Yoseefu haa hadee da Potiifa hhapee da Misirige
39
1 Inkoo, qatlaykeesii Yoseefu duguraa ilii khay ha Waisimaeeli hhapee da Misiri naqatloo, dugugi tosaa kirigi dabaiĩ koinaa ha Misirimokira Potiifa. Ina gwaa leẽ gu hida gu deni gu mutemi Faraaw haa sirikaarimoo gu didiru gu raqa da ga⁄aw.a2 Taataa Iliitleemu yaa sliimaa wana haa Yoseefu, gugi iliiay yondu sliimaage hari khisla. Yoseefu yaa yondimaamidi mara gu looimoo gosii, hikee gwaa Misirimoo. 3 Potiifa, looimoo gosi, giyaa ilii baraslay tuba, Taataa Iliitleemu yaa sliimaa wana haa Yoseefu, tay gu tosaa iliiaꞌay gimba sliimaage giyaa yondiidi. 4 Inkoo, Yoseefu gi slay hhoinay pandaa da Potiifa hari khisla, gi yondimiisay gosi loi tleehhidi. Potiifa gugi qaasi ina, heedi gu wariiqadimidu gu mara gosi haa gu khooslay gosi goõ. 5 Qatlaykeesaa Potiifa yaa qaasi Yoseefu heedi gu wariiqadimidu gu mara gosi, Taataa Iliitleemu gi ⁄aafi Potiifa haa idadu sliimaa gu mara gosi haa qaymamuu kosi. 6 Teꞌesii Potiifa gi qay ⁄uuru sa Yoseefu, ma tawaalimi idadu kosi goõ giyaa kone mara gosii. Potiifa yaa kara konaaba tlaꞌamee lensee daqa yondu sliimaage gu mara gosi, ⁄agoo dosi kilesi siginaa kona tlaꞌamee.
Yoseefu yaati qaraimoo gu hhou hari khisla. 7 Qariqaaqari, daa ilii cati qatlay coko⁄o, hadee da looimoo gosi gi tlaatleesidi khuꞌuruu Yoseefu, tay gu tosaa slahhaahhaaꞌada. Letu waka sugugi kaadi ina tuba, “Khoca, qaati haa ana!” 8 Teꞌesii, Yoseefu gi siꞌi, gi kaay sa hadetee tuba, “Yuꞌudiyaa, looimoo gooi Potiifa siniĩ hadisi ana ⁄uuru guri tawaaliru idadu sliimaa marakii. Kara idadu sliimaa gi kone giĩ taatahhi dabaiĩ koii. 9 Hhaku yondimiisay lensee marakii gu didiru da ana gooay. Kara looimoo gooi hinaa tlaatlahhasiiba idoo lensee, igi kilesi, sa gimba igi ti hadee dosi. Ana ha malee yondiida tlakwaroti da didiri, haa gi yondiida tlakwaroo da hatee gooay pandaa da Iliitleemuge? Haydahhasaaba!” 10 Hadetee giyaamati ilakonti laalaagiru Yoseefu balalu sliimaa, Yoseefu gi siꞌi sumuku qata haa ina, iliisataraa see giyaa koisiiba.
11 Letu waka, Yoseefu gii day marage, ma yondiidi yondu gosi, kara teꞌesii yondimiisay lensee yaa wanaaba. 12 Hadee da Potiifa yaagi khaydi, gi oodi qayru gu Yoseefu haa gi kaadi tuba, “Khoca, qaati haa ana!” Teꞌesii, Yoseefu gi siꞌi, gi may qayru gosi dabaiĩ kosii haa gi tosaa lakidi khoorooge.
13 Qatlay hadetee giyaa ilii anti Yoseefu hiĩ lakidi khoorooge daqa dosaa, gi may qayru gosi dabaiĩ kosii, 14 teꞌesii hadetee gi eteti yondimiisee wakinay da aya gosi haa gi kaadi sa inay tuba, “Yuꞌudaa, Eburaanimoki daraani khay ha hhawata gooi, hindii ilamuriidisi! Ina yaani khay tiꞌii daqa dooii, hinigi slai oowaraa hari ⁄uuru. Ana hanti maahhi. 15 Qatlay giĩ ilii akhasi ana maahhama, ma dinima iliiay, ina gi lakidi khoorooge, tay gi tosaa may qayru gosi daqa dooii.”
16 Hadetee gi tosaa qaasidi qayrukee ilaciyaa kosii, qatlaykaꞌa naqatloo daa ilii ki⁄i looimoo gosi ayage. 17 Da hheꞌesi gi catimisidi sa hhawata gosi gimbakee, gi kaadi tuba, “Tongimooki gu Eburaanimoo sandiraani khaydi, hinaani ilii khay, mani muriidisi ana. 18 Cirakiray, qatlay gaã ilii maahhi, ina gi lakidi khoorooge, tay gi tosaa may qayru gosi daqa dooii.”
19 Potiifa, looimoo gosi, qatlay giyaa ilii akhasi catimisukee gu hadee dosi tuba, dagaã yondiidi tlakwaroo teesaaqay ha tongimoo gosi Yoseefu, ina gi qupidi hari khisla. 20 Inkoo, ina hirigi waaudi Yoseefu haa gugi ilapingimi jeerage, daqa daa ilii khiidimi hida gwaa dakusee pandaa da mutemige.
Qatlay Yoseefu giyaa ilii teꞌesii wane jeerage, 21 Taataa Iliitleemu kahhi yaa sliimaa wana haa ina, gi yondiidi hhoinay gu didiru sa ina, duguma slai hari khisla ha heedi gu didiru gu jeeratee. 22 Teesaaqay, heedikee gu didiru gu jeera, gi qaasi Yoseefu, ma heedi gu didiru tleehhidi gu wariiqadimidu gu hida goõ daa khiidimi haa wariiqadimidu yondu goõ gu jeera. 23 Teꞌesaa heedikee gu didiru gu jeeratee yaa kara konaaba tlaꞌamee lensee daqa yondu sliimaa daa wariiqadiidimidiye Yoseefu. Sa gimba Taataa Iliitleemu yaa sliimaa wana haa Yoseefu, kara dugugi iliiay gimba sliimaage giyaa yondiidi.