Hhiee gu Yoseefu Misiri kawa
42
1 Qatlay Yakoobo slime giyaa ilii akhasi tuba, yade Misirige baruũ wana, gi kaay sa yaꞌay kosi tuba, “Haã soꞌoy ibitiri tiꞌii hanguti khuꞌuntay kilesi?” 2 Ina gi ilakoomi kaawara sa inay tuba, “Itatiisa! Haã akhasi tuba, yade Misirige baruũ wana. Tlawuu, gweegwe⁄edaw yade la kiriga kayday baruũ sa dandiray, hoo ba⁄atii kaka⁄ana sa qori.”3 Da hheꞌesi hhiee hhakira mibi gu Yoseefu gii gweegwe⁄ediri yade Misirige sa kiriga da baruũ. 4 Teꞌesii, Yakoobo gi tlaatlaahhasi Benyamiini, hhia gu coko⁄o gu Yoseefu, hhanti hada kay sliimaa haa hhiee kosi, sa gimba yaa tlaꞌamuudi tuba, angamalee slay ilaqaꞌa. 5 Teesaaqay hida gu Israeelia yaa wanay tla⁄aã gu hhakiray gwaa hadakawee Misirige sa kiriga da baruũ, maꞌaana qori yaa wana slime hhapee da Kanaanige.
6 Qatlaykeesii Yoseefu yaa heedi gu didiru taysi hhapee da Misirige, ina naa naadiidina baruũ sa hida goõ gu khooroo sliimaa. Qatlay hhiee gu Yoseefu giyaa ilii dayri yade, gi keebeeꞌemidiri pandaa dosii. 7 Yoseefu giyaa ilii arimi hhiee kosi, cirakiray lenge gigi caahhi. Ina hingigi laqi ubee, giti hhidina pahha. Da hheꞌesi gigi maasi hari dihhay tuba, “Unkuray haa kaadahhaday?” Inay gi ilaki⁄isiri tuba, “Dandiray haa hhapee da Kanaani dahhana, hanti kiriga kayni baruũ.”
8 Yoseefu giyaamati caahhi see hhiee kosi, inay gwaa caahhiriiba ina. 9 Da hheꞌesi Yoseefu gii slay tletaa kosi gu wakaꞌalee, giyaa tletiitimi daqa hhiee kosii, sigigi kaay inay tuba, “Unkuray ti qotiqotimisee gwaa ciraarahhe! Hanti khaydirii sa arimaa daqa da ilii hhaka ga⁄aw hhapee doorii.”
10 Inay gugi ilaki⁄isiri tuba, “Looimoo goori, teesaaqay gooba. Dandiray yondimiisee doogu hanti khayni sa kiriga gu baruũ. 11 Dandiray gonkotaa ti yaꞌay gu heedi leẽ. Dandiray ti hida gu hhoi, kara ti qotiqotimisee gooba.”
12 Teꞌesii Yoseefu gi ilakoomi kaawaraa tuba, “Suti! Unkuray hanti khaydiri sa arimaa daqa da ilii hhaka ga⁄aw hhapee doorii.”
13 Inay gi ilaki⁄isiri tuba, “Looimoo goori, dandiray gu tiꞌii waaree ti yondimiisee doogu, sliimaa dooraa yaa hhiee mibi haa cada, yaꞌay gu heedi leẽ, goó ibiida hhapee da Kanaanige. Kara hhia goori gu coko⁄u ayage wana sliimaa haa taataa goori, waku yaa hhami.”
14 Yoseefu gi kaay sa inay tuba, “Sanguu ilii kaay gooay, unkuray ti qotiqotimisee! 15 Haã na amoo danguri koimisiye unkuray, bere siniĩ kaadiri gimba gu lou. Ana seelima hari uma gu Faraaw, hangu geemawaaba tiaa, bere niba arimaa hhia googuna gu coko⁄u. 16 Ya⁄aba leẽ tla⁄aã googunaa, maguraa khay hhiakee kokuna gu coko⁄u, unkuray wakinay dangu leehhisi jeerage. Tiꞌii gimba googuna, ma dugu ilatahhi, bere gimba gu lou guni cocaacoꞌoday. Bere yoo teesaaqay gooba, ha seelima hari uma gu Faraaw tuba, unkuray ti qotiqotimisee.” 17 Da hheꞌesi gigi ilapingimi gonkoinaa jeerage balalu tami.
18 Baloo da tamiige Yoseefu gi kaay sa inay tuba, “Taqay laqa, ma ilakontiri ibinaa, maꞌaana ana Iliitleemu gunoó gwaa⁄a. 19 Bere gu lou, unkuray ti hida gu hhoi, leẽ tla⁄aã googunay meetiye jeerage, wakinay leehhisiyee baruũ sa hida kokuna gu koomee qori ayage. 20 Kara, kwanda guraa khaydee hhia googuna gu coko⁄u daqa dooii, ma caahhi, bere gimba googuna guti lou. Bere guti lou, kaka⁄adaaiiba.” Inay gi ⁄imbiri teesaaqay laqaraa.
21 Inay haa inay hingigi warii kaayri hari gimba gooina tuba, “Gu lou, dandiray danditi ⁄agitiitina, sa gimba gu hhia goori. Dandiray hagwaa arini, idoo giyaa ilii slahhaai muuna gosii, hindigi tlaatlaqasi, ma ilabuꞌumi ibinaa dosi, dandiray gi siani. Inkoo haã na idoo dandiray see sa slahhaaꞌameege wane.”
22 Rubeeni gigi ilaki⁄isi tuba, “Gu lou, ana sangwaa kaay ambee, hhanti yonditay gimba gu tlaku daqa qaraimooge! Slime, unkuray hanaa akhasidiriiba! Inkoo, danditi ⁄agatiitina sa gimba gu ceedee dosi.”
23 Qatlaykeesii inay yaa baraslayriiba tuba, Yoseefu yaa caahhi gimbakee goõ giyaa cocaacoiyee hari Eburaanaisoo, sa gimba teꞌesii yaa wana heedi gwaa ilakesaasida sa ina gimbakee gu Eburaanaisoo hari Misiriꞌisoo.
24 Da hheꞌesi Yoseefu hingigi pasli ina lenkosi kengage, gi tlaatleesi ⁄aa⁄imu. Qatlay giyaa iliiqabi, gi ki⁄i daqa dooinay, kara gi cocoi haa hhiee kosi. Teꞌesii gii leehhi Simi⁄ooni tla⁄aã gooinaa, gi ilafahhi sirikaarii dosi, gugi khiidiniri pingu pandaa dooinay.
Hhiee kosi Yoseefu ki⁄eemoo dooina ayage
25 Yoseefu gi ilafahhi tongee dosi, ma hacimisiri baruũ curuqeeraa gu hhiee kosii haa kila heedi tla⁄aã gooinay sugu ki⁄isiye peesay gosi hari hhaaboo waꞌay gu curuqu gosii. Kara gi ilafahhi, ma sigi hadisi ⁄agoo da ⁄agoo amooge. Qatlay sigaa ilii yondiidi gimbakee sliimaa, 26 inay gi ubaabimisiri baruũ daqa daqwaai koinay, gi tooinaa waaudiri.
27 Qatlay giyaa ilii dayri daqa da ilii guꞌudee yade amooge, gii ⁄eetisiri baruũ gooina, mayii fiifisiri, leẽ tla⁄aã gooinay gi gweedi curuquu gosi, ma ⁄agimisi daqway gosi. Teꞌesii gi slay peesay gosi waꞌay gu curuquu gosii, hirigii tlai hari khisla. 28 Ina gi kaay sa hhiee kosi tuba, “Sinaani ki⁄isiri peesay goy. Yuꞌudiyaa, nahiĩ tiꞌii waꞌay gu curuquu gooii!” Qatlay giyaa ilii akhasiri teesaaqay, muunaiĩ koina gi kaka⁄iri. Hingigi khuꞌuniri ilaa haa ilaa, tay tooinaa dakhadakhiyay haa hingigi maamisiri tuba, “Ti gimba mala hiĩ, diĩ yondiidi ha Iliitleemu sa dandiray?”
29 Qatlay giyaa ilii dayri daqa taataa gooinay Yakoobo hhapee da Kanaanige, sugugi kaayri gimbakira goõ gwaayii ca⁄u daqa dooinay yade Misirige. Gi kaayri tuba, 30 “Heedi gu didiru gu hhapetira yaati cocoi haa dandiray hari dihhay, haa hindigi sitaakimi dandiray ubee, hanti qotiqotiitimisana pahha gimba gu hhapee dosi. 31 Dandiray sugugi kaawani ina tuba, ‘Dandiray ti hida gu hhoi, qotiqotimisee gooba. 32 Dandiray, yaa hhiee mibi haa cada, yaꞌay gu heedi leẽ. Tla⁄aã goorii leẽ yaa hhami, kara hhia goori gu coko⁄u ayage wana sliimaa haa taataa goori hhapee da Kanaanige.’
33 Da hheꞌesi heedi gu didiru gu hhapetee sindigi kaay tuba, ‘Taqay gana ilii caahha, bere gimba gu lou guni cocaacoꞌoday: leẽ tla⁄aã googunay meetiye tiꞌii haa ana, unkuray wakinay leehhisa baruũ sa hida kokuna gu koomee qori. 34 Kara, kwanda guraa khaydee hhia googuna gu coko⁄u daqa dooii, ma caahhi, bere gimba googuna guti lou, kara ti qotiqotimiisee gooba. Da hheꞌesi, bere teesaaqay laqaday, ana sangu ki⁄isa hhia googuna, kara unkuray dangu ⁄imbi, ma kirigintiri hhapetii.’ ”
35 Teꞌesii qatlay giyaa ilii kuꞌuuꞌumisiyee baruũ curuqeeraa koinaa, kila heedi yaati bakai, giyaa ilii slay bena gu peesay waꞌay gu curuqu gosii! Qatlay inay haa taataa gooina giyaa ilii aniri benaiĩ gu peesay, gi tlaꞌamuumuudiri hari khisla. 36 Taataa gooina Yakoobo gi kaay sa inay hari qaiidimoo tuba, “Unkuray haniĩ afii⁄utlidiri yaꞌay koi. Yoseefu yaa hhami, Simi⁄ooni sliimaa wanaaba haa dandiray, inkoo unkuray hati slaꞌadaaii hiiowaraa Benyamiini see. Ana gimbakee goõ hininti ilii huui!”
37 Rubeeni ginaa ilii kaay sa taataa gosi tuba, “May Benyamiini dabaiĩ koii, ana hagu ga⁄aw haa gwaa ki⁄isa daqa dooguu. Ana bere hoo maw ki⁄isaraa Benyamiini daqa dooguu, loo cu⁄uda yaꞌay koi cada koinaa!”
38 Kara, taataa gosi gi ilaki⁄isi tuba, “Suti! Nankoy, hada kayaaba sliimaa haa unkuray. Hhia gosi Yoseefu yaa hhami, ina kilesi Benyamiini niĩ meeti daqa iyoo dooinay Raheeli. Ana ti gaduwaa gu kooma saga⁄abakunay, bere qaraimoki slay ilaqaꞌa waka hhiyuuma doogunay, ana gaduwaa hanoo ⁄isinta, ma gwaai sa qaiidimoo gu qaraimoo gooi.”