Boo⁄imisu gu Masabaahu da ilii daada⁄aru sadaaka
38
1 Da hheꞌesi, Besaleeli gi boo⁄imisi hari bangasay gu khaimoo gu lawau masabaahu da iliidaada⁄aru sadaaka, tlederuũ kosi ti fuuti fanqu haa nusuu, hiitlakhwaruũ kosi fuuti fanqu haa nusuu, qadoo dosi rawaa khuꞌusa fuuti cigahha haa nusuu. 2 Gi boo⁄imisi khadami cigahha hari sahaabu sa soomaiĩ cigahha gu masabaahutee, kila khadaã gugi ilanuunuꞌusi sooma lenge gu masabaahutee, khadami hhakee haa masabaahu gi idoo leẽ tleehhidiri. Da hheꞌesi, masabaahutee gigi maakhi hari ⁄aray. 3 Slime gi boo⁄imisi khooslay goõ gu masabaahutee hari ⁄aray. Khooslaykee ti ⁄alalee guri babaciru ⁄ura, beleesaaee, lagabaaee guri hitimisu, waaloo da sikhimi dari waaliiliru fuꞌumay haa idadu guri gatlinay aslaa. 4 Kara, gi boo⁄imisi baakuu hari ⁄aray sa masabaahutee, gigii lu⁄i hari biraa gu khansu gu masabaahu, gi daadi tla⁄aã gu masabaahuteesii. 5 Kara, gi boo⁄imisi peetatuu cigahha gu ⁄aray, sa oowaraa da sangiidimaiĩ hhakee, gu soomaiĩ cigahha gu baakutee. 6 Slime gi boo⁄imisi sangidimaiĩ hari khaimoo gu lawau, haa gigi maakhi hari ⁄aray. 7 Ina gii lu⁄umi sangidimaiĩ hhakee urungaa hhakeesii gu tluntlubabu gu masabaahuge waaree, sari geregediru gosi. Masabaahutee daa boo⁄imisi hari bangasay, yaa konta qurumbu waꞌay kosii.Boo⁄imisu gu Beseeni da ilii hhuncidaa
8 Da hheꞌesi, gi boo⁄imisi beseeni diitlaakhwi da ⁄aray, kitiĩ gosi see gu ⁄aray. Beseenitee dagaati boo⁄imisi hari kiyayuu gu ⁄aray daa hadisi ha tigay gwaa yondimaamidee afamaraa gu Hemaa da Iliislaslawge.
Efeenaa da Hemaa daa Tlintiꞌisi
9 Da hheꞌesi, gi boo⁄imisi efeenaa. Hari bara da wayee gu efeenatee yaa wanay pasiyayuu daa hhutli hari kitambalaluu gu ⁄abakwi poy. Pasiyayuu hhakee yaa konay tlederuũ gu fuuti miyaa leẽ haa mibeeri kooani. 10 Pasiyayuu hhakee digaati ooyi rawaage ha unguruꞌu mibeeri cada haa caqalaqaatisimaiĩ mibeeri cada, daa boo⁄imisi hari ⁄aray. Slime, qolondaaee gu unguruꞌukee haa batlinqisay haa horongonay daa boo⁄imisi hari feesa yaa wanay rawaa gu unguruꞌukeesii. 11 Hari bara da goraa tlederuũ gu pasiyaa yaa fuuti miyaa leẽ haa mibeeri kooani, haa unguruꞌu gosi mibeeri cada haa caqalaqaatisimaiĩ koina mibeeri cada daa boo⁄imisi hari ⁄aray. Inkoo, qolondaaee haa horongonay daa boo⁄imisi hari feesa yaa wanay rawaa gu unguruꞌukeesii.
12 Bara da ilacindoo gu biraa gu efeenatee, yaa konta pasiyayuu gwaa koomee tlederuũ gu fuuti mibeeri lahhoꞌo haa lahhoꞌo. Slime yaa konta qolondaaee haa horongonay gu unguruꞌu gosi mibi, caqalaqaatisimaiĩ kosi mibi, daa boo⁄imisi hari feesa. 13 Hari bara da ilacindoo gu rawaa, doó iliibiifiꞌisiye letu, efeenatee yaa konta hiitlakhwaruũ gu fuuti mibeeri lahhoꞌo haa lahhoꞌo. 14 Pasiyayuu yaa wanay hari bara leẽ da kaꞌafu, yaa konay tlederuũ gu fuuti mibeeri cada haa cada haa nusuu. Unguruꞌu gu pasiyayuu hhakee yaa wanay tami haa caqalaqaatisimaiĩ kosi tami. 15 Slime hari bara da cadii da kaꞌafukee gu efeenaa yaa wanay pasiyayuu gwaa koomee tlederuũ gu fuuti mibeeri cada haa cada haa nusuu, sliimaa haa unguruꞌu gosi tami haa caqalaqaatisimaiĩ koina tami. 16 Pasiyayuu goõ gwaa niini⁄idee efeenaa gwaati qayru gu ⁄abaaku poy daa hhutli naraꞌa. 17 Caqalaqaatisimaiĩ goõ gu unguruꞌu gwaati ⁄aray, qolondaaee gu unguruꞌukee haa batlinqisay koina gwaati feesa, cinaanaa gu unguruꞌukee gwaati feesa, unguruꞌu goõ gu efeenatee dugwaati ilanuunuꞌusi hari horongonay gu feesa.
18 Pasiyaa da kaꞌafu gurii dawa efeenaage, dagaati boo⁄imisi hari puteeri gu kalay gu qancaru raw pahha, gu daahhiya, gu daa⁄adu haa kalay gu ⁄abaaku poy daa hhutli haa dagagi hambuhambuudisi naraꞌa, yondu gu heedi gu khua hambuhambuudimisu. Slime, pasiyatee yaa konta tlederuũ gu fuuti mibeeri tami, tlederuũ gu rawaa khuꞌusa yaa fuuti fanqu haa nusuu, hingaati afiiqoniri haa pasiyayuu goõ. 19 Slime yaa wanay unguruꞌu gosi cigahha haa caqalaqaatisimaiĩ cigahha, goõ digaati boo⁄imisi hari ⁄aray. Qolondaaee kosi haa horongonay gosi goõ gwaa feesa, cinaanaa koina digaati ilacuuyi hari feesa. 20 Kara, kikau goõ gu Daqa daa Tlintiꞌisi haa kikau gu pasiyayuu gu efeenaa gwaa niini⁄idee bareemoo goõ gwaa ⁄aray.
Idadu daraa boo⁄imisi Daqa daa Tlintiꞌisi haa hemaa dosi
21 Haã na faadoo da khooslay daraa tleehhi Daqa daa Tlintiꞌisi, Daqatee daa Tlintiꞌisi da ilatlatlaw. Faadoti ha Walaawi nagaa ilakhuukhuꞌusiri, hari ilakaawa da Musaa, hari wariiqadida da Itihhamaari nanku hhapalooay Haruuni. 22 Besaleeli nanku Uurii, okookoo gu Huurii, gu kabiraa da Yuuda, ina gi yondiidi gimba goõ, Taataa Iliitleemu giyaa ilakaay sa Musaa. 23 Yondukii, Besaleeli dugwaa iliiaꞌaaꞌay ha Oholiyaabu nanku Ahisamaaki, gu kabiraa da Daani. Ina yaa heedi gu khua hambuhambuudimisu, boo⁄imisu gu khongaairu haa tlemidu hari puteeri gu kalay gu qancaru raw pahha, gu daahhiya, gu daa⁄adu haa gu ⁄abaakwi poy daa hhutli naraꞌa. 24 Sahaabu goõ giyaa hadisiri sadaaka da waratlaysa sa Taataa Iliitleemu, sari tlehhinay gu Daqa daa Tlintiꞌisi, hiiloaruũ kosi yaa kiloo miyaa dagati, mibeeri fanqu haa fanqu haa giraamu miyaa tami, hari ilakhua da piimoo gu Daqa daa Tlintiꞌisi.
25 Feesa daa slagwi ha hida gu marimariya daa faadi, hiiloaruũ kosi yaa kiloo elefu tami haa mibi haa fanqu, haa giraamu miyaa fanqu haa mibeeri kooani hari ilakhua da piimoo gu Daqa daa Tlintiꞌisi. 26 Kila heedi daa faadi gwaa kooma koraraa mibeeri cada haa leẽ, yaa hadisi slagumu gosi giraamu kooani gu feesa sa yondu gu Daqa daa Tlintiꞌisi. Hhawatee goõ daa faadi yaa 603,550. 27 Kiloo elefu tami gu feesa duguraa boo⁄imisi caqalaqaatisimaiĩ miyaa leẽ gu Daqa daa Tlintiꞌisi haa sa pasiyaa dosi. Kila caqalaqaatisimoo leẽ dugwaa boo⁄imisi hari kiloo mibeeri tami gu feesa. 28 Kilookira gu mibi haa fanqu haa giraamu mibeeri fanqu haa kooani gwaa meetu, dugurigi boo⁄imisi urangaa guri khiidiidiru unguruꞌu, makhanay sagaiĩ gu unguruꞌu haa boo⁄imisu gu qolondaaee kosi.
29 Slagumu goõ gu ⁄aray daa slay daqa sadaaka da waratlaysa sa Taataa Iliitleemu, yaa kiloo elefu cada haa miyaa leẽ haa mibeeri cada haa cigahha. 30 Besaleeli gi boo⁄imisi hari ⁄arayikee caqalaqaatisimaiĩ gu afamaraa gu Hemaa da Iliislaslaw, masabaahu da ⁄aray sliimaa haa baakuu dosi da ⁄aray, haa khooslay goõ gu masabaahu. 31 Caqalaqaatisimaiĩ gu efeenaa niini⁄ida da bareemoo goõ, caqalaqaatisimaiĩ gu kaꞌafu gu efeenaa, kikau goõ gu Daqatee daa Tlintiꞌisi haa kikau goõ gu efeenaa, gwaa niini⁄idee bareemoo goõ.