Hhiee gu Yoseefu ki⁄imoo dooina Misirige
43
1 Qatlaykii qori yaa kahhi gwaa dihhu hari khisla hhapee da Kanaanige. 2 Teesaaqay, qatlay baruũ gooina giraa khayri Misirigo, giyaa ilii faaki, Yakoobo gi kaay sa yaꞌay kosi tuba, “Ta⁄amida, ki⁄a Misirige kara la sandi kiriga kayday ⁄agoo.”3 Yuuda gi ilaki⁄isi taataa gosi tuba, “Taataa, heedikira hindaa ilakaay hari ilakwikwihha tuba, ‘Hanimaa antaaiiba kara, bere hanguraaba khawa hhia googuna gu coko⁄u.’ 4 Inkoo, bere ⁄imbida hhia goori, ma hada kay sliimaa haa dandiray, ha kiriga kayna ⁄agoo. 5 Bere ⁄imbidaaba, ina ma hada kay sliimaa haa dandiray, ha hada kaynaaba, sa gimba heedikira yaati kaay sa dandiray tuba, ‘Hanimaa antaaiiba kara, bere hanguraaba khawa hhia googuna gu coko⁄u.’ ”
6 Israeeli gi kaay hari muunaꞌafa tuba, “Siniraani soꞌoy khaydiri ilahufiduki sa ana hari amoo da kaawaraa sa heedikee tuba, kontay hhia waku gu coko⁄u?”
7 Inay gugi ilaki⁄isiri tuba, “Heedikira hindaa qotiqotimisi hari khisla, gimba goori haa hiidayuuma doori, hindigi maasi tuba, ‘Taataa googuna kahhiyaa slafi? Kontaaii hhia waku?’ Dandiray gugi ilaki⁄isani, gimba gosi kilesi hindaa maamaamisiye. Gu lou, haa malee aloo caahhana sindi kaay tuba, ‘Laraa khayday hhia googuna gu coko⁄u!’ ”
8 Yuuda gi kaay sa taataa gosi Israeeli tuba, “Geemay hhiakee koi gu coko⁄o Benyamiini, hada kaye sliimaa haa ana inkoo tuutuu, ma waaudani, kirigakayni ⁄agoo, dandiray haa ugu sliimaa haa yaꞌay koti, ma mayni kaka⁄u sa qori. 9 Ana hayii fadida pandaa dooguu, Benyamiini suguu taatlida. Bere hagoo ki⁄isaaba haa haguroo khawaaba ina tiꞌii pandaa dooguu, ilawaamisukee goõ daqa dooii wane balalu sliimaa. 10 Caahhi, bere hanti mayna hiikaaꞌa waaudimoo haa Benyamiini, gu lou, haã aloo hheꞌesana haã waaudani hhiyuuma da cada Misirige, kara handi aloo ki⁄ana ayage!”
11 Da hheꞌesi taataa gooina Israeeli gi kaay sa inay tuba, “Ee! Bere hindiiti ⁄uureesi teesaaqay, taqay laqa. Unkuray hubida curuqeeraa kokunay idadu wakinay gu hhoi gu hhapee doori haa gigi leehhisiday sa heedikee gu didiru, idadu gu haysaraa pahha bueemaa see hhaka, seeria coko⁄o, dinu, idadu daroó khwereꞌesiye ⁄agoo, manemaane haa pisagaroo da koyogoo haa kalanga. 12 Hubida peesay, gii roogisiday da hikee gooay da slaiye, maꞌaana kwanda ga ki⁄isidee hikira gwaa slaydiri waꞌay gu curuqeeraa kokunay. Angamalee hida hhanki yaatii dakusiri ki⁄isaraa. 13 Hubida slime hhia googuna gu coko⁄u, taa⁄amida la cira ki⁄iday daqa heedikeesii. 14 Iliitleemu gu kooma ⁄uuru goõ hangu iliiaye, ma slaydiri hhoinay pandaa da heedikeesii, ma sangwaa geemay hhia googuna Simi⁄ooni haa Benyamiini sliimaa haa unkuray. Daqa dooii, bere ti afakaka⁄u goosee yaꞌay koi, diniĩ afakaka⁄i.”
15 Teꞌesii, hhiee hhakee gi hubidiri idadu hhakira gu haysaraa, bueemaa see hhaka, haa hiiroogisa da peesaykira gooay gwaa hubidiri wakaꞌalee. Inay gii slehheesiri waaudimoo Misirige sliimaa haa Benyamiini, kara qatlay giyaa ilii dayri Misirige, hingigii ca⁄asiri pandaa da Yoseefuge. 16 Qatlay Yoseefu giyaa ilii arimi Benyamiini sliimaa wana haa inay, gi ilafahhi heedi goó wariiqadidimida aya gosi tuba, “Leehhisi hida hhanki aya gooii, laisaquutlida kuꞌunaanimoo haa layii qaasida ⁄agoo da hhoi, maꞌaana hida hhanki sliimaa ⁄aginay haa ana ⁄agoo da tleemaa.”
17 Heedikee goó wariiqadimida, gi yondiidi, idoo sugwaa ilii kaay gooay, gi tosaa leehhisi hida hhakee gwaa yaamulooee gooba aya gu Yoseefuge. 18 Qatlay giyaa ilii aniri digi leehhisi aya gu Yoseefuge, gi tlaꞌamuumuudiri. Inay gi ilahudeesiri tuba, “Dandiranti khay tiꞌii, sa gimba gu peesaykira, daa ki⁄isi curuqeeraa kotii, qatlaykira sa ilii khayni hhiyuumatiray da pandaa. Ina hinditi slai iliitlaꞌa, afii⁄utla daqwaai koti haa mandi tongee dosi tleehhidisi.”
19 Teesaaqay, gi iliisatiri ciyoomooge heedikee goó wariiqadimida mara gu Yoseefu, gi cocoiri haa ina, tay kahhiyay afamaraage wanay. 20 Inay gi kaayri tuba, “Looimoo goori, handi itatiiside, guti lou dandiray haa khayni tiꞌii hhiyuuma doorii da pandaa sa kiriga da ⁄agoo. 21 Qatlay gaa ilii kikaaki⁄ane ayage, hari amasi hayii fiifisani daqa da ilii guꞌudee yade amooge, gii ⁄eetimisani baruũ goori. Teꞌesii gi gweedini curuqeeraa koti, ma ⁄agimisani daqwaai koti, harigii tlaꞌani slawaraa peesay gu kila heedi waꞌay gu curuquu gosii rawairee. Hiĩ na peesay loi gaa buani sa baruũ gu kila heedi. Inkoo peesaykee guraani khayni, magu ki⁄isani. 22 Dandiray slime haraani khayni peesay waku sa kirigaraa da ⁄agoo. Inkoo, dandiray ha hhidina miyaa naa qaasi peesaykee curuqeeraa kotii.”
23 Heedikee goó wariiqadimida gi ilaki⁄isi tuba, “Hhanti kontay tlaꞌamee, gimba sliimaa guti hhou. Gu lou, Iliitleemu googuna, Iliitleemu gu taataa googuna, sanguu hadisi unkuray peesay curuqeeraa kokunay. Qatlaykeesii ana haa ooy peesay googuna.” Da hheꞌesi ina gi afiiooyimi Simi⁄ooni, guraagi khay daqa hhiee kosii.
24 Heedikira gi kwahhasuusi hida hhakira waꞌay gu mara gu Yoseefuge, sigigi hadisi maꞌay gu hhuncidaa yeꞌeeroo koina haa gi haysi ⁄agoo sa daqwaai koina. 25 Qatlay giyaa ilii akhasiri tuba, Yoseefu yaa khay sa ⁄agoo haa inay hari tleemaa, inay gi qaasiri naraꞌa idadu hhakira gu hadisaraa sa ina bueemaa see hhaka.
26 Yoseefu giyaa ilii khay ayage, gi taatahhiri sa ina idadu hhakira giyaa konee gu hadisaraa, inay gi keebeeꞌemidiri pandaa dosii. 27 Yoseefu gigi cehheemisi inay tuba, “Hangu hhoii gonkokunaa?” Da hheꞌesi kara gigi maasi tuba, “Taatakira kokuna gu gaduwaa sinaa kaadiri gu hhouu? Kahhiyaa, wanaa slafii?” 28 Inay gugi ilaki⁄isiri tuba, “Yondimiisay googu, taataa goori gu hhou, kara kahhi slafi.” Qatlay giyaa ilii hheꞌesiri kaawaraa gimbakee, gi keebeeꞌemidiri hhapeege sa laqaru gu muree pandaa dosii.
29 Yoseefu qatlay giyaa ilii ganaꞌasi ilaa kosi gi arimi Benyamiini hhia gosi gu coko⁄u gu guraꞌa leẽ haa ina, gi maasi tuba, “Kaslenkwaa! Hiĩ na hhia googunaa gu coko⁄u, sinaa kaadiri gimba gosi?” Da hheꞌesi gi kaay sa Benyamiini tuba, “Nankoy, Iliitleemu gu ⁄aafiye.” 30 Yoseefu yaa kona kwayru gu didiru gu arimaa kara hhia gosi, yaati amoolee slai ⁄aa⁄imu. Cirakiray gi waaudi teꞌesaa pandaa dooinaa, gii day sagay kosii, taysi gi ⁄aa⁄i hari khisla.
31 Qariqaaqari giyaa ilii hheꞌesi hhuncidaa pandaa dosi, yaagii ca⁄i, tay hingigii ⁄atlisi, gi ilafahhi tuba, “Leehhisaa ⁄agoo.”
32 Yoseefu sugugii satisi ⁄agoo daqa da ina lenkosi, hhiee kosi see daqa da inay kilakoinay haa hida gu Misiri gwaa ⁄agimee sliimaa haa ina, daqa da inay kilakoinayge, sa gimba hida gu Misiri yaa aloo hiidahhasiyaaiiba ⁄agoo sliimaa haa hida gu Eburaaniya. Maꞌaana yaati kitlaku hida gu Misiri ⁄agoo sliimaa haa inay. 33 Hhiee kosi Yoseefu digaati ibiidisi pandaa dosii, idoo digaa ilii laqwali gooay, tlaatleesi hiĩ gu badiisu gu yaꞌaycataa naqatloo. Inay hingigi khuꞌuniri inay haa inay, tay hiĩ tooinaa bakairi tuba, hiĩ malee caahhi, idoo digaa ilii laqwali. 34 Inay sigigi hadisi ⁄agoo daa meesaa da Yoseefu dahha. Benyamiini sugugii roogimisi waa kooani ba⁄ay da hhiee kosi. Inkoo, gi tooinaa ⁄aginiri haa gi kitahhaniri, tay hintooinaa hhaꞌaluuminidi sliimaa haa ina.