Efurayiimu haa Manaase ⁄aafa dooina ha Yakoobo
48
1 Qariqaaqari gimbaki giyaa ilii cati, Yoseefu sugugi kaay tuba, “Yuꞌudiyaa, taataa googu mama⁄i hari khisla.” Teesaaqay gi hada kay daqa taataa gosii sliimaa haa yaꞌay kosi cada gu hhawatee, Manaase haa Efurayiimu. 2 Qatlay Yakoobo sugwaa ilii kaay tuba, “Nankoogu Yoseefu yaani khay sa arimaa doogu,” Israeeli gi slay ⁄uuru, gi tosaa ibiidi buburuuge, mangu cehheemisiri.3 Yakoobo gi kaay sa Yoseefu tuba, “Iliitleemu gu kooma ⁄uuru goõ, hinaa ilii khay yade Luusuge hhapee da Kanaanige, yade hinigi ⁄aafi. 4 Ina gi kaay sa ana tuba, ‘Yuꞌudiyaa, laqwalida yaꞌay wa⁄a, faadoo da laqwaloo doogu hiidakusi tlakhwayde hari khisla. Kara kookoo gu kabiraa da hida wa⁄a tleehhita. Teesaaqay, laqwaloo doogu saga hadisa hhapeti, maga tawaaliniri haa ma tooina tleehhiti koraraa goóba hiifaakoo.’ ”
5 Inkoo, Yakoobo gi ilakoomi kaawa tuba, “Yaꞌay koku gu cada, Efurayiimu haa Manaase, hhaã giyaa slaydi tiꞌii Misirige, qatlay gaa ilii kahhe dawaraa tiꞌii, ti yaꞌay koi tleehhidiyay. Kara inay cada koinaa ti aalinay daqa dooaa, Rubeeni haa Simi⁄ooni gooay. 6 Yaꞌay hhakee gimaa laqwalide qariqaaqari, maati koku tleehhidiyay. Inkoo, aalimee dooina hhapee dooinay maati daqa Efurayiimu haa Manaase dahhada. 7 Hanti teesaaqay laqi, sa gimba gu yaayii doogu, Raheeli. Qatlay ana gaa ilii kikaaki⁄ie hhapee da Padaanigoa ina gi hhanti hhapee da Kanaanige, qatlay gaa ilii kahhane dawaraa taysi tongoo da Efuraatige, sinigi may ana slahhaaꞌamee wa⁄a. Inkoo, ana hagagi tooaa qaasi ina kenga gu balabalaa daa Efuraati khuꞌusidi.” (Hari uma waku, na Beteleheemu.)
8 Qatlay Israeeli giyaa ilii arimi yaꞌay gu Yoseefu, gugi maasi tuba, “Hhaã ti yaꞌay gu miyaa?”
9 Yoseefu gugi ilaki⁄isi taataa gosi tuba, “Hhaã ti yaꞌay koi gu hhawatee, sinaa qay ha Iliitleemu ga ilii tiꞌii waaree Misirige.”
Da hheꞌesi Yakoobo gi kaay tuba, “Aare, satisankii ilaciyaa gooii, magi ⁄aafi.”
10 Qatlaykeesii ilaa gu Israeeli yaa khuꞌuuꞌunaaiiba naraꞌa, sa gimba ina yaa gaduudi hari khisla, yaati khuꞌuuꞌuna hari maana. Teꞌesii, Yoseefu yaagii satisi yaꞌay kosi ilaciyaa gu taataa gosi, ina gigi tooinaa humbaꞌamidi haa gigi khambaciicimi.
11 Da hheꞌesi Israeeli gi kaay sa Yoseefu tuba, “Ana haa ilahudeedemisaaba ambee, kara hagwaa aloo hiidahhasa arimaa ugu. Inkoo, kaslenkwaa, Iliitleemu niĩ iliiay ana, arimaa ugu haa yaꞌay koku see slime!”
12 Teꞌesii Yoseefu gigi surukusi yaꞌay kosi tlanu gu taataa gosaa,b ina see gi keebeeꞌedi hhapee naqatloo pandaa dosii. 13 Kara Yoseefu gii tlaysi yaꞌay hhakee kosi cada koinaa, Efurayiimu gugi qadidisi hari daba gu basa gu Israeeli, kara Manaase hari daba gu ⁄uya, gigii satisi ilaciyaa haa kookoo gooina. 14 Israeeli gi leehhisi daba gosi gu ⁄uya, gugii qaasi saga gu Efurayiimuge, ina giyaamati nanku yaꞌaycataa see, kara daba gosi gu basa gugii qaasi saga gu Manaasege, ina giyaamati nanku badiisu.
15 Da hheꞌesi, teꞌesii Yakoobo gi ⁄aafi Yoseefu, gi kaay tuba,
“Ye, Iliitleemu, ugu na Iliitleemu gu ayiĩ koti Aburahaamu haa Isaaka,
hiĩ gwaa muriidiri ibinaa dooinay.
Ugu na Iliitleemu hiĩ gu deꞌemiisay gooi, ibinaa dooii goõ.
16 Ugu na Malayikakee, gunaa ilabuꞌumu ana ilaqaꞌadu sliimaago.
Hagu firiirima Iliitleemu, ⁄aafi qaraiyati.
Uma gooi haa umaiĩ gu ayiĩ koi Aburahaamu haa Isaaka,
ibiidiyee daqa ibinaa da qaraiyatii,
inay see laqwaliyee, faadoo dooina hiiroogite khoorooge.”
17 Qatlay Yoseefu giyaa ilii arimi taataa gosi, hindii qaasi daba gosi gu ⁄uya saga gu Efurayiimuge, dugwaa muunaboo⁄eesiiba. Teꞌesii, ina gi ooy daba gu taataa gosi, giyaa slai surukusa saga gu Efurayiimugo, maguu qaasi saga gu Manaasege. 18 Yoseefu gi kaay sa taataa gosi tuba, “Taataa, hhanti teesaaqay laqada! Hiĩ guri bara doogu waara da ⁄uya na nanku badiisu. Qaasii daba googu gu ⁄uya saga gosii.”
19 Taataa gosi gi siꞌi, gi kaay tuba, “Nankoy, ana khua. Yaꞌay gu Manaase see, maa kabiraa da didiri tleehhidiyay, damaa daareesiye. Teesaaqay see, hhia gosi gu coko⁄o Efurayiimu, maa heedi gu didiru tleehhidi ba⁄ay da Manaase see, kara laqwaloo dosi maa hhapapu wa⁄a tleehhidiyay.” 20 Letutee Yakoobo gigi ⁄aafi inay, gi kaay tuba,
“Hari umaiĩ kokunay, hida gu Israeeli hingi ⁄aafiyay, kaayay tuba,
‘Dugu ⁄aafiye ha Iliitleemu, idoo giyaa ilii ⁄aafi gooay Efurayiimu haa Manaase.’ ”
Hari amoti Yakoobo, gi giyaadisi Efurayiimu pandaa da Manaasege.
21 Da hheꞌesi Israeeli ginaa ilii kaay sa Yoseefu tuba, “Yuꞌudiyaa, ana gwaaꞌaraa doy yaani daadaauusidi. Teesaaqay see, Iliitleemu maa sliimaa wana haa unkuray balalu sliimaa, kara maa ki⁄isi unkuray hhapee da ayiĩ kokunay. 22 Kara ugu, hiĩ gu rawaa gu hhiee kokuu waara, ana sugu hadisa daqa waka da hhoi daayii looi, da onke waara yade Kanaanige,c daqatira gaay ⁄utli dabaiĩ gu Waamoorigo hari pangaa haa ga⁄aree dooi.”