Lupapulo lwa kusumbula lweke Paulo kwa
Timoseo
Paulo alikumuposya Timoseo
1
Lupapulo loolu nyeghile une Paulo. Une ndaghiisilwe kubha muntengwe ghweke Jheesu Kiliisito kwi ilaghi lyeke Kabhumba Kasābhula ghwetu no kwa Jheesu Kiliisito ghotwisighile mu nfuku ^siisile. 2 Ndikukunyeghela ughwe Timoseo, mwanaane ghwa bhwene bhukohela noghwe umwisighile Jheesu Kiliisito kobhe une.Ndikusēegha kubhala sighōngo na maholo kufuma kwa Taata Kabhumba no kwa Jheesu Kiliisito, Sifwe Bhusya, fibhe hamwi naghwe.
Paulo alikumukabha Timoseo nasilōndi malāngululo gha malami
3 Liima lyonankabhuukanga kujha ku sihugho sya Makedonia, nankakulebhelesyanga usiibhe mu lugho lwa Efeso. Nankakulebhelesyanga teetyo aleke ubhalēsye bhantu ^bhalikulāngulula malāngululo gha malami. 4 Bhalombe bhalēke kusamba ne nsumuulilo sya kale sisili no bhwene bhobhonse, na masiina gha bhakulu bha kale ghasila ha bhuhela. Ghaagho maghāmbo ghonse ghalikusūla kuhisyunkana, teghalikubhafūnaanila bhantu kukola mulīmo ghweke Kabhumba, kobhe bhoghulikukoleka ku nsīla jhya kumwisigha. 5 Sintu sikulu kwi ilaghi leelyo, ni kuhensa bhahemba bheke Jheesu bhetēhe ku mwēgho musogha, ku kulanganyia fya bhuntu, no ku kwisigha kwa bhwene. 6 Tukubha bhandi bhantu bhaghalēka ghaagho, bhahīnduka, bhasumbula kutenda maghāmbo masila iijhobho. 7 Bhalikuhensa kubha bhamakota bha Kabhāngo keke Musa hamwi no kubha ghobhalikutenda bhasimbaatisya nkana, tebhaghajhinsi.
8 Tukubha ufwe tujhinsi kubha ti, Kabhāngo keke Musa ni kasogha, kubha muntu nalikukalōnda kobhe bhokali. 9 Kabhili, ni fisogha tumānye kubhala, Kabhāngo te ku bhantu bhatendeke, tukubha ni ku bhabhiihya bha Kabhāngo, bhabhi, bhasikohulika, bhēela bhubhi na bhasimutikiisye Kabhumba. Kabhāngo ni ku bhantu bhasila myēgho misogha, bhehaghanyi bha bhasiibho na bhanyinaabho, ajhe bhehaghanyi bha bhantu bhobhonse. 10 Kabhāngo ni ku bhaswanyi na bhaghoosi ^bhalikuswana bheene ku bheene, bhantu ^bhalikubhwelamila bhenaabho bhaajha mukabhasulusya mu bhusya, bhakanya malami na bhantu bhakukabha bhalikulahila ku fya malami. Kabhāngo kabhiikilwe ku maghāmbo ghonse ghasijhikenyie na malāngululo gha bhwene. 11 Malāngululo ghaagho gha bhwene ghakolōleka mu Sikūla Sisogha, ^silikulānsya njimiisi jhyeke Kabhumba ali ne mpambulilo syonse. Seesyo Sikūla gho syonankaheebhwanga na Kabhumba insitangaasye.
Sighōngo syeke Jheesu Kiliisito kwa Paulo
12 Ndikumusīima Jheesu Kiliisito Sifwe Bhusya, ampeele managha gha kukola mulīmo ghwajhe. Ndikumusīima, bhukohela ghakalōlanga kubha ti inesighilwako, ghambiika imbe mukola milīmo ghwajhe, 13 hamwi no kubha mu kusumbula nankamutukanga, nambasanfya bhantu bhaajhe, ghaagho nankaghēlanga ku bhuniofi. Tukubha, unyene ghandōlela sighōngo, bhukohela nkabheele nendikwīla ghaagho ku bhungalangala bhwane no kukubhula kwisigha. 14 Sifwe Bhusya Jheesu Kiliisito ghakandōlelanga sighōngo sikulu, kabhili ghakampanga kwisigha no kutēha bhukohela ndi hamwi naajhe.
15 Ni ighāmbo lya bhwene lihenseelwe bhantu bhonse bhaaliswa, kubhala, “Jheesu Kiliisito ghakesanga hanu ha bhweleelo mukubhasābhula bhakanya bhubhi,” no mu bhaabho bhakanya bhubhi, une nkabheele kanya bhubhi kusumba bhonse. 16 Singa teetyo, Jheesu Kiliisito ghakandōlelanga sighōngo une! Ghatuusya mwēgho ghwajhe kumwane une kanya bhubhi kusumba bhonse, aleke imbe kwa kumānyila ku bhalya bhalokamwisigha bhapokeele bhupanga bhwa nfuku syonse. 17 Kujhimbikwa ne mpunda fibhe kumwajhe Kabhumba nfuku syonse bhusila ha bhuhela! Unyene ni Mwami ghwa bhusila ha bhuhela, tyanafwa, tyalikulōleka, ni Kabhumba ^ali ghongwae. Na fibhe bhoobho.
Paulo alikumusīipya Timoseo nasilēki kwisigha kwajhe
18 Ughwe Timoseo mwanaane, nankuha leelyo ilaghi, ^lijhikenyie na maghāmbo gha bhughwelaghu ^ghakatendwanga ku luhande loobhe. Maghāmbo ghaagho ghakufūnaanile mwi isumo lya mulīmo musogha ghweke Kabhumba. 19 Tembeekesya kwisigha koobhe no kubha no mwēgho musogha. Bhantu bhandi bhaalēka kwīla ghaaghali ghobhajhinsi kubha ti ni gha bhwene, teetyo bhabhiihya kwisigha kwabho. 20 Mu bhantu bhaabho alimo Himenajho, no Alekisanda. Bhantu bhaabho namulēkela Syetani, aleke bheejhighe, bhalēke kumutuka Kabhumba.