Meesilo gha Mwēgho Mulafu ghweke Kabhumba
2
Bholyakabhanga lyafīka ifuku lya mubhāla ghwa Pentekosite,a bhahemba bhonse bheke Jheesu bhakabheele bhakomenkana mu nyumba jhimwi. 2 Mukubha bhajhīkeele, bhahulika silongo kufuma mwi ighūlu kobhe musāgha mukali, ku mujhaghumwi ghwabhumbika nyumba jhyonse mobhakabheele bhajhīkeele. 3 Kundi halōleka kobhe ikamba lya mulīlo lighabhunkene, lyamusookela ha mutwe kila muntu akabheeleho. 4 Bhonse bhabhumbika Mwēgho Mulafu ghweke Kabhumba,b bhajha kutenda tutendelo twingi, kobhe Mwēgho Mulafu ghweke Kabhumba bhoghakabhahanga managha.5 Mu lugho lwa Jhelusalemu bhakabheelemo Bhajhahudi ^bhakabheele bhatendeke kwa Kabhumba, bhaabho bhakabheele bha kufuma mu fihugho fyonse fya ha bhweleelo. 6 Bhobhakahulikanga silongo seesi, linyabhwingi lya bhantu bhakakomenkananga mu kwilōleela. Bhonse bhalikosa mahi, bhukohela muntu ghoghonse ghakahulikanga katendelo kaajhe kalikutendwa na bhalya bhahemba bheke Jheesu. 7 Mukubha bhasusuka, bhajha kwibhasya, “Teeti, bhaabha bhonse bhalikutenda ghaagha, te bhantu bha mu Ghalilaajha? 8 Filikubha bhuti ufwe fwense tulikuhulika kila ugho katendelo kaajhe ka kufuukana? 9 No mu ufwe twakomenkana haaha, bhaliho bhantu bha kufuma ku fihugho fya Pati, Medi, Elami na bha kufuma ku sihugho sya Mesopotamia. Bhandi ku Jhudea, Kapadokia, Ponto, Asia, 10 Filighia, Pamufilia, Miisili na bhandi bha kufuma luhande lwa sihugho sya Libhia, sili ha bhwihi no lugho lwa Kilene. Bhandi ni bha kufuma mu lugho lwa Luumi, 11 mu bhaabho bhandi nfume jhyabho ni Bhajhahudi, bhandi bhakepampika ku Bhajhahudi kumupeela Kabhumba. Bhandi ni bha kufuma ku fihugho fya Kileete no ku Bhwalabhu. Tukubha ufwe fwense, tuhuliike ku tutendelo twetu bhobhalikumulumba Kabhumba ku maghāmbo makulu ghoghajhīla!”
12 Bhantu bhonse fyabhalubha, bhaghubhaha bhajha kwibhasya, “Kubhala teetyo ni kubhala bhuti?” 13 Tukubha bhandi mu bhaabho, bhajha kubhasēka bhabhala, “Bhakolwa maalwa!”
Petelo alikulāngulula bhantu mwi ifuku lya Pentekosite
14 Kundi Petelo ghajhughalala hamwi na bhenaajhe ikumi na ghumwi, ghajha kubhalomba bhaabho bhantu bhonse ku silongo sikulu kubhala, “Umwe Bhajhahudi bha mu Jhelusalemu nomwe Bhajhahudi bha mu findi fihugho, hulikisye fisogha imitānyisye. 15 Bhomulikulanganyia te teetyo, bhaabha bhantu tebhakosilwe, bhukohela ni sa taatu jhya mulāabho. 16 Ghaagha gho ghalya ghoghakatendanga Kabhumba ghahitila kwa mughwelaghu ghwajhe Jhoeli kubhala,
17 ‘Mu nfuku sya bhuhela, abhasile Kabhumba,
nonkabhaheekesya bhantu bhaane bhonse Mwēgho ghwane Mulafu,
bhaana bhenyu bhaghoosi na bhakeema bhaloghwa ilaghu,
bhalughalugha bhenyu bhalolōla filōli,
na bhaghosibhakulu bhalolotesibhwa.
18 Mu nfuku seesyo, bhakola milīmo bhaane bhaghoosi na bhakeema,
nonkabhaheekesya Mwēgho ghwane Mulafu,
akulinga bhonse bhaghwe ilaghu.
19 None ndojhīla maleebha mwi ighūlu,
no lusante hanu hansi.
Bhantu bhalolōla malaso no mulīlo,
ne lyonsi lilofuma ikulu.
20 Isyubha lilohīnduka lyabha sikolo,
no mwensi ghulobha mubheele kobha malaso.
Ghaagho ghalolōleka lisyali kufīka
lilya ifuku ikulu lyeke Sifwe Bhusya Kabhumba.
21 Tukubha muntu ghoghonse alomusēegha,
kwi isiina lyeke Sifwe Bhusya, alosābhulwa.’c
22 “Alōle bhajhango Bhesilaheeli, hulikisye! Kabhumba ghakamitembekesisyanga kubhala ti Jheesu ghwa ku Nasaleti ni muntu ghwa bhwene ku nsīla jhya maleebha no lusante fyoghakēlanga kumwenyu. Ghaagho ghonse mughajhinsi. 23 Ghooghu Jheesu ghakafumisibhwanga ku mwenyu na Kabhumba, kobhe bhwakabheele nabhasile kufuma kale. Kundi umwe hamwi na bhantu bhasili bhasogha, mwamwihaghila ku musalabha. 24 Tukubha Kabhumba ghamusyula kufuma kusimu, ghamufumya mu bhulwasye bhwa liilufu, bhukohela liilufu telikabheele na managha kabhili gha kumunīgha. 25 Mwami Daudid naagho abhasile mpola syajhe kubhala,
‘Nkabheele nemubhwene Taata Bhusya ha mbele jhyane mafuku ghonse,
bhukohela akabheele luhande lwane lwa kwene nsinatengelehi.
26 Teetyo, mwēgho ghwane ghusangabhele nkana,
kabhili lulimi lwane lwaswahila,
kumwi no mutūmba ghulojhīkala ghwisighile,
27 bhukohela ughwe Taata Bhusya Kabhumba, teghwandēke kusimu,
kabhili teghwaghulēke mutūmba ghwane ghubhōle,
une mukola milīmo ghoobhe musila kanyanyala.
28 Ughwe ghwanangisya nsīla jhya bhupanga,
bholobha hamwi nane, ndoobha mu mujheebho mukulu nkana.’e”
29 Petelo ghajhililika kutenda ghaabhala, “Bhamughana ghwane, lēka imitānyisye fisogha kubhala, nyinefwekulu mwami Daudi ghakaghābhanga ngōma, ghafelwa mwi itabhami na kabhwalelo. 30 Tukubha Daudi akabheele mughwelaghu, ghakamānyanga kubhala, Kabhumba ghakamulahililanga kubha ti alokamubhiika muntu ghumwi mu bhukwa bhwajhe ajhime mu bhwami bhwajhe. 31 Mwami Daudi akabheele ghakaghamānya kale maghāmbo ghalokakolwa na Kabhumba, gho kutuma ghatenda kusyuka kweke Jheesu Kiliisitof kubhala, teghakalēkwanga kusimu, mutūmba ghwajhe teghwakabhōlanga.g
32 “Ghooghu Jheesu Kabhumba ghakamusyulanga, nofwe ghofwe bhakalōla. 33 Kabhumba ghamutansya Jheesu, ghamubhiika luhande lwajhe lwa kwene, ha kujhima. Kundi Usye ghaamuha Mwēgho Mulafu kobhe bhwakabheele nabhasile. Ghooghu Mwēgho Mulafu ghweke Kabhumba, gho ghatuha ghaagha ghomuhuliike no ghomubhwene. 34 Mwami Daudi unyene teghakatandanga kujha mwi ighūlu, hamwi ne teetyo ghakabhalanga,
‘Sifwe Bhusya Kabhumba ghakamulombanga Taata Bhusya,
“Jhīkala luhande lwane lwa kwene,
35 mpaka nambabhiika bhemba bhoobhe heefo jhya maghūlu ghoobhe.”’h”
36 Ku bhuhela Petelo ghaabhala, “Nonwe Bhesilaheeli bhonse bhamānye bhwene kubhala, Kabhumba ghakamubhiika Jheesu kubha ti gho Sifwe Bhusya, gho Muhosya. Tukubha umwe ghooghoe mwamwihagha, ku kumubhamba ku musalabha!”
37 Bhantu bhobhakahulikanga ghaagha maghāmbo, myēgho jhyalahuka nkana. Haaho bhamubhasya Petelo na bhandi mintengwe bhabhala, “Nonwelo bhamughana ghwetu twīle bhuti?” 38 Petelo ghabhalomba ghaabhala, “Bhantu mwense, ghalaghale bhubhi bhwenyu kwa Kabhumba, mubhatisibhwe kwi isiina lyajhe Jheesu Kiliisito akulinga mulesibhwe bhubhi bhwenyu, muloheebhwa no Mwēgho Mulafu ghweke Kabhumba. 39 Bhukohela ilaghi leeli lili kuli umwe no ku bhaana bhenyu, lili ku bhonse bhajhīkeele mule, no ku muntu ghoghonse ghwakukabha Sifwe Bhusya Kabhumba ghamwita.” 40 Petelo ghabhatānyisya maghāmbo mengi nkana, lya bhuhela ghaabhala, “Liijheke ne jheejhi nfuuke jhisimwisighile Kabhumba.” 41 Mu bhantu ^bhakaghahulikanga ghaagha maghāmbo ghwakabheele nalikutenda Petelo, bhantu kobhe elufu itatu bhakaswanga bhanabhatisibhwa, bhaghungilika ku bhahemba bheke Jheesu.
Bhujhakumwi bhwa bhahemba bheke Jheesu
42 Bhahemba bhonse bhakaghungilikanga bhajhililika mu malāngululo gha mintengwe, bhakakolelanga kumwi kobhe bhanamuntu, mu kumetula ibhu no mu kutendajhyuka. 43 Mintengwe bhakabheele bhalikujhōojhya lusante na maleebha mengi, bhantu bhonse bhaghubhaha. 44 Bhahemba bhonse bheke Jheesu bhakabheele hamwi. Fintu fyobhakabheele nafyo bhakabheele ketebhafibhiika hamwi. 45 Bhakabheele ketebhaghūsya fintu fyabho, mahela bhabhiika hamwi. Ketebhaghaghābhula kulōnda bhuli muntu fyalikusamba. 46 Nfuku syonse bhakabheele ketebhasangaana ku mwēgho ghumwi mu lusinga lwa Nyumba Nkulu jhya Ipeelelo. Nfuku syonse, ketebhaliila hamwi fyakulya mu ngo syabho bhasangabheele. 47 Bhaabha bhantu bhabha bhalikumulumba Kabhumba, bhatēhwa na bhantu bhonse. Nfuku syonse Sifwe Bhusya Jheesu, akabheele nalikughungilisya bhantu bha kusābhulwa.