^Filikuhenselwa ku bhantu bhajhughalaliile kaniisa
3
Leeli ighāmbo ni lya bhwene kubhala, muntu ^alikuhensa mulīmo ghwa kujhughalalila kaniisa, ghahensa mulīmo musogha. 2 Kundi, muntu ghoghonse ghwa kujhughalalila kaniisa, abhe ni muntu ghwa bhusila kutendwa ku mabhi. Abhe natoosile mukeema ghumwi,a abhe muntu ^anakobhola kwijhughalalila, kabhili abhe na masāla. Abhe muntu ^ajhimbiikwe, mukonka bhantu, abhe najhinsi kulāngulula Ighāmbo lyeke Kabhumba. 3 Nasikolwi maalwa, nasibhi ghwa masōola, abhe mutendeke mutēha maholo. Kabhili nasibhi mutēha mpijha. 4 Abhe muntu ghwa kujhughalalila fisogha lugho lwajhe, muntu ^ajhinsi kulānga bhatwana kuhulikisya bhantu no kubhatiikisya. 5 Kubha muntu nasikobhwele kujhughalalila lugho lwajhe, alokobhola bhuti kujhughalalila kaniisa lyeke Kabhumba? 6 Kabhili, nasibhi muntu asyalisighile mu nfuku sya habhwihi, akulinga nasibhi na myala. Jheejhyo myala jhilomusūla aaghwe ghakalilwa kobhe bhoghakakalilwanga Syetani. 7 Kabhili ahenseelwe kutendwa fisogha kumwi no ku bhantu bhasili bhahemba bheke Jheesu, aleke nasitendwi fibhi no Syetani nasimuteghi.^Filikuhenselwa ku bhantu ^bhalikubhafūnaanila ^bhajhughalaliile kaniisa
8 Teetyoe, bhantu ^bhalikubhafūnaanila ^bhajhughalaliile kaniisa, naagho bhabhe na nsembo nsogha, bhasibhi bhantu bha kuhīndukahīnduka, bhasikolwi maalwa, bhasibhi ne iitama ibhi lya kuhensa mahela. 9 Tukubha, bhabhe bhantu ^bhanīghiliile ku mwēgho musogha bhwene bhwa kwisigha kwetu bhoghakatulānsya Kabhumba. 10 Bhaabho naagho, bhaaghemwa nyinambele. Kubha bhalōleka kubha ti bhanakobhola, kundi bhakola ghoogho mulīmo. 11 Bhakasi bhaabho naagho, bhabha na nsembo nsogha, bhasibhi bhaghamba bhantu, bhabhe bhantu ^bhanakobhola kwijhughalalila, kabhili bhabha bhesighiilweko mu maghāmbo ghonse ghobhalikwīla. 12 Bhalya ^bhalikubhafūnaanila ^bhajhughalaliile kaniisa bhahenseelwe bhonse kubha na mukeema ghumwi ghumwi bhuhela,b bhabhe bhalikujhughalalila fisogha bhaana bhaabho na bhandi ^bhali mu ngo syabho. 13 Bhalya ^bhalikukola fisogha mulīmo ghwa kubhafūnaanila ^bhajhughalaliile kaniisa, bhaabho bhakojhimbikwa nkana. Haaho bhabha na bhusimu bhukulu bhwa kubhalomba bhantu bhuli bhobhamwisighile Jheesu Kiliisito.
Bhwene bhwa kwisigha kwetu
14 Ndikukunyeghela maghāmbo ghaagho, singa bhombasile kwisa kumoobhe teeti nonwe. 15 Kubha nantinda, ulomānya bhantu bheke Kabhumba ghobhahenseelwe kwīla. Bhantu bhaabho gho kaniisa lyeke Kabhumba ^ali bhupanga, ne kaniisa gho ihanda no musingi ghwa bhwene. 16 Bhwene bhoghatulānsya Kabhumba bhukulu nkana, ni bhoobhu,
Kiliisito ghakelubhusyanga ku nsīla jhya mutūmba,
Mwēgho Mulafu ghweke Kabhumba ghakalānsyanga kubhala, Kiliisito ni Mwana ghweke Kabhumba.
Misambwa jhyeke Kabhumba jhyamulōla,
ghatangaasibhwa ku bhantu bha fihugho fyonse,
bhantu bha ha bhweleelo bhamwisigha,
ghatwalwa kujha mwi ighūlu mu lughamba mu njimiisi jhyajhe.