Boo⁄imisu gu Sandikoo da Ila⁄imbidu
37
1 Da hheꞌesi, Besaleeli gi boo⁄imisi sandikoo hari bangasay gu khaimoo gu lawau, tlederuũ kosi fuuti tami haa inchi gweleti, hiitlakhwaruũ kosi fuuti cada haa inchi tami, slime tlederuũ kosi rawaa khuꞌusa ti fuuti cada haa inchi tami. 2 Ina gigi maakhi sandikotee hari sahaabu daa ilabuusli, hari waꞌay haa hari khooroo see. Slime, sagagi boo⁄imisi khansu gu sahaabu gu niini⁄ida bareemoo goõ. 3 Ina gi boo⁄imisi urungaa cigahha gu sahaabu haa gigi khiidiidimi yeꞌeeroo kosii cigahhage, urungaa cada hari bara leẽ haa cada hari bara da cadii. 4 Kara gi boo⁄imisi sangiidimaiĩ gu khaimoo gu lawau haa gigi maakhi hari sahaabu. 5 Ina gii lu⁄umi sangiidimaiĩ hhakee urungaa hhakeesii gu sahaabu gu waaree hari bareemoo cada gu sandikotee sari geregediru sandikotee. 6 Da hheꞌesi, gi boo⁄imisi ilakhupisimoo gu ilamooyiru tlakwaroo, hari sahaabu daa ilabuusli, tlederuũ kosi fuuti tami haa inchi gweleti, hiitlakhwaruũ kosi fuuti cada haa inchi tami. 7 Da hheꞌesi, ina gi boo⁄imisi sanaamamuu cada gu makeruubi gu koomee hhababeeraa hari sahaabu daa sapi, gigi qaasi kengaiĩ cadage gu ilakhupisimokeesii gu ilamooyiru tlakwaroo. 8 Ina gi qaasi keruubi leẽ hari khansuki kara keruubi gu caduu hari khansu gu caduu gu ilakhupisimokee gu ilamooyiru tlakwaroo, gigi idoo leẽ tleehhidisi haa ilakhupisimokee soomaiĩ cadage. 9 Makeruubitee gii tlaaꞌasiri hhababee koina rawaage, haa gi ilakhupisiri ilakhupisimokee gu ilamooyiru tlakwaroo hari hhababeeraa koina. Pandadu koina hingigi iliifookimidiri haa gi khuꞌuniri ilakhupisimokee.Boo⁄imisu gu Meesaa da mukaatee da sadaaka
10 Slime, gi boo⁄imisi meesaa hari bangasay gu khaimoo gu lawau, tlederuũ kosi fuuti tami, hiitlakhwaruũ kosi fuuti leẽ haa inchi lahhoꞌo, qadoo dosi rawaa khuꞌusa fuuti cada haa inchi tami. 11 Meesatee gigi maakhi hari sahaabu daa ilabuusli haa gigi iliiqaasi khansu gu sahaabu gi niini⁄idi bareemoo goõ. 12 Slime gi boo⁄imisi bangasiya da coohhi da kooma hiitlakhwaruũ gu ilakhua da inchi tami haa sagagi boo⁄imisi khansaiĩ daa tlemi hari sahaabu ninii⁄ida da bareemoo goõ gu meesaa. 13 Ina gi boo⁄imisi urungaa cigahha gu sahaabu sa meesatee, gigi ilanuunuꞌusiri urungaa hhakee soomaiĩ kosii cigahhage, leẽ daqa kila yaaee lenge. 14 Urungaa hhakee yaa ilaciyaa wanay haa bangasiyatira da coohhi, ma daqa tleehhidiri da iliilu⁄umiru sangiidimaiĩ guri geregediru meesa. 15 Ina gi boo⁄imisi sangiidimaiĩ hhakee hari khaimoo gu lawau haa gigi maakhi sahaabu, sari geregediru meesa. 16 Ina gi boo⁄imisi hari sahaabu daa ilabuusli khooslay gu qaasaraa rawaa gu meesaage. Khooslaykee ti saananuu, ⁄atisaaee, lagabaaee, qulu⁄umbaaee haa dehheeri sa iliiesidu sadaaka da kitahhu.
Boo⁄imisu gu kalagaa da caaꞌasoo
17 Da hheꞌesi, gi boo⁄imisi kalagaa hari sahaabu daa ilabuusli, sa iliiqamidu caaꞌasoo. Kalagatee gigi boo⁄imisi gonkosaa hari pencerehhemiya leẽ da sahaabutee, sira dosi haa khaimoo gosi gi idoo leẽ tleehhidiri, qulu⁄umbaaee kosi, kukeenoo kosi haa humbalaalay gosi. 18 Elemu lahhoꞌo yaagii caca⁄iri tluntlubabu gu kalagateesaa, elemu tami hari bara leẽ, kara elemu tami hari bara da cadii. 19 Daqa kila eleemage, daa boo⁄imisi qulu⁄umbaaee tami gu humbalaalay gu khaimoo waku slanqasa, doó eteedine muloosi. 20 Rawaa gu kalagateesii yaa wanay qulu⁄umbaaee cigahha gu humbalaalay gu khaimoo gu muloosi slaqamisee, sliimaa haa kukeenoo kosi haa humbalaalay gosi. 21 Kila daqa daa iliiwane ilagaasa da elemu cada kalagateesii daa wana kukuniya leẽ, kukuniya da cada ilagaasa da cadage da elemu gu cada, kukuniya da tami ilagaasa da tamige da elemu gu tami. 22 Kukeenoo hhakee haa elemu kosi goõ, yaati idoo leẽ tleehhidiri daqa kalagateesii da iliiqamidu caaꞌasoo, gonkoinaa digaati sapi sahaabu daa ilabuusligo.
23 Ina gi boo⁄imisi caaꞌasoo fanqu, mukaasaaee gurii segidu puteeri haa saananuu kosi, hari sahaabu daa ilabuusli. 24 Ina gi boo⁄imisi kalagatee da caaꞌasoo haa khooslay gosi goõ, hari kiloo mibeeri tami haa kooani gu sahaabu daa ilabuusli.
Boo⁄imisu gu masabaahu da ilii ilaeehhimisu ubaanii
25 Da hheꞌesi, gi boo⁄imisi masabaahu hari bangasay gu lawau, ma daqa da iliieehhimisu ubaanii tleehhiti. Masabaahutee yaa konta tlederuũ gu fuuti leẽ haa nusuu, hiitlakhwaruũ kosi fuuti leẽ haa nusuu, qadoo dosi rawaa khuꞌusa yaa fuuti tami. Khadami kosi yaati idoo leẽ tleehhidiri haa masabaahutee. 26 Ina gi ilakhupisi hari sahaabu daa ilabuusli masabaahutee, bareemoo kosi goõ gu tluntlubabu, sliimaa haa khadami hhakira gigi maakhi hari sahaabu daa ilabuusli. Slime, sagagi boo⁄imisi khansu gu sahaabu gwaa niini⁄idu bareemoo kosi goõ. 27 Da hheꞌesi, gi boo⁄imisi urungaa cada gu sahaabu, gigi ilanuunuꞌusi biraa gu khansukeesii, leẽ sa bara leẽ haa waka sa bara da cadii da masabaahutee, ma ooyiri sangiidimaiĩ guri geregediru masabaahutee. 28 Da hheꞌesi gi boo⁄imisiri sangiidimaiĩ hhakee hari bangasay gu lawau haa gigi maakhi hari sahaabu.
Boo⁄imisu gu du⁄iya da makhanay haa ubaanii
29 Slime, gi boo⁄imisiri du⁄iya daa tlintiꞌisi sari makhanay haa ubaanii gu kooma tafu gu hhou hari khisla, yondu gu heedi gu khua boo⁄imisu du⁄iya da tafu hhoi.