Faraaw tletaa kosi
41
1 Qatlay koraraa cada giyaa iliicatiri, Faraaw yaa tletiitimi tletaa. Tletaa kosii yaati qadidi kenga gu duudu wakuu, doó eteedine na Nayli hhapee da Misirige. 2 Teꞌesii gi arimi yakway fanqu gwaa wahhaahhaadee hari khisla, yaay ca⁄iyay maꞌay gu duudukeesaa, kara ⁄aginay sluufa gu naa⁄a gu duudu. 3 Kara yuꞌudiyaa, yakway wakinay fanqu gwaa slosloimee haa gu tlakwi hari khisla, inay see yaagii ca⁄iri duudukeesaa, gi qadimidu kayri ilaciyaage haa hhakira gwaa wahhaahhaadee hari khisla kenga gu duuduge. 4 Da hheꞌesi yakway hhakee gwaa slosloimee hari khisla, gi ⁄aginiri hhakira gu fanqu gwaa wahhaahhaadee hari khisla! Teꞌesii Faraaw gii tlay guꞌudeego.5 Kara, qatlay giyaa ilii qaati, gi tletimi tletaa wakinay. Ina gi arimi goo⁄u fanqu gu ⁄atlanaru gu baruũ, yaa ilanihhi slaarahhiya lenge. 6 Da hheꞌesi, yuꞌudiyaa, goo⁄u waku fanqu gu cohhu yaagi ilanihhi, kara gi moomooi, sa gimba gu pupuiya da ilacindoo gu rawaa. 7 Goo⁄ukee gu cohhu gi gwi⁄i goo⁄ukira gu fanqu gu ⁄atlanaru. Da hheꞌesi Faraaw yaagii tlay guꞌudeego, ginaa ilii baraslay tuba, kaslenkwaa yaati tletaa. 8 Heetlaalee dosii daa iliipisi, ina yaa kona tlaꞌamee hari khisla sa tletaa hhakee kosi, gi ya⁄abi yondimiisee dosi, ma eteediri qwasleeri sliimaa haa hida sliimaa gu koomee waaway gu Misiri. Qatlay giyaa ilii khayri, Faraaw gi catimisi sa inay tletaa kosi. Teꞌesii, hhaku lensee gwaayii dahhasu ilakeesa tletaa hhakee.
9 Da hheꞌesi nankuay gi kaay daqa Faraawge tuba, “Looimoo gooi, letuti handii slay dakoo dooi. 10 Qatlaykira sandaa ilii slahhaaꞌadi ana haa heedi gu didiru goó deequuquma mukaatee, ugu handaa khiidinti jeerage, dabaiĩ gu sirikaarimoo gu didiruge gu raqa doó ga⁄awa. 11 Letu waka hari amasii, dandiray cada kotaa haa tletiitini tletaa, kila heedi tletaa kosi yaa konay maꞌaana da pasla. 12 Inkoo, teꞌesii jeerage yaa wana qaraimoo waku gu Eburaanimoo sliimaa haa dandiray. Ina yaa yondimiisay gu sirikaarimoo gu didiru gu raqa doó ga⁄awa. Dandiray sugugi catimisani tletaa koti. Ina nayii dahhasi ilakeesa, kila heedi sugugi kaay maꞌaana da tletaa kosi. 13 Kara nama gimbakira gooay goõ sandaa ilakeesi gu tletaa koti, gu lou naina naay ca⁄i. Ugu hanaay ki⁄isidi ana yondu gooii, kara heedi gu didiru goó deequuquma mukaatee gugi kancisidi khaimooge.”
14 Faraaw ginaa ilii ya⁄abi hida, Yoseefu dugurimaa khay, inay gi teesaaqay laqiri, cirakiray dugwaagii ca⁄asi jeerago. Ina gi hhaadi quubu gosi haa gii fooki qayroo kosi, gi tosaa hada kay pandaa da Faraawge. 15 Faraaw gi kaay sa Yoseefu tuba, “Hari amasi haã tletiitimi tletaa, hhaku heedi lensee guunii dahhasu ilakeesa sa ana tletaa hhanki. Ana, haã akhasi daqa hida wakinaygo tuba, ugu bere suguũ kaay tletaa, gu lou hagii dahhasida ilakeesa maꞌaana dosi.”
16 Yoseefu gi ilaki⁄isi tuba, “Ana koomaaba ⁄uurukee coko⁄o see, Iliitleemu sugu ilakeesi maꞌaana dosi loi ga ugu slaꞌade.”
17 Da hheꞌesi Faraaw gi kaay sa Yoseefu tuba, “Haa tletiitimi tletaa, hagi arimi haã qadidi kenga gu duudu gu Naylige. 18 Ana hagi arimi yakway fanqu, gwaa wahhaahhaadee hari khisla yaay ca⁄iyay duudukeesaa ⁄aginay sluufaa gu naa⁄a. 19 Da hheꞌesi, yakway wakinay fanqu gwaa slosloimee haa gu tlakwi hari khisla, yaagii ca⁄iri duudukeesaa, gi sirakoniri yakway gwaa wahhaahhaadee. Etaa ana ha kahha arimaa yakway gu tlakwi hhakee gooay hhapee sliimaa da Misirige. 20 Yakway hhakee gwaa slosloimee haa gu tlakwi hari khisla, gi ⁄aginiri yakway hhakira fanqu gwaa wahhaahhaadee. 21 Qatlay giyaa ilii hheꞌesiri ⁄agoo, inay digigi arimi kahhiyay hiĩ slosloiniri da wakaꞌalee gooay, yaay fookidiriiba coko⁄o see. Da hheꞌesi haagi iladahhi guꞌudeego.
22 Kara, qatlay gaa ilii qaati, hagi tletiitimi tletaa wakinay, hagi arimi goo⁄u fanqu gu baruũ gu ⁄atlanaru, yaa ilanihhi slaarahhiya lenge. 23 Da hheꞌesi, yuꞌudiyaa, goo⁄u waku gu cohhu yaagi ilanihhi, kara yaa moomooi, sa gimba gu pupuiya da ilacindoo da rawaa. 24 Goo⁄ukee gu cohhu gi gwi⁄i goo⁄ukira gu fanqu gu ⁄atlanaru. Ana hagi kaay sa qwasleeri tletaa hhanki, teꞌesii hhaku heedi lensee gwaay dahhasu ilakeesa maꞌaana dooina.”
25 Da hheꞌesi Yoseefu gi kaay sa Faraaw tuba, “Maꞌaana da tletaa koku cada koinaa ti leẽ. Iliitleemu suguniĩ tlaaꞌasi gimba giyoo yondiidiye baalahhankii. 26 Maꞌaana da yakway hhakee gwaa wahhaahhaadee ti koraraa fanqu, kara maꞌaana da goo⁄u fanqu gu ⁄atlanaru ti koraraa fanqu. Maꞌaana da tletaa hhakee cada koinaa ti leẽ. 27 Yakway hhakee gu fanqu gwaa slosloimee gu tlakwi hari khisla haa goo⁄ukee fanqu daa moomooꞌosi ha pupuiya da ilacindoo gu rawaa, maꞌaana dosi ti koraraa fanqu gu qori.
28 Ti idoo sugwaa ilii kaay gooay ugu Faraaw, Iliitleemu sugungii tlaaꞌasi teesaaqay, idoo gi ilii yondiidiye. 29 Koraraa fanqu gu slafimaa gu didiri yaa khociyay hhapee sliimaa da Misirige. 30 Da hheꞌesi, damaa khay koraraa fanqu gu qori gu didiru. Qatlaykeesii hida digimaati afahhana slafimaa hhakee goõ. Qorikee gu didiru maati hhapee sliimaa da Misirige. 31 Slafimaa hhakee gwaa waaree Misirige, hida gimaa kara hiislayaaiiba sumuku, sa gimba qori gwaa khoca guti dihhi hari khisla. 32 Tletaa hhakee digaati ilaki⁄i waa cada daqa Faraawge, maꞌaana gimbakee gu lou, Iliitleemu niĩ slai laqaraa yondukee gaã tletiitinti tletaage. Kara Iliitleemu gimbaki gi cira yondiidi.
33 Inkoo, looimoo gooi, hagu slaꞌa tlaatlaqasa, dabiidi cira heedi gu kooma marifaa haa waaway, ma heedi gu didiru tleehhidi gu wariiqadimida hhapeti goõ da Misiri. 34 Kara leehhi hida gu wariiqadimidee hhapee sliimaage, ya⁄abaki ma hiikurunkura kayri leẽ da kooani da buꞌuru goõ gu Misiri, qatlay gu koraraa fanquge gu slafimaa gu didiri. 35 Inay hiikurunkuriyee ⁄agotee sliimaa koraraa hhankii gu fanqu gu slafimaa gwaa khocee. Kara ilakiiki⁄imisiyee baruũ tawaaloo da Faraawge, gi ⁄agoo tleehhidi sa yaamu sliimaa, inay barukee gugi ga⁄ayay. 36 ⁄agoti ti ilakiiki⁄isa da didiri tleehhita da ilabuꞌuru hhapee da Misiri, teesaaqay hida gu hhapeti maa hhanti kaka⁄iyay sa qori koraraa hhakeesii fanqu gu qori gwaa khocee.”
Yoseefu sugugi qay tawaaloo da didiri
37 Gimbakee gu Yoseefu dugugi arimi gu hhou hari khisla ha Faraaw haa hida kosi goõ gu deni. 38 Teesaaqay, Faraaw gi maasi hida kosi gu deni tuba, “Haslaynaa heedi waku guyii nooa da Yoseefu gooay gu kooma muuna gu Iliitleemu?”
39 Da hheꞌesi Faraaw gi kaay sa Yoseefu tuba, “Iliitleemu sugunii tlaaꞌasi gimbakee sliimaa, hhaku heedi waku see gu kooma marafuumaa haa waaway ugu gooay. 40 Inkoo, ugu na heedi gu didiru gu wariiqadimida hida gu tawaaloo dooi, kara hida koi goõ hhapetii ilafahha doogu gini itatiimisiyay. Tawaaloo googuu ana kilesi na didiri ba⁄ay da ugu, sa gimba haã ilii ibiidi kitiĩ gu mutemi.” 41 Faraaw gi kaay sa Yoseefu tuba, “Yuꞌudiyaa! Inkoo, ugu haguyii leehha, ma heedi gu didiru tleehhiti hhapee sliimaa da Misirige.” 42 Teꞌesii Faraaw gi baci petee gosi gu mutemimiꞌisoo haa gugii lu⁄i dinca da Yoseefuge. Kara gi haysa sa ina qayroo gu hhoi gu ⁄abakwi, ma daamisi, slime haa heeleꞌesiya da sahaabu, maga daasi isa dosii. 43 Faraaw gugii daasi kokoteeni gosii gu caduu daa dukhudukhuukhune ha faraasi, ma dugu caahhi ha hida tuba, tawaaloo gosii ina hiĩ giyaadimiisay tleehhidi. Sirikaarii dosi gi giyati pandaa dosi, tay tooinaa kakaanay sa hida tuba, “Keebeeimida!” Faraaw ginaa ilii qaasi Yoseefu, ma heedi gu didiru tleehhidi hhapee sliimaa da Misirige.
44 Da hheꞌesi Faraaw gi ilakoomi kaawaraa sa Yoseefu tuba, “Ana na Faraaw! Hhaku heedi lensee hhapetii da Misirige gu yondiidi idoo lensee, bere ugu haguba ⁄imbaraa.” 45 Faraaw gurigi ay Yoseefu uma gu Misiriꞌisoo na Safenaati-Paneeya. Kara sugugi khabimi sagameeriya uma gosi na Asenaati, hotu Potifeera, hhapalooay gu yaamu gu Oonii.
46 Qatlaykeesii Yoseefu yaa kona koraraa mibeeri tami, giyaa ilii tlaatleesi yondukee sugaa hadisi ha Faraaw, mutemi gu Misiri. Yoseefu gii ca⁄i pandaa da Faraawgo, gi ilakhookhocimi hhapee sliimaa da Misiri, ma dugu caahhi.
47 Koraraa hhakiray gu fanqu gu slafimaa, hhapee da Misiri yaay ca⁄asidi baruũ wa⁄a hari khisla. 48 Yoseefu gi ilafahhi yondimiisee tuba, hiikurunkuriyee baruũ wa⁄a daa buꞌumi, yaa teesaaqay laqiri koraraa hhakeesii gu fanqu gu slafimaa hhapee da Misirige. Kila yaamu yaa qaasi kuugiyooge baruũ daa buꞌumi qaymamuu gwaa ilaciyaa waaree ha yaamu hhakee. 49 Yoseefu gii kurunkuri ⁄agoo wa⁄a, gigi qamidi kuugiyooge, ⁄agotee gi hacidi seehhinankaꞌa pahha gu tlawa da didiri, duguraati amoolee slanqadi faadoo dosi.
50 Qatlay daa ilii kahhiye tlaatleesa koraraa gu qori, Asenaati hotu Potifeera, hhapalooay gu yaamu gu Oonii, yaay daadi yaꞌay cada gu hhawatee sa Yoseefu. 51 Yoseefu hirigi ay uma nankosi gu badiisu na Manaase,a tay gi ilahudeesi tuba, “Ti sa gimba Iliitleemu niĩ iliiay dinima afahhami labaꞌasu gooi sliimaa haa hida goõ gu aya gu taataa gooi.” 52 Nankosi gu caduu gurigi ay uma na Efurayiimu,b tay gi ilahudeesi tuba, “Iliitleemu siniĩ hadisi laqwaloo hhapetii gaa ilii slay ana labaꞌasu.”
53 Koraraa hhakira gu fanqu gu slafimaa hhapee da Misirige gii catiri. 54 Da hheꞌesi koraraa fanqu gu qori gi tlaatleesiri, Yoseefu idoo giyaa ilii kaay gooay wakaꞌalee. Qori gii qoomi hhapapu wakinay goõ, tay hhapee sliimaa da Misiri yaa konta baruũ kuugiyoo koinay. 55 Hida sliimaa gu Misiri giyaa ilii tlaatleesiri slawaraa qori, inay gi ilii ⁄aa⁄iri Faraaw ma sigi hadisi ⁄agoo. Da hheꞌesi ina sigigi kaay tuba, “Taa⁄amida gonkokunaa daqa Yoseefuge, idoo sangoo kaaye unkuray laga yonditay teesaaqay.”
56 Qatlay qori giyaa ilii qoomi hhapee sliimaage da Misiri, Yoseefu gi tlaaꞌasi kuugiyoo goõ gu baruũ haa gi tlaatleesi naadiru sa hida gu Misiri, maꞌaana qori gwaa dihhi hari khisla. 57 Kara hida gu hhapapu wakinay yaagi khayri Misirige sa kiriga baruũ daqa Yoseefugo, sa gimba qori gwaa didiru hari khisla khooroo sliimaage.