Maꞌaraa da ila⁄imbidu
24
1 Hiifaakooge, Taataa Iliitleemu gi kaay sa Musaa tuba, “Ugu laa ilakhiinaaꞌata daqa dooii sliimaa haa Haruuni, Nadaabu haa Abiihu, sliimaa haa gaduũ mibeeri fanqu gu Israeeli. Unkuray ma keebeeꞌemitiri pandaa dooii segengo hanigi firiirintay ana. 2 Musaa kilesi na iliisati ilaciyaage ana, Taataa Iliitleemu, wakinay naa hhanti iliisatiyay ilaciyaage. Kara, Waisraeeli yaa hhanti ilakhiinaaꞌadiyay onke sliimaa haa ina.”3 Musaa gi waaudi, gi kaawa kay sa hida gimbakee goõ haa ilakaawatee goõ daa kaay ha Taataa Iliitleemu. Hida goõ gi ilaki⁄isiri hari afoo leẽ tuba, “Gimba goõ diĩ kaay ha Taataa Iliitleemu hagu yondiidana.”
4 Teꞌesii, Musaa gi handikimi ilakaawa goõ daa kaay ha Taataa Iliitleemu. Heetlaalee dosii hari tumpaatumpu gii tlay, gi tlaatleesi tlehhinay masabaahu iladifaa gu onke. Slime gi qadidimisi tle⁄eẽ mibi haa cada unguruꞌu pahha ilakhuukhuꞌusa da kabiraa mibi haa cada da Israeeli. 5 Da hheꞌesi, gi ya⁄abi qaraiya da Waisraeeli, inay gi hadisiri sadaaka da da⁄araa aslaage haa gi cu⁄iri karamu, ma sadaaka da qasaw tleehhiti daqa Taataa Iliitleemuge. 6 Musaa gii deehhi nusuu gu ceedetira da kuꞌunaanay daa ooyi haa gigii eesi qulu⁄uuge. Ceedetira nusuu waka daa meti hiideehhago, gigi hitimisi rawaa gu masabaahuge. 7 Da hheꞌesi, ina gii oyi kitaabukira giyaa handikimi gu ila⁄imbidu gu Taataa Iliitleemu, gugi somimi pandaa da hidage. Inay gi ilaki⁄isiri tuba, “Dandiray yondiidana haa akhamisana gimba goõ daa kaay ha Taataa Iliitleemu.”
8 Musaa gii oyi ceedetira daa qulu⁄uuge waara haa gi ilii hitimisi hida, tay tosaa kakaana tuba, “Haã na ceedee da ila⁄imbidu diĩ qaasi ha Taataa Iliitleemu sliimaa haa unkuray hari amoo da sirakomamidu gimbaki goõ.”a
9 Da hheꞌesi, Musaa haa Haruuni, Nadaabu haa Abiihu, haa gaduũ mibeeri fanqu gu Israeeli gi ilakhiinaaꞌadiri rawaa gu onke. 10 Teꞌesii, inay gi aniri Iliitleemu gu Israeeli. Biraa gu yeꞌeeroo kosii daa wana idoo waka, sakaafu pahha daa boo⁄imisi hari tle⁄eẽ wakinay gu hhoi. Uma gu tle⁄eẽ hhakee na yakuuti samaawi gu qancari ubee, rawkaꞌa pahha goó fiica. 11 Inkoo, giyaadimiisetee da deni da Waisraeeli, giyaamati aniri see Iliitleemu, ina giyaa ilaqaiiba inay, gi kitahhaniri sliimaa haa ina.
Musaa oõ gu Sinaayige
12 Taataa Iliitleemu gi kaay sa Musaa tuba, “Ugu khawa daqa dooii, tay rawaa gu onke, ma ibiti tiꞌii haa ana. Ana sugu hadisa khongoroꞌosay gu tle⁄eẽ gu koomee sariyaa haa ilakaawatira gaa handikimi sa caacaahhamisu gu Waisraeeli.”
13 Teesaaqay, Musaa gi waaudi haa yondimiisay gosi Yosuuwa, Musaa gi ilakhiinaaꞌadi rawaa gu oõ gu Iliitleemuge. 14 Qatlay giyaa iliikahhiye waauda, Musaa gi kaay sa gaduũ hhakira gu Israeeli tuba, “Handi haraa baqatee tiꞌii haati amoolaa ki⁄ana daqa doogunay. Haruuni haa Huuri sliimaa wanay haa unkuray, heedi gu koomaa gimba ilii hadakaye inay.”
15 Musaa gi ilakhiinaaꞌadi rawaa gu onke, tlongiyatira gi ilaslaabidi oõ gu Sinaay.b 16 Wanqamee da Taataa Iliitleemu gii ibiti rawaa gu oõ gu Sinaayige. Balalu lahhoꞌo tlongiyatee gi ilaslaabidi okee. Baloo da fanquge Taataa Iliitleemu gi eteedi Musaa, tla⁄aã gu tlongiyateesaa. 17 Qatlay Waisraeeli giyaa ilii yuꞌudiri rawaa gu onke, wanqamee da Taataa Iliitleemu dagaati arimi ubee, aslaa doó oowa pahha rawaa gu onke. 18 Musaa giyaa ilii ilakoomi ilakhiinaaꞌada rawaa gu onke, gii day waꞌay gu tlongiyateesii giyaa ilakhiinaaꞌaaꞌamidiye rawaa gu onke. Ina gi ibiidi taysi balalu mibeeri cigahha, tleemaa haa amasi.