Dangu hhanti afahhana Taataa Iliitleemu
8
1 Musaa gi ilakoomi kaawa sa Waisraeeli tuba, “Unkuray kwanda ga iliikontee naraꞌa ilakaawa goõ hanguũ ilafahhi unkuray letuti, ma hiidahhasidiri ibinaa haa faadoo dooguna gii roogita. Slime hagii dahhasiday hiiguuma gii ⁄utliday hhapetee Taataa Iliitleemu, Iliitleemu googuna giyaa seelimi hadisa sa ayiĩ kokuna. 2 Slawaw, Taataa Iliitleemu, Iliitleemu googuna, idoo hanguraa ilii giyaadi hhiyuuma doogunay da tleedi hari amoo da kongoqomee koraraa mibeeri cigahha. Ina yaati slai mangu koisi haa ma arimi bere hiikaasiday, ma caahhi idoo goó ilahudeemiside muunaiĩ kokunay, haa bere iliikontay baku iliikontaaiiba ilakaawa dosi. 3 Taataa Iliitleemu hangwaa may unkuray, ma arintiri qori haa qariqaaqari sangugi hadisi ⁄agoo doo maana oine ma ⁄agintiri, ⁄agoo gaa hhidintee, ma ayiĩ kokuna see giyaati hhidinay. Ina yaati laqi teesaaqay, mangu caacaahhamisi unkuray tuba, heedi yoó ibiidiyaaba hari ⁄agoo kilesi, ti ibiidi hari kila gimba goõ giyoó kaaye ina.a 4 Qayroo kokuna yaa faakiriiba ma yeꞌeeroo kokuna see yaa laafimidiriiba koraraa hhankii gu mibeeri cigahha. 5 Caahha, muunaiĩ kokunay tuba, Taataa Iliitleemu, Iliitleemu googuna yoóti ⁄agitina, idoo heedi gooay giyoó ilii⁄agitine yaꞌay kosi.6 Teesaaqay, unkuray iliikoomaw ilakaawa da Taataa Iliitleemu, Iliitleemu googuna, sirakomamida amamu kosi haa gugi gwaa⁄aday ina. 7 Taataa Iliitleemu, Iliitleemu googuna hanguraa khakhaakhay unkuray hhapee da hhoige day looi. Hhapetee ti hhapee da kooma duudadaa haa hhaahhiyoo goó guumee maꞌay hiihuuꞌumago haa omeerigo. 8 Slime, hhapetee konta ganoo haa wee⁄oo, sabiibu haa ⁄ancaa, ⁄aamu doó eteedine komamanga, seyituuni doó tinqine gii ca⁄asi du⁄iya haa konta dinu. 9 Hhapeteesii slayda ⁄agoo wa⁄a dooba slakuda, haa hamaa afariislaꞌataaiiba idoo lensee. Slime, tle⁄eẽ kosi konay sikhima haa omeeri kosii hiidahhasiday folinay tle⁄eẽ gu ⁄aray. 10 Qatlay unkuray ga ilii ⁄agintee haa gi akhankhatay, hhaꞌaleesa Taataa Iliitleemu, Iliitleemu googuna, sa gimba gu hhapee da hhoi sanguũ hadisi ha ina.”
Hiigadiru afahhamage Taataa Iliitleemu
11 Musaa gi kaay tuba, “Hangu ga⁄aydee dangu hhanti afahhana Taataa Iliitleemu, Iliitleemu googuna, hari amoo da mawa oowa ilakaawa dosi goõ haa sariyaa dosi, hanguũ ilafahhi unkuray letuti. 12 ⁄agintay haa akhakhantay, tleehheday maraai gu hhoi haa gi ibitay teꞌesii. 13 Kara, kuꞌunaanay googuna gimaa iliitlakhwaye hari khisla haa gi slayday feesa haa sahaabu wa⁄a, idadu kokuna goõ gi kontee, faadoo dooina hiiroogita. 14 Teꞌesii, hangu ga⁄aydee hari khisla, muunaiĩ kokuna hingi hhanti hiiduubiyay, dangugi afahhana Taataa Iliitleemu, Iliitleemu googuna, ina nangwaa hiica⁄asi unkuray hhapee da tongaiimaago da Misiri. 15 Ina nanguraa giyaadi kongoqometiray da didirige haa doó gwaa⁄iye da kooma deesasee gu koomee qada haa nyeraree, hhapee da gongooriya dooba maꞌay. Ina sangwaa hiica⁄asi maꞌay hhafida gwaa karahhugo. 16 Kara ina sangwaa hadisi ⁄agoo doó maana oine, ⁄agotee daa hhidine ayiĩ kokuna, maga ⁄agintiri kongoqomeege. Gimbakee goõ giyaati yondiidi mangu labaꞌasi haa mangu ilatahhi, haa sangu pihhi hhoinay hiifaakooge. 17 Teesaaqay, hhanti ilahudeesida tuba, ‘Hanti slay hindaqaruumaa hari hiidahhasa doy haa hari ⁄uuru goy loi.’ 18 Slawaw, Taataa Iliitleemu, Iliitleemu googuna, ina loi na sangoó hadisi ⁄uuru gu slawaraa hindaqaruumaa. Hari amoti, ina yoótii ⁄atlisi Ila⁄imbidu gosi giyaa seelimi sa ayiĩ kokuna, idoo giyoó ilii yondiidiye gooay letuti naqatloo. 19 Inkoo, bere dangu afahhana Taataa Iliitleemu, Iliitleemu googuna, haa gi sirakontay iliitleemamee wakinay, haa gigi firiirintay haa gi keebeeꞌemitay hhapeege daqa dooinay, ana hangu ilii⁄oo⁄a unkuray letuti ambee, gu lou kwanda dangu hhamisiye unkuray. 20 Hida gu hhapapu wakinay gooay, idoo digaa ilii hhamisi ha Taataa Iliitleemu pandaa doogunay, unkuray see dangumaa teesaaqay hhamisi, bere hagu akhamisidaaiiba Taataa Iliitleemu, Iliitleemu googuna.