Milīmo jhya Mintengwe bheke Jheesu
Kwisa kwa Mwēgho Mulafu
1
Mujhango Tofilo, sitaabhu silya sya kusumbula,a nankakunyeghelanga ku maghāmbo ghonse ghoghakakolanga Jheesu no kulāngulula kufuma ha bhusumbulilo bhwa mulīmo ghwajhe, 2 mpaka ifuku lyoghakanyanyulwanga mwi ighūlu. Nasyali kufelwa mwi ighūlu ghakabhahanga malaghi ku Mwēgho Mulafu ghweke Kabhumbab bhalya mintengwe bhwakabheele ghasāaghula. 3 Mukubha ghahwa kubhunusibhwa, ghakelubhusyanga kumwabho ghabhatembekesesya ku mpituka singi kubhala ti ali bhupanga. Ku nfuku makumi ane nasyukile, akabheele nalikubhesila nalikughatānyia maghāmbo gha Bhwami bhweke Kabhumba.c 4 Bhwakabheele ghasangaana nabho, ghakabhalaghilanga ghaabhala, “Musifumi mu Jhelusalemu, hembele nyinambele Mwēgho Mulafu ghweke Kabhumba ajhise kumwenyu. Jheejhi gho nsimaano jhyoghakabhalanga Taata kubha ti alomulaghiila. Seesyo gho sikūla syonkabheele nendikumilomba, 5 kubhala, Jhohana ghakabhatisyanga na mansi, tukubha umwe mulobhatisibhwa na Mwēgho Mulafu mu nfuku nse ^silakwisa.”dJheesu alikunyanyulwa kujha mwi ighūlu
6 Mukubha mintengwe bhakomenkana hamwi no Jheesu, bhamubhasya bhabhala, “Ee Sifwe Bhusya nonwe bholakubhaha kabhili Bhesilaheeli bhwami bhwabho?” 7 Jheesu ghabhalomba, “Te mulīmo ghwenyu kumānya nfuku ne liima mu njimiisi jhya kumwajhe Taata. 8 Tukubha Mwēgho Mulafu ghweke Kabhumba alomiisila, alomiha managha, nomwe mulokabha bhakalōla bhaane mu Jhelusalemu, no mu Jhudea monse, no mu Samalia mpaka ku bhuhela bhwa bhweleelo.”
9 Bhoghakabhanga ghahwa kutenda ghaagho, mukubha bhakūngiile, ghanyanyulwa mu lughamba mwi ighūlu. Ifūmbe lyamupokeela ghaafuma mu menso ghaabho. 10 Bhobhakabheele bhahusuliile menso ghaabho mwi ighūlu, unyene mukubha najhiile, halōleka bhantu bhabhili bhajhughalele ha bhwihi nabho, bhafwite myenda milafulafu, 11 bhabhala, “Ale bhantu bha mu Ghalilaajha, ku bhuti mujhughalele mukūngiile mwi ighūlu? Ghooghu Jheesu ghatwalwa kufuma ku mwenyu kujha mu lughamba mwi ighūlu, alokeesa kabhili teetyoe bhomumubhwene najhiile mwi ighūlu.”
Matijha alikusāaghulwa kwīkala halēka Jhuuda
12 Kundi mintengwe bhaheleela ku Jhelusalemu kufuma ku Musosi ghwa Miselituni, ^ghukabheele hale fise no lugho lwa Jhelusalemu. 13 Bhobhakabhanga bhafīka mu lugho lwa Jhelusalemu, bhakajhanga bhatanda ku kati mu nyumba jhya kapungu, jhyobhakabheele bhapekeeme. Bhaabho mintengwe bhakabheele Petelo, Jhohana, Jhakobho, Andelea, Filipo, Tomasi, Bhatolomajho, Matajhu, Jhakobho mwana Alufajho, Simoni ghaketwangako Selote,e no Jhuuda mwana Jhakobho. 14 Bhaabho bhonse bhakabheele ketebhakomenkana haaho, bhalikutendajhyuka kwa Kabhumba ku mwēgho ghumwi. Hamwi na bhaabho, bhakabheeleho no Maliamu nyina ghweke Jheesu na bhandi bhanabhakeema, na bhamughana ghwajhe Jheesu. 15 Mu mafuku ghaagho ifuku limwi Petelo ghajhughalala ha kati na bhahemba, bhakabheele ighāna na makumi abhili ghaabhala, 16 “Bhamughana ghwane, mpola silya sinyeghilwe mwi Ighāmbo lyeke Kabhumba f ku luhande lweke Jhuuda ^ghakafelanga bhantu bhamunīghe Jheesu, ghaagho ghabha ghakwila. Maghāmbo ghaagho ghakatendwanga na Mwēgho Mulafu ghweke Kabhumba kuhitila kwa mwami Daudi.g 17 Jhuuda akabheele mwineetu, twakahebhwanga mulīmo tukole naajhe.”
18 Ghoogho Jhuuda ghakaghūlanga ibhāla ku mahela gha ihōngo. Mu leelyo ibhāla moghakaghwanga bhubhundama, nda jhyatanduka, bhusoojhe bhonse bhwafuma kunse. 19 Ighāmbo leeli lyamānyika ku bhekasi bhonse bha mu Jhelusalemu, leelyo ibhāla ku katendelo kaabho lyajhilikwako Akelidama, gho kubhala “Ibhāla lya malaso.”
20 Petelo ghajhililika ghaabhala, “Finyeghilwe mu Sabhuli kubhala,
‘Lugho lwajhe lubhe itōngo,
muntu ghoghonse nasijhīkalimo.’h
“Tukubha kabhili finyeghilwe,
‘Mulīmo ghwajhe ghwa bhujhughalasi aheebhwe ghundi.’i
21 “Teetyo, tulikuhenselwa tusāaghule ghundi mu bhalya bhotukabheele tulikulōndekana nabho nfuku syonse syotukabheele kumwi no Sifwe Bhusya Jheesu, 22 kusumbula mafuku ghoghakabhanga Jhohana ghamubhatisya Jheesu, mpaka bhoghakanyanyulwanga kujha mwi ighūlu. Ghoogho gho tulobha tulikwifūnaanila kubha bhakalōla bha kusyuka kweke Jheesu.”
23 Haaho bhabhalaho masiina gha bhantu bhabhili. Ghwa kusumbula Jhusufu, lindi isiina ghajhitwa Bhalisabha, na bhandi bhakabheele bhamwita Jhusito. Ghwa bhubhili akabheele najhitilwe Matijha. 24 Kundi bhamusēegha Kabhumba bhabhala, “Ee Sifwe Bhusya, ughwe ujhinsi myēgho jhya bhantu bhonse. Tulikusēegha utulānsye ni ghuuhe ghoghwasāaghula mu bhaabha bhabhili, 25 akulinga atwale mulīmo ghwa kubha muntengwe ghoghakalēka Jhuuda, bhoghakasumaalika ghakajha halya hamulaasile.”
26 Kundi bhateela bhwahulo, bhwahulo bhwanīghila kwa Matijha. Ghoogho Matijha ghaghungilika ha bhalya mintengwe ikumi na ghumwi.