida du⁄iya lensee hari idadu hhanki. Haã ti du⁄iya daa tlintiꞌisi haa kwanda ga antee dagaa tlintiꞌisi.
33 Heedi gu boo⁄imisa du⁄iya da hatee gooay, baku gi maakhi du⁄iyatee heedi waku hiĩ gu hhapalooay gooba, heedikee kwanda dugu paslisiye daqa hida kosaa, Waisraeeli.’ ” 34 Taataa Iliitleemu gi kara kaay sa Musaa tuba, “Ugu oyii piimoo gu kooma ilakhua leẽ da idadu hhanki gooay gu koomee tafu gu hhou; ongonoo doó oine na nataafi, sekeleeti haa kelibeena, sliimaa haa ubaanii gu hhou. 35 Ugu la ilafahhada heedi gu khua boo⁄imisu ubaanii gu kooma tafu gu hhou hari idadu hhakee. Lugu cakhasida, ma ubaanii gu hhou tleehhidi haa daa tlintiꞌisi. 36 Ubaanii waku lugu saadinta, ma gubaraa gu niqimee tleehhidi, qaasaku pandaa da sandikoo da ilatlatlawge, ma duguri yondiidi Hemaa da Iliislaslawge, daqa hangu ilii slaslawe haa ugu. Hikee na ubaanii daa tlintiꞌisi hari khisla tleehhidiye daqadoogunay. 37 Etaa, hhanti boo⁄imisida ubaanii waku lensee hari idadu hhanki sa yondu googuna unkuray kilakokuna, sa gimba ubaanikee duguti tlintiꞌisi pandaa dooii, ana Taataa Iliitleemu. 38 Heedi gu boo⁄imisa ubaanii da hikee gooay, girigi yondiidi ubee, du⁄iya dosi pahha da kooma tafu gu hhou, kwanda dugu paslisiye daqa hida kosaa, Waisraeeli.”