Yoseefu ilakesiduu gu tletaa
40
1 Qariqaaqari gimbaki giyaa ilii cati, yondimiisee cada gu mutemi gu Misiri, gi dakusiri pandaa da mutemi gooinay. Yondimiisetee yaa nankuay ha heedi gu didiru goó deequuquma mukaatee. 2 Faraaw, mutemi gu Misiri, gi slahhaai sa hida hhakee kosi cada gu deni. 3 Da hheꞌesi gigi ilapingimi jeerage, daqa giyaa ilii ilapingimi Yoseefu, gugi may dabaiĩ gu sirikaarimoo gu didiruge gu raqa doó ga⁄awa ina. 4 Heedikee gu didiru gu sirikaarii, gii leehhi Yoseefu, ma heedi gu didiru tleehhidi gu hida hhakee gu cada gu deni. Ina gi yondiidi sa inay.Qatlay giyaa ilii ibiidiri jeerage balalu wa⁄a, 5 letu waka hari amasii, nankuay haa heedikee gu didiru goó deequuquma mukaatee sa Faraaw, gonkoinaa gi tletiitiniri tletaa jeerage. Kila heedi haa tletaa kosi, gwaa koomee maꞌaana paslaapasloo.
6 Yoseefu qatlay giyaa ilii hadakay daqa dooinay hari heetlawaa, hirigii tlai, giyaa ilii arimi inay hiĩ moorooꞌomidiri. 7 Da hheꞌesi Yoseefu gigi maasi yondimiisetee da Faraaw, daa sliimaa waara jeerage haa ina dabaiĩ gu looimoo gosii tuba, “Letuti siĩ soꞌoy moorooꞌomitiri taqay?”
8 Inay gugi ilaki⁄isiri tuba, “Letuti haã tletiitini tletaa, teꞌesii hhaku lensee guyii dahhasa ilakeesa maꞌaana da tletaa koti.” Yoseefu gi kaay sa inay tuba, “Iliitleemu kilesi na kona hiidahhasa da ilakeesa tletaa. Sini kaadee tletaa kokuna.”
9 Nankuay gi catimisi sa Yoseefu tletaa kosi, gi kaay tuba, “Tletaa koii haã arimi khaimoo gu sabiibu pandaa dooii. 10 Khaimokee gu sabiibumoo hiĩ kona elemu tami. Cirakiray qatlay giĩ ilii tlaatleesi ilanihha, nama qatlaykeesii lenge humbalaalay gii fahhi, kara oloꞌoogay gosi gi ⁄aamu gwaa hamaadu tleehhidi. 11 Qulu⁄uũ gu mutemi Faraaw yaa daba gooii wana, gii oy ⁄aamu gu sabiibu, gugi tooaa tinqimi qulu⁄ukeesii kosii, gugi haysi sa Faraaw.”
12 Yoseefu gi kaay sa nankuay tuba, “Maꞌaana da tletaa koku na nahaã. Maꞌaana da elemu hhakee gu tami ti balalu tami. 13 Qatlay gu balalu tamige, Faraaw guu ca⁄asi ugu jeerago haa guyii ki⁄isi kara ugu yondu googuu gu seguge. Kara hay dahhasida hadimisu daba gosii qulu⁄uũ, gaa ilii yondimaamite gooay wakaꞌalee. 14 Hhooa, dugumaa ilii ca⁄asiye, haguũ firimi, hanii slayde haa sini yondite hhoinay hari amoo da uꞌuruu uma goy daqa Faraawge, ana see hinimii ca⁄asi jeerataa. 15 Haguti firiirima teesaaqay, maꞌaana gu lou ana diniraati waaudi hari ⁄uuru hhapee da Eburaaniyago. Kara tiꞌii Misirige haa yondiidiiba ma gimba lensee gu tlaku, guraayii boo⁄u hiilu⁄a ana jeerage.”
16 Qatlay heedikira gu didiru goó deequuquma mukaatee, giyaa ilii akhasi tuba, maꞌaana da ilakeesa da tletaa gu danaꞌa gosi da hhoi, gi kaay sa Yoseefu tuba, “Ana see haa tletiitimi tletaa. Saga gooii haayii tiiꞌi kapapuu tami gu mukaatee. 17 Kapuu da rawaage, daa wana mukaatee paslaapasloo wa⁄a, daa deequuqumi sa Faraaw. Inkoo, cira⁄oo yaa ⁄agingita mukaatetee kapuugo.”
18 Yoseefu gugi ilaki⁄isi ina tuba, “Maꞌaana da tletaa koku na nahaã. Maꞌaana da kapapuu hhakee gu tami ti balalu tami. 19 Qatlay gu balalu tamige, Faraaw guu ca⁄asi ugu jeerago haa gu afakereꞌesi isa doogu. Ina giyoo hheꞌesiye, slaqwa doogu gi kancisi khaimooge, cira⁄oo gi ⁄aginta tuuꞌuna doogu.”
20 Inkoo, baloo da tamii yaa baloo dayii slawaraa da hiidawaraa da Faraaw, ina gi boo⁄isi losona sa yondimiisee dosi goõ. Faraaw yaagii ca⁄asi jeerago nankuay haa heedikira gu didiru goó deequuquma mukaatee, giraagi khay pandaa da hida kosii gu denige. 21 Da hheꞌesi gi tosaa gii ki⁄isi nankuay yondu gosii gu seguge, ma hadimisi kara sa Faraaw qulu⁄uũ daba gosii.