Kalimbo ka kumwihagha Jheesu
(Matajhu 26:1-5, 14-16; Maaliko 14:1-2, 10-11; Jhohana 11:45-53)
22
Mafuku gha mubhāla ghwa mabhu ghasibhikilwemo bhumela,a ^ghukabheele ghujhitilwe Pasaka,b ghakabheele ghakoleela. 2 Bhapeesi bhakulu hamwi na bhamakota bha Kabhāngo keke Musa bhakabheele bhalikuhensa nsīla ku bhufiso jhya kumwihagha Jheesu, bhukohela bhakabheele bhalikughubhaha bhantu.3 Kundi Syetani ghamwibhingako Jhuuda, ^akabheele najhitilwe Isikalyote, ghumwi mu bhaabhali mintengwe ikumi na bhabhili. 4 Jhuuda ghaajha ghakēkala kalimbo na bhapeesi bhakulu na bhakulu bha bhasilikale bha Nyumba Nkulu jhya Ipeelelo, ghatensanyia nabho bhuli bhwalomuhīnduka aleke bhamunighe. 5 Leelyo, bhalinyomwa nkana bhalya bhakulu bhakulu, kundi bhalaghana kumuha mpijha. 6 Jhuuda ghaaswa, ghabha nalikuhensa nsīla akulinga amuhīnduke Jheesu.
Matelekanyi gha mubhāla ghwa Pasaka
(Matajhu 26:17-25; Maaliko 14:12-21; Jhohana 13:21-30)
7 Ifuku lya mubhāla ghwa mabhu ghasibhikilwemo bhumela, lyafīka. Leelyo gho ifuku lyobhakabheele bhasinsa ntaamac jhya Pasaka. 8 Kundi Jheesu ghabhalaghiila Petelo no Jhohana, ghabhalomba ghaabhala, “Lyāte mukatelenkanyie Pasaka akulinga tulye.” 9 Bhamubhasya bhabhala, “Ulikuhensa tughēlile ihe matelekanyi?” 10 Ghabhahindula ghaabhala, “Hulikisye, bhomulobha mulikujhingila mu lugho mulosangaana na mwanamughoosi natwite muhange ghwa mansi. Ghoogho mwamulōnda mpaka mu nyumba jhyalojha ghakengilamo. 11 Mutānyisye nyene lugho, ‘Sifwe bhuhemba alikubhasya, “Sili ihe syumba sya bhanyenyi mondoliila Pasaka hamwi na bhahemba bhaane?”’ 12 Alomilānsya syumba sikulu sya mu lughamba, silobha sijhōjhisiibhwe. Moomo momwajhīlila matelekanyi.”
13 Bhalya bhahemba bhaajhe bhakabhuukanga bhaajha. Bhobhakafīkanga mu lulya lugho, bhasānga kobhe bhoghakabhalombanga Jheesu, kundi bhaajhīla matelekanyi gha Pasaka.
Hofisumbuliile ibhu ne divai kubha ko fyakulya fyeke Sifwe Bhusya
(Matajhu 26:26-30; Maaliko 14:22-26; 1 Bhakolinto 11:23-25)
14 Bholyakabhanga liima lyafīka, ghajhīkala ha fyakulya na bhalya mintengwe hamwi naajhe. 15 Ghabhalomba ghaabhala, “Nansīima nkana kulya mubhāla ghooghu ghwa Pasaka hamwi nomwe, nensyali kufwa. 16 Bhukohela ndikumilomba, nsyakalye kabhili Pasaka mpaka bhojhilokabha jhyakwila mu Bhwami bhweke Kabhumba.”
17 Kundi ghatwala sikombe sya divai,d ghasīima, ghaabhala, “Twale seesi mughabhunkane mwense. 18 Ndikumilomba kubhala, kusumbula nonwe nsilokanywa kabhili divai mpaka Bhwami bhweke Kabhumba bhobhulokabha bhwajhisa.”
19 Kundi ghatwala ibhu ghasīima kwa Kabhumba, ghalimetula, ghabhaheekesya nalikubhala, “Ibhu leeli gho mutūmba ghwane ghulikufumisibhwa kumwenyu. Temwajhīla teetyo ku kunjisukila.” 20 Bhobhakabhanga bhakwisya kulya ghatwala mutaho ghaajhīla bhoobhoe. Kundi ghaabhala, “Mutaho ghooghu ni kalaghano kahya ka malaso ghaane ^ghaloghoneka ku kuhensa kumisābhula umwe.
21 Tukubha, kūnga, kubhoko kwa muntu alikunhīnduka, ndi nako ha siikalo simwi. 22 Gho kubhala Mwana ghwa Muntu ajhiile, kobhe bhofyakabhalwanga no Kabhumba. Tukubha koghaabha ghoogho muntu alikumuhīnduka.” 23 Haaho mintengwe bhaajhe bhajha kwibhasya bheene ku bheene, “Ni ghanyi mu ufwe anakola ighāmbo lya teetyo?”
Mukulu ni ghuuhe?
24 Kundi bhahemba bheke Jheesu bhajha kusoola kubhala ti, mukulu ni ghanyi mu bhonse. 25 Kundi Jheesu ghabhalomba ghaabhala, “Bhakulu bhakulu bha fihugho bhakobhalombola bhantu bhaabho ku managha, na bhaabho bhaami bhakoliijhīla gho bhakonka bhantu.
26 Tukubha kumwenyu umwe musijhīli teetyo, ali mukulu ku mwenyu ghabha kobhe ali mutooli. Na ali kalombo, abhe kobhe muntu alikukolela bhandi. 27 Nonwe, mukulu ni ghuuhe? Ghooghuli ajhīkeele ha fyakulya, ajhe ghulya alikuhindaghana? Sakubha ghulya ajhīkeele ha fyakulya? Nonwe une kumwenyu ni kobhe ghulya alikuhindaghana.
28 Umwe ghomwe mwakasīibhanga hamwi none mukubha nendikughemwa. 29 Nonwe, une ndikumibhikila managha gha kujhima, kobhe Taata bhoghakambikilanga une, 30 akulinga mubhe mulikulya mwananywa hamwi none, mu Bhwami bhwane. Kabhili mwajhīkala ku fitebhe fya bhwami mulikubhakalila makabhila ikumi na abhili gha Isilaheeli.”
Jheesu alikutenda bhuli Petelo, lindi isiina Simoni, bhwalobhala ti tyamujhinsi
(Matajhu 26:31-35; Maaliko 14:27-31; Jhohana 13:36-38)
31 Jheesu ghaabhala, “Simoni, Simoni! Mānya kubhala ti Syetani ghakahensanga amijhelange kobhe ngano. 32 Tukubha nankutendajhyukila kwa Kabhumba akulinga nosilēki kwisigha koobhe. Bholokabha ghwanheleelela, ghwajhisukila kusīipya bhenoobhe.” 33 Simoni ghamuhindula ghaabhala, “Ee Taata Bhusya une nankehala kujha noghwe, singa kwabha kujhīghalilwa ajhe kufwa.” 34 Tukubha Jheesu ghamuhindula ghaabhala, “Ndikukulomba Petelo kubhala, bhwalelo lisyali kuhila likajhenje, ulobha ghwanhīnduka myelelo itatu kubha ti tunyinsi.”
Matelekanyi gha silanda silikwisa
35 Kundi Jheesu ghabhabhasya bhahemba bhaajhe ghaabhala, “Bhonankamulaghilanga bhusila mbughuli, bhusila bhahasya nenga tu nkwābho sya kuhindulila, mwakasambanga sintu?” Bhamuhindula bhabhala, “Lekehi.” 36 Ghabhalomba ghaabhala, “Tukubha nonwe ali ne mbughuli ajhitwale, nali ne bhahasya teetyoe. No muntu asili no lupanga aghūsye ighwanda lyajhe alughūle. 37 Mānye kubhala ti finyeghilwe, ‘Ghakabhikwanga sibhya simwi na bhakanya bhubhi.’e Ndikumilomba ghaagha maghāmbo ghakabhikwanga ghandasile une. Bhwene ni mpaka ghakwila kumwane, no kubha ghali kwihi kukoleka.” 38 Bhamulomba bhabhala, “Sifwe Bhusya, kūnga haaha siliho mpanga ibhili.” Naagho ghabhahindula ghaabhala, “Lekenge fyakwīla.”
Jheesu alikutendajhyuka nali ku Musosi ghwa Miselituni
(Matajhu 26:36-46; Maaliko 14:32-42)
39 Kundi Jheesu ghabhuuka kujha ku Musosi ghwa Miselituni, kobhe bhwakabheele ghaajhīla. Bhahemba bhaajhe naagho bhamulōnda. 40 Mukubha ghafīka kooko, ghabhalomba ghaabhala, “Musēeghe Kabhumba akulinga kubha mwaghemwa musipootwi.”
41 Kundi ghabhalēka fise, ntaabhulo singana. Ghasukama, ghatendajhyuka kwa Kabhumba ghaabhala, 42 “Taata, kubha ghwatēha unandesya no ghooghu mutaho ghwa kusamba. Hamwi na ghaagho, fisibhi kobha bhontēhile une, fibhe kobhe bhotēhile ughwe.” 43 Musambwa kufuma mwi ighūlu ghamwisila, ghamusīipya. 44 Mukubha mwēgho ghwahelaana nkana, ghasunfya kusēegha. Kafita kafuma kobhe matanta gha malaso ghalikutonya hansi.f
45 Kubha ghahwa kusēegha, ghabhaheleelela bhahemba bhaajhe ghabhasānga bhaghōna tulo, bhukohela bhakabheele bhakima na bhulanda. 46 Ghabhabhasya, “Nasi bhomulikughōna? Bhuuke mumusēeghe Kabhumba akulinga kubha mwaghemwa musipootwi.”
Kuhīndukwa no kunīghwa kweke Jheesu
(Matajhu 26:47-56; Maaliko 14:43-50; Jhohana 18:3-11)
47 Jheesu mukubha nalikutenda ghaagho, kobhe akatipwile, hajhisa mulēgha ghwa bhantu bhalombwelwe na Jhuuda, ^akabheele mu bhaabhali mintengwe ikumi na bhabhili. Kundi Jhuuda ghamukoleelela Jheesu kuhensa ti amujhambile. 48 Tukubha Jheesu ghamubhasya ghaabhala, “Ee Jhuuda! Ulikumuhīnduka Mwana ghwa Muntu ku kumujhambila?” 49 Kundi bhahemba bheke Jheesu mukubha bhabhwene bhofilikubha, bhamubhasya bhabhala, “Ee Sifwe Bhusya, tubhaputaghule na mpanga?”
50 Haaho na haaho ghumwi mu bhaabho, ghamutema na lupanga musya ghweke mupeesi mukulu, ghamuputa itwi lya kwene. 51 Tukubha Jheesu ghatenda ghaabhala, “Lēke musijhīli bhoobho.” Ghalinigha lilya itwi ghamusisya.
52 Kundi Jheesu ghabhabhasya bhapeesi bhakulu na bhakulu bha bhasilikale bha Nyumba Nkulu jhya Ipeelelo, hamwi na bhaghosibhakulu bha Bhajhahudi ^bhakesanga mu kumunigha, ghaabhala, “Kusi mwanjisila ne mpanga no bhuhili kobhe mwifi mwihaghanyi? 53 Nasi nfuku syonse, tubheele tuli hamwi mu Nyumba Nkulu jhya Ipeelelo, sakubha mwanigha! Tukubha nonwe gho nsa jhyenyu ne ikunka lya bhwami bhwa kusimu.”
Petelo alikubhala ti tyamujhinsi Jheesu
(Matajhu 26:57-58, 69-75; Maaliko 14:53-54, 66-72; Jhohana 18:12-18, 25-27)
54 Kundi bhalya bhantu bhamunigha Jheesu, bhamufela mu nyumba jhyeke mupeesi mukulu. No Petelo akabheele nalōnsile ku hale. 55 Bhalya bhantu bhobhakabhanga bhafīka, bhasyana mulīlo mukati mu lusinga, bhajhīkala hamwi. Petelo naagho ghakoleela, ghajhīkala nabho. 56 Haaho, mukola milīmo ghumwi muhāla, ghamulōla Petelo mwi ilangaasi lya mulīlo ghamukomenkesya fisogha, ghaabhala, “Ghooghu muntu naagho abhele kumwi naajhe.” 57 Tukubha Petelo ghatuna ghaabhala, “Ale mukulwana ughwe, une nsimujhinsi.”
58 Lyalikahita ikunka, ghundi muntu ghamulōla Petelo ghaabhala, “Ughwe noghwe, uli kumwi na bhaabhali!” Tukubha Petelo ghahindula ghaabhala, “Ale muntu ughwe, teene.”
59 Mukubha jhyahita kobhe nsa jhimwi, ghundi muntu ghamutembekesisya ghaabhala, “Bhwene ghooghu muntu abhele kumwi naajhe, bhukohela unyene naagho ni ghwa ku Ghalilaajha kobhe Jheesu!” 60 Tukubha, Petelo ghahindula ghaabhala, “Ale muntu ughwe, gholikutenda ghaagho, une nsighajhinsi!” Haahoe mukubha nalikutenda ghaagho, likajhenje lyahila.
61 Jheesu ghabhijhuka, ghamukūnga Petelo. Kundi Petelo ghajhisukila lilya ighāmbo lyoghakamulombanga Jheesu kubhala, “Bhwalelo likajhenje lisyali kuhila, ulakubha ghwanhīnduka myelelo itatu.” 62 Haaho Petelo ghaafuma kunse, ghajha kulīla ku bhulanda.
Kusyentekwa no kuhuulwa kweke Jheesu
(Matajhu 26:67-68; Maaliko 14:65)
63 Bhasilikale ^bhakabheele bhamughangaliile Jheesu, bhajha kumusyenteka no kumuhuula ntuuso. 64 Bhamuhamba sitambala ku bhusyu, bhabha bhalikumubhasya, “Kooko mānya ghanyi ghakuhuula?” 65 Bhatenda maghāmbo ghandi mengi nkana gha kumutuka.
Jheesu ha mbele jhya ibhalasa lya Bhajhahudi
(Matajhu 26:59-66; Maaliko 14:55-64; Jhohana 18:19-24)
66 Mukubha kwasya, lyajhīkala ibhalasag lya bhaghosibhakulu bha Bhajhahudi lyakēkalwanga na bhapeesi bhakulu na bhamakota bha Kabhāngo keke Musa. Jheesu naagho ghalentwa ha mbele jhyabho. 67 Bhamubhasya kubhala, “Tulombe, ughwe ghoghwe Muhosya?” Jheesu ghabhahindula ghaabhala, “Singa namilomba temulakuswa. 68 No kubha namibhasya, temulonhindula. 69 Tukubha, kusumbula nonwe Mwana ghwa Muntu, alobha najhīkeele luhande lwa kubhoko kughoosi kweke Ghwamanga Kabhumba.”
70 Haaho, bhonse bhamubhasya, “Gho kubhala ti, ughwe uli Mwana ghweke Kabhumba?”h Jheesu ghabhahindula ghaabhala, “Kobhe bhomwabhala, une ghone.”
71 Kundi bhalya bhakulu bhabhala, “Hali ghundi kabhili ghwakwisa mu kututembekesesya? Twalihulikila fwebheene kufuma mu kanywa ka kumwajhe!”