Yuuda haa Tamaari
38
1 Qatlaykeesii, Yuuda hingigi deehhiihhimi haa hhiee kosi, gi ibinaa kay haa heedi waku, uma gosi na Hiira, Adulaanimoo. 2 Taysi Yuuda hingigi slaslay haa hotu Suuya, hiĩ gwaa Kanaanimoo. Ina gigi tosaa khabimi haa gi gui haa ina, 3 hadetee gii loaydi haa gii daadi naw, gurigi ay uma na Eeri. 4 Kara hadee dosi gii loaydi, gii daadi naw, gurigi ayri uma na Onaani. 5 Kara ina gi kara hiidaadi naw waku, gurigi ayri uma na Selakhaa. Qatlaykeesii inay yaa yaamu gu Kesiibuge wana.6 Yuuda gii daamisi hadee sa nankosi gu badiisu Eeri, gigi khabimi, uma gu hadetee naa Tamaari. 7 Inkoo, Eeri badiisu gu Yuuda, yaa heedi gu tlaku pandaa da Taataa Iliitleemuge. Teesaaqay Taataa Iliitleemuge gi ⁄isimi, ma gwaai. 8 Da hheꞌesi Yuuda gi kaay sa Onaani tuba, “Aalimi tleega doogu Tamaari hadee da hhia googu, maꞌaana qocay goorii, duguti slai ma teesaaqay laqadi tleega gosi pahha, ma slaydi sa hhia googu gu didiru laqwaloo.”
9 Sa gimbakee, Onaani yaa caahhi tuba, gu lou yaꞌay gi laqwaliye haa Tamaari, yaa aloo kosi tleehhidiyaaiiba. Qatlay giyaa ilii guꞌuuꞌumine sliimaa haa tleegatee tosi, ina pisagaroo da hhawatuꞌuumaa giyaati tuutuquuquna hhapeege, ma may laqwaloo yaꞌay sa hhia gosi gu didiru. 10 Yondukee gu siaraa laqwaloo yaꞌay sa hhia gosi, gi slahhaaꞌasi Taataa Iliitleemu, slime Taataa Iliitleemu gi ⁄isimi Onaani, ma gwaai.
11 Da hheꞌesi Yuuda gi kaay sa kumboꞌoo dosi Tamaari tuba, “Taa⁄a ki⁄ee daqa taataa googii, la ibita mogombitoꞌoo pahha taysi, qatlaykaꞌa naqatloo damaa ilii diiraye nankoy Selakhaa.” Maꞌaana Yuuda yaa ilahudeesi, gi tlaꞌamuudi tuba, Selakhaa see angamalee gwaai, hhiee kosi pahha gu deni. Inkoo, Tamaari tosaa ki⁄idi, gi ibinaa kaydi aya gu taataa gosi.
12 Balalu wa⁄a gii catiri, hadee da Yuuda hotu Suuya gi hhanti. Qatlay Yuuda giyaa ilii hheꞌesi gaiidimoo hadee dosi, gi waaudiri sliimaa haa danaꞌa gosi Hiira, hiĩ gwaa Adulaanimoo, hingaa ariiriru kay haa hida gwaa sikiikimee quubu gu bee⁄u gosi. Daqatee dagaati eteediidina na Timunaa.
13 Tamaari sagaa kaay tuba, kumbaꞌa gosi amooge wana, yade khuꞌuuꞌumisi Timunaa, sikoo kay quubu gu bee⁄u gosi. 14 Da hheꞌesi gi tosaa babacinti qayroo kosi goó laqamee dagaa afahhami hhawata, gi ilacuudi pandaa dosi hari qayru, dagama may caahharaa. Nama qatlaykeesii lenge, gi hada kaydi, gi ibiti kaꞌafu gurii dawaraa tongoo da Enayiimuge, daa balabalaage waara, yade khuꞌusa Timunaa. Ina yaati teesaaqay laqadi, sa gimba yaa anti tuba, inkoo Selakhaa hiĩ heedi gu didiru tleehhidi. Slime Yuuda yaa kahhi ⁄imbaraa dagama khabimi ha Selakhaa.
15 Qatlay Yuuda giyaa ilii arimi Tamaari hiĩ ibiti kenga gu amooge, yaa ilakhupisidi pandaa dosi hari qayru, ina beelaa yaa slipalauutoꞌoo. 16 Teꞌesii giyaa kahhi caahha tuba, ina yaati kumboꞌoo dosi. Inkoo, ina gii slakhadi daqa dosii gi kaay tuba, “Hhooa ana slaꞌa qata haa igi.”
Tamaari gi ilaki⁄isidi, tay gi maasidi tuba, “Sini mala haysida, bere ⁄imba qata haa ugu?”
17 Yuuda gi ilaki⁄isi tuba, “Haa ya⁄aba daqa doogii dakhwada raqa dooaa.”
Tamaari gi ilaqincidi maamisu tuba, “Sini idoo mala haysida laanii gooay, ana ma ⁄imbi tuba, sinaa leehhisida dakhwadatee?” 18 Yuuda gi ilaki⁄isi tuba, “Igi ha idoo mala slaꞌada, ma sigi hadisi laanii?”
Tamaari gi ilaki⁄isidi tuba, “Sini hadiside petee gu kooma caqaru gu uma googu haa heeleꞌesiya doosi hatee gaã daasidi isage, sliimaa haa hhadatee da daba googuu waara.” Teꞌesii Yuuda gi tosaa hadisi idadu hhakee goõ, gi waaudiri, gi qaati haa ina. Tamaari gii loaydi.
19 Da hheꞌesi Tamaari gii tlaydi, gi ki⁄idi ayage, gi bacidi qayrukira kosi hingiraati ilacuudi pandaa dosi haa gi tosaa daamisidi qayroo gu hadee daa afahhami hhawata. 20 Qatlaykeesii lenge, Yuuda gi ya⁄abi danaꞌakee kosi Hiira gwaa Adulaanimoo, ma leehhisi dakhwadatira daqa hadetiray, maa afiigweedi idadu kosi daqa dosaa giyaa qaasi laanii. Inkoo, Hiira giyaa slayiiba hadetee. 21 Hiira gi maasi hida goó ibiidee daqa teesii tuba, “Kaale wanta slipalauutoꞌotira, daa kenga gu balabalaage waara Enayiimuge?” Inay gugi ilaki⁄isiri tuba, “Etaa, hakahhana arimaa tiꞌii slipalauutoꞌoo” 22 Inkoo, Hiira gi tosaa ki⁄i daqa Yuudage, sugugi kaay tuba, “Hagaã slayiiba! Kara hida goó ibiidee daqateesii, siniĩ kaayri tuba, yaqay hhaka slipalauutoꞌoo daa waara.”
23 Da hheꞌesi Yuuda gi kaay tuba, “May giri mete idadu hhakee, dandoo ba⁄ati muriidisi pandaa da hidage. Yuꞌudiyaa, ugu loi haã anti tuba, sagaã leehhisi dakhwadati, ina hagaã slaydiiba.”
24 Qatlay daa ilii cati slehheeri tami taqaaqay, Yuuda sugugi kaay tuba, “Tamaari kumboꞌoo doogu yaa slipalauutoꞌoo tleehhiti, inkoo hiica⁄amuu kosi, hingii loaydi!” Teꞌesii Yuuda gi ilafahhi hhawatee tuba, “Ca⁄asakanay kenga gu yaamuge, hhamisakana hari aslaa!”
25 Qatlay giyaa ilii ca⁄aa⁄amisiyee kenga gu yaamuge, Tamaari gi ya⁄abidi ya⁄aboo daqa kumbaꞌa gosii, gi kaadi tuba, “Heedi gu kooma idadu hhanki, niĩ qay hubay sa ana. Aare, caahhi! Peteki haa heeleꞌesiya dosi, sliimaa haa hhadati guti miyaa?”
26 Yuuda gigi caahhi idadu hhakee haa gi kaay tuba, “Gu lou, Tamaari naraꞌa wanta, ana na kooma dakoo, sa gimba hagaa taatahhiiba ina dagama aalimi ha nankooi Selakhaa, qatlay gaa ilii fadidi gooay.” Teꞌesaa Yuuda yaa kara hiiki⁄isiiba qata haa Tamaari.
27 Qatlay gu Tamaari giyaa ilii day guyii dawaraa, dagagi caahhi tuba, yaati konta hiiloaruũ gu yaꞌay irangiya. 28 Qatlaykeesii kosii guyii dawaraage, daa⁄u leẽ yaagii ca⁄asi daba gosi, laqwaliidisoꞌoo gii oodi putiĩ gu daa⁄adu, gugi khiidinti daba gosii, tay kakanta tuba, “Hiĩ naanii ca⁄i gu pandaa khoorooge.” 29 Qatlay daa⁄ukee giyaa ilii ki⁄isi daba gosi waꞌayge, danaꞌa gosi dugugii day gu pandaa. Da hheꞌesi laqwaliidisoꞌoo gi kaadi tuba, “Yuꞌudiyaa, idoo gaani iliica⁄adi gooay hari ⁄uuru!” Inkoo, gurigi aydi uma na Pereesi.a 30 Qariqaaqari hhia gosi dugugii day kona putikira gu daa⁄adu daba gosii, ina see dugurigi ay uma na Seera.b