Hemaa daga qadidisi haa daga ilabuusli
40
1 Da hheꞌesi, Taataa Iliitleemu gi kaay sa Musaa tuba, 2 “Baloo da lenge da slehheẽ gu leẽ, ugu la qadidisida Daqa daa Tlintiꞌisi da Hemaa da Iliislaslaw. 3 Waꞌay gu hemaage qaasi Sandikoo da Ilatlatlaw, da hheꞌesi la qaasida pasiyaa, ma gointi sandikotee. 4 Da hheꞌesi, daasii meesaa haa qaasi khooslay gosi goõ rawaa kosii. Slime daasii kalagaa da caaꞌasoo haa qaasi caaꞌasoo dosi rawaa kosii. 5 Masabaahu da sahaabu da ilii eehhimisu ubaanii qaasaka pandaa da Sandikoo da Ilatlatlawge, da hheꞌesi la hiitaareꞌeda pasiyaa afamaraa gu Daqa daa Tlintiꞌisige.6 Da hheꞌesi, qaasi masabaahu da iliidaada⁄aru sadaaka, pandaa da afamaraa gu Daqa daa tlintiꞌisi da Hemaa da iliislaslaw. 7 Beseeni da ilii hhuncidaa qaasaka tla⁄antla⁄a gu Hemaa da Iliislaslaw haa masabaahu haa laga hacisida maꞌay waꞌay kosii. 8 Da hheꞌesi, qadidisi unguruꞌu haa pasiyayuu gu niini⁄idee efeenaa da hemaa haa taareeii pasiyaa kaꞌafu gu efeenateesii. 9 Ugu oyii du⁄iya, maakhi Daqa daa Tlintiꞌisi da hemaa da iliislaslaw haa khooslay gosi goõ, haa laga tlintiꞌisida sliimaa haa khooslay gosi goõ, ma hemaa daa tlintiꞌisi tleehhiti. 10 Da hheꞌesi, maakhi du⁄iya masabaahutee da iliidaada⁄aru sadaaka sliimaa haa khooslay gosi goõ, tlintiꞌisi masabaahutee, ti daa tlintiꞌisi tleehhita hari khisla. 11 Maakhi du⁄iya beseeni da ilii hhuncidaa sliimaa haa kitiĩ gosi, haa laga tlintiꞌisida.
12 Ugu eteedi Haruuni haa yaꞌay kosi, yaa khayee afamaraa gu Hemaa da Iliislaslawge, da hheꞌesi ligi hhuncida hari maꞌay. 13 Da hheꞌesi, daamisi sa Haruuni qayroo hhakira daa tlintiꞌisi, maakhaku du⁄iya haa lugu tlintiꞌisida, ma sini yondiidi yondu gu hhapalooaisoo. 14 Eteedi yaꞌay kosi haa sigi daamiside kanchachuu hhakira. 15 Slime inay see maakhaki du⁄iya, idoo gaã iliimaakhadi gooay taataa gooina, inay see ma sini yondiidiri yondu gu hhapalooaisoo. Makhanay gooina du⁄iya digitii guumisi inay, hhapalooaisoo da ilakooma laqwaloo dooina goõ daa khoca.” 16 Musaa gi yondiidi kila idoo naraꞌa loi, idoo Taataa Iliitleemu gwaa ilii ilakaay.
17 Teesaaqay, Daqa daa Tlintiꞌisi da Iliitleemu dagagi qadidisi baloo da lenge da slehheẽ gu leẽ, kori gu cada giyaa iliica⁄iri Misirigo. 18 Musaa gi qadidisi Daqa daa Tlintiꞌisi, gi qamidi caqalaqaatisimaiĩ kosi daqeemoo koinay, gi qadidimisi bangasay, gii qamidi gompaai haa gi qadidimisi unguruꞌu gosi. 19 Da hheꞌesi, ina gii hhafi hemaa rawaa gu Daqa daa Tlintiꞌisige haa gi ilakhupisi hemaa hari ilakhupisimoo waku gu naaꞌaru, idoo Taataa Iliitleemu gooay giyaa ilii ilakaay Musaa.
20 Da hheꞌesi, ina gii oyi khongoroꞌosaykira cada gu tle⁄eẽ gu Ilatlatlaw haa gigi qaasi waꞌay gu Sandikoo da Ila⁄imbiduge. Ina gii lu⁄umi sangiidimaiĩ urungagu gu sandikoteesii haa gi qaasi rawaa kosii ilakhupisimoo gu ilamooyiru tlakwaroo. 21 Da hheꞌesi, gi qaasi Sandikoo waꞌay gu Daqa daa Tlintiꞌisige haa gii taareei pasiyaa ma gointi Sandikoo da Ilatlatlaw, idoo Taataa Iliitleemu gooay giyaa ilii ilakaay Musaa.
22 Musaa gi qaasi meesaa waꞌay gu Hemaa da Iliislaslawge, hari bara da goraa gu pasiyaa da Daqa daa Tlintiꞌisi. 23 Ina gi siikhidisi rawaa gu meesaage mukaatee daa tlintiꞌisi pandaa da Taataa Iliitleemuge, Taataa Iliitleemu gooay, idoo giyaa ilii ilakaay ina.
24 Musaa gi qaasi kalagaa da caaꞌasoo waꞌay gu Hemaa da Iliislaslawge, hari bara da wayee gu Daqa daa Tlintiꞌisi, bara da meesaa khuꞌusa. 25 Da hheꞌesi, gi ooyisi caaꞌasoo pandaa da Taataa Iliitleemuge, Taataa Iliitleemu gooay giyaa ilii ilakaay ina.
26 Musaa gi qaasi masabaahu da sahaabu waꞌay gu Hemaa da Iliislaslawge pandaa da pasiyaage, 27 rawaa kosii gi ilaeehhisi ubaanii gu tafu hhou, Taataa Iliitleemu gooay giyaa ilii ilakaay ina.
28 Da hheꞌesi, Musaa gii taareei pasiyaa afamaraa gu Daqa daa Tlintiꞌisige. 29 Ina gi qaasi masabaahu da iliidaada⁄aru sadaaka ciyoomoo haa afamaraa gu Daqa daa Tlintiꞌisi da Hemaa da Iliislaslawge, rawaa kosii gi hadisi sadaaka da da⁄araa haa sadaaka da baruũ, idoo Taataa Iliitleemu gooay giyaa ilii ilakaay ina.
30 Musaa gi qaasi beseeni da ilii hhuncidaa tla⁄antla⁄a gu Hemaa da Iliislaslaw haa masabaahu, haa gi hacisi maꞌay waꞌay kosii, sa hhuncidaa. 31 Qatlay sliimaa, Musaa, Haruuni haa yaꞌay kosi hhunciyee dabaiĩ haa yeꞌeeroo koina beseniteesii. 32 Qatlay goõ gi iliigumaagunee waꞌay gu Hemaa da Iliislaslawge, baku giyaa iliisatiri masabaahu, yaati hhunciri, Taataa Iliitleemu gooay, idoo giyaa ilii ilakaay Musaa.
33 Da hheꞌesi, Musaa gi qadidisi unguruꞌu haa pasiyayuu gu efeenaa, niini⁄ida da Daqa daa Tlintiꞌisi haa masabaahu, slime gii taareei pasiyaa kaꞌafu gu efeenateesii. Teesaaqay, Musaa gii gaasi yondukee goõ.
Tlongiya rawaa gu Hemaa da Iliislaslawge
(Faadoo 9:15-23)
34 Teꞌesii, tlongiya gi ilaslaabidi Hemaa da Iliislaslaw, haa wanqamee da Taataa Iliitleemu gi hacisidi Daqa daa Tlintiꞌisi. 35 Musaa yaa hiidahhasiiba hiidawa waꞌay gu Hemaa da Iliislaslawge, sa gimba tlongiya yaa ilaslaabidi Hemaa da Iliislaslaw, haa wanqamee da Taataa Iliitleemu gi hacisidi Daqa daa Tlintiꞌisi.
36 Hhiyuuma dooinay gonge Waisraeeli, etaa yaa tlaatleesiriiba hhiyuuma dooina, qatlaykaꞌa naqatloo tlongiya dagaa ilii waratlaysi rawaa gu Daqa daa Tlintiꞌisigo. 37 Bere tlongiyatee dagaba waratlaysa, inay yaa tlaatleesiriiba hhiyuuma dooina, yaati baqamidiri qatlaykaꞌa naqatloo dagaa ilii waratlaysi rawaage. 38 Qatlay goõ gu hhiyuuma dooina, Waisraeeli goõ yaa hiidahhasiri arimaa tlongiya da Taataa Iliitleemu rawaa gu Daqa daa Tlintiꞌisige, qatlay gu tleemaa haa aslaa yaa ooyiiyinta rawaa gu tlongiyateesii qatlay gu amasi.