Tlaatleesoo 49

Yakoobo ⁄aafaraa da yaꞌay kosi

1 Da hheꞌesi Yakoobo gi ⁄oo⁄i yaꞌay kosi goõ, sigigi kaay tuba, “Kurunkuridaaruu sliimaa, ma sangu kaay gimba dagumaa slawa unkuray balalu gwaa khocee.

2 Kurunkuridaaruu la itatiisiday, ye yaꞌay gu Yakoobo,

hani itatiisidee ana taataa googuna Israeeli.

3 Rubeeni, ugu na nankoy gu badiisu,

⁄uuru gooi haa tlaatleesoo gu ⁄uuru gooi gu qarauumaa,

ugu haanii catidi wakinay hari waaway

haa ⁄uuru ba⁄ay da wakinay see.

4 Kara, ugu tlakwaroo doogu da tlakwi hari khisla.

Ugu ti heedikaꞌa pahha doóba hiidahhasaraa tawaaliru,

maꞌay gu ilawa⁄iya pahha.

Inkoo, kara heedi gu didiru tleehhitaaba,

maꞌaana haa qati buburuu gooii,

guraagi ilii khaydi slasla⁄iima haa hanigi qooqiti,

hari amoo dari guaraa hadee doy da afay!

5 Simi⁄ooni haa Laawi ti hhiee,

khasima gooina goóti oyay sa yondu caꞌabasluuma da didiri.

6 Muuna gooi, hangu hhanti ilagaasida sliimaa haa balasaa dooina,

kara hangu hhanti ilagaasida yondu gooinay haa hiikurunkurimidu gooinay gu tlaku,

sa gimba inay yaa cu⁄iri hida hari qupidaa koina.

Kara idoo giyaa ilii slaiyee gooay, yaa kereꞌemisiri ne⁄eebaaee gu tlanu gu karamu.

7 Slahhaaꞌamee dooina dagati ilawaasiye, maꞌaana daati dihhi hari khisla,

kara qupidaa koina digi ilawaasiye, maꞌaana konaaiiba ilamooyiru.

Inkoo, Iliitleemu hiideehhi laqwaloo dooina daqa Yakooboge,

haa gi pasidisi daqa kabiraa wakinayge da hhapee da Israeeli.

8 Ugu Yuuda, hhiee koku gumaa daareesiyay,

maa kaba⁄ada fa⁄ayaa doogu,

kara hhiee koku maa keebeeꞌemidiyay pandaa dooguu.

9 Ugu Yuuda, nankoy, ti nanku diidaw pahha, gwaa diiraw,

hiĩ gwanti ki⁄u slagaadugo, hiĩ ankhi.

Diidaw pahha goó hiicaagwa haa gi qaati hhapeege,

miyaa nuguy dahhasi hiitlaysa ina?

10 Qatlay sliimaa hhadaa da mutemi hiidahhasidaaba hiica⁄a daba gu Yuudago,

balalu sliimaa laqwaloo dosi na tawaalinta,

qatlaykaꞌa naqatloo damaa ilii khaye, hikira gumaa hiiow tawaaloo,

hikira damaa itatiisiye ha hhapapu goõ.

11 Ina yoo khiidina daqway gosi khaimoo gu sabiibuge,

kara daqumoo gosi eleema da hhoige da sabiibumoo.

Ina yoo fulina qayroo kosi maꞌay gu daa⁄adige gu sabiibu daa tinqimige.

12 Ilaa kosi maati daa⁄adayay butli sa buraa wa⁄a da sabiibu,

kara ⁄atloo kosi maati ⁄abakwayay poy sa ilibaa wa⁄a.

13 Sabulooni ilaciyaa gu kenga gu tlawa da didirige ibiidi,

kenga gosi gu tlawa da didiri ti daqa da ilii qadidimisu meeli tleehhita.

Digimaa gu hhapee dosi, maati hhapee da Sidooni qatlisi.

14 Isakaari maati daqway gu kooma pahha ⁄uuru,

hiĩ goó qaamida sa hiiloaruu tla⁄aã gu tlokay gosii giyoó geregedine.

15 Ina giyoo ane daqa da hhoi, da ilii fiifisa,

haa idoo hhapee giraa ilii boo⁄odi,

hiti ilabiiraaidisi danda gosi sa geregeda da idoo day looi,

haa hingii ca⁄asi sa yondu gu tongaiimaa gu ⁄uureemisu.

16 Daani maa ilabuꞌumiisay gu hida kosi tleehhidi,

haã da leẽ tla⁄aã gu motoliya wakayge da Israeeli.

17 Daani maa deesu tleehhidi kenga gu balabalaage,

deesu doó tlaꞌamuudiye pahha, kenga gu amooge,

hikira goó kikihha gobini gu faraasi,

heedi goóy dadawa pahha faraasige, maay huui, hinti kongoqi.

18 Ye Taataa Iliitleemu, ha baqaaqamida ilabuꞌuru googu!

19 Gaadi dugumaa cira iliitlai ha hida goó afii⁄utlidee idadu,

teꞌesii, ina gimaa siragusina alungo, gigi iliitlai.

20 Hhapee da Aseeri maayii ca⁄asida ⁄agoo daa cuuꞌudi hari khisla,

ina maayii ca⁄asi ⁄agoo daraay boo⁄odi ⁄agoo ha mutemi.

21 Nafutaali maati tlaaqitimoo daa geemay pahha,

goó ta⁄ata⁄amidi daqa nama daqa,

goó laqwala yaꞌay gu hhoi.

22 Yoseefu maati sabiibumoo goó boo⁄a pahha ⁄aamu hari khisla,

sabiibumoo goó boo⁄a gu kenga gu hhaahhiyage waara,

hiĩ elemu kosi goó slaabimee bi⁄inaage.

23 Hari slahhaaꞌamee fa⁄ayaa dosi da khua cakhadiru hari kasamu, gu iliitlaiyay.

Inay gu cakhadiyay hari fayuũ haa gu labaꞌasiyay.

24 Ga⁄aree dosi kahhada dagaa tosaa coo⁄imi wanta,

kara dabaiĩ kosi sigaa qay ⁄uuru guri sabiru,

harii dahhasaraa da ⁄uuru gu Iliitleemu gu Yakoobo,

ina doó eteedine slime Deꞌemiisay haa Hhafida gu Israeeli.

25 Sa gimba Iliitleemu gu taataa goó iliiaꞌay ugu,

ina na kona ⁄uuru sliimaa, ina nugoó ⁄aafi,

hari amoo da slawaraa tlubay rawgo, hhaahhiyoo gu maꞌay gu hhapeege waaree,

hari amoo da qawaraa yaꞌay wa⁄a haa kuꞌunaanay.

26 ⁄aafaraa da taataa googu dati didiri,

hingii catidi hata da omeeri gu segi goóba hiifaakoo,

kara yoóti kaba⁄ada idadu hhakaꞌa gu hhoi,

doó slahhaahhaaiye gu tioo gu koraraa goóba hiifaakoo.

⁄aafatee saga gu Yoseefuge wante,

haa pandaca⁄ay da nanku mutemige, tla⁄aã gu hhiee kosii.

27 Benyamiini maati takuraaimoo gu dihhu pahha,

hari heetlawaa yoóti ⁄agina idoo giyoó ooyiye slagaadu gosaa,

kara hari khwayaiĩ yoóti deehhina idadu goó meetee.”

28 Hhakee na tlaatleesoo da motoliya mibi haa cada da Israeeli. Kara hiĩ na gimba taataa gooina giyaa ilakaay sa inay, qatlay giyaa ilii ⁄aafi inay. Ina gi ⁄aafi yaꞌay sliimaa gu hhawatee, idoo giyaa ilii wariiboo⁄i gooay.

Yakoobo gwaaꞌaraa dosi

29 Da hheꞌesi Yakoobo gi ilakaay yaꞌay kosi tuba, “Ana gwaaꞌaraa dooi yaani daadaauusidi, mangu ilagaasi haa hida koi, gwaa giyaadee kaka⁄u. Hani qaasa kaydee sliimaa haa ayiĩ koi daqa maraiya da qaymoo da Efuroonige waara, hiĩ gu Hiitimoo. 30 Maraiyati yade wanta Makipeelage, ilaciyaa haa Mamuree hhapee daa Kanaanige. Aburahaamu giyaati kirigi maraiyatee haa qaymootee daqa Efuroonigo Hiitimoo, ma daqa dosi tleehhiti da iliiqamidu hiidayuuma dosi. 31 Teꞌesii na daqa daa ilii qaasi Aburahaamu haa Saara hadee dosi, daganaa ilii qaasi Isaaka haa Rebeeka hadee dosi, kara yade hagi qaasi Leyaa. 32 Qaymotee haa maraiyatee da waara tla⁄aã kosii, dagaati kirigi daqa hida gu Hiitigo.” 33 Qatlay Yakoobo giyaa ilii hheꞌesi ilakaawa yaꞌay kosi, yaay ki⁄isi yeꞌeeroo kosi buburuuge, gi dafidi dandaꞌaaliya, hingigi ilagaasi haa hida kosi gwaa giyaadee kaka⁄u.