Boo⁄imisu gu Qayroo sa hhapalooay
39
1 Da hheꞌesi, hari puteeri gu kalay gu qancaru raw pahha, gu daahhiya haa gu daa⁄adu gi boo⁄imisi qayroo daa hambahambuudisi naraꞌa sari yondu Daqa daa Tlintiꞌisige. Slime gi hirimaamidi sa Haruuni qayroo daa tlintiꞌisi, Taataa Iliitleemu gooay giyaa ilii ilakaay Musaa.2 Inay gi boo⁄imisiri qayriya daa ilakhupisidi muunaiĩ gurugendi naqatloo, hari puteeri gu kalay gu sahaabu, gu qancaru raw pahha, gu daahhiya, gu daa⁄adu haa gu qayru gu ⁄abaaku poy daa hhutli. 3 Gi sapiri hari nondoo pencerehhemay gu cohhu gu sahaabu haa gigi boo⁄imisiri puteeri gu cohhi pahha, magi hhutliri sliimaa haa puteeri hhakee gu kalay gu qancaru raw pahha, gu daahhiya, gu daa⁄adu haa gu ⁄abaaku poy, yondu gu heedi goó hambuhambuudisa hari khisla. 4 Qayriyatee da muunaiĩ sagaati boo⁄imisiri hhagumeerii cada, daa hirimaamidi soomaiĩ kosii gu cadage, guri khiidiru kwahhuge. 5 Coo⁄ay gu khiriĩ daa hambahambudisi naraꞌa yaati idoo leẽ haa qayriyatee da muunaiĩ. Slime coo⁄aykee gwaati boo⁄imisiri hari puteeri gu kalay gu sahaabu, gu qancaru raw pahha, gu daahhiya, gu daa⁄adu haa gu ⁄abaaku poy daa hhutli naraꞌa, idoo Taataa Iliitleemu gooay giyaa ilii ilakaay Musaa.
6 Da hheꞌesi, gi boo⁄imisiri tle⁄eẽ gu kaari doó eteedine na sohaamu haa gigii lu⁄uminiri hiikhangaꞌasa da sahaabuge. Tle⁄eẽ hhakee digaa khorongimi capaa pahha, digaa ilii handikimi umaiĩ mibi haa cada gu Waisraeeli. 7 Da hheꞌesi, tle⁄eẽ hhakee gu cada gigi ilakhiidi hhagumeerii hhakeesii gu kwahhuge gu qayriyatiray daa ilakhupisidi muunaiĩ, ma tle⁄eẽ gu hiislaslaw tleehhidiri sa Waisraeeli, idoo Taataa Iliitleemu gooay giyaa ilii ilakaay Musaa.
Boo⁄imisu gu Curuqu gu Muunaiĩ
8 Inay gi boo⁄imisiri curuqu gu muunaiĩ, yondu gu heedi goó hambuhambuudisa hari khisla qayriyatira da muunaiĩ, hari puteeri gu kalay gu sahaabu, gu qancaru raw pahha, gu daahhiya, gu daa⁄adu haa puteeri gu ⁄abakwi poy daa hhutli naraꞌa. 9 Curuqukee yaa kona bareemoo cigahha, tlederuũ kosi inchi gweleti, hiitlakhwaruũ kosi inchi gweleti, kara dugwaati qwasa⁄i waa cada. 10 Curuqukee gwaati tlemi hari slaahhadisa cigahha da tle⁄eẽ gu kaari. Slaahhadisa da pandaa yaa konta tle⁄eẽ doó eteedine akiiki, yakuuti da qalamaasiya, topaasi haa alimaasi da daa⁄adi. 11 Slaahhadisa da cada yaa konta tle⁄eẽ doó eteedine sumariidi, yakuuti samaawi haa alimaasi. 12 Slaahhadisa da tami yaa konta tle⁄eẽ doó eteedine yakinto, akiiki da daa⁄adi haa ametiisito. 13 Slaahhadisa da cigahha yaa konta tle⁄eẽ doó eteedine kirisoliito, sohaamu haa yaasipi. Tle⁄eẽ hhakee goõ gu kaari giyaatii lu⁄uminiri hiikhangaꞌasa da sahaabuge. 14 Inkoo, tle⁄eẽ hhanki mibi haa cada ti sa umaiĩ gu yaꞌay gu Israeeli, hhaã gu mibi haa cada gu kabiraa mibi haa cada da Israeeli. Kila tlaa⁄u gwaati iliislangaainiri capaa pahha, kona uma leẽ gu kabiraa mibi haa cada da Israeeli.
15 Inay gi boo⁄imisiri sa curuqukee gu muunaiĩ, heeleꞌesay gu sahaabu daa ilabuusli naraꞌa, daa hhutli hhagumoo pahha. 16 Slime gi boo⁄imisiri hiikhangaꞌasa cada haa urungaa cada gu sahaabu, haa gigi ilanuunuꞌusiri urungaa hhakee soomaiĩ cadage gu rawaa gu curuqukeesii. 17 Heeleꞌesaykee gu cada gu sahaabu gigi khiidiniri daqa urungaa hhakeesii gu soomaiĩ gu curuqukee gu muunaiĩ. 18 Cinaanaa hhakira wakinay cada gu heeleꞌesay gigi ilanuunuꞌusiri daqa hiikhangaꞌasa cadage gu sahaabu. Teesaaqay, gigi ilakufiri haa sukumi hhakira cada gu kwahhu gu qayriyatira da ilakhupisa muunaiĩ gurugendi naqatloo dari bara da pandaa. 19 Da hheꞌesi, gi boo⁄imisiri urungaa cada gu sahaabu, gigii lu⁄uminiri soomaiĩ cadage gu biraa gu curuqukee gu muunaiĩ, khansu gosii gu waara hari bara da waꞌay gu qayriyatee da muunaiĩ. 20 Kara, gi boo⁄imisiri urungaa wakinay cada gu sahaabu, haa gigi ilanuunuꞌusiri soomaiĩ gu biraage gu kwahhu gu qayriyateesii da muunainge, daqa hingoo ilii ilagaaside rawaa gu coo⁄ay gu khiringe gu curuqukee, daa hambuhambuudisi naraꞌa. 21 Inay gi khiidiniri urungaa gu curuqukee gu muunaiĩ sliimaa haa urungaa gu qayriyatee hari hhagumoo gu qancaru raw pahha. Curuqukee duguma ilakufi rawaa gu coo⁄aykee gu khiriĩ, ma may darakha, hingigi mamay haa qayriyatee da muunaiĩ, idoo Taataa Iliitleemu gooay giyaa ilii ilakaay Musaa.
Boo⁄imisu gu Qayroo wakinay gu hhapalooaisoo
22 Da hheꞌesi, ina gi hirimaamidi jurungii da kalay gu qancaru raw pahha, da daasaraa hari waꞌay gu qayriya daa ilakhupisidi muunaiĩ gurugendi naqatloo, yondu gu heedi gu khua hhutloo naraꞌa. 23 Jurungitee, tla⁄antla⁄a sagaa cihhi mucu sa hiilu⁄a saga. Daqatee da isa dagaa niini⁄idisi hari dahhamu gu coohhu daa hambahambuudisi, ma maydi feehhida. 24 Qwasa⁄a dosii da biraage, niini⁄ida da bareemoo goõ gu jurungitee, yaa hambahambuudisiri idadu wakinay gu ⁄aamu gu komamanga slaqamisee hari puteeri gu qancanari raw pahha, gu daahhiya, gu da⁄adani haa gu ⁄abakwi poy daa hhutli. 25 Da hheꞌesi, gi boo⁄imisiri emberekay gu sahaabu daa ilabuusli, haa gigii kufiminiri niini⁄ida da qwasa⁄a da jurungitee, tla⁄eeri gu makomamangage. 26 Teesaaqay, emberekay haa komamanga hingaati sirakomamidi niini⁄ida da qwasa⁄a da jurungiteesii. Haruuni kwanda gi daasiye jurungitee yondu gosii gu hhapalooaisoo, idoo Taataa Iliitleemu gooay giyaa ilii ilakaay Musaa.
27 Slime inay gi boo⁄imisiri sa Haruuni haa yaꞌay kosi, kanchachuu gu digidakwi hari qayru gu ⁄abaaku poy, 28 kitambalaa da ⁄abaakwi poy da khiidiru sagage, kofiyayuu gu ⁄abakwi poy, haa qayroo gu waꞌay gu ⁄abakwi poy daa hhutli naraꞌa. 29 Kara gi boo⁄imisiri coo⁄aai gu qayru gu ⁄abaaku poy daa tlemi, hari kalay gu qancaru raw pahha, gu daahhiya haa gu daa⁄adu haa digigi hambuhambuudisi hhoinay, yondu gu heedi gu khua hambuhabuudisa, idoo Taataa Iliitleemu gooay giyaa ilii ilakaay Musaa.
30 Da hheꞌesi, inay gi boo⁄imisiri saanii hari sahaabu daa ilabuusli sa hhamaa daa tlintiꞌisi, haa gi handikiniri rawaa kosii handikati, idoo doó ilii handikine gooay chapaa: hiĩ hanguti tlintiꞌisi sa taataa iliitleemu. 31 Da hheꞌesi, inay gii qaasiri saanii da kalay gu qancaru raw pahha, ma daga khiidimi kitambalateesii daa niini⁄idisi saga gosii hari bara da rawaa, idoo Taataa Iliitleemu gooay giyaa ilii ilakaay Musaa.
Hiigaasa da yondu gu Daqa daa Tlintiꞌisi
32 Teesaaqay, yondu goõ gu Daqa daa Tlintiꞌisi da Hemaa da Iliislaslaw gi buꞌudi. Waisraeeli gi yondiidiri kila idoo naraꞌa, idoo Taataa Iliitleemu gooay giyaa ilii ilakaay Musaa. 33 Da hheꞌesi, hiraagi khayri daqa Musaage, Daqa daa tlintiꞌisi sliimaa haa khooslay gosi goõ, batlinqisay kosi, bangasay gosi, gompaai kosi, unguruꞌu gosi haa caqalaqaatisimaiĩ koina, 34 ilakhupisimoo daa boo⁄imisi hari faloo gu gondadee daa maakhi hari kalay gu daa⁄adu, ilakhupisimoo gu naaꞌaru gu faloo gu bee⁄u, pasiyaa da Daqa daa Tlintiꞌisi, 35 Sandikoo da Ilatlatlaw sliimaa haa sangiidimaiĩ kosi haa ilakhupisimoo gu ilamooyiru tlakwaroo, 36 meesaa sliimaa haa khooslay gosi goõ haa mukaatee daa tlintiꞌisi sa Iliitleemu, 37 kalagaa da iliiqamidu caaꞌasoo daa boo⁄imisi hari sahaabu da hhoi, slaahhadisa dosi da caaꞌasoo sliimaa haa khooslay gosi goõ, haa du⁄iya sa ooyimisu gu caaꞌasoo, 38 masabaahu da sahaabu, du⁄iya da makhanay, ubaanii gu kooma tafu gu hhou, haa pasiyaa da afamaraa gu Daqa daa Tlintiꞌisige, 39 masabaahu da ⁄aray sliimaa haa baakuu da ⁄aray, unguruꞌu gosi haa khooslay gosi goõ, beseeni haa kitiĩ gosi, 40 pasiyayuu gu efeenaa, unguruꞌu haa caqalaqaatisimaiĩ koina, pasiyaa da kaꞌafu gu efeenaa, hhagumeerii, kikau sa hemaa haa sa efeenaa haa khooslay goõ daa slaiye sa Daqa daa Tlintiꞌisi da Hemaa da Iliislaslaw, 41 haa qayroo daa hambahambuudisi sa yondu gu Daqa daa Tlintiꞌisi, qayroo daa tlintiꞌisi sa hhapalooay Haruuni haa qayroo sa yaꞌay kosi, qatlay gi ilii yondiidiyee yondu gu hhapalooaisoo.