Sikūla Sisogha syeke Jheesu Kiliisito
kobhe bhosinyeghilwe na
Luuka
Maghāmbo gha kusumbulila
1
Mughosimukulu Tofilo, bhantu bhengi bhakēkala bhanyegha ntusya mwēgho mpola sya maghāmbo ghonse gheke Jheesu ghakasūlikanga kumwetu. 2 Bhakaghanyeghanga kobhe bhotwakatānyisibhwanga na bhalya bhakaghalōlanga ghaagho maghāmbo kufuma ha bhusumbulilo, no kughatānyia. 3 None nankabhukomenkesya fisogha bhwene bhwa mpola syajhe kufuma ha bhusumbulilo. Seesyo gho syasūla nankunyeghela ku mitontelo, 4 akulinga noghwe ubhumānye bhwene bhwa ghalya ghoghwakalāngululwanga.
Kufuuka kwajhe Jhohana Mubhatisi kulikutendwa na musambwa
5 Nfuku syakabheele mwami Helodea najhimile mu sihugho sya Jhudea, hakabheele mupeesib ghumwi najhitilwe Sakalia, ghwa situnfi ^sikabheele syeke mupeesi Habhia. Mukasi akabheele najhitilwe Lisabheti. Bhobhabhili bhakabheele bha nfuuke jhyeke mupeesi Haluni. 6 Bhakabheele bhasila keghonde kwa Kabhumba, bhēkeele bhanighile misīlo na malaghi ghonse gheke Sibho Bhusya Kabhumba. 7 Bhaabha bhantu tebhakabheele na bhaana, bhukohela Lisabheti akabheele mughumba, kabhili bhobhabhili bhakabheele bhakekulu.
8 Ifuku limwi ^likabheele ninga jhya situnfi syeke Sakalia kukola milīmo jhya mupeesi kwa Kabhumba, 9 Sakalia ghasāaghulwa kutīnka bhubhani mu Nyumba Nkulu jhya Ipeelelo lyeke Kabhumba,c kobhe bhobhakabheele bhaajhīla bhapeesi. 10 Mukubha nalikutīnka bhubhani mu Nyumba Nkulu jhya Ipeelelo, bhantu bhengi bhakabheele bhakomenkana hanse, bhalikutendajhyuka kwa Kabhumba.
11 Haaho na haaho musambwad ghweke Kabhumba ghamwisila Sakalia, ghafīka ghajhughalala luhande lwa kwene haaho hwakabheele nalikutīnka bhubhani. 12 Sakalia bhoghakabhanga ghamulōla, ghasusuka, bhoobha bhwamwisila. 13 Tukubha musambwa ghamutānyisya ghaabhala, “Sakalia, nosighubhahi, kusēegha koobhe Kabhumba ghahulika. Mukasyobhe Lisabheti alokufyalila mwana mughoosi, ne isiina lyajhe ulomwilikako Jhohana. 14 Ulosangabhala nkana mu mwēgho, na bhantu bhengi bhalomusīima Kabhumba ku kufuuka kwajhe. 15 Ghoogho mwana alobha na ntighili nkulu kwa Sye Bhusya Kabhumba. Nasinywi divaie ajhe lukosyo, alobha nabhumbiike Mwēgho Mulafuf ghweke Kabhumba nasyali mu nda mwa nyina. 16 Bhesilaheeli bhengi alobhahelesya kwa Sibho Bhusya Kabhumba ghwabho. 17 Alobha muntengwe namulombolele Sye Bhusya, kubhalomba bhantu bhatelenkanyie kumusangaanila Sibho Bhusya. Alobha na mwēgho na managha kobhe ghweke Elijha.g Alojhihindula myēgho jhya bhasiibho jhibhajhelekele bhaana, no kubhahindula bhakanya bhutulunfi bhabhe bhaghololoke myēgho.”
18 Kundi Sakalia ghamubhasya musambwa, “Nankughamānya bhuti ghaagha gholikutānyia kubha ti ni gha bhwene? Une ndi mukekulu, no mukasyane naagho ni mukekulu.” 19 Musambwa ghamuhindula, “Une ndi Ghabhulyeli, nkokajhughalala ha mbele jhyeke Kabhumba. Ndaghiisilwe kumoobhe seesi sikūla sisogha. 20 Hulikisya, bhukohela bhosighaswele ghaagha ghonantenda, ulakubha kameeme. Teghwatende mpaka ghaagha ghonantenda ghafīka. Bhwene bhulolōleka kubha hafīka!”
21 Ikunka leelyo bhantu ^bhakabheele hanse bhamuhembeele Sakalia, fyabhalubha kutīnda koghatīndamo mu Nyumba Nkulu jhya Ipeelelo. 22 Bhoghakabhanga ghanyalika teghakakobholanga kutenda nabho ghasīibha teghasonta tue. Kundi bhamānya kubha ti ghaalōla fya kulōla mu Nyumba Nkulu jhya Ipeelelo. Sakalia ghanasīibha kameeme. 23 Bhosyakabhanga nfuku syajhe sya kukola milīmo jhya mupeesi syahwa, ghaheleela ku lugho lwajhe.
24 Kafumilo ka haaho mukasi Lisabheti ghajhimula. Nanywamile ghalijhīghalila myensi itaanu, nalikubhala, 25 “Leeli lyoghanjīlila Taata Bhusya, ghankūnga ghanfumisya nsonyi ku bhantu.”
Ilaghu lya Kufuuka kweke Jheesu
26 Mwensi ghwa mukaagha ghwa bhunywamu bhweke Lisabheti, musambwa Ghabhulyeli ghakalaghilwanga na Kabhumba ajhe ku lugho lwa Nasaleti mu sihugho sya Ghalilaajha, 27 kwa muhālah ghumwi akabheele najhitilwe Maliamu. Ghoogho akabheele ghakalōndwa na mwanamughoosi najhitilwe Jhusufu, ghwa nfuuke jhyeke mwami Daudi.i 28 Musambwa ghamujhiila, ghamubhalila, “Ndikukuposya ughwe ulabhilwe mpemba no Kabhumba kusumba bhonse. Sifwe Bhusya ali kumwi noghwe.”
29 Maliamu bhoghakabhanga ghahulika ghaagho maghāmbo, ghasusuka ghalanganyia nkana mu mwēgho, ghalibhasya, “Kubhala bhoobhu ni kubhala bhuti?” 30 Kundi musambwa ghamubhalila, “Nosisūpi Maliamu, Kabhumba gho ghakwīlila seesi sighōngo. 31 Ahulikisya, ulakujhimula ghwanafyala mwana mughoosi, isiina lyajhe ghwamwilikako Jheesu. 32 Ghoogho alobha mughosimukulu, alokeetwa Mwana ghweke Kabhumba Mukulu ghwa Fyonse. No Kabhumba Sye Bhusya alokamuha sitebhe sya bhwami syeke Daudi usye. 33 Alokeema mu Bhesilaheeli nfuku syonse, no bhwami bhwajhe tebhwakabhe na ha bhuhela.”j
34 Maliamu ghamubhasya musambwa, “Lilakubha bhuti leeli ighāmbo kumwane une nsinalaale no mughoosi?” 35 Musambwa ghamuhindula, “Mwēgho Mulafu ghweke Kabhumba alokusookela, na managha ghaajhe Kabhumba Mukulu ghwa Fyonse ghalokufimbila kobhe bhulēlo. Teetyo mwana ^alofuuka alobha ghwa ntenteko, kabhili alojhitwa Mwana ghweke Kabhumba.k 36 Hulikisya, ghwamughana ghoobhe Lisabheti naagho ghatwala bhunywamu bhwa mwana mughoosi mu bhukekulu bhwajhe. Ghooghu ghobhakabheele bhabhalako mughumba, mwensi ghooghu ni mwensi ghwajhe ghwa mukaagha. 37 Bhukohela kumwajhe Kabhumba ni kutuhu ighāmbo lisinakobholeka.” 38 Maliamu ghaabhala, “Une ndi musya ghweke Taata Bhusya, na fibhe kobhe bhoghwabhala.” Kundi ghulya musambwa ghabha ghaajha.
Maliamu alikumujhumbila Lisabheti
39 Mu nfuku syakalōndanga, Maliamu ghakabhuukanga ghaajha nali bhwangubhwangu mu lugho lumwi ^lukabheele mu sihugho sya Jhudea, lukabheele mu misosi misosi. 40 Kooko, ghajhingila mu nyumba jhyeke Sakalia, ghafīka ghamuposya Lisabheti. 41 Lisabheti bhoghakabhanga ghahulika silongo syeke Maliamu sya kumuposya, mwana munyia ghajha kusaaha mu nda jhyajhe. Kundi Lisabheti ghajhisilwa na Mwēgho Mulafu ghweke Kabhumba, 42 ghatenda ku silongo sikulu, “Ulabhilwe mpemba mu bhanabhakeema bhonse, na ^alofuuka mu nda jhyobhe alabhilwe mpemba. 43 Ndi ghanyi une ghwakukabha nyina ghweke Taata Bhusya ghajhisa mpaka mu lugho lwane? 44 Bhonambanga nahulika silongo syobhe, mwana munyia mu nda jhyane ghasangabhala ghajha kusaaha. 45 Sumbwa ughwe ghwakaghaswa maghāmbo gheke So Bhusya kubhala ti ghalokafīka.”
Lwimbo lweke Maliamu
46 Kundi Maliamu ghaabhala,
“Mwēgho ghwane ghulikumulumba Taata Bhusya,
47 kabhili ghumusangabhaliile Kabhumba, Kasābhula ghwane.
48 Bhukohela ghandōla une musya ghwajhe,
nenga bhondi muntu ghwa heefo.
Kusumbula nonwe nfuuke syonse ha bhweleelo
bhalondōla ndi ne sumbwa.
49 Lighwamanga lyanjīlila fikulu,
ntighili jhyajhe ni nkulu!
50 Ne sighōngo syajhe ni mu kesukulu na kesukulu
ku bhaabhali bhamuheele ntighili.
51 Ghaajhīla maghāmbo makulu ku managha ghaajhe,
ghabhasambaasya bhakanya bhutulunfi mu myēgho jhyabho.
52 Ghabhaghwisya bhakulu
kufuma ku fitebhe fyabho fya njimiisi,
tukubha bha heefo ghabhatansya.
53 Bhali mu nsāla ghabhafela mu siikuta,
tukubha bhatunsi ghabhabhuusya mabhoko ghamwenga.
54 Ghabhafūnaanila Bhesilaheeli, bhakola milīmo bhaajhe,
kooku najhisukiile kubhalōlela sighōngo,
55 kobhe bhoghakabhalombanga bhanyinefwekulu,
Bhulahimul no bhukwa bhwajhe nfuku syonse.”
56 Maliamu ghakēkalanga no Lisabheti kujha ku myensi itatu, kundi ghaheleela ku lugho lwajhe.
Kufuuka kweke Jhohana Mubhatisi
57 Bhosyakabhanga nfuku sya kwihekula kwajhe Lisabheti syakwila, ghaliheekula mwana mughoosi. 58 Bhafitinkanyi bhaajhe na bhamughana ghwajhe bhobhakabhanga bhahulika bhuli Sibho Bhusya bhoghamwīlila sighōngo syajhe, bhasangabhalila kumwi naajhe.
59 Kundi mwi ifuku lya munane bhajhisa mu kumuputa nkōpa mwana,m bhahensa ti bhamwilike isiina lyeke sye Sakalia. 60 Tukubha nyina ghaabhala, “Lekehi, alakwilikwa Jhohana.” 61 Bhamuhindula bhabhala, “Kutuhu muntu ali ne leeli isiina kumwenyu!” 62 Kundi bhalīngisya kumuhita mu nda usye bhahulike isiina lyatēhile kumwilika mwanaajhe. 63 Ghahensa ilimba lya kunyeghelako, ghaanyegha itye, “Isiina lyajhe alakwilikwa Jhohana.” Bhonse bhalikosa mahi. 64 Haaho hoghakasumbulilanga kutenda, bhukameeme bhwahwa. Ghasumbula kutenda maghāmbo gha kumulumba Kabhumba. 65 Bhonse ^bhakabheeleho bhabha na syubhaho. Maghāmbo ghonse ghaagho ghamānyika nkana mu sihugho syonse sya misosi misosi jhya Jhudea. 66 Bhonse bhakaghahulikanga fyabhalubha, bhalanganyia mu myēgho jhyabho bhabhala, “Ghooghu mwana alakubha ghwa bhuti?” Bhukohela managha gheke Sye Bhusya ghakabheele hamwi naajhe.
Lwimbo lweke Sakalia
67 Sakalia sye ghwa mwana, ghajhisilwa na Mwēgho Mulafu ghweke Kabhumba. Ghaghwa ilaghu, ghaabhala,
68 “Alumbwe Taata Bhusya, Kabhumba ghwa Isilaheeli,
bhukohela ghajhisa mu kubhapingula bhantu bhaajhe.
69 Ghatulentela Kasābhula ghwa managha,
ghwa kufuma mu nfuuke jhyeke mwami Daudi, mukola milīmo ghwajhe,
70 kobhe bhoghakabhalanga kufuma kale,
kuhitila bhaghwelaghu bhaajhe bhakabheele bhatentekwe.
71 Ghakabhalanga, alotusābhula kufuma ku bhemba bheetu,
no kufuma mu mabhoko gha bhonse bhatughājhile.
72 Kabhumba ghatulōlela sighōngo kobha bhoghakabhalanga ku bhasiifwe,
najhisukiile kalaghano kaajhen kasila kanyanyala.
73 Ghooghu gho mulahi ghwamulahilile Bhulahimu nyinefwekulu,
74 kubhala atusābhule kufuma mu mabhoko gha bhemba bheetu,
akubha tumukolele bhusila kusūpa.
75 Kabhili, tubhe bhasila keghonde bhatendeke ku mwajhe,
nfuku syonse sya bhupanga bhwetu.
76 Noghwe mwanaane,
ulojhitwa mughwelaghu ghweke Kabhumba Mukulu ghwa Fyonse.
Ulobha nolombwele ku mulombolo ghweke Sifwe Bhusya,
kubhalomba bhantu bhatelenkanyie kumusangaanila.
77 Ulobhalomba bhantu bhaajhe kubha,
Kabhumba alobhasābhula ku kulesya bhubhi bhwabho
78 Sighōngo syajhe silotusookela kufuma mwi ighūlu kobhe ilangaasi,
bhukohela Kabhumba ghwetu ni ghwa sighōngo ku mwetu,
79 kutulafisya ufwe tuli mu sikolo,
kabhili ufwe tuli mwi ihinahina lya liilufu.
Alotulombola maghūlu gheetu ku nsīla jhya maholo.”
80 Ghulya mwana Jhohana ghakula, ghaghungilika managha gha Mwēgho Mulafu ghweke Kabhumba. Ghakēkalanga mwi isēnga mpaka ifuku lyoghakabhanga ghalilubhusya ku Bhesilaheeli.