Yakoobo hhiyuuma dosi Misirige
46
1 Teesaaqay, Yakoobo gi tlaatleesi hiiyuuma dosi da Misiri kawa sliimaa haa khooslay gosi goõ. Qatlay giyaa ilii day Beeri-Seebage, gi hadisi sadaaka sa Iliitleemu daa hhaꞌaleelemisiye ha Isaaka, taataa gosi.2 Hari amasi Iliitleemu gi cocoi haa Israeeli, tay tletaage wana, gugi eteedi tuba, “Ye Yakoobo! Yakoobo!” Yakoobo gi ilaki⁄isi tuba, “Taataa, ana hagu akhaakhamisa.”
3 Iliitleemu gi kaay tuba, “Ana na Iliitleemu, Iliitleemu gu taataa googu. Ugu hhanti tlaꞌamuta Misiri kawa, maꞌaana taysi hagu hhapee da didiri tleehhidisa. 4 Ana loi sliimaa hadakaw haa ugu taysi Misirige, kara gu lou, sugwaa ki⁄isa laqwaloo doogu tay. Qatlay gamaa ilii hhante, maa dabaiĩ gu Yoseefuge hhanta.”
5 Yakoobo ginaa ilii waaudi teꞌesaa Beeri-Seebago. Yaꞌay kosi gu hhawatee gurigi waaudiri taataa gooina. Yaꞌay hhakee gwaa kahhee gu digidakwi sliimaa haa tigay koina, gigii guumisiri kokoteenaaee hhakiray, daa ya⁄abi ha Faraaw doó dukhudukhune ha daqwaai. 6 Inay slime gi hubidiri kuꞌunaanay gooina sliimaa haa khooslay gooina goõ giyaa slayri hhapee da Kanaanige, gi tooinaa waaudiri Misirige. Yakoobo haa hiidayuuma dosi goõ gi waaudiri yade Misirige. 7 Teꞌesaa gi hhiyuudi haa yaꞌay kosi, okookoiĩ haa amaamau kosi Misiri naqatloo.
8 Hhaã na umaiĩ gu yaꞌay gu hhawatee haa okookoiĩ kosi gu Israeeli gwaa sliimaa waaudee taysi Misirige.
Rubeeni naa badiisu gosi gu Yakoobo.
9 Rubeeni yaa kona yaꞌay gu hhawatee, umaiĩ koina naa
Khanooki, Paalu, Khesirooni haa Kariimi.
10 Simi⁄ooni yaa kona yaꞌay gu hhawatee, umaiĩ koina naa
Yemueeli, Yamiini, Ohaadi, Yakiini, Sohhaari haa Sawli nanku hadee daa Kanaanitoꞌoo.
11 Laawi yaa kona yaꞌay gu hhawatee, umaiĩ koina naa
Gerisooni, Kohaati haa Meraari.
12 Yuuda yaa kona yaꞌay gu hhawatee, umaiĩ koina naa
Eeri, Onaani, Selakhaa, Pereesi haa Seera. Eeri haa Onaani yaa hhapee da Kanaanige hhamaahhaniri.
Pereesi yaa kona yaꞌay gu hhawatee, umaiĩ koina naa
Khesirooni haa Hhamuuli.
13 Isakaari yaa kona yaꞌay gu hhawatee, umaiĩ koina naa
Toola, Puuya, Yasuubu haa Simurooni.
14 Sabulooni yaa kona yaꞌay gu hhawatee, umaiĩ koina naa
Sereeda, Elooni haa Yaleeli.
15 Hhaã na yaꞌay gu hhawatee gu Leyaa, giyaa laqwalidi sa Yakoobo taysi hhapee da Padaani-Araamuge sliimaa haa sagameeriya dosi Diina. Leyaa, yaꞌay kosi gonkoinaa haa okookoiĩ kosi yaa mibeeri tami haa tami.
16 Gaadi yaa kona yaꞌay gu hhawatee, umaiĩ koina naa
Sifiyooni, Hhaagi, Suuni, Esibooni, Eeri, Aroodi haa Areeli.
17 Aseeri yaa kona yaꞌay gu hhawatee, umaiĩ koina naa
Imuuna, Isihhiifa, Isihhiifi haa Beri⁄aa.
Hhioo dooina yaa Seera.
Beri⁄aa yaa kona yaꞌay gu hhawatee, umaiĩ koina naa
Khebeeri haa Malikieeli.
18 Hhaã na yaꞌay haa okookoiĩ mibi haa lahhoꞌo gu Siliipa, giyaa laqwalidi sa Yakoobo. Siliipa yaa tongitoꞌoo, Labaani giyaa hadisi sa sagameeriya dosi Leyaa.
19 Yakoobo haa Raheeli yaa laqwaliri yaꞌay cada gu hhawatee, umaiĩ koina naa
Yoseefu haa Benyamiini.
20 Taysi hhapee da Misirige, Yoseefu gi slay yaꞌay cada, Manaase haa Efurayiimu daqa hadee dosii Asenaati, hotu Potifeera, hiĩ gwaa hhapalooay gu didiru gu diini hhapee da Oonige.
21 Benyamiini yaa kona yaꞌay gu hhawatee, umaiĩ koina naa
Beela, Bekeeri, Asibeeli, Geera, Namaani, Eekhi, Roosi, Mupiimu, Hupiimi haa Ariidi.
22 Hhaã na yaꞌay mibi haa cigahha gu Raheeli, giyaa laqwalidi sa Yakoobo.
23 Daani yaa kona naw, uma gosi na Khusiimu.
24 Nafutaali yaa kona yaꞌay gu hhawatee, umaiĩ koina naa
Yaseeli, Guuni, Yeseeri haa Sileemu.
25 Hhaã na yaꞌay fanqu gu Bilihhaa, giyaa laqwalidi sa Yakoobo. Bilihhaa yaa tongitoꞌoo, Labaani giyaa hadisi sa sagameeriya dosi Raheeli.
26 Laqwaloo goõ hatee Yakoobo giraa waaudi Misirige, yaa hida mibeeri lahhoꞌo haa lahhoꞌo, tigay gu yaꞌay kosi gu hhawatee digaa ilafaadiiba. 27 Sliimaa haa yaꞌay cada gu hhawatee gu Yoseefu da laqwali taysi Misirige, laqwaloo goõ da Yakoobo daa Misirige waara, yaa hida mibeeri fanqu.a
Yakoobo haa laqwaloo dosi dawaraa dooina Misirige
28 Qatlay giyaa ilii daadaauusiri Misirige, Yakoobo gi giyaadisi Yuuda daqa Yoseefuge, ma sugu tafaꞌasa kay naraꞌa amoo dari dawaraa yaamu gu Goseenige. Qatlay Yakoobo haa laqwaloo dosi giyaa ilii dayri Goseenige, 29 Yoseefu gi ilakhuukhuꞌusi kokoteeni gosi doó duukhiye ha faraasi, gi waaudi, gi amoodabaawa kay taataa gosi Israeeli taysi Goseenige. Yoseefu qatlay giyaa ilii day daqa taataa gosii, gugi khambacimi haa gi ⁄aa⁄i kwaahha da taataa gosii qoomay gu tleedu. 30 Teꞌesii Israeeli hari hhaꞌaloo da didiri, gi kaay sa Yoseefu tuba, “Inkoo, gamati gwaai see naraꞌa, maꞌaana haguũ arimi haa haã caahhi tuba, ugu kahhada slafida.”
31 Yoseefu gi kaay sa hhiee kosi haa hida goõ gu aya gu taataa gosi tuba, “Inkoo, daraay boo⁄i ana hadakawa daqa Faraawge, ma sugu kaawa kay tuba, ‘Hhiee koi haa hida gu aya gu taataa gooi, gwaa ibimaamidee hhapee da Kanaanige, yaani khayri daqa dooii. 32 Inay yoóti deꞌenay kuꞌunaanay. Kara haraani khayri aaraa, bee⁄u, yakway koina sliimaa haa khooslay gooina goõ.’ 33 Faraaw dangoo eteedi unkuray haa dangugi maasi tuba, ‘Yondu mala guni khuꞌuday?’ 34 Unkuray sugooti kaadee ubee, ‘Looimoo goori, dandiray yondimiisee doogu, kuꞌunaanay gunoó deꞌena taysaa loaa daaqauumaa doraa letuti naqatloo, idoo daa ilii laqi gooay ayiĩ koti.’ Teesaaqay kaawa, ma dangu ⁄imbi ibinaa yaamu gu Goseenige, maꞌaana deꞌemiisee goõ da kuꞌunaanay dagoóti waki ha hida gu Misiri.”