36
1 Teesaaqay, Besaleeli, Oholiyaabu haa kila heedi hiĩ saa pihhi ha Taataa Iliitleemu caahhamuu haa hiidahhasa da yondiidu yondu goõ gu tlehhinay gu Daqa daa Tlintiꞌisi, inay yondiidiyay yondukee, idoo Taataa Iliitleemu giyaa ilii ilafahhi gooay.”2 Da hheꞌesi, Musaa gi eteedi Besaleeli, Oholiyaabu haa kila heedi gu kooma caahhamuu hiĩ saa pihhi ha Taataa Iliitleemu hidahhasa haa heedi gu slaꞌa yondu hari muuna gosi. 3 Inay gi ooyiri daqa Musaago idadu goõ daa hadisi ha Waisraeeli hari muunaiĩ koina sa tlehhinay gu Daqa daa Tlintiꞌisi. Hida gi ilakoniri hadimisu slagumu gooina balalu sliimaa hari heetlawaa. 4 Hida goõ gu koomee caahhamuu, gwaa yondimaamidee yondu paslaapasloo gu tlehhinay gu Daqa daa Tlintiꞌisi, yaagii ca⁄iri, kila heedi yondu gosaa. 5 Inay, gi ilii hadakayri Musaa haa sugugi kaayri tuba, “Hida hiraani khayri idadu wa⁄a hari khisla, hiicata da idadu hhakira daa slaiye sa yondu dandaa ilakwikwihhi ha Taataa Iliitleemu.”
6 Teꞌesii, Musaa gi ilakaay inay, inay gii qoomeesiri gimbaki kambii gonge tuba, “Heedi lensee, hhawata baku hadee yaa hhanti leehhisiyay kara idoo lensee sa sadaaka da Daqa daa Tlintiꞌisi.” Teesaaqay hida digigi tlaatlahhasi hari khakhaw idadu kara. 7 Sa gimba idadu hhakee giraa khayri yaa buꞌudisiri sa yondukee haa gi meeti.
Tlehhinay gu Daqa daa Tlintiꞌisi haa hemaa dosi
8 Da hheꞌesi, hida goõ gu koomee caahhamuu, gi boo⁄imisiri Daqa daa Tlintiꞌisi hari pasiyayuu mibi gu ⁄abakwi poy daa hhutli. Pasiyayuu hhakee gigi tlemiri hari puteeri gu kalay gu qancaru raw pahha, kalay gu daahhiya haa kalay gu daa⁄adu. Slime tlemakina hari hhabahhabinay gu makay, uma gooina na makeruubi gu koomee hhababee gu malayika pahha slaqamisee, yondu gu heedi gu khua pahha hirimaamidu naraꞌa. 9 Kila pasiyaa yaa konta tlederuũ gu fuuti mibeeri cigahha haa cada, haa hiitlakhwaruũ koina konee fuuti lahhoꞌo. Pasiyayuu hhakee gonkoinaa yaati konay piimoo leẽ. 10 Inay gi ilanuunuꞌusiri pasiyayuu kooani daqa lenge, ma ⁄isiniri kaꞌaã leẽ gu didiru. Slime gi laqiri namati teesaaqay daqa hhakira wakinay gu kooani. 11 Da hheꞌesi, gi boo⁄imisiri horongonay hari dahhamu gu kalay gu qancaru raw pahha, qwasa⁄a da pasiyaa da hiifaakooge da kaꞌaã gu pandaage. Slime gi teesaaqay leẽ laqi, daqa kaꞌaã gu hiifaakoo gu pasiyaa da cadii. 12 Slime gi boo⁄imisiri horongonay mibeeri kooani pasiyaa da pandaage, haa horongonay waku mibeeri kooani daqa pasiyaa da cadiige, horongonaykee goõ hingaati iliifokimidi. 13 Da hheꞌesi, gi boo⁄imisiri batlinqisay mibeeri kooani gu sahaabu, ma ilanuunuꞌusiri sliimaa kaeeri hhakira gu cada gu deni gu pasiyayuu, hematee gi idoo leẽ tleehhiti. 14 Slime, gi boo⁄imisiri pasiyayuu mibi haa leẽ hari quubu gu aaraa, ma hemaa tleehhidiri sa ilakhupisaraa da Daqatee daa Tlintiꞌisi. 15 Kila pasiyaa yaa konta tlederuũ gu fuuti mibeeri cigahha haa kooani, haa hiitlakhwaruũ gu fuuti lahhoꞌo. Pasiyayuu hhakee gonkoinaa yaa konay piimoo leẽ. 16 Inay gi ilanuunuꞌusiri pasiyayuu hhakira kooani daqa lenge, kara hhakira see gu lahhoꞌo daqa lenge. 17 Da hheꞌesi, gi booi⁄misiri horongonay mibeeri kooani khansu gu pasiyaa da hiifaakooge da kaꞌaã gu pandaage. Slime, gi teesaaqay leẽ laqiri, daqa kaꞌaã gu hiifaakoo gu pasiyaa da cadii. 18 Inay gi boo⁄imisiri qolondaaee mibeeri kooani gu ⁄aray, qwasa⁄a da pasiyaa da hiifaakooge da kaꞌaã gu pandaa, nama teesaaqay qwasa⁄a da pasiyaa da hiifaakooge da kaꞌaã gu cada. Gi boo⁄imisiri qolondaaee mibeeri kooani gu ⁄aray, ma karahhasiri hemaa sliimaa, ma ilakhupisimoo leẽ tleehhiti. 19 Da hheꞌesi, gi boo⁄imisiri ilakhupisimoo gu hemaa, hari faloo gu gondadee daa maakhi hari kalay gu daa⁄adu. Kara rawaa kosii dagii hhafi ilakhupisimoo waku gu naaꞌaru, daa boo⁄imisi hari faloo gu naꞌanari gu makay.
20 Da hheꞌesi, gi boo⁄imisiri bangasay gu lawau sari qadidisa da Daqa daa Tlintiꞌisi. 21 Kila bangasiya yaa konta tlederuũ gu fuuti mibi haa kooani haa hiitlakhwaruũ gu fuuti cada haa nusuu. 22 Kara, kila bangasiya yaa konta eaa cada sari ilanuunuꞌusa sliimaa daqa lenge. Bangasay goõ gu Daqa daa Tlintiꞌisi giyaa teesaaqay boo⁄imisi. 23 Da hheꞌesi, inay gi boo⁄imisiri bangasay mibeeri cada sa bara da wayee gu Daqa daa Tlintiꞌisi. 24 Slime gi boo⁄imisiri hari feesa caqalaqaatisimaiĩ mibeeri cigahha, sa qamidu biraa gu bangasaykeesii. Kila bangasiya gi slayda caqalaqaatisimaiĩ cada, leẽ gugi qaasiri biraa gu eea lenge haa gu caduu eea da cadiige. 25 Kara, gi boo⁄imisiri bangasay mibeeri cada sa bara da goraa gu Daqa daa Tlintiꞌisi. 26 Slime gi boo⁄imisiri caqalaqaatisimaiĩ mibeeri cigahha hari feesa, caqalaqaatisimaiĩ cada biraa gu bangasiya lenge. 27 Da hheꞌesi, gi boo⁄imisiri bangasay lahhoꞌo sa bara da aluũ gu Daqa daa Tlintiꞌisi, bara da ilacindoo gu biraa khuꞌusa. 28 Slime gi boo⁄imisiri bangasay cada, sa soomaiĩ guri bara da aluũ gu Daqa daa Tlintiꞌisi. 29 Soomaiĩ hhakeesii gu cadage dagi qadidisi bangasay cada, tlaatleesa da hhapeego rawaa naqatloo. Slime, rawaage digaati ilanuunuꞌusi daqa urunga lenge. Bangasaykee cada sa soomaiĩ hhakee cada digaa teesaaqay boo⁄imisi. 30 Teesaaqay, yaa wanay bangasay dagati haa caqalaqaatisimaiĩ mibi haa lahhoꞌo daa boo⁄imisi hari feesa, caqalaqaatisimaiĩ cada biraa gu bangasiya lenge. 31 Slime, gi boo⁄imisiri gompaai kooani gu lawau sa bangasay guri bara leẽ da Daqa daa Tlintiꞌisi. 32 Kara, gi boo⁄imisiri gompaai wakinay kooani sa bangasay guri bara da cadii waaree da Daqa daa Tlintiꞌisi, haa kooani sa bangasay guri aluũ gu daqatee waara, hari bara da ilacindoo gu biraa. 33 Inay gi boo⁄imisiri gompay gu tla⁄aã, giicati hari tla⁄aã gu bangasay gu Daqatee, bara lengo bara da cadii naqatloo. 34 Inay gi maakhiri bangasay haa gompaai hhakee hari sahaabu, haa gi boo⁄imisiri urungaa gu sahaabu, gigii tluhhumisiri bangasayge haa gompaaige sa oowa dooina.
35 Da hheꞌesi, gi boo⁄imisiri pasiyaa hari puteeri gu kalay gu qancaru raw pahha, gu daahhiya, gu daa⁄adu haa kalay gu ⁄abaaku poy daa hhutli naraꞌa. Hari puteeri hhakee, pasiyatee dagagi tlemi naraꞌa hhabihhabinaaee gu makeruubi gu koomee hhababeerii malayika pahha, yondu gu qeeraa gu fundi, ginaa iliiyondiidi. 36 Kara, gi boo⁄imisiri sa pasiyatee unguruꞌu cigahha gu khaimoo gu lawau, haa gigi maakhiri hari sahaabu. Da hheꞌesi, pasiyatee gigii taareeiri daqa qolondaaee daa boo⁄imisi hari sahaabu, gigi qadidisiri caqalaqaatisimaiĩ cigahhage gu feesa. 37 Sa afamaraa gurii guuma hemaage, gi boo⁄imisiri pasiyaa da hiilooi hari puteeri gu kalay gu qancaru raw pahha, gu daahhiya, gu daa⁄adu haa gu ⁄abaaku poy daa hhutli hhoinay haa daa hambuhambuudisi naraꞌa. 38 Slime gi boo⁄imisiri unguruꞌu kooani gu lawau gu koomee qolondaaee. Gigi maakhiri hari sahaabu cinaanaa gu rawaa gu unguruꞌukee sliimaa haa horongonaykee. Slime gi boo⁄imisiri caqalaqaatisimaiĩ koina kooani gu ⁄aray.