Bhamakota bha malami
4
Nonwe, Mwēgho Mulafu ghweke Kabhumba alikutenda bhusila kufisa kubhala, mu nfuku sya ku bhuhela bhandi bhalokalēka kwisigha kwabho kwa bhwene, bhalōnda mamisāgha mabhi gha malami na malāngululo ghaabho. 2 Malāngululo ghaagho ghalikulalasibhwa na bhakateelanyia bhakanya malami, tebhajhinsi bhubhi no bhusogha bhukohela myēgho jhyabho jhili kobhe jhyakatumbwa na mulīlo. 3 Bhaabho bhalikulāngulula bhantu kubha ti bhalēke kwitoola, ajhe kulya fyakulya findi findi. Tukubha Kabhumba ghakabhumbanga fyakulya aleke bhafipokeele ku musīimo ^bhamwisighile no kubhumānya bhwene. 4 Fintu fyonse fyoghakabhumbanga Kabhumba ni fisogha, hatuhu sya kutunwa. Fyonse fipokeelwe ku musīimo, 5 bhukohela Ighāmbo lyeke Kabhumba no kusēegha kwetu, kukosūla fintu feefyo fibhe fisogha kuliibhwa.Mukola milīmo musogha ghweke Jheesu Kiliisito
6 Kubha ghwabhalāngulula bhahemba bhonse bheke Jheesu ghaagho maghāmbo, ulobha mukola milīmo musogha ghweke Jheesu Kiliisito, ulobha ghwatobhelwa fisogha mu bhwene bhwa kwisigha kwetu no mu malāngululo masogha ghoghwakalōnda. 7 Lēsya bhuliko nsumuulilo sya kale sisili no bhwene bhobhonse, tukubha lijhande nkana kwīkala kobhe bhwahensile Kabhumba. 8 Jhimānyiike kubhala kwisibhika mutūmba kughuha managha, kuli na bhusabhaghala bhuse tue. Tukubha, kwijhisibhisya kwīkala bhuli bhwahensile Kabhumba, kuli na bhusabhaghala bhwingi, bhukohela leeli lilikutuha mpambulilo sya kupata bhupanga bhwa nonwe no bhulya ^bhulokeesa. 9 Leelyo ighāmbo ni lya bhwene, kabhili bhantu bhahenseelwe kulilōnda. 10 Leelyo gho lilikusūla tulikwifinda kukola mulīmo ku managha, bhukohela tumujheghamiile Kabhumba ^ali bhupanga. Unyene gho Kasābhula ghwa bhantu bhonse, nkana bhalya ^bhamwisighile.
11 Ghaagho maghāmbo, ughalāngulule, ghwanaghalaghiila. 12 Muntu ghoghonse nasikutunguuli bhukohela ughwe usyali mulughalugha, tukubha ghwalifinda kubha muntu ghwa kumānyilako ku bhahemba bheke Jheesu ku maghāmbo ghoobhe, nsembo jhyobhe, kutēha koobhe, kwisigha no bhukonde bhoobhe. 13 Ghwalifinda kubhasomela bhantu Ighāmbo lyeke Kabhumba, kabhili ghwatangaasya no kulāngulula, mpaka hondokeesila. 14 Nosilēki kukosya managha ghoheebhilwe na Kabhumba ku nsīla jhya maghāmbo gha bhughwelaghu ^ghakalombwanga na bhaghosibhakulu bha kaniisa ifuku lyobhakakubhikilanga mabhoko. 15 Ghwalifinda kughakola ghaagho ku mwēgho ghoobhe ghonse, aleke bhantu bhonse bhalōle kajhiilo mu meekasi ghoobhe. 16 Tembeekesya nkana maghāmbo ghoobhe ghwenyene na malāngululo ghoobhe. Kubha ghwajhililika kukola ghaagho, ulolisābhula ughwe ghwenyene na bhandi ^bhalikukuhulikisya.