Yakoobo ⁄aafaraa Faraaw
47
1 Yoseefu qatlay giyaa ilii ki⁄i Goseenigo, gi kaawa kay daqa Faraawge tuba, “Taataa gooi haa hhiee koi yaani khayri yadaa hhapee da Kanaanigo, yaa konay bee⁄u, aaraa, yakway sliimaa haa khooslay gooina see goõ. Inkoo, yade wanay yaamu gu Goseenige.” 2 Yoseefu gii leehhi hhiee kosi kooani tla⁄aã gooinaa, gigi leehhisi daqa Faraawge, magu cehheemisuu kayri.3 Faraaw gigi maasi hhiee hhakee kosi gu Yoseefu tuba, “Unkuray yondu mala guni khuꞌuday?”
Inay gugi ilaki⁄isiri tuba, “Looimoo goori, dandiray yondimiisee doogu ti deꞌeẽ gu kuꞌunaanay guni khuana ayiĩ koti pahha, idoo giyaa ilii yondimaamidiyee.” 4 Slime inay sugugi kaayri tuba, “Dandiray hanti khayni sa ibinaa yaamulooee gooba pahha hhapetii qoomay gu coko⁄o, sa gimba yade hhapee da Kanaanige qori guti dihhu hari khisla, kara sluufaa gu deꞌeẽ kuꞌunaanay see hhaku. Inkoo, hhooa looimoo goori, haguũ firini, sandi ⁄imbide, ma ibiidani yade Goseenige.”
5 Faraaw gi kaay sa Yoseefu tuba, “Taataa googu haa hhiee koku yaani daqa dooguu khayri. 6 Kara hhapeti sliimaa da Misiri dabaiĩ kokuu wanta, haysi sa taataa googu haa hhiee koku daqa da hhoi hari khisla da hhapetii waara. Inkoo, inay sigi hadiside Goseeni, ma ibinaa kayri taysi. Kara bere khuꞌuda tla⁄aã gu hhiee kokuu gu khuee naraꞌa deꞌeẽ kuꞌunaanay, leehhakii, ma hida goo wariiqadimidee kuꞌunaanay gooi tleehhidiri.”
7 Da hheꞌesi Yoseefu haraagi khay taataa gosi Yakoobo pandaa da Faraawge, magu cehheemisi. Teꞌesii Yakoobo gi ⁄aafi Faraaw. 8 Faraaw gi maasi Yakoobo tuba, “Inkoo, ugu koraraa maka konta?”
9 Yakoobo gugi ilaki⁄isi tuba, “Koraraa gu hhiyuuma doy ti koraraa miyaa leẽ haa mibeeri tami. Koraraa koi hinti coko⁄ayri haa yaati haciri ilahufiduu, kara dayaaiiba daqa koraraa daa ibiidi ayiĩ koi hida goó loloymee pahha.” 10 Teꞌesii Yakoobo kara gi ⁄aafi Faraaw haa gugi aareesi, gi waaudi pandaa dosaa.
11 Yoseefu gi asu qay daqa da ibinaa sa taataa gosi haa hhiee kosi hhapee da Misirige haa sigigi hadisi daqa da hhoi hari khisla, da ilii ibinaa hhapee da Rameseesige,a Faraaw gooay idoo giyaa ilii ilafahhi. 12 Yoseefu slime gi hadisi ⁄agoo sa taataa gosi, hhiee kosi sliimaa haa hida wakinay goõ gu aya gu taataa gosi, ilakhuukhuꞌusa da faadoo da yaꞌay koinay.
Yoseefu tawaaloo dosi qatlay gu qori gu dihhuge
13 Qatlaykii qori gu dihhu hari khisla yaagi asu hiica⁄i, maꞌaana ⁄agoo yaay faakidi hhapee da Misirige haa hhapapu gwaa ilaciyage waaree. Hida goõ gu Misiri haa gu Kanaani gi slosloiniri hari khisla, sa gimba gu qorikee gu dihhu. 14 Yoseefu gii kurunkuride peesay goõ daqa hida gwaa khakhaakhawee sa kiriga da baruũ hhapee da Misirigo haa Kanaanigo, haa gugi tosaa leehhisi daqa mara gu didiruge gu mutemi Faraaw. 15 Qatlay hida goõ gu Misiri haa gu Kanaani digaa ilii afiifaaki peesay gooina, hida gu Misiri gwaagi ilii khayri Yoseefu haa sugugi kaayri tuba, “Sandi hadiside ⁄agoo. Sa soꞌoy kaka⁄ana sa qori gu dihhu pandaa dooguu? Yuꞌudiyaa, inkoo, peesay goori hindii faaki!”
16 Yoseefu gi ilaki⁄isi tuba, “Sa gimba peesay googuna hindii faaki, leehhisaa daqa dooii kuꞌunaanay googuna, mangu alaalaani haa baruũ.” 17 Inay yaagi asu leehhimisiri kuꞌunaanay gooina daqa Yoseefuge, yakway, faraasi, aaraa, bee⁄u haa daqwaai, ina sigigi hadisi baruũ hari amoo da alaalaaru. Korikee Yoseefu gigi omi, sigigi hadimisi baruũ hari amoo da alaalaaru haa kuꞌunaanay gooina goõ.
18 Kori gwaa sirakoomu, gwaagi kara ilii khayri Yoseefu haa sugugi kaayri tuba, “Looimoo goori, gu lou sugu yakwanaaba, peesay goori goõ hindii faaki, kara kuꞌunaanay goori see hiĩ koogu tleehhidi. Inkoo, looimoo goori, dandiray konaaba idoo lensee diĩ meti da hadisaraa sa ugu alaalaaru gu barunge. Slaqoo koti kilesi ninti meetiri haa qaymamuu koti. 19 Ha soꞌoy kaka⁄ana pandaa dooguu, dandiray gi mayna qaymamuu koti, ma tlakwaakwayri? Inkoo, handi kirigide dandiray sliimaa haa qaymamuu koti hari baruũ, ma tongee da Faraaw tleehhidani, kara qaymamuu koti see ma kosi tleehhidiri. Dandiray sandi hadiside baruũ haa pisagaroo da daamisu, ma mayni kaka⁄u haa qaymamuu koti hhanti meetiyay ihiĩꞌi gi tlakwaakway.”
20 Teesaaqay Yoseefu gi kirigi qaymamuu goõ gu Misiri sa Faraaw. Hida sliimaa gu Misiri gi naadiniri qaymamuu koina, maꞌaana qori gwaa dihhu hari khisla. Hhapee sliimaa gi khoosliya da Faraaw tleehhiti. 21 Kara Yoseefu, hida goõ gu Misiri gigi tongee tleehhidisi, bara lengo da Misiri, bara da cadii naqatloo. 22 Teesaaqay see, Yoseefu yaa kirigiiba qaymamuu gu hhapalooee, sa gimba inay yaa slaslaaslayay deehhoo dooina goõ daqa Faraawgo, teꞌesii inay yaa konay ⁄agoo. Inkoo, hiĩ na gimba saa mayri naadiru qaymamuu koina.
23 Da hheꞌesi Yoseefu gi kaay sa hida gu Misiri tuba, “Yuꞌudaa, letuti hanguũ kirigi unkuray gonkokunaa sliimaa haa qaymamuu kokuna sa Faraaw. Inkoo, sangu hadisi pisagaroo, ma daamisidiri qaymamuu kokunay. 24 Qatlay gamaa ilii slaydee baruũ, lamaa hadisiday sa Faraaw leẽ da kooani da baruũ googuna. Cigahha da kooani damaa meeta, maa pisagaroo dooguna tleehhite haa ⁄agoo sa unkuray sliimaa, hida gu ayeemaa kokuna haa yaꞌay kokuna.”
25 Inay gugi ilaki⁄isiri tuba, “Looimoo goori, ugu haã ilabuꞌunti ibinaa doori! Inkoo, sandi laqante hhoinay googu gu didiru pandaa da looimoo goorii, dandiray tongee da Faraaw tleehhidana.”
26 Teꞌesii Yoseefu gi qaasi gimbakee, ma sariyaa tleehhiti hhapee da Misirige. Kara sariyatee kahhada wanta letuti naqatloo tuba, leẽ da kooani da buꞌuruu dati Faraaw. Ti qaymamuu gu hhapalooee kilesi diginaa nangusiiba ha sariyatee, maꞌaana digaa kirigiiba sa Faraaw.
Yakoobo ilakaawa dosi
27 Hida gu Yakoobo yaa ibiidiri taysi yaamu gu Goseenige, hhapee da Misirige. Inay taysi gi slayri khooslay wa⁄a haa hingigi wariilaqwaliniri haa faadoo dooina gii roogiti hari khisla.
28 Yakoobo gi ibiidi hhapee da Misirige koraraa mibi haa fanqu, koraraa gu ibinaa dosi gi dayri miyaa leẽ haa mibeeri cigahha haa fanqu. 29 Qatlay gu gwaaꞌaraa dosi Israeeli giyaa ilii daadaausi, ina gi eteedi nankosi Yoseefu, sugugi kaay tuba, “Hanguũ firimi, bere gu lou, haã slay hhoinay gu didiru haa qasaw pandaa dooguu, qaasii daba googu hari biraa gu tlaana dooi,b sinii fadite ubee, sini yondita ilakaawa dooi hari iliipaꞌaruu. Kara ilakaawa doy na nahaã. Hanimaa hhanti qaasida ana tay Misirige. 30 Qatlay gamaa ilii qaate sliimaa haa ayiĩ koi, hanii oode Misirigo, hani qaasakayde aysasu koinay.” Yoseefu gi ilaki⁄isi tuba, “Ana maa yondiida teesaaqay gaã ilii kaadi gooay.”
31 Yakoobo gi ilakwikwihhi ina tuba, “Seelimi daqa dooii.” Da hheꞌesi Yoseefu gi seelimi daqa dosii. Teꞌesii Israeeli gi keebeeꞌedi buburuu gosii, haa gi hhaꞌaleesi Iliitleemu.