Kusyuka kweke Jheesu
(Matajhu 28:1-8; Maaliko 16:1-8; Jhohana 20:1-10)
24
Ifuku lya Jhumapiili mukubha kulikubhenga, bhalya bhanabhakeema bhakajhanga ku lulaalo. Bhakabheele bhatwite mafuta no muti fyobhakabheele bhatelenkanyia fya kughusīigha ghulya mutūmba ghweke Jheesu. 2 Mukubha bhafīka, bhasangana ibhwe lyakabhikwanga ha mulyāngo lyafilinkasibhwa lili ha mbali. 3 Kundi bhajhingila mukati, bhasangana mutūmba ghweke Sifwe Bhusya Jheesu, ghuli mutuhu. 4 Mukubha bhalikuteteelwa ku ghaagho maghāmbo, bhajhisukila bhanabhaghoosi bhabhili bhafwite myenda jhilikujhengajhenga bhajhughalele ha bhwihi nabho. 5 Bhaabho bhanabhakeema bhaghubhaha. Bhajhinama mpaka hansi. Kundi bhalya bhanabhaghoosi bhabhalomba bhabhala, “Nasi mulikumuhensa ali bhupanga ku bhafu? 6 Ali hatuhu hanu! Ghasyuka! Jhisukile maghāmbo ghoghakamilombanga bhwakabheele nasyali ku sihugho sya Ghalilaajha. 7 Ghakabhalanga, ‘Mwana ghwa Muntu alobhiikwa mu mabhoko gha bhakanya bhubhi, ghabhambwa ku musalabha, ne ifuku lya bhutatu ghasyuka.’”8 Kundi bhalya bhanabhakeema bhaghesukila maghāmbo gheke Jheesu,
9 bhaheleela kufuma ku lulaalo, bhabhatānyisya bhalya mintengwe ikumi na ghumwi hamwi na bhandi bhonse, ghonse ghobhalōlanga. 10 Bhanabhakeema ^bhakatendanga ghaagho ku mintengwe, bhakabheele ni Maliamu Maghidalena, Jhoana, no Maliamu nyina ghweke Jhakobho, hamwi na bhandi bhanabhakeema ^bhakabheele kumwi nabho. 11 Tukubha mintengwe bheke Jheesu, bhobhakahulikanga ghaagho maghāmbo, tebhakaghaswanga bhukohela bhakaghalōlanga kobhe bhungalangala. 12 Haaho, Petelo ghabhuuka ghaajha lubhilo mpaka ku lulaalo, ghajhinama ghasunukila mukati, ghaalōla tu ghulya mwenda ghwa sanda ghobhakamufwikanga Jheesu. Ghahafuma halya nalikwikosa mahi nkana ghaagho maghāmbo ghasūlika.
Jheesu alikwilubhusya ku bhahemba bhabhili
(Maaliko 16:12-13)
13 Jhyalikabha mu leelyo ifuku, bhahemba bhabhili bhakabheele bhajhiile mu lugho lwa Emau. Lugho loolo lukabheele hale, lwēndo lwa mansa abhilia kufuma ku Jhelusalemu. 14 Mukubha bhalikulyāta, bhabha bhalikusāhulila ghaagho maghāmbo ^ghakabheele ghasūlika. 15 Mukubha bhalikusāhula no kwitānyisya ghaagho, Jheesu ghalabhuka, ghajha kulyāta hamwi nabho. 16 Tukubha bhakahulwanga kabhūbhi, tebhakamumānyanga kubha ti ni Jheesu.
17 Jheesu ghabhabhasya ghaabhala, “Ni maghāmbo si ghomulikujha mwasāhula?” Bhalya bhahemba bhajhughalala ku bhulanda. 18 Ghumwi mu bhaabho, isiina lyajhe Kileopa, ghamuhindula ghaabhala, “Ndikulanganyia nighwe bhuhela mu bhanyēnyi bhajhīkeele mu Jhelusalemu usijhinsi ghakasūlike hanu mu seesi nfuku.” 19 Jheesu ghabhasya, “Ni maghāmbo si ghaagho?” Bhamuhindula bhabhala, “Ni maghāmbo ghalya ghakamufīkileko Jheesu Munasaleti. Ghoogho akabheele mughwelaghu, kanya managha gha kukola no bhulonfi, ha mbele jhyeke Kabhumba na bhantu bhonse. 20 Bhapeesi bhakulu na bhakulu bhakulu bheetu, bhamufela mu kukalilwa liilufu. Kundi bhamubhamba ku musalabha. 21 Ghoogho ghotukabheele twisighile kubhala ti alakutusābhula ufwe Bhesilaheeli. Hamwi na ghaagho, bhwalelo ni ifuku lya bhutatu ghasūlike.
22 Kabhili hali bhanabhakeema bhasūla twalikosa mahi, bhukohela bhwalelo mukubha kulikubhenga, bhajhanga ku lulaalo, 23 bhasangana mutūmba mutuhu mu lulaalo. Bhajhisa bhatulomba kubhala ti, bhakesilwangaho ne misambwa bhabhalomba ti Jheesu ali bhupanga. 24 Na bhandi mu ufwe, bhajhanga ku lulaalo bhalōla kobhe bhobhatānyianga bhalya bhanabhakeema, tukubha unyene tebhamulōlanga.”
25 Kundi unyene Jheesu ghabhalomba ghaabhala, “Umwe muli bhangalangala! Kabhili, myēgho jhyenyu ni mikaka kuswa ghonse ghakatendwanga na bhaghwelaghu! 26 Teeti, tyahenseelwe Muhosya abhambwe no kwingila mu mpasi jhyajhe?” 27 Kundi ghabhatānyisya mpola syonse sinyeghilwe mwi Ighāmbo lyeke Kabhumba ku luhande lwajhe, kusumbula mu fitaabhu fyeke Musa mpaka mu fitaabhu fyonse fya bhaghwelaghu.
28 Mukubha bhali ku bhwihi no lugho mobhakabheele bhajhiile, Jheesu ghabha kobhe ahitiliile. 29 Tukubha bhamulebhelesya nkana bhalikubhala, “Jhīkala nosijhi, bhukohela isyubha lyahwa, bhufuku bhuli kwihi kujhila.” Haaho ghajhingila, ghajhīkala nabho.
30 Bhobhakabhanga bhajhīkala ha fyakulya, ghatwala ibhu ghasīima kwa Kabhumba, ghalimetula, ghabhaheekesya. 31 Kundi kabhūbhi kabhafuma ku menso, bhamumānya kubha ti ni Jheesu. Kafumilo ka haaho ghabhapenga. 32 Kundi bhajha kwibhasya kubhala, “Teeti, myēgho jhyetu tejhibhele jhilikulāhuka bhwabhele nalikutenda nofwe mu nsīla, nalikututānyisya bhuli bhofibhasilwe mu fitaabhu fya Ighāmbo lyeke Kabhumba?”
33 Mu leelyo ikunkae, bhabhuuka bhaheleela ku Jhelusalemu. Kooko bhabhasānga bhalya mintengwe ikumi na ghumwi hamwi na bhandi bhakabheele kumwi nabho bhakomenkana, 34 bhalikusāhula kubhala, “Ni bhwene Sifwe Bhusya ghasyuka! Ghalōleka no kwa Simoni!”
35 Kundi naagho bhalya bhabhili bhabhatānyisya bhobhalōndekananga naajhe mu nsīla, no bhobhamumānyanga mukubha nalikumetula ibhu.
Jheesu alikwilubhusya ku bhahemba bhaajhe
(Matajhu 28:16-20; Maaliko 16:14-18; Jhohana 20:19-23; Milīmo jhya Mintengwe 1:6-8)
36 Mukubha bhalikusāhula ghaagho, Jheesu nyene ghajhughalala hakati nabho. Ghabhalomba ghaabhala, “Bhe na maholo.” 37 Bhasusuka bhanaghubhaha nkana bhajhinsi ti twalōla musimu.
38 Kundi ghabhalomba, “Lēke kusūpa, lēke kwisihisya mu myēgho jhyenyu. 39 Kūnge mabhamba ku mabhoko na maghūlu ghaane, mulōle kubhala ti nine. Kookwe nighe mulōle, bhukohela musimu teghuli na nyama na mafuha kobha une bhomumbwene.”
40 Bhoghakabhanga ghatenda ghaagho, kundi ghabhalānsya mabhoko na maghūlu ghaajhe. 41 Bhasyali bhalikujhisihisya, bhasangabheele no kwikosa mahi, Jheesu ghabhabhasya, “Muli na kakulya kokonse hanu?” 42 Bhamuha itinta lya isembe lya bhutīnke, 43 ghatwala, ghalya bhabhwene. 44 Kundi ghabhalomba ghaabhala, “Ghaagho gho maghāmbo ghaane ghonankamilombanga nensyali kumwi nenyu kubhala, ni mpaka ghakwila ghonse ghatensilwe ku luhande lwane mu Kabhāngo keke Musa, no mu fitaabhu fya bhaghwelaghu no mu sitaabhu sya Sabhuli.”
45 Kundi ghajhīghula masāla ghaabho bhalōle mu kulimānya Ighāmbo lyeke Kabhumba. 46 Ghabhalomba ghaabhala, “Finyeghilwe kubhala, Muhosya alokabhambwa no kwihaghwa, ne ifuku lya bhutatu alokasyuka kufuma ku bhafu. 47 Kabhili, bhantu bha fihugho fyonse kusumbulila ku Jhelusalemu, bhalokatangaasibhwa kwi isiina lyajhe, mpola sya kughalaghala, akulinga Kabhumba alesye bhubhi bhwabho. 48 Bhukohela umwe ghomwe bhakalōla bha ghaagha ghonse, mwabhatentemulila na bhandi.
49 Hulikisye! Nonwe nankumilaghisisya Mwēgho Mulafub ghweke Kabhumba, ajhise kumwenyu kobhe Taata bhoghakabhalanga kubha ti alomilaghisisya. Tukubha musifumi munu mu lugho lwa Jhelusalemu, mpaka mwaheebhwa managha kufuma mwi ighūlu.”
Kughulusibhwa kweke Jheesu mwi ighūlu
(Milīmo jhya Mintengwe 1:9-11; Maaliko 16:19-20)
50 Kafumilo ka haaho Jheesu ghabhalombola kunse na lugho, mpaka mwi ihala lya Bhesania. Mukubha bhafīka haaho, ghatalika mabhoko ghaajhe, ghabhapambulila. 51 Mukubha nalikubhapambulila, ghabhalēka, kundi ghaghulusibhwa na Kabhumba kujha mwi ighūlu.
52 Haaho, bhamupeela, bhaheleela ku Jhelusalemu, bhasangabheele nkana. 53 Nfuku syonse, bhakabheele bhajhīkeele mu Nyumba Nkulu jhya Ipeelelo, bhalikumulumba Kabhumba.