Yoseefu hingigii ca⁄asi daqa hhiee kosii
45
1 Teꞌesii Yoseefu giyaa ilii akhasi gimbakee gu Yuuda, hingirigi slanqadi tlaatlahhasa ⁄aa⁄imu pandaa da tongee dosii daa qadimiti ilaciyaa kosii. Ina gigi ilii maahhi hari afoo da didiri tuba, “Gonkokunaa waauda pandaa dooaa!” Teesaaqay, Yoseefu gi meeti haa hhiee kosi kilesi qatlay hingaa ilii ca⁄aa⁄amisiye daqa dooinay. 2 Ina gi tlaatleesi ⁄aa⁄imuu hari afoo da didiri, tongee dosi hida gu Misiri gwaati amoolee akhasiri. Kara hida gu aya gu Faraaw see gi akhasiri gimbakee.3 Yoseefu gi kaay sa hhiee kosi tuba, “Ana na Yoseefu!” Ina gigi maasi tuba, “Taataa gooi kahhiyaa slafi?” Teꞌesii, hhiee kosi yaati bakairi, yaay dahhasiriiba ilaki⁄isa ina, sa gimba inay yaa tlaꞌamuumuudiri pandaa dosii.
4 Yoseefu ginaa ilii kaay daqa hhiee kosii tuba, “Sataaru ilaciyaa koii.” Qatlay inay gwaa iliisatiri, gi kaay tuba, “Ana na hhia googuna Yoseefu, hikira gwaa naadintiri Misirige! 5 Inkoo, hhanti slahhaahhaaꞌaday, kara hangu hhanti ilawaasiday, sa gimba hanaa naadintiri ana tay. Iliitleemu naraa khay ana tay, ma sangwaa giyaadi, ma ilabuꞌumi ibinaa da hida wa⁄a. 6 Maꞌaana inkoo ti koraraa cada qori hiĩ wana hhapee sliimaage. Kara kahhiyay wanay koraraa wakinay kooani, hida maa doosliyaaiiba ma buꞌuru see. 7 Iliitleemu hiniraati khay ana tay, ma sangwaa giyaadi unkuray, ma hiidahhasi ilabuꞌuru unkuray labaꞌasu gu qori gu didiruge, hari afiigweeda da didiri, haa gi meesi laqwaloo dooguna khoorotii. 8 Inkoo, ti unkuray gooba naraa khaydiri ana tiꞌii. Ti Iliitleemu naraa khay ana tay. Iliitleemu naa qaasi ana tiꞌii, mayii saasahhamidi gimba daqa mutemi Faraawge. Kara Iliitleemu hinaa qaasi ana, heedi goó wariiqadimida mara gosi goõ haa heedi goó tawaalima hhapee goõ da Misiri.
9 Inkoo, waauda cira daqa taataa gooii haa sugu kaawakaydee ubee, nankoogu Yoseefu sugwaani kaay tuba, ‘Iliitleemu hinaa qaasi, ma heedi gu didiru tleehhidi hhapee sliimaa da Misirige. Teesaaqay, haa hhantii kaaꞌada, khawa cira daqa dooii. 10 Ugu ibita yaamu gu Goseenige tiꞌii hhapee da Misirige ilaciyaa haa ana, ugu sliimaa haa yaꞌay koku, okookoiĩ koku, kuꞌunaanay googu haa khooslay googu goõ. 11 Qatlay gamaa ilii taysi wante, ana hangumaa oma ugu, hida gu aya googu sliimaa haa kuꞌunaanay googu, ma maydiri kaka⁄u sa qori. Maꞌaana kahhiyay wanay koraraa kooani wakinay gu qori.’ ”
12 Yoseefu gi kara kaay tuba, “Inkoo, unkuray sliimaa haa hhia goori Benyamiini haã antiri hari ilaa kokuna tuba, gu lou ana ti Yoseefu gu cocaacoa haa unkuray. 13 Taa⁄amida kaawa sa taataa gooi ubee, ana kooma muree da didiri tay hhapee da Misirige. Kara sugu kaade gimba sliimaa gaã antiri qatlay gaã ilii tiꞌii wantee. Taa⁄amida luguraa khayday cira tay.”
14 Da hheꞌesi gi khambacimi hhia gosi Benyamiini, gi ⁄aa⁄i. Benyamiini see gugi khambacimi tay tooinaa ⁄aa⁄iyay. 15 Yoseefu tay tosaa kahhi ⁄aa⁄i, gi humbaꞌamidi hhiee kosi goõ. Qatlay giyaa ilii hheꞌesi ⁄aa⁄imuu, hhiee kosi gi cocoiri haa ina tlaꞌamee see hhaka.
Faraaw kwahhasuusa da Yakoobo Misirige
16 Qatlay gimbakee gu khawaraa da hhiee gu Yoseefu, giyaa ilii day daqa mara gu Faraawge, Faraaw haa hida kosi goõ gu deni, gi hhaꞌaluumidiri hari khisla. 17 Faraaw gi kaay sa Yoseefu tuba, “Kaay sa hhiee koku ubee, ubaabisiyee khooslay gooina daqa daqwaai koinay, ki⁄iyee hhapee dooinay da Kanaanige. 18 Inay haraa khayee tiꞌii taataa gooina haa hiidayuuma dooguna goõ. Ana sangu hadisa daqa da hhoi loi da ilii ibinaa tiꞌii hhapee da Misirige. Taysi hiidahhasiyay slawaraa ⁄aamu sliimaa gu hhou gu hhapeti.
19 Kara guũ ilafahhi ambee, ‘Sigi kaade hhiee koku hiioyee kokoteenaaee doó dukhudukhune ha daqwaai Misirigo, maa ubaabiri yaꞌay koina gu digiidakwi haa tigay koina, yaa ubaabiyee taataa googuna haa laa sliimaa khayay. 20 Sigi kaade hhanti tlaꞌamuudiyay sumuku, hari khawaraa khooslay gooina tay, sa gimba sigi hhadisa daqa da hhoi loi, da ilii ibinaa tiꞌii hhapee da Misirige.’ ”
21 Yaꞌay gu Israeelia gi teesaaqay laqiri. Yoseefu sigigi hadisi kokoteenaaee, Faraaw idoo giyaa ilii ilafahhi gooay. Kara sigigi hadisi ⁄agoo da ⁄agoo amooge. 22 Ina yaa hadisi qayroo gu ⁄abi sa inay. Kara, Benyamiini sugwaa hadisi sekeelib miyaa tami da feesa haa qayroo peyaa kooani gu ⁄abi guyii fookaraa. 23 Kara gi ya⁄abi daqa taataa gosii daqwaai mibi gwaa ubaabee idadu gu hhoi gu Misiri, daqwaai gu tigay mibi gwaa ubaabee baruũ, mukaatee haa ⁄agoo da ⁄agoo sliimaa haa taataa gooina amooge. 24 Da hheꞌesi Yoseefu hingigi aareemisi haa hhiee kosi. Qatlay giyaa ilii waauuꞌumidiye, gigii gadimi tuba, “Hhanti naanaqamitay amooge!”
25 Teesaaqay, gi waaudiri Misirigo, gi ki⁄iri ayage daqa taataa gooinay Yakoobo hhapee da Kanaanige. 26 Qatlay giyaa ilii dayri, gi kaayri sa taataa gooina tuba, “Taataa, Yoseefu kahhi slafi! Kara ina noó tawaalina hhapee goõ da Misiri!” Teꞌesii, taataa gooina dugugi ooy ha amaaoo, gi bakai, yaa ⁄imbiiba gimba gooina.
27 Qatlay giyaa ilii catimisiri sa taataa gooina gimbakee sliimaa digaa ilafahhi ha Yoseefu, kara giyaa ilii arimi kokoteenaaee hhakee sugwaa ya⁄abi haa Yoseefu, gwaa khawee dugurima waaudi Misirige, muuna gu taataa gooina gi kaanahhasi haa gi hhaꞌaluudi hari khisla. 28 Israeeli gi asu kaay tuba, “Inkoo, haã ⁄imbi ti guti lou! Nankoy Yoseefu kahhi wana slafi, ana cira hadakaw, magu arimaa kay ga ilii kahhe gwaaꞌaraa.”