Sikūla Sisogha syeke Jheesu Kiliisito
kobhe bhosinyeghilwe na
Luuka
Mulombolo
Seesi sitaabhu syakanyeghwanga na Luuka gho ghakanyeghanga ne sitaabhu sya Milīmo jhya Mintengwe. Unyene tyakabheele Mujhahudi, akabheele Mujhunani ghakatalamika, akabheele muhemba ghweke Jheesu. Sindi nfuku akabheele ghajhumbila kumwi no Paulo bhalikutangaasya Sikūla Sisogha. Mu seesi sitaabhu Luuka ajhitensile milīmo jhyeke Jheesu ku mitontelo misogha, akulinga bhantu bhasili Bhajhahudi bhamānye.
Mu seesi sitaabhu muli mpola singi syatensile Luuka sisilimo mu findi fitaabhu fya Kalaghano kahya kobhe, kufuuka kweke Jhohana Mubhatisi na maghāmbo ghwakabheele nalikutangaasya, kufuuka kweke Jheesu ne mpola sya bhutwana bhwajhe. Kabhili atensile bhuli Kabhumba bhwabhatēhile bhantu bhonse. Jheesu alansiisye bhuli bhwabhatēhile bhantu kubha ghwahulikisya ngēlo syajhe kwa Musamalia mutendeke (suula jhya 10), mutwana kanya kupumpuka (suula jhya 15) no bhuli bhoghakengilanga mu nyumba bhajhīkala fisogha no mulihiisya makomo ^akabheele naghājhilwe nkana na bhantu (suula jhya 19). Kabhili bhoghakabhalanga kumuha bhupanga bhwa nfuku syonse muntu kanya bhubhi ^akabheele ghabhambwa ku musalabha (suula jhya 23). Luuka atensile bhuli Jheesu bhwakolisinga bhantu bhakukabha bhahambasiibhwe kobhe teeti, bhalihiisya makomo, bhapīina, bhanabhakeema na bhantu bhandi bhasili Bhajhahudi.
| Ghali mu seesi sitaabhu | Suula |
| Maghāmbo gha mulombolo | 1:1-4 |
| Kufuuka kweke Jheesu no bhutwana bhwajhe | 1:5-2:52 |
| Mulīmo ghweke Jhohana Mubhatisi no kughemwa kweke Jheesu | 3:1-4:13 |
| Jheesu alikulāngulula gha Bhwami bhweke Kabhumba no kujhōojhya maleebha mu Ghalilaajha | 4:14-9:50 |
| Jheesu alikulāngulula mengi ku bhalikumulōnda, mukubha bhali mu nsīla najhiile ku Jhelusalemu | 9:51-19:27 |
| Jheesu alikwingila mu lugho lwa Jhelusalemu ghanalāngulula nfuku sya bhuhela | 19:28-21:38 |
| Kufwa kweke Jheesu | 22:1-23:56 |
| Kusyuka kweke Jheesu | 24:1-53 |