Yoseefu qulu⁄uũ gosi
44
1 Inkoo, hhiee kosi giyaa ilii slaiyee ki⁄eemo yaamu koinay, Yoseefu gi ilafahhi heedikee kosi goó wariiqadimida mara gosi, gi kaay tuba, “Hacimisi baruũ curuqeeraa gu hida hhanki, idoo gi ilii slaiyee geregedaraa, kara la ki⁄isida peesay gu kila heedi waꞌay gu curuquu gosii. 2 Kara curuquu gu hhia gooinay gu coko⁄u, looyii qaasida qulu⁄uũ gooi, hikira gu feesa,a sliimaa haa peesay gosi, giĩ hadisi sa kirigaraa baruũ.” Heedikee gi teesaaqay laqi, idoo sugwaa ilii kaay gooay ha Yoseefu.3 Qatlay daa iliipisi, hida hhakee digigi geemay, ma watliri sliimaa haa daqwaai koina. 4 Inay giyaa ilii kahhiyee dawaraa segenge, yaamu hhakeesaa gu mutemi Faraawgo, Yoseefu gi kaay sa heedikira kosi goó wariiqadimida mara gosi tuba, “Siragusimi cira hida hhakira! Gu lou, giyoo slayde amooge, sigi kaade ubee, ‘Saani soꞌoy fiisidiri qulu⁄uũ gu looimoo gooi, kara ina sangwaa yondiidi hhoinay kilesi? 5 Qulu⁄uki gu kaaru gu looimoo gooi, hiĩ giroó kitahhane haa giroó kuꞌumisiye tletiruu gosi. Haã tlakweesidiri hari khisla teesaaqay laqaraa!’ ”
6 Qatlay giyaa ilii slay inay amooge, gi kaay gimbakee, idoo dugwaa ilii ilafahhi gooay. 7 Teꞌesii, inay gugi ilaki⁄isiri tuba, “Looimoo goori, Yoseefu, maꞌaana mala kona da kaawaraa teesaaqay? Gimbaki sandii tlintiꞌiye, dandiray yondimiisee doogu, seelina hayii dahhasanaaba coko⁄o see, yondiidaraa gimba da hikee gooay! 8 Looimoo goori, slayii, haa ki⁄isani peesay gwaa slayni waꞌay gu curuqeeraa kotii yadaa hhapee dooraa da Kanaanigo. Inkoo, ha soꞌoy fiisana feesa baku sahaabu mara gu looimoo googwaa? 9 Inkoo, bere leẽ tla⁄aã goorii dugoo ilii slay qulu⁄ukee, dugu gaasiye, kara dandiray see gonkotaa ha tongee doogu tleehhidana.”
10 Heedikee goó wariiqadimida gi kaay tuba, “Naraꞌa haã ⁄imbi. Heedi doo ilii slaye qulu⁄ukee, hikee na tongimoo gooi tleehhidi, wakinay gonkoinaa yoo konaaiiba dakoo.”
11 Teꞌesii kila heedi gi cira hii⁄eetisi curuquu gosi hhapeege haa gigi gweedimi. 12 Da hheꞌesi heedikira goó wariiqadimida, gi dabiidi curuqeeraa gonge, gi tlaatleesi curuquu gu hikiraa gu badiisugo haa gii faakisi daqa curuquu gu hikiray gu yaꞌaycataage. Qulu⁄ukee dugugi slay curuquu gu Benyamiinige. 13 Teꞌesii gi feehhimisiri qayroo koina hari slahhaaꞌamee. Da hheꞌesi gonkoinaa gi ubaabisiri curuqeeraa koina daqa daqwaaige, gi ki⁄iri yaamuge.
14 Qatlay Yuuda haa hhiee kosi giyaa ilii guniri mara gu Yoseefuge, ina yaa kahhi, yaa wanay waꞌay gu marage. Teꞌesii inay gi keebeeꞌemidiri hhapeege pandaa dosii. 15 Yoseefu gigi maasi inay tuba, “Siniĩ soꞌoy teesaaqay laqadiri? Unkuray caahha tuba, heedi da ana gooay kooma hiidahhasa da kuꞌumisu, gi caahha gimba googuna goõ gwaa yakwidiri!”
16 Yuuda gi ilaki⁄isi tuba, “Looimoo goori, sugu mala kaawana? Hangu malee ilakeesana? Iliitleemu hindii tlaaꞌasi tlakwaroo doori. Inkoo dandiray gonkotaa haã tongee doogu tleehhidani sliimaa haa hikee diĩ ilii slay qulu⁄uũ googu.”
17 Yoseefu sigigi kaay tuba, “Suti! Etaa, ana hiidahhasaaba teesaaqay laqaraa! Ti hikee kilesi diĩ ilii slay qulu⁄uũ gooi na tongimoo gooi tleehhidi. Unkuray wakinay goõ ki⁄a ayage hari qasaw daqa taataa googunay.”
Yuuda ilii ⁄aa⁄imuu Benyamiini
18 Da hheꞌesi Yuuda ginaa iliisati ilaciyaa gu Yoseefuge, sugugi kaay tuba, “Looimoo goori, hhooa sini ⁄imbide ana yondimiisay googu, mangu ilakeesi coko⁄oniinii yakwaraa see hhaka pandaa dooguu. Kara hhooa hhanti qupita sa yondimiisay googu, maꞌaana ugu ti Faraaw loi pahha. 19 Looimoo gooi handaa maasidi dandiray tongee doogu tuba, ‘Kontaai taataa baku hhia wakuu?’ 20 Dandiray sugugi ilakeesani tuba, ‘Taataa goori wana, ina hiĩ gaduudii, kara dandiray kona hhia gu coko⁄u, daa hiiday qatlay gu gaduumaa da taataa goorii. Hhia gosi gu hhiaki koori gu coko⁄u yaa hhami, hiĩ gu coko⁄u na ina kilesi niĩ meeti daqa iyoo dosii, kara ina dugu slai hari khisla ha taataa gosi.’
21 Da hheꞌesi handaa ilafahhadi dandiray tongee doogu tuba, ‘Hari khawankuna hhiakee kooguna gu coko⁄o daqa dooii, magu arimi.’ 22 Kara sugugi kaawani ugu looimoo goori tuba, ‘Qaraimokee hanguu dahhasiyaaba, mamawuu haa taataa gosi, maꞌaana bere teesaaqay laqi, taataa gosi gwaai.’ 23 Kara, ugu sindaa kaadi dandiray tongee doogu tuba, ‘Hanimaa antaaiiba kara, bere hanguraaba khawa hhia googuna gu coko⁄u.’ 24 Qatlay gaa iliiki⁄ani daqa tongimoo googuu, taataa gooi, sugwaa ilakeesani ina gimbakira goõ, idoo handaa ilii ilafahhadi gooay.
25 Qariqaaqari slehheeri angaamaka taataa goori gi kaay tuba, ‘Taa⁄amida ki⁄a taysi Misirige, kara la sandi kiriga kayday ⁄agoo.’ 26 Dandiray, gugi ilaki⁄isani tuba, ‘Hay dahhasanaaba ki⁄araa taysi dandiray kilakoti. Ugu, bere ⁄imbida hhia goori gu coko⁄u, ma hada kay sliimaa haa dandiray, hada kayni. Heedikee gu didiru hindii geemayaaba magu arini, bere hhia goori gu coko⁄u gu mayna.’
27 Kara taataa goori, tongimoo googu, sandigi kaay tuba, ‘Khuꞌuday tuba, hadee doy Raheeli sinaati laqwalidi ana yaꞌay cada kilesi. 28 Naw leẽ yaati hhami, ana tay gi tooaa kaay ambee, “Gu lou, Yoseefu dugunti dee⁄i bareemoo haa bareemoo ha makimoo gu dihhu.” Kara hagu kahha arimaa qatlaykeesaa loaa. 29 Benyamiini see, bere guri waautay daqa dooaa, gi slawa kay ilaqaꞌa waka hhiyuuma doogunay, ana ti gaduwaa gu kooma saga⁄abakunay, hanoo gaasiday, hanigi qaasiday, hari qaiidimoo gu qaraimoo gooi.’
30-31 Inkoo, looimoo goori, haydahhasaaba ki⁄araa taysi daqa taataa goorii, bere qaraimoki hhaku sliimaa haa dandiray. Taataa, bere yoo arina qaraimoki hhaku sliimaa haa dandiray, gwaai! Maꞌaana slafimaa kosi, yoó iliipaꞌaruu gu qaraimokii wanay. Teesaaqay, dandiray tongee doogu hoo ⁄isina taataa goori, ma gwaai hari gaiidimoo gu didiru. 32 Maꞌaana looimoo goori, ana haayii fadidi pandaa da taataa gooii, qaraimoki suguu taatlida, ma khuꞌumi slafimaa kosi. Ana sugwaa kaay ambee, ‘Bere Benyamiini hagoo ki⁄isaaba haa haguroo khawaaba ina teꞌesii daqa dooguu, ilawaamisukee goõ daqa dooii wane balalu sliimaa.’
33 Inkoo, ee looimoo goori, hagu tlaatlaqasa, hani geemayde ana ma ibiidi tiꞌii, ma tongimoo googu tleehhidi, ma qadidi daqa da qaraimoki. Ugu mawaku ina, ma ki⁄i ayage sliimaa haa hhiee kosi. 34 Ana ha malee ki⁄a daqa taataage, bere niba ki⁄araa sliimaa haa qaraimoki? Suti, haydahhasaaba hiikaasa, arimaa slahhaaꞌamee da taataa gooi, giyoo ilii slay gimbakee.”