Lupapulo lwa kusumbula lweke Paulo kwa
Timoseo
Mulombolo
Lupapulo loolu lunyeghilwe na Paulo, muntengwe ghweke Kiliisito (1:1). Ghakamunyeghelanga muntu ^akabheele najhitilwe Timoseo, ghwa kufuma mu lugho lwa Lisitila. Timoseo akabheele mwana ghwa mwanamukeema Mujhahudi, no sye akabheele Mujhunani (kūnga Milīmo jhya Mintengwe 16:1). Timoseo ghakalimānyanga Ighāmbo lyeke Kabhumba kuhitila kwa Paulo, ghofilikutuma Paulo ghamwita Timoseo kubha ti ni, “Mwanaane ghwa bhwene bhukohela noghwe umwisighile Jheesu Kiliisito kobhe une” (1:2). Timoseo ghakalōndekananga no Paulo mu mulīmo ghwa kutangaasya Sikūla Sisogha syeke Jheesu (kūnga Milīmo jhya Mintengwe 17:14-15; 18:5). Jhilōleeke kubhala, Paulo ghakanyeghanga lupapulo loolu mu mwaka ghwa 65 Jheesu Kiliisito nafuukile. Paulo nasyali kunyegha lupapulo loolu ghakamuhanga Timoseo mulīmo ghwa kujhughalalila bhahemba bheke Jheesu mu lugho lwa Efeso (1:3). Lupapulo lwa kusumbula no lwa bhubhili, hamwi no lupapulo kwa Tiito, simanyiike kobhe mpapulo sya sikemi.
Syakasūlanga Paulo kunyegha lupapulo loolu, akabheele nalikuhensa kumubhalila Timoseo bhuli bhofihenseelwe mu kubhasāaghula no kubhalāngulula bhaghosibhakulu bha kaniisa na bhantu ^bhalikubhafūnaanila bhajhughalaliile kaniisa. Paulo akabheele nalikuhensa Timoseo na bhaabho bhaghosibhakulu bha kaniisa bhabhe bhaghololoke, bhalāngulule bhwene ne nsembo nsogha ku bhahemba. Kabhili akabheele nalikuhensa kumulomba Timoseo abhe kwa kulōlela masogha ku bhantu bhonse (4:12). Lindi kabhili lyakabheele nabhasile ni kumulānga Timoseo bhwakubhafūnaanila bhahemba mu nfuku sya kusanfisibhwa. Kabhili Timoseo abhe na managha gha kughatuna malāngululo ghonse ghasili gha bhwene (1:3-7; 4:1-5; 6:3-5).