Jheesu ha mbele jhyeke Pilaato, mwami ghwa ku Jhudea
(Matajhu 27:1-2, 11-14; Maaliko 15:1-5; Jhohana 18:28-38)
23
Kafumilo ka haaho, bhalya bhakulu bhakulu bhonse bha Bhajhahudi bhabhuuka, bhamufela kwa Pilaato.a 2 Bhasumbula kubhuula maghāmbo gha kumulembesya, bhabhala, “Twamusangana ghooghu nalikubhahughya bhantu bhalēke sihugho syetu, alikulesya bhantu kulīha ikooli kwa Kalisaali, nalikubhala ti unyene gho Muhosya, mwami.”3 Kundi Pilaato ghamubhasya ghaabhala, “Ughwe ghoghwe mwami ghwa Bhajhahudi?” Jheesu ghamuhindula ghaabhala, “Ughwe ghoghwe ghwabhala ghaagho.” 4 Haaho Pilaato ghabhalomba bhapeesi bhakulu, hamwi no mulēgha ghonse ghwa bhantu ghaabhala, “Nsibhwene nfūno jhya kumusitaaka ghooghu muntu.” 5 Tukubha, bhalya bhantu bhasimbaatisya bhabhala, “Ku malāngululo ghaajhe alikubhasoosya bhantu mu sihugho syonse sya Bhajhahudi. Ghakasumbulilanga ku Ghalilaajha, ghafīka no kunu.”
Jheesu alikufelwa kwa Helode Antipa
6 Pilaato bhoghakabhanga ghahulika ghaagho, ghabhasya kubhala, “Ghooghu ni muntu ghwa ku Ghalilaajha?” 7 Bhoghakabhanga ghamānya kubha ti ni muntu ghwa ku Ghalilaajha, afumile mu mpasi jhyeke Helode,b ghalaghiila bhamufele kwa Helode, bhukohela seesyo nfuku Helode akabheele haahoe ha Jhelusalemu.
8 Helode bhoghakabhanga ghamulōla Jheesu, ghasangabhala nkana, bhukohela nfuku singi akabheele nalikuhensa kumulōla. Akabheele ghakahulika mpunda syajhe, tukubha, ghakahensanga kulōla ileebha lyolyonse kufuma kwa Jheesu. 9 Helode ghamubhasya fingi, tukubha Jheesu teghakamuhindulanga lyolyonse. 10 Mu leelyo ikunka bhapeesi bhakulu na bhamakota bha Kabhāngo keke Musa bhakabheeleho, bhalikumubhuula Jheesu ku maghāmbo mengi gha kumulembesya.
11 Kundi Helode hamwi na bhasilikale bhaajhe bhamufwisya nsonyi bhalikumusyenteka. Kundi bhamufwika myenda misogha, bhamuheleesya kwa Pilaato. 12 Nfuku sya ku nyuma Helode no Pilaato bhakabheele bhemba, tukubha kusumbulila ifuku leelyo bhakasaananga bhwabha bhunywanyi.
Jheesu alikukalilwa kwihaghwa
(Matajhu 27:15-26; Maaliko 15:6-15; Jhohana 18:38-19:16)
13 Kundi Pilaato ghabhajhita bhapeesi bhakulu na bhakulu bha Bhajhahudi, hamwi na bhandi bhantu bha mu lugho, 14 ghabhalomba ghaabhala, “Mwanentela ghooghu muntu, mulikubhala ti alikubhahughya bhantu. Bhuli bhomulikumusitaaka namubhasya nomwe muhuliike, tukubha nsibhwene ibhi lyolyonse kumwajhe. 15 No Helode naagho ghaalōla teetyoe, ghofyatuma ghamuheleesya kumwetu. Nonwe hulikisye, ghooghu muntu tyajhīlite lyolyonse linasūla ghakalilwa kwihaghwa. 16 Teetyo, nankumuhuula tue na sibhooko, kundi namulekuulula.”c
18 Tukubha bhalya bhantu bhatansya silongo bhabhala, “Ghoogho muntu ajhihaghwe, mujhīghulile Bhalaabha.” 19 Liima leelyo Bhalaabha akabheele ghakeghalilwa ku bhwimba bhwa kusoosya bhantu mu lugho ne mpasi, no kwihaghana.
20 Haaho Pilaato ghakatendanga nabho lwa bhubhili, bhukohela akabheele nalikuhensa kumulekuulula Jheesu. 21 Tukubha bheene bhasunfya tu kajhombe, “Mubhambe, mubhambe!”
22 Pilaato ghatenda nabho kabhili lwa bhutatu ghaabhala, “Ghooghu muntu ghabhiihya sighanyi? Nsibhwene ibhi lyolyonse kumwajhe linasūla ghakalilwa kwihaghwa. Nankumuhuula tue na sibhooko, kundi namulekuulula.” 23 Tukubha, bhasunfya tu kajhombe ku managha nkana, kuhensa bhamubhambe. Kundi silongo syabho syaghola.
24 Haaho Pilaato ghabha ghakala kobhe bhobhatatiike. 25 Kobhe bhobhakatatikanga, ghamujhīghulila Bhalaabha, ^akabheele ghajhīghalilwa ku bhwimba bhwa kusoosya bhantu ne mpasi, no kwihaghana. Kundi ghamunyalisya Jheesu ku bhasilikale akulinga bhamwīlile kobhe bhantu bhobhahensile.
Kubhambwa kweke Jheesu
(Matajhu 27:32-44; Maaliko 15:21-32; Jhohana 19:17-27)
26 Bhasilikale mukubha bhamufelite Jheesu, bhamusānga muntu ghumwi ajhitilwe Simoni ghwa kufuma ku lugho lwa Kilene nafumile ku mabhāla. Bhamutwikilisya musalabha ghweke Jheesu aghutwale, nalōnsile mu nyuma jhyeke Jheesu. 27 Mulēgha mukulu ghwa bhantu ghukabheele ghumulōnsile Jheesu. Mu bhaabho bhakabheelemo bhanabhakeema ^bhakabheele bhalijhinamiile ku bhulanda bhalikumulīlila Jheesu. 28 Jheesu ghabhabhijhukila ghaabhala, “Ale bhanabhakeema bha mu Jhelusalemu, musindīlili une, lilīlile mwebheene na bhaana bhenyu. 29 Mānye kubhala, mafuku ghesile bhalokabhala, ‘Sumbwa mwanamukeema mughumba, nda jhisifyele na mabheele ghasinaghonsye!’ 30 Mafuku ghaagho,
‘Bhantu bhalokabha bhalikujhilomba misosi, “Tughwile!”
no tutuulo, “Tufuliile!”’d
31 Kubha bhalikwīla teeti ku siti sitoto, ku siti sighumu bhalīngisya ihe?”e
32 Hakabheele bhabhiihya bhabhili ^bhakabheele bhafelitwe mu kwihaghwa hamwi no Jheesu. 33 Bhobhakabhanga bhafīka ^hakabheele hajhitilwe Ihanga, bhamubhamba Jheesu ku musalabha, na bhalya bhabhili bhabhabhamba kila muntu na musalabha ghwajhe, ghumwi luhande lwa kwene no ghundi luhande lwa kunso. 34 Jheesu ghaabhala, “Ee Taata, bhalesisye bhubhi bhaabha, bhukohela tebhajhinsi fyobhalikukola.” Kundi bhalya bhasilikale bhajhiteelela bhwahulo myenda jhyeke Jheesu kumānya ti ni ghanyi alakujhitwala.
35 Bhantu bhabha bhajhughalele bhakūngiile. Tukubha bhakulu bha Bhajhahudi bhasumbula kumuhahuula Jheesu bhalikubhala, “Ghakasābhulanga bhandi, kubha nali Muhosya mwene ghakasāaghulwa na Kabhumba, alisābhule nyene.”
36 Bhasilikale naagho bhamubhenguka, bhamukolelela bhalikumuheekesya divai jhyakaghaasa, 37 no kooku bhalikubhala, “Kubha noli mwami fyene ghwa Bhajhahudi, lisābhule.”
38 Na ha lughamba no musalabha hakabheele ilimba linyeghilweko kubhala, “Ghooghu gho Mwami ghwa Bhajhahudi.”
39 Ghumwi mu bhabhiihya bhabhili, ^akabheele nabhanfilwe, ghamutuka Jheesu ghaabhala, “Ughwe ti ghoghwe Muhosya? Lisābhule ghwenyene, utusābhule nofwe!” 40 Tukubha ghulya ghwa bhubhili ghamukabha mwinaajhe ghaabhala, “Ughwe tumughubhehe nensi tu Kabhumba? Ughwe noghwe ghwakalilwa liilufu bhoobhoe. 41 Ufwe twakalilwa bhwene, tulikubheghwa kahūnga ku mabhi ghotwakola. Tukubha ughooghu tehali ibhi lyolyonse lyoghakola.” 42 Kundi ghaabhala, “Ee Jheesu mukubha nolikujhingila mu bhwami bhoobhe, ghwanjisukila none!” 43 Jheesu ghamuhindula ghaabhala, “Ndikukulomba bhwene kubhala, bhwalelo bhoobhu ulobha hamwi none mu bhupanga bhwa nfuku syonse.”
Kufwa kweke Jheesu
(Matajhu 27:45-56; Maaliko 15:33-41; Jhohana 19:28-30)
44 Bholyakabhanga isyubha lyalingila hakati, kwajhilabhula sihugho syonse isyubha lyasipa lyasumwa lyahunga. 45 Ikōha likabheele lighabhwile Nyumba Nkulu jhya Ipeelelo, lyatandukamo habhili kufuma mu lughamba mpaka mwifo.
46 Jheesu ghatangiila nkana ghaabhala, “Ee Taata, nambubhiika bhupanga bhwane mu mabhoko ghoobhe.” Kubha ghakwisya kutenda ghaagho, kundi ghaputunkana. 47 Mukulu ghwa bhasilikale bhoghakabhanga ghaalōla bhuli bhofyabha, ghamulumba Kabhumba ghaabhala, “Namānya kubha ti ghooghu muntu akabheele mughololoke mwēgho!”
48 Bhantu bhonse ^bhakabheele bhakomenkana halya mu kulōla bhofyabha, bhobhakabhanga bhaghalōla ghasūlika, bhaheleela ku myabho bhalikwipampamula matundu ku bhulanda. 49 Tukubha bhonse bhakabheele bhahwile kwimānya no Jheesu, hamwi na bhanabhakeema ^bhakabheele bhamulōnsile kufuma ku Ghalilaajha, bhajhughalala ku hale bhakūngiile ghalikukoleka.
Kusiikwa kwajhe Jheesu
(Matajhu 27:57-61; Maaliko 15:42-47; Jhohana 19:38-42)
50 Hakabheele muntu ghumwi mutendeke, mughololoke mwēgho, isiina lyajhe Jhusufu. Unyene akabheele ghwa mwi ibhalasa lya Bhajhahudi, 51 tukubha unyene teghakaghaswanga ghobhakakalanga bhenaajhe mwi ibhalasa. Ghooghu akabheele mwikasi ghwa ku Alimatajha, kooko ku Bhujhahudi, akabheele nabhuhembeele nkana Bhwami bhweke Kabhumba.
52 Ghoogho muntu ghakajhanga kwa Pilaato ghakasēegha ahebhwe mutūmba ghweke Jheesu akasiike. 53 Kundi Jhusufu ghaghutwala ghulya mutūmba ghaghubhingilisya mu mwenda ghwa sanda, ghaghubhiika mu lulaalo ^lukabheele lusabhilwe mu manyaabhwe lusinabhikwemo muntu. 54 Ifuku leelyo likabheele lya matelekanyi,f Ifuku lya Kutamukag likabheele ha bhwihi kusāpa.
55 Bhalya bhanabhakeema ^bhakesanga no Jheesu kufuma ku Ghalilaajha, bhamulōnda Jhusufu bhalulōla lulya lulaalo, no bhuli bhobhabhiika ghulya mutūmba ghweke Jheesu. 56 Kafumilo ka haaho, bhaheleela ku lugho, bhaajhīla matelekanyi gha mafuta no muti ghwa kughusīigha ghulya mutūmba.h Gho Ifuku lya Kutamuka bhatamuka kobhe bhofinyeghilwe mu Kabhāngo keke Musa.