Kufuuka kweke Jheesu
(Matajhu 1:18-25)
2
Mu silya nfuku Kalisaalia Aghusito ghwa bhwami bhwa Bhaluumi ghakahamulisyanga kubhala, bhantu bha mu fihugho fyonse fya bhwami bhwajhe, bhaghandikwe. 2 Loolu gholukabheele lwa kusumbula kughandika bhantu, nfuku syakabheele Kilenio nali mwami ghwa mu sihugho sya Siilia. 3 Bhantu bhonse bhakajhanga mu kwighandikisya, kila muntu ghaajha mu lugho lwa bhukwa bhwajhe.4 Jhusufu naagho ghakabhuukanga kufuma mu lugho lwa Nasaleti ^lukabheele mu sihugho sya Ghalilaajha. Ghaajha mu lugho lwa Bhetelehemu ^lukabheele mu sihugho sya Jhudea. Loolo lugho loghakafuukilangamo mwami Daudi, no Jhusufu akabheele ghwa bhukwa bhweke Daudi. 5 Ghakajhanga mu kwighandikisya hamwi no Maliamu ghwakabheele ghakalōnda. Mafuku ghaagho Maliamu akabheele nanywamile. 6 Mukubha bhali ku Bhetelehemu, nfuku syajhe sya kwihekula syakwila. 7 Ghafyala mwana mughoosi, ibhēle, ghamufwika myenda jhya sinyia. Ghamulaasya mwi ipango lya kuliilamo ng'ombe, bhukohela nyumba jhya bhanyēnyi jhikabheele jhyabhumbikamo bhantu.
Misambwa na bhakema ntaama
8 Bhulya bhufuku, hakabheele bhakema ntaama ^bhakabheele bhēkeele bhalikulalilila ntaama syabho mu lubhanda, kwihi na lugho lwa Bhetelehemu. 9 Haahoe, musambwa ghweke Sifwe Bhusya ghabhesila, ilangaasi kufuma kwa Sifwe Bhusya lyabhalafisya honse. Bhaghubhaha nkana. 10 Kundi musambwa ghabhabhalila, “Musighubhahi, bhukohela namulentela sikūla sisogha silosūla bhantu bhonse kusangabhala. 11 Bhwalelo mu lugho lweke Daudi ghafuuka Kasābhula ghwenyu, gho Muhosyab Sinywe Bhusya. 12 Silosūla mwamumānya ni isye, mulomusānga mwana munyia nalele mwi ipango lya kuliilamo ng'ombe, nafwikilwe myenda jhya sinyia.”
13 Haaho na haaho, bhajhisa misambwa bhengi maghāna na maghāna kufuma mwi ighūlu, bhali kumwi no mwinaabho bhajha kumwimbila Kabhumba kubhala,
14 “Alumbwe Kabhumba mu lughamba mwi ighūlu,
na maholo ghabheeho ha bhweleelo,
ku bhantu bhonse bhwasangabhaliile.”
15 Misambwa bhobhakabhanga bhahwa kwimba, bhaheleela mwi ighūlu. Kundi bhakema ntaama bhajha kutensanyia bheene ku bheene bhabhala, “Tujhe ku Bhetelehemu tukalōle leeli lyasūlika, lyoghatulomba Sifwe Bhusya Kabhumba.”
16 Kundi bhakilima kujha ku Bhetelehemu, bhabhasangana Maliamu no Jhusufu, no ghulya mwana munyia nalele mwi ipāngo lya kuliilamo ng'ombe. 17 Bhobhakabhanga bhamulōla ghulya mwana, bhatānyia ku bhantu fyonse fyakatendwanga ne misambwa fijhikenyie no ghoogho mwana. 18 Bhonse bhakahulikanga fibhalwa fyakatendwanga na bhalya bhakema ntaama, bhalikosa mahi nkana. 19 Tukubha Maliamu ghakafibhikanga fibhalwa fyonse mu mwēgho ghwajhe, nalikufilanganyia. 20 Bhalya bhakema ntaama bhaheleela, kooku bhalikumulumba Kabhumba no kutenda mpunda syajhe ku maghāmbo ghonse ghobhahulika bhanalōla. Kobhe bhobhakatānyisibhwanga ne misambwa, bhofyakabhanga.
Mwana alikwilikwa isiina
21 Mwi ifuku lya munane nafuukile, bhamuputa nkōpa, bhamwilika isiina lyajhe Jheesu.c Teetyo bhoghakelikwanga no musambwa nasyali no kutwalwa isiimi.
Jheesu alikutentekwa ha mbele jhyeke Kabhumba
22 Kundi bhosyakabhanga syakwila nfuku sya kufūlwa kwabho Jhusufu no Maliamu kobhe bhokabhasile Kabhāngo keke Musa,d bhakamufelanga Jheesu ku lugho lwa Jhelusalemu, mukamutenteka ha mbele jhyeke Kabhumba. 23 Bhakēlanga teetyo kobhe Kabhāngo keke Sifwe Bhusya kabhasile kubhala, “Mwana ghoghonse mughoosi ibhēle, ni ghwa ntenteko kwa Sifwe Bhusya.”e 24 Kabhili bhakajhanga mu kufumya mpeesi kobhe bhokabhasile Kabhāngo keke Sibho Bhusya kubhala, bhafumye nkundya ibhili ajhe mabhojha abhili gha nkundya.f
25 Kooko ku Jhelusalemu mu seesyo nfuku, kukabheele no muntu ghumwi najhitilwe Simehoni. Ghoogho muntu akabheele musila kanyanyala, nfuku syonse akabheele nalikutendajhyuka kwa Kabhumba, nahembele kwisa kweke Muhosya ajhisile mu kubhasābhula Bhesilaheeli. Kabhili akabheele nalombwelwe na Mwēgho Mulafu ghweke Kabhumba. 26 Ghoogho Mwēgho Mulafu akabheele ghakamulāngisya kubhala, teghafwe bhusila kumulōla Muhosya kufuma kwa Sye Bhusya Kabhumba. 27 Kundi Simehoni nalombosilwe na Mwēgho Mulafu ghweke Kabhumba, ghakajhanga ha Nyumba Nkulu jhya Ipeelelo lyeke Kabhumba. Jhusufu naagho no Maliamu bhakamufelanga Jheesu ha jheejhyo Nyumba Nkulu jhya Ipeelelo, mu kumutenteka no kufumya mpeesi, kobhe bhofibhasilwe mu Kabhāngo. 28 Kundi Simehoni ghamupokeela mwana ghamuhingata mu mabhoko ghaajhe, ghamulumba Kabhumba, ghaabhala,
29 “Nonwe Taata Bhusya, ntabhulenge une mukola milīmo ghoobhe,
infwe fisogha, kobhe bhoghwakabhalanga.
30 Bhukohela menso ghaane ghamulōla Kasābhula,
31 ghoghwalibhiika alōleke ku bhantu bhonse.
32 Ughoogho gho ilangaasi lya kumulāngisya Kabhumba
ku bhantu bhasili Bhajhahudi,
kabhili alolenta mpunda ku bhantu bhoobhe Bhesilaheeli.”
33 Haaho sye no nyina ghweke Jheesu bhalikosa mahi ku maghāmbo ghakatendwanga kuli mwanaabho. 34 Kundi Simehoni ghabhalabha mpemba, ghamulomba Maliamu ghaabhala, “Ughooghu Mwana ghabhiikwa na Kabhumba mu sihugho sya Isilaheeli, akulinga bhalobha bhamutuna bhalohiila, tukubha bhalobha bhamuswa bhalosābhuka. Alobhakabha bhengi, na bhengi bhalomutuna, 35 ne fyobhalikulanganyia bhantu bhengi, filolōleka halafu. Noghwe ulofilōlela bhusungu kobhe muntu ghasōmwa ne isumo.”
36 Hakabheele no mughwelaghu mwanamukeema akabheele mukekulu, isiina lyajhe Hana ghwa Fanweli, ghwa bhukwa bhwa Asyeli. Ghakatolwanga ghajhīkala ne ibha myaka ndwi bhuhela, kundi ibha ghasumaalika. 37 Akabheele mulekwa, akabheele ghakakwisya myaka makumi munane ne ine. Unyene tyakabheele ghaafuma ha Nyumba Nkulu jhya Ipeelelo, ghakēkalanga bhusila kulya mukubha nalikutendajhyuka kwa Kabhumba bhufuku ne isyubha. 38 Mu leelyo ikunkae Simehoni nalikusāhula no Jhusufu no Maliamu, Hana ghajhisa ghabhasānga. Ghasumbula kumulumba Kabhumba no kutānyia mpola sya ghulya mwana ku bhonse ^bhakabheele bhahembeele Kabhumba amulaghiile Kasābhula, ghwa kwisa mu kubhapingula Bhesilaheeli bhonse.
39 Jhusufu no Maliamu bhobhakabhanga bhakwisilisya mitontelo jhyonse, kobhe bhofilaghisilwe mu Kabhāngo keke Sibho Bhusya, bhakaheleelanga kumwabho ku lugho lwa Nasaleti mu sihugho sya Ghalilaajha. 40 Ghulya mwana ghajha ghakula, ghaghungilika managha na masāla, nalabhilwe mpemba na Kabhumba.
Jheesu ha Nyumba Nkulu jhya Ipeelelo lyeke Kabhumba
41 Myaka jhyonse bhafyasi bheke Jheesu, bhakabheele bhaajha ku Jhelusalemu mafuku gha mubhāla ghwa Pasaka,g hamwi na bhandi Bhajhahudi. 42 Jheesu bhoghakabhanga ghafīsya myaka ikumi ne ibhili, ghakajhanga nabho ku Jhelusalemu ku ghoogho mubhāla kobhe bhobhakabheele bhaajhīla. 43 Bhoghwakabhanga mubhāla ghwahwa, mukubha bhaheleesile ku lugho, Jheesu ghasīibha ku Jhelusalemu bhusila bhafyasi bhaajhe kumānya. 44 Bheene bhakabheele bhalikulanganyia ti ali kumwi na bhandi, bhalyāta lwēndo lwa ifuku isima. Kundi bhajha kumuhensela mu bhamughana ghwabho no mu bhanywanyi bhaabho. 45 Bhobhakabhanga bhamubhulwa, bhakaheleelanga ku Jhelusalemu, bhakamuhense.
46 Ifuku lya bhutatu mubhāla ghuhwile, bhamusangana ha Nyumba Nkulu jhya Ipeelelo. Akabheele najhīkeele hakati na bhamakota, nabhahulikiisye no kubhabhasya. 47 Bhonse bhakabheele bhamuhulikiisye, bhalikosa mahi ku masāla ghaajhe ne fyalikubhahindula. 48 Bhafyasi bhaajhe bhobhakabhanga bhamulōla, bhalikosa mahi nkana. Kundi nyina ghamulomba, “Mwanaane, ku bhuti ghwajhīla bhoobhu? Kūnga, une no so twasamba nkana mu kujha twakuhensa.” 49 Jheesu ghabhahindula ghaabhala, “Ku bhuti mubhele mulikunhensa? Temujhinsi kubha ti nhenseelwe kubha nendi ha nyumba jhyeke Taata?” 50 Tukubha bhafyasi bhaajhe tebhakamānyanga ti alikutenda si.
51 Kundi ghaheleela hamwi na bhafyasi bhaajhe ku Nasaleti, ghabha nabhahulikiisye. Tukubha unyina ghakaghabhikanga ghonse mu mwēgho ghwajhe. 52 Jheesu ghajha ghakula, ghaghungilika masāla, ghabha natēhilwe na Kabhumba na bhantu.