Milīmo jhya Mintengwe bheke Jheesu
Mulombolo
Luuka gho kanya kunyegha sitaabhu sya Milīmo jhya Mintengwe. Unyene gho kanya kunyegha ne sitaabhu sya Sikūla Sisogha silya sijhitilwe Luuka. Ghoogho tyakabheele Mujhahudi. Akabheele keteghajhumbila kumwi na muntengwe Paulo ku sindi nfuku mu nyēndo syajhe sya kutangaasya Sikūla Sisogha syeke Jheesu Kiliisito (Bhakolosai 4:10-14). Paulo ghakatendanga kubhala Luuka akabheele mu bhalya bhakola milīmo ^bhakabheele bhali kumufūnaanila (2 Timoseo 4:11; Filimooni 24). Kabhili akabheele nali “mufumo mutēha bhantu” (Bhakolosai 4:14).
Luuka ghakanyeghanga sitaabhu sya Milīmo jhya Mintengwe kobhe mu myaka jhya 60-64 nfuku syakabheele Jheesu nafuukile, mu liima lyakabheele nali hamwi na Paulo mu lugho lwa Luumi. Tujhinsi ti Luuka ghakanyeghanga sitaabhu seesyo mu myaka jheejhyo bhukohela, sitaabhu syakakwilanga nasyali Paulo kuhwa nfuku syajhe mwi ighelesya.
Luuka ghakamunyeghelanga sitaabhu sya Sikūla Sisogha hamwi ne sitaabhu sya Milīmo jhya Mintengwe muntu ^akabheele najhitilwe Tofilo. Luuka ghakamunyeghelanga Tofilo, namubhasileko munyampala (Luuka 1:3). Ghoogho Tofilo, bhamakota bhengi bha Ighāmbo lyeke Kabhumba bhalikulanganyia kubhala, akabheele mu bhalya bhakulu bha lugho lwa Luumi ^bhamwisighile Kabhumba. Singa tu kubha Luuka ghakamunyeghelanga Tofilo, bhamakota bhengi bhalikulanganyia kubhala Luuka akabheele nabhasile bhahemba bhonse, Bhajhahudi hamwi na bhasimwisighile Kabhumba, bhasōme fitaabhu feefyo.
Sitaabhu sya Milīmo jhya Mintengwe silikughungilisya ku Sikūla Sisogha syeke Luuka (Milīmo jhya Mintengwe 1:1-2). Sisumbuliile halya sitaabhu syeke Luuka hosiheleleele. Mu sitaabhu sya Milīmo jhya Mintengwe, Luuka atendeleele maghāmbo makulu nkana bhuli bhoghakalōlanga mu bhusumbulilo bhwa kaniisa lya kusumbula. Ighāmbo lyajhe ikulu likabheele ni kulānsya bhuli Kabhumba bhoghakalānsyanga Sikūla Sisogha syeke Jheesu Kiliisito, no bhuli bhoghakabhajhughalalilanga no kubhapambulila bhahemba ku kuhitila Mwēgho Mulafu.