Yoseefu tletaa kosi
37
1 Yakoobo gi ilakoomi ibinaa hhapee da Kanaanige, taataa gosi daqa giyaa ilii ibiidi yaamulooay gooba pahha. 2 Hiĩ na catimisu gu Yakoobo haa laqwaloo dosi.Yoseefu, qaraimoo gu koraraa mibi haa fanqu, yaati deꞌeeꞌena raqoo gu bee⁄u haa aaraa sliimaa haa hhiee kosi, yaꞌay gu Bilihhaa haa yaꞌay gu Siliipa, tigay gu taataa gosi. Yoseefu haraagi khay sa taataa gooina gimba gu tlakwi gu hhiee hhakee kosi.
3 Inkoo, Israeeli gi slai Yoseefu ba⁄ay da yaꞌay kosi gonkoinaa, sa gimba dugwaa qatlay gu gaduumaa dosii hiiday. Teesaaqay, Israeeli gi hirimaamidi qayru gu tleedu daa tlemi hari khisla sa ina. 4 Qatlay hhiee kosi giyaa ilii aniri tuba, taataa gooina giyaa slai ina ba⁄ay da inay see, gugi wakiri ina haa gi mayri cocoꞌomoo hari qasaw haa ina.
5 Amasi waku, Yoseefu gi tletimi tletaa. Qatlay giyaa ilii catimisi sa hhiee kosi, gugi wakiri ina hari khisla. 6 Hiĩ na gimba giyaa kaay sa inay tuba, “Itatiisa tletaa hhanki gaa tletiitimi. 7 Arimi, dandiray haa qaymooge wana haa khiidiidina upaiĩ gu ganoo. Cirakiray upa gooi gii tlay haa gi qadidi ge⁄e, upaiĩ kokuna gi niini⁄idiri upa gooi haa gii keebeeꞌemidiri upa gooi!”
8 Hhiee kosi gi kaayri daqa dosii tuba, “Inkoo, ugu goo ilatahhade mutemi goori tleehhita? Gu lou, handiti tawaalinta dandiray?” Kara inay gi ilakoniri wakaraa ina hari khisla, sa gimba gu tletaa kosi haa gimbakee kosi giyaa kaay daqa dooinay.
9 Da hheꞌesi Yoseefu gi kara tletiitimi tletaa wakinay, gi catimisi sa hhiee kosi, gi kaay tuba, “Itatiisa, haã tletiitimi tletaa wakinay, haa arimi qatlaykii letu, slehheẽ haa tica⁄eerii mibi haa leẽ yaa keebeeꞌemidiri daqa dooi.”
10 Qatlay giyaa ilii kaay sa taataa gosi sliimaa haa hhiee kosi, taataa gosi gugi ilii⁄oo⁄i, gi kaay tuba, “Ti tletaa mala hhaã ga konte? Gu louu ana, yaayii doogu haa hhiee koku hamaati keebeeꞌemidanaa hhapeege pandaa dooguu?” 11 Hhiee kosi gi tlaatleesiri arimaa tloomu sa ina, tay taataa gosi gi ilakoomi ilahudeemisu muuna gosii gimbakee.
Yoseefu idoo dugwaa ilii naadimi ha hhiee kosi
12 Inkoo, letu waka hhiee kosi gu Yoseefu yaa deꞌeẽ kayri kuꞌunaanay gu taataa gooina, ilaciyaa haa Sekeemu. 13 Israeeli gi kaay sa Yoseefu tuba, “Ga ilii khuꞌude gooay, hhiee koku deꞌeeꞌenaai kuꞌunaanay ilaciyaa haa Sekeemu. Khoca, hagu slaꞌa ya⁄aboo ugu daqa dooinay.”
Yoseefu gi ilaki⁄isi tuba, “Naraꞌa haã ⁄imbi.”
14 Israeeli, taataa gosi gi kaay sa ina tuba, “Taa⁄a la arimaa kayda hhiee koku sliimaa haa kuꞌunaanay, bere qasaw wanay. Da hheꞌesi siniraa khayda gimba gooina.” Yakoobo gugi ya⁄abi Yoseefu teꞌesaa hiihuuꞌuma gu Heburoonigo. Qatlay giyaa ilii day Sekeemuge, 15 heedi leẽ gugi slay Yoseefu, tay tosaa niini⁄imidi raqamaauuge, gugi maasi tuba, “Ha mala dabimaamita?”
16 Ina gi ilaki⁄isi tuba, “Hhiee koi gini dabimaamida. Hhooa sini kaade daqa gi ilii deꞌeeꞌenee kuꞌunaanay gooina.”
17 Heedikira gi ilaki⁄isi tuba, “Inay hiĩ looyiri tiaa, hagiĩ akhasi kakaanay tuba, ‘Paaree Dotaanige.’ ” Inkoo, Yoseefu gi sirakoomi hhiee kosi, gigi slay taysi Dotaanige.
18 Hhiee kosi gwaa caahhiri Yoseefu segengo, tay yaa tosaa khoci. Qatlay giyaa ilii kahhiye dawaraa daqa dooinay, inay cirakiray gi ilakhuukhuꞌusiri gaasaraa ina. 19 Hiĩ na gimba hingaa ilakaayri inay haa inay tuba, “Yuꞌudiyaa taysi, hiĩ goó tletiitima tletaa yaa khoci! 20 Inkoo, khocaa magu gaasani ina haa gugii slakhana bondaa lenge gu ilasegu,a haa gi kaawana tuba, duguũ gaasi ha makimoo gu dihhu. Da hheꞌesi ha arina, bere tletaa kosi gu lou, maayii ca⁄iyay.”
21 Qatlay Rubeeni giyaa ilii akhasi gimbaki, gi koisi ilabuꞌuru ina dabaiĩ koinaa. Ina gi kaay sa hhiee kosi tuba, “Hagu hhanti gaasana! 22 Hhanti tuutuqana ceedee dosi! Ina gutii slakhanee bondakii gu ilaseguge tiꞌii kongoqomeege. Kara, hagu hhanti ilaqaꞌaday!” Rubeeni yaa kaay teesaaqay, magu ilabuꞌumi Yoseefu hari hhaaboo dabaiĩ koinaa haa magu ki⁄isi daqa taataa gosii.
23 Inkoo, qatlay Yoseefu giyaa ilii day daqa hhiee kosii, gugi afabaciri hari ⁄uuru qayrukira gu tleedu daa tlemi naraꞌa, giyaa daasi. 24 Da hheꞌesi gugi ooyiri haa gugii slakhiri bondakeesii, qatlaykeesii gwaaba maꞌay.
25 Qatlay giyaa ilii ibiidiri, ⁄aginay ⁄agoo dooina, gi aniri raqa da Waisimaeeli yaa khocida yadaa Gileyaadigo. Inay yaa konay gamiyaa gwaa ubaabee idadu daroó khwereꞌesiye ⁄agoo, haa manemaane,b magi leehhisiri Misiri naqatloo.
26 Yuuda gi kaay sa hhiee kosi tuba, “Ha faydaa mala slayna, bere hagaasana hhia goori haa gi yakwana yonduki gu gaasaraa dosi? 27 Khocaa, ba⁄ay guti naadine ina daqa Waisimaeeli hhankii. Hagu hhanti gaasana, maꞌaana ina ti hhia goori, kara ina ti ceedee leẽ haa dandiray.” Hhiee kosi hingigi ila⁄imbiri. 28 Inkoo, qatlay hida hhakee Midiyaani goó kirigimee, giyaa ilii dayri teꞌesii, hhiee kosi gwaagii duukhiri Yoseefu bondakira haa gugi naadiniri daqa Waisimaeelige, gi slayri sekeeli mibeeri cada da peesay.c Da hheꞌesi inay gugi hubidiri Misirige.
29 Qariqaaqari Rubeeni giyaa ilii ki⁄i daqa bondakiray haa gi arimi tuba, Yoseefu hhaku, hirigii tlai, gi feehhimisi qayroo kosi hari slahhaaꞌamee. 30 Ina gi ki⁄i daqa hhiee kosii, gi kaay tuba, “Qaraimoo hhaku yaqay! Inkoo hangoo malee ariirina haa taataa goy?”
31 Da hheꞌesi gi slayri qayru gu Yoseefu, gi gaasiri gwereti haa gii tumbulaahhiri qayrukira ceedeege. 32 Inay gii oyri qayrukee daa tlemi naraꞌa, gugi leehhisiri daqa taataa gooinay haa gi kaayri tuba, “Qayruki gunti slaslayni. Aare yuꞌudii, bere gu nankoogu Yoseefu baku pasli.”
33 Taataa gooina gigi caahhi, gi kaay tuba, “Qayruki guti nankoy! Ana goó ilatahhe ha makimoo gu dihhu nuguũ iliitlai gugi ⁄agimi. Gu lou, Yoseefu duguũ dee⁄i bareemoo haa bareemoo!” 34 Da hheꞌesi Yakoobo gi feehhimisi qayroo kosi hari slahhaaꞌamee da didiri, gi ila⁄utli khiringe guniyayuu haa gi gaiidi sa nankosi balalu wa⁄a. 35 Yaꞌay kosi gonkoinaa gu hhawatee haa gu tigay yaagi khayri, magu tlaatlaqasiri. Teꞌesii, ina yaa ⁄imbiiba magu tlaatlaqamisiri. Ina gi kaay tuba, “Suti, nankoy hagu ilakooma gaiidimoo hugumaati amoolee slawakaw tla⁄aã gu hida gwaa kaka⁄ee.” Taataa gosi yaa teesaaqay ⁄aa⁄i sa Yoseefu.
36 Qatlaykeesii lenge, taysi Misirige Midiyaanitira gugi naadiniri Yoseefu daqa Potiifage, leẽ gu hida gu deni gu mutemi Faraaw haa sirikaarimoo gu didiru gu raqa doó ga⁄awa.