Malāngululo ghajhikenyie no kumupeela Kabhumba mu kaniisa
2
Lya kusumbula mu fyonse, ndikuhensa mubhe mulikubhatendajhyukila, kubhasēeghela no kubhēelila mpeesi bhantu bhonse. Kabhili mwabha mulikumusīima Kabhumba ku maghāmbo ghoghakakola ku bhantu bhonse. 2 Muhenseelwe kubhatendajhyukila kwa Kabhumba bhaami na bhandi bhonse bhakulu bhakulu, aleke twīkale ku maholo bhusila kajhunga, tumutiikisye Kabhumba no kubha ne nsembo nsogha. 3 Ighāmbo leeli ni isogha, gho lisīimilwe na Kabhumba Kasābhula ghwetu. 4 Kabhumba alikuhensa bhantu bhonse bhasābhulwe no kubhumānya bhwene. 5 Aliko Kabhumba ghumwi bhuhela, no ghwa kusanyia bhantu na Kabhumba ni muntu ghumwi bhuhela, Jheesu Kiliisito. 6 Unyene gho ghakafumyanga bhupanga bhwajhe, aleke atupingule fwense. Bhoobhu gho bhukalōla Kabhumba bhoghakatuhekesyanga mu liima lyoghakabhiikanga. 7 Teetyo une, nankabhikwanga imbe nendikutangaasya Sikūla Sisogha no kubha imbe muntengwe ghwajhe. Ndikutenda bhwene, nsilikutenda malami. Nankabhikwanga kubha sibho bhuhemba ghwa bhantu bhasili Bhajhahudi, imbe nendikutangaasya sikūla sya bhwene sya kwisigha.8 Teetyo, hohonse homwakomenkana mu kupeela kwa Kabhumba, ndikuhensa bhanabhaghoosi mukubha bhalikutendajhyuka bhatansye mabhoko ghaabho bhusila keghonde, bhusila sisila ne mpaka. 9 Teetyoe ndikuhensa bhanabhakeema bhafwale kobhe bhofihenseelwe, bhabhe na nsembo nsogha ne syubhaho. Bhasitēhi majhemi gha kusuka nyele, ajhe kufwala fintu fya sahabhu ne fya kujhengajhenga, ajhe myenda jhya mahela mengi. 10 Tukubha, bhabha bhalikwīla maghāmbo masogha, kobhe bhofihenseelwe ku bhanabhakeema ^bhaswele kumutiikisya Kabhumba. 11 Bhanabhakeema, kubha bhalikulāngululwa, bhabha bhahulikiisye no kutiikisya. 12 Nsilikubhaswesya bhanabhakeema kulāngulula, ajhe kubhakanya bhanabhaghoosi, bheene ni kuhulikisya bhuhela. 13 Ndikutenda teetyo bhukohela, Kabhumba ghakamubhumbanga Adamu mu kusumbula, kundi ghalōnda Hawa. 14 Kabhili Adamu teghakatebhwanga, tukubha Hawa gho ghakatebhwanga, ghabha nalikubhiihya malaghi gheke Kabhumba.a 15 Tukubha mwanamukeemab alosābhulwa ku nsīla jhya kufyala bhaana, kubha ghajhililika kwisigha, kutēha, kufūlwa no kubha ne syubhaho.