Gusiru gu hida gu hhapapu
7
1 Musaa gi kaay sa Waisraeeli tuba, “Taataa Iliitleemu, Iliitleemu googuna, hangurii guna hhapee ga hii⁄utla kaydee gi tooguna tleehhita. Yuꞌudaa, ina himaa gusina pandaa doogunaa hida gu hhapapu fanqu gu koomee ⁄uuru ba⁄ay da unkuray see. Hhapapu hhakee ti Wahiiti, Wagirigaasi, Waamoori, Wakanaani, Wapereesi, Wahiifi haa Wayebuusi. 2 Qatlay Taataa Iliitleemu, Iliitleemu googuna, gimaa iliilu⁄iye dabaiĩ kokunay haa gigi kaba⁄aday inay, ligimaati hhamisiday sumuku. Unkuray hhanti ⁄isintay ila⁄imbidu lensee haa inay, ma ⁄awaariru see sigi hhanti antay inay. 3 Unkuray hangi hhanti khabiibintay haa inay. Hhantii geemayday sagameeru googuna duguma khabiibimi baku qaraiya dooguna gi khabiibinay sagameeru gooina, 4 sa gimba, bere teesaaqay laqaday, hida hhakee papa⁄eedeesiyay yaꞌay kokuna, gi mayay firiiriru Taataa Iliitleemu haa gi asu firiirinay iliitleemamee wakinay. Taataa Iliitleemu, qupidaa kosi yooti ci⁄iyay aslaa pahha daqa doogunay, cirakiray lenge hangugi hhamisi unkuray. 5 Haã na idoo ga yonditee daqa dooinay. Unkuray kwanda ga tlakweemisidee sumuku masabaahu koina haa loolokhoma tle⁄eẽ koina gu iliifiriiriru daa waraqamidi unguruꞌu pahha. Slime tlaaqa sumuku sanaamuu gu iliitleemitoꞌoo dooina Aseera haa da⁄a aslaage sanaamamuu koina gu khafinay. 6 Teesaaqay laqa, sa gimba unkuray dangwaati tlintiꞌisi sa Taataa Iliitleemu, Iliitleemu googuna. Ina hangwaatii leehhi unkuray tla⁄aã gu hida gu hhapapu wa⁄ago, ma hida kosi loi gu kaari tleehhitiri.7 Taataa Iliitleemu yaa qaasiiba slaꞌamuu kosi daqa doogunay haa hangugii leehhi, sa gimba unkuray ti wa⁄a ba⁄ay da hida gu hhapapu wakinay. Gu lou, unkuray hangwaati coko⁄i hari khisla ba⁄ay da hida gu hhapapu wakinay khoorotii. 8 Inkoo, Taataa Iliitleemu hangu slai unkuray, haa yooti slai hiigaasa seeliru giyaa seelimi daqa ayiĩ kokunay. Haã na idoo sangwaa hiica⁄asi unkuray hari dabaiĩ kosi gu koomee ⁄uuru haa hangugi afiigweedi hhapee da tongaiimaago da Misiri, daa tawaaliiline ha mutemi Faraaw. 9 Inkoo, unkuray caahha Taataa Iliitleemu, Iliitleemu googuna, ti Iliitleemu gu lou hiĩ goó iliikooma ila⁄imbidu gosi gu slaꞌamuu daqa laqwaloo elefafaa wa⁄a da hida hhakaꞌa gu slaee haa goó iliikoomee ilakaawa dosi. 10 Teesaaqay see, ina yoó hiikaaiyaaba ilaki⁄isa hari amoo da hhamisaraa hhakaꞌa gu wakee ina. 11 Inkoo, unkuray kwanda hangu khuꞌuntee naraꞌa gi iliikontay ilakaawa goõ haa sariyaa goõ hanguũ ilafahhi unkuray letuti.”
⁄aafaraa da hida goó akhamisee
12 Musaa gi ilakoomi cocoꞌomoo daqa Waisraeelige tuba, “Bere balalu sliimaa ilakontay akhamisu sariyati haa hagagi sirakontay naraꞌa, Taataa Iliitleemu, Iliitleemu googuna, iliikona naraꞌa ila⁄imbidu gosi gu slaꞌamuu daqa doogunay, giyaa ilii seelimu gooay daqa ayiĩ kokunay. 13 Ina hangu slai haa hangu ⁄aafi, haa sangu hiiroogisi faadoo dooguna. Slime ⁄aafi laqwaloo dooguna, qaymamu kokuna, ma slaydiri baruũ, difaay dooguna da ⁄abi haa du⁄iya. Slime, ina hangu ⁄aafi, sangugi hadisi yakway haa bee⁄u wa⁄a, hhapetiray giyaa seelimi hadisa sa ayiĩ kokuna. 14 Taataa Iliitleemu hangu ⁄aafi unkuray ba⁄ay da hida gu hhapapu wakinay see. Tla⁄aã googunay wanaaiiba hhawatee baku tigay ma kuꞌunaanay see maa caꞌatuumidiyaaiiba. 15 Taataa Iliitleemu hangu goina haa ga⁄ay sliimaa, haa dangu ooyiyaaba ha ga⁄ay sliimaa gu tlaku gwaa khuꞌudee yade hhapee da Misirige. Teesaaqay see, ina ⁄agitina hari ga⁄aykee fa⁄ayaa dooguna. 16 Unkuray kwanda ga hhamisidee hida goõ gu hhapee, hhaã Taataa Iliitleemu, Iliitleemu googuna giyoo hiilu⁄iye dabaiĩ kokunay. Hida gu hhapetee sigoo hhanti ⁄awaarintay. Slime hhanti firiirintay iliitleemamee koina, gimbaki ti hatliroo tleehhidi daqa doogunay.
17 Angamalee hati ilahudeedemisiday muunaiĩ kokuna tuba, ‘Malee hhamisana hida gu hhapapu hhanki? Hida gu hhapapu hhanki ti wa⁄a haa konay ⁄uuru ba⁄ay da dandiray. Hagi malee hiidahhasana gusiru?’ 18 Teesaaqay see, hagi hhanti tlaꞌamutay inay! Slawaw naraꞌa, Taataa Iliitleemu, Iliitleemu googuna, idoo giyaa ilii yondiidi daqa Faraawge haa daqa hida goõ gu hhapee da Misiri. 19 Slawaw, unkuray haati antiri sagadadahhu goõ hari ilaa kokuna loi haa gimba gu didiru gu bakaꞌasa, Taataa Iliitleemu, Iliitleemu googuna ginaa iliica⁄asi unkuray hhapee da Misirigo hari daba gosi gu kooma ⁄uuru. Teesaaqay, ina gini iliiyondiidi daqa hida gu hhapapu goõ giyoó tlaꞌamutee. 20 Slime, Taataa Iliitleemu, Iliitleemu googuna, ya⁄abi dabinaana tla⁄aã gooinay haa gi hhamisi hida hhakaꞌa gumaa meetee, hiĩ nahhamidiri pandaa doogunay. 21 Unkuray hida gu hhapapu hhakee hagi hhanti tlaꞌamutay, sa gimba Taataa Iliitleemu, Iliitleemu googuna wana tla⁄aã googunay, ina kilesi na didiri haa gu hiitlaꞌamuudisa. 22 Taataa Iliitleemu, Iliitleemu googuna gi gusina hida gu hhapapu hhakee cokoocoko⁄u pandaa doogunaa. Inay gii dahhasidaaiiba gusiru gonkoinaa waa leẽ. Bere teesaaqay laqaday, faadoo da makay gu kweera cira hiiroogita haa gi tlaꞌamutay unkuray. 23 Taataa Iliitleemu, Iliitleemu googuna, hiilu⁄i hida hhakee dabaiĩ kokunay, haa gi ⁄isina inay ma tlaꞌamuudiri, digimaati amoolaa hhamisi. 24 Slime, ina hiilu⁄i dabaiĩ kokunay watemi dooina haa gigi cu⁄uday, hida digigi afahhana umaiĩ koina khoorotii. Hhaku heedi lensee gu hiidahhasa qadida gi kanisi unkuray, inay giti hhamisiday goõ. 25 Sanaamamuu gu iliitleemamee koina gu khafinay ligi da⁄aday hari aslaa. Unkuray hhanti slahhaaꞌaday peesay haa sahaabu da rawaa gu sanaamamuu hhakeesii waara, hagi hhanti hiiooday, ma khooslay googuna tleehhidi, ti hatliroo daqa doogunay. Hagi hhantii ooday, sa gimba ti slahhaaꞌasa daqa Taataa Iliitleemuge, Iliitleemu googuna. 26 Unkuray hhanti leehhisiday idoo lensee maraai kokunay da kooma slahhaaꞌasa, bere malee Taataa Iliitleemu hangu hhamisi, idoo giyaa iliihhamisi gooay inay. Unkuray kwanda gi wakidee sumuku idadu hhakee, sa gimba digaati tlintiꞌisi sa da⁄araa.”