Malaghi ku bhantu bha mu kaniisa
5
Nosibhakalihili bhanabhaghoosi bhakekulu, tukubha bhahane kobhe bhaaso. Bhalughalugha ghwabhahana kobhe bhamughana ghoobhe. 2 Bhanabhakeema bhakekulu ghwabhahana kobhe bhanyoko na bhanabhakeema bhahāla ghwabhahana kobhe bhehwa bhoobhe. Ghwajhīla teetyo ku mwēgho musogha.3 Bhatiikisye bhanabhakeema ^bhakafwilwa na bhebhaabho bhasili na bha kubhafūnaanila. 4 Tukubha mwanamukeema mulekwa ghoghonse kubha ghabha na bhaana ajhe bhesukulu, bhaabho bhahenseelwe nyinambele kukola milīmo jhyabho jhya kubhafūnaanila bhamughana ghwabho. Kubha bhaajhīla teetyo, bhalobha bhalikubhalīha masogha bhafyasi bhaabho ghobhakabhēlilanga. Teetyo gho Kabhumba bhwahensile. 5 Mwanamukeema mulekwa asili no muntu ghwa kumufūnaanila, ghoogho amwisighile Kabhumba, ni ghwakubha nalikutendajhyuka no kumusēegha Kabhumba bhufuku ne isyubha amufūnaanile. 6 Tukubha mwanamukeema mulekwa ghwakukabha nfuku syonse nalikuhensa fintu fya ha bhweleelo, ghoogho alakubha kobhe ghakafwa singa nali bhupanga. 7 Ghaagho maghāmbo naagho, ghwabhalaghiila bhahemba bheke Jheesu, akulinga bhasikatendwi fibhi. 8 Tukubha muntu ghoghonse asikofūnaanila bhantu bhaajhe, nkana bhalya bha mu nyumba jhyajhe, ghoogho alobha ghaalēka kumwisigha Kabhumba, kabhili alobha muntu mubhi nkana kusumba ghulya asimwisighile Kabhumba.
9 Mwanamukeema mulekwa ^apandilwe kubha mu bhalekwa bha kufūnaanilwa ne kaniisa, ghabha na myaka kusumbulila makumi mukaagha, no kubha ghabha mwanamukeema asikabheele natoosilwe ha mpali.a 10 Ghabha kanya mpunda nsogha, ghabha muntu ghulya ^ghakatobhelanga bhaana bhaajhe fisogha, ^ghakasanganilanga bhanyēnyi, ^ghakabhajhyukilanga bhahemba bheke Jheesu ku kubhanyaaghisya maghūlu ghaabho, ^ghakafūnanilanga bhalikubhunusibhwa, kabhili abhe muntu ^ghakakolanga maghāmbo masogha nfuku syonse. 11 Tukubha bhanabhakeema ^bhakafwilwa bhasyali bhahāla, nosibhaswesi kwipampika ku bhalekwa bha kufūnaanilwa, bhukohela mitūmba jhyabho jhili ne iitama, bhalohensa nkana kutoolwa hali kukola mulīmo ghweke Kiliisito. 12 Teetyo bhalobha bhalikalila bheene, bhukohela bhalobha bhaalēka kalaghano ka kumwabho no Kiliisito ka kusiibha bhusila kutoolwa kabhili. 13 Bhalekwa kobhe bhaabho, bhesibhiile nsembo jhya bhukime, bhalikulyātalyāta mu majhumba gha bhantu. Kabhili ni bhakasonganyia, bhalikwingila mu maghāmbo gha bhandi, bhalikukola maghāmbo ghasili gha kumwabho no kutenda ghasili masogha. 14 Nonwe, ndikuhensa bhanabhakeema ^bhakafwilwa bhasyali bhahāla, bhabhe bhalikutoolwa, bhafyale bhaana no kukōnka nyumba syabho, aleke bhemba bheetu bhasitutendi fibhi, 15 bhukohela bhalekwa bhandi bhakahwa kutaajhika bhamulōnda Syetani.
16 Kubha mwanamukeema ^alisighile nali na bhalekwa mu bhamughana ghwajhe, ghabhafūnaanila, akulinga kaniisa lisinywamilwi. Teetyo, kaniisa lilobha na mwengulo ghwa kubhafūnaanila bhalekwa bhandi bhasili na bhantu bha kubhafūnaanila.
17 Bhaghosibhakulu ^bhalikujhughalalila kaniisa fisogha, bhahenseelwe kutiikisibhwa no kwīlilwa masogha, nkana bhalya ^bhalikwihala kutangaasya no kulāngulula Ighāmbo lyeke Kabhumba ku bhantu. 18 Ndikutenda teetyo, bhukohela finyeghilwe mwi Ighāmbo lyeke Kabhumba kubhala, “Nosijhihambi kanywa ng'ombe kubha jhilikuhuula ngano.”b Kabhili finyeghilwe kubhala, “Mukola milīmo ghoghonse ahenseelwe kulīhwa simaanya syajhe.”c
19 Nosiswi maghāmbo ku luhande lwa bhaghosibhakulu bha kaniisa, bhusila bhukalōla bhwa bhantu bhabhili ajhe bhatatu.d 20 Tukubha bhaghosibhakulu bha kaniisa bhalya ^bhajhililiike kukola mabhi, ghwabhakabha ha mbele jhya bhandi bhonse, aleke bhaabho naagho bhaghubhahe.
Malaghi kwa Timoseo
21 Ndikukulaghiila ha mbele jhyeke Kabhumba, na ha mbele jhyeke Jheesu Kiliisito ne misambwa ^jhyakasongolwa kubhala, nīghilila ghaagho. Nosikali bhwangu bhwangu ajhe kukūnga luhande lumwi. 22 Nosijhīli bhwangu bhwangu kumughambikako mabhoko muntu aleke akole mulīmo ghweke Sifwe Bhusya, bhukohela kubha ghwamubhiika mwīla bhubhi mu ghoogho mulīmo, noghwe ulobha kumwi naajhe mu ghaagho mabhi ghaajhe. Ughwe liijheke na mabhi aleke usiibhe mutendeke.
23 Kusumbulila nonwe, ughwe nosinywi mansi bhuhela, tukubha ghwabha nolikunywa ne divaie fise ku bhulwele bhoobhe bhwa mu nda na malwele ghandi ^ghalikukusanfya.