50
1 Teꞌesii Yoseefu gi khambacimi taataa gosi, tay tosaa ⁄aa⁄i haa gu tosaa humbaꞌamidi. 2 Da hheꞌesi gi ilafahhi dareesimaiĩ kosi, ma maakhiri haa ma ilii qaasiri umaasay tuuꞌuna da taataa gosi, ma maydi gubaraa. 3 Inay gi teesaaqay laqiri qoomay gu balalu mibeeri cigahha, maꞌaana qocay gu Misirige hhakee naa balalu daa slaiye gu makhadu umaasaykee tuuꞌunage. Hida gu Misiri gugi gaiidiri Yakoobo balalu mibeeri fanqu.4 Qatlay balalu gu gaiidimoo giyaa ilii faakiri, Yoseefu gi kaay sa gaduũ gu aya gu Faraaw tuba, “Bere haã slay hhoinay gu didiru pandaa doogunay, hhooa gimbuusa daqa Faraawge sa ana. Sugu kaadeei ubee, 5 ‘Taataa gooi Yakoobo yaa kaay, ana ma seelimi haa gi kaay tuba, “Yuꞌudiyaa, ana gwaaꞌaraa doy yaani daadaausidi. Gu lou, hani leehhiside hhapee da Kanaanige haa hanigi qaasaraa kayde aysateesii gaa ana loi hiikhuri.” Inkoo, hagu firiirima hani geemayde, ma qaasaraa kay taataa gooi, goo hheꞌese haa cira ki⁄a.’ ”
6 Faraaw gi kaay tuba, “Taa⁄a qaasi taataa googu, idoo giyaa ilii laqi gooay, ugu ma seelinti.”
7 Teesaaqay, Yoseefu gi waaudi, gi qaasaraa kay taataa gosi, dugugi leeleehhisi haa yondimiisee goõ da Faraaw, gaduũ goõ gu aya gosi sliimaa haa hida wa⁄a gu deni gu hhapee da Misiri. 8 Yoseefu see hingigi sirakomamidiri haa hida goõ gu aya gosi, hhiee kosi goõ sliimaa haa hiidayuuma goõ da taataa gosi Yakoobo. Yaꞌay koina haa kuꞌunaanay gooina kilesi naati meetiri yaamu gu Goseenige. 9 Kara dugugi leeleehhisi ha hida goóy dadawee faraasige haa kokoteenanuu doó dukhudukhune ha faraasi, gonkoinaa sliimaa yaa raqa da didiri hari khisla.
10 Qatlay giyaa ilii dayri biiraa gu ilii heeleꞌemisu baruũ daqa doó eteedine na Ataadi, hari tlo⁄osaa gu duudu gu Yoridaani, gi ⁄aa⁄iri hari afoo da didiri haa hari slahhaaꞌamee da didiri. Taysi Yoseefu gi ilakoomi balalu fanqu gaiidimoo taataa gosi. 11 Wakanaani looee doó ibiida teꞌesii, giyaa ilii aniri gaiidimokee biiraa gu ilii heeleꞌemisuge baruũ teꞌesii Ataadige, gi kaayri tuba, “Gu lou, gaiidimoki gu hida gu Misiri gwaati didiru!” Inkoo, na idoo daqataꞌa saganoó eteedina Abeeli-Misirayiimu,a dari tlo⁄osaa gu duudu gu Yoridaani waara.
12 Teesaaqay, yaꞌay gu Yakoobo, gi yondiidiri sa ina, idoo digaa ilii ilafahhi gooay ha taataa gooina. 13 Inay gugi geregediri ina hhapee da Kanaani naqatloo. Taysi gugi tooinaa qaasiri aysa daa maraiyage waaraa qaymoo da Makipeelage, ilaciyaa haa Mamuree. Qaymotee na hatira Aburahaamu giyaa kirigi daqa Efuroonigo, Hiitimoo, ma daqa dosi tleehhiti da ilii qamidu. 14 Qariqaaqari Yoseefu giyaa ilii hheꞌesi qaasaraa taataa gosi, gi ki⁄i Misirige sliimaa haa hhiee kosi haa hida hhakira wakinay goõ gwaa hadakawee sliimaa haa ina qaasaraa da taataa gosii.
Yoseefu bacaraa da tlaꞌamee da hhiee kosi
15 Qatlay hhiee gu Yoseefu giyaa ilii aniri taataa gooina hiĩ hhami, gi tlaꞌamuumuudiri, hingigi wariikaayri tuba, “Hati malee laqana, bere Yoseefu kahhi yoo kona wakimaa haa dandiray, gii dahhasi hiislarakhasa gu lou, gimbakira goõ gu tlaku gwaa yondiidani daqa dosii?” 16 Inkoo, inay gi ya⁄abiri ya⁄aboo daqa Yoseefuge, gi kaayri tuba, “Qatlay taataa googu giyaa ilii kahhiye hhamaraa, yaa may ilakaawarati daqa doorii, ma kaawani sa ugu tuba, 17 ‘Haguũ firimi, ca⁄asii muuna googwaa tlakwaroo haa gimbakira goõ gu tlaku gu hhiee koku. Gu lou, idoo giyaa yondiidiri daqa dooguu, dati tlakwi hari khisla.’ Inkoo, hhooa ilamooyimi tlakwaroo da yondimiisee da Iliitleemu gu taataa googu.” Qatlay ya⁄abotee tooina giyaa ilii daadi daqa dosii, Yoseefu gi ⁄aa⁄i.
18 Da hheꞌesi hhiee kosi yaagi khayri, inay kilakoina gi keebeeꞌemidiri pandaa dosii, gi kaayri tuba, “Dandiray ti tongee doogu.”
19 Teꞌesii, Yoseefu gigi ilaki⁄isi inay tuba, “Hhanti tlaꞌamutay, ana ti Iliitleemu gooba, hangu hukumaaba. 20 Unkuray haati taarintiri hiisletuudisaraa ana. Hari amoo da yondukee, Iliitleemu yaati taarimi yondu hhoinay gu ilabuꞌuruu hida wa⁄a, idoo giĩ ilii laqi gooay inkoo. 21 Teesaaqay hhanti tlaꞌamutay, ana sangu hadisa ⁄agoo unkuray sliimaa haa yaꞌay kokuna.” Ina gi cocoi haa inay hari muuna gu cabuuma, magi muunaiĩ hii⁄atlisi.
Yoseefu gwaaꞌaraa dosi
22 Yoseefu gi ilakoomi ibinaa hhapee da Misirige sliimaa haa hhiee kosi haa hiidayuuma goõ da taataa gosi. Yoseefu yaa ibiidi koraraa miyaa leẽ haa mibi. 23 Ina dugwaa ⁄aafi gi arimi yaꞌay haa okookoiĩ gu Efurayiimu. Kara yaa arimi yaꞌay gu Makiiri, hiĩ gwaa nanku Manaase, gigi kwahhasuusi yaꞌay kosi pahha.
24 Da hheꞌesi Yoseefu gi kaay sa hhiee kosi tuba, “Inkoo, ana haã daadaauusi gwaaꞌaraa. Gu lou, Iliitleemu dangumaa iliiawa kay, dangumaa looysi hhapetaa haa dangugi leehhisi hhapetaꞌa naqatloo giyaa seelimi sa Aburahaamu, Isaaka haa Yakoobo.”
25 Da hheꞌesi Yoseefu gi ⁄isimi hida gu Israeeli, ma seeliniri tay tosaa kakaana tuba, “Gu lou, Iliitleemu dangu iliiay loowaraa hhapetaa, kwanda ga seelintee tuba, qatlaykeesii, maa hubitay taysi fararu koi.”
26 Inkoo, teꞌesii Yoseefu gi hhami, tay tosaa kona koraraa miyaa leẽ haa mibi. Inay gugi maakhiri umaasay tuuꞌuna dosi, ma maydi gubeemaa, gigi qaasiri sandikoo da tuuꞌunage taysi Misirige.