Mpeesi jhya mulekwa
(Maaliko 12:41-44)
21
Jheesu mukubha nali mu Nyumba Nkulu jhya Ipeelelo, ghakabhalōlanga bhatunsi bhalikufumya mpeesi syabho mu sibhya sya kufumisya mpeesi. 2 Ghamulōla no mulekwa ghumwi mupīina nalikubhiikamo senti ibhilia bhuhela. 3 Haaho, Jheesu ghaabhala, “Bhwene ndikumilomba, mulekwa ghooghu mupīina, gho ghafumya ihela ikulu kusumba bhandi bhonse. 4 Bhukohela bhalya bhandi bhonse, bhafumya fintu fitooli, mu fintu fyabho fingi. Tukubha mulekwa ghooghu mu bhupīina bhwajhe, ghafumya fyonse fyali nafyo mu meekasi ghaajhe!”
Kusambasibhwa kwa Nyumba Nkulu jhya Ipeelelo
(Matajhu 24:1-2; Maaliko 13:1-2)
5 Mu bhahemba bheke Jheesu, bhakabheelemo bhakabheele bhalikutenda ghajhikenyie ne Nyumba Nkulu jhya Ipeelelo bhuli bhojhighubheekwe na mabhwe masogha, hamwi no kunyeghwa ne fintu fya mpunda bhantu fyobhakafumyanga kwa Kabhumba. Tukubha Jheesu ghaabhala, 6 “Ghaagho ghonse ghomubhwene nonwe, silokesa nfuku syakukabha telilokasīibha singa ibhwe limwi lilokabha lili ku lughamba jhya lindi, ghonse ghalokasambasibhwa!”
Kusamba kulokeesa nfuku sya bhuhela
(Matajhu 24:3-14; Maaliko 13:3-13)
7 Bhalya bhahemba bhaajhe bhamubhasya bhabhala, “Ee sifwe bhuhemba, ghaagho mabhi ghalokeesa ifuku si? Kabhili ni lusante si lulokatutembekesisya kubha ti ghali ha bhwihi kukoleka?” 8 Ghabhalomba ghaabhala, “Bhe mubhengile, akulinga musitēbhwi! Bhukohela bhantu bhengi bhalokeesa kwi isiina lyane bhalikubhala, ‘Une ghone Muhosya kufuma kwa Kabhumba!’ Kabhili, bhalobhala, ‘Nfuku sili ha bhwihi!’ Bhantu bhaabho, musibhalōndi! 9 Umwe kubha mwahulika sikūla sya isumo na kajhunga kakulu, musighubhahi. Ku fyofyonse mpaka ghaagho ghalōleka nyinambele, tukubha kubhuhela bhwa bhweleelo kulokabha kusyali.”
10 Jheesu ghajhililika kutenda kubhala, “Sihugho simwi silokasoola ne sindi, bhwami bhumwi bhulokasoola na bhundi. 11 Mu fihugho fingi mulokabha manyamusikimya makulu, nsāla nkulu ne syuka sibhi. Kabhili, mulokabha fintu fya nsubha no lusante lukulu kufuma mu lughamba.
12 Tukubha, ghaagho ghonse mukubha ghasyali kulōleka, bhantu bhalokaminigha bhamisanfya. Bhalokamifela mu kukalilwa mu majhumba gha kusangaanilamo no kumijhīghalila mu maghelesya. Kabhili mulokafelwa ku bhaami na bhatwale akulinga mukalilwe, bhukohela bhomwakajhimbika isiina lyane. 13 Ghaagho ghalokabha gho silumbo sya kunumba une ku bhantu. 14 Nonwe, simye mu myēgho jhyenyu, lēke kulanganyia kubha ti, mulokatenda si mu maghāmbo. 15 Bhukohela une ndomiha masāla na maghāmbo, bhuli bhomulobhala bhasumwa bhemba bhenyu bhapootwa kumituna, ajhe kumilesya. 16 Bhalokabha bhalikumihīnduka bhafyasi bhenyu, na bhanamuntu, na bhamughana ghwenyu, kumwi na bhanywanyi bhenyu. Kabhili bhandi mu umwe bhalojhihaghwa. 17 Bhantu bhonse bhalokabha bhamighājhile bhukohela bhomulijhimbiike isiina lyane. 18 Tukubha, telwataajhike lunyele singa tu lumwi ku mitwe jhyenyu! 19 Nomwe kubha mwasīipa, mulosābhula bhupanga bhwenyu bhwa nfuku syonse.”
Ilaghu lya kutumbwa kwa lugho lwa Jhelusalemu
(Matajhu 24:15-21; Maaliko 13:14-19)
20 Jheesu ghajhililika ghaabhala, “Kubha mwalōla lugho lwa Jhelusalemu lwaniengesibhwa na lubhugha, mānyenge kubhala ti kutumbwa kwa lugho kwakoleela. 21 Haaho, bhali mu sihugho sya Jhudea, bhakilimila mu misosi. Bhali mu lugho lwa Jhelusalemu, bhafuma bhakilima, na bhali mu mabhāla, bhasiisi kuheleela mu lugho. 22 Bhukohela nfuku seesyo silokabha sya kahūmbi, akulinga ghonse ghanyeghilwe mwi Ighāmbo lyeke Kabhumba ghakwīle. 23 Kobhaabha bhanabhakeema bhalokabha bhanywamile, na bhalokabha bhalikughonsya mu nfuku seesyo! Kalokabha kajhunga kakulu nkana mu sihugho seesyo, ne sisila syeke Kabhumba silobhajhisila bhantu bhaabha. 24 Bhandi bhantu, bhalokehaghwa ku mpanga, bhandi bhalokafelwa mu bhusya mu fihugho fingi. Na bhantu bhasili Bhajhahudi, bhalokeesa mu kubhafindamisya mu lugho lwa Jhelusalemu, mpaka nfuku syabho sya kujhima syahwa.”
Kwisa kwa Mwana ghwa Muntu
(Matajhu 24:29-31; Maaliko 13:24-27)
25 Jheesu ghajhililika ghaabhala, “Hali no lusante lulokalōleka kwi isyubha, ku mwensi no ku ntangwa. Na hanu ha bhweleelo, bhantu bha fihugho fyonse bhalokasūpa no kusambaghila na kujhuma kwa tanganika na mabhīmbi ghaajhe makulu. 26 Bhantu bhalokakolobhela ku kusūpa, bhalobha bhakūngiliile maghāmbo mabhi nkana ghesile ha bhweleelo, bhukohela managha gha fintu fya mu lughamba ghalotengesibhwa.
27 Haaho hobhalokamulōla Mwana ghwa Muntu nalikwisa mu mafumbe ku managha mengi ne mpunda nkulu. 28 Ghaagho bhoghalokabha ghalikusumbuka kukoleka, bhe musīipile, mwanabha mwisighile bhukohela ghaagho ghalikulānsya kubhala ti, Kabhumba ali ha bhwihi kumisābhula!”
Lughēlo lwa siti sya tiini
(Matajhu 24:32-35; Maaliko 13:28-31)
29 Kundi Jheesu ghabhalomba bhahemba bhaajhe lughēlo ghaabhala, “Kūnga siti sya tiini ne fiti findi fyonse. 30 Mukubha mwalōla fiti fyasumbula kulēmba, mujhinsi kubhala mutusyo ghuli ha bhwihi. 31 Ghobhuli bhofili, nomwe kubha mubhwene ghalya mabhi ghalikukoleka, mānye kubha ti Bhwami bhweke Kabhumba bhuli ha bhwihi. 32 Bhwene ndikumilomba kubhala, nfuuke jheejhi tejhilakuhita mpaka ghaagha ghonse ghahwa kukoleka. 33 Ighūlu no bhweleelo filohita, tukubha ghaagho maghāmbo ghaane teghakahite na kale.
Bhe menso
34 Bhe menso, myēgho jhyenyu jhisisumbilwi na mibhembo mibhi, no bhulefi, no kusamba kwa hanu ha bhweleelo, akulinga ifuku leelyo lya bhuhela lisikamitipukanyi kobhe mutegho. 35 Mānye kubhala, ifuku leelyo lilokabhatipukanyia bhantu bhonse bhajhīkeele ha bhweleelo honse. 36 Nonwe, bhe menso nfuku syonse bhufuku ne isyubha, bhe mulikumusēegha Kabhumba, akulinga abhe nalikumiheekesya managha gha kulenganyia mu ghonse ghalokeesa, akulinga mujhughalale ha mbele jhya Mwana ghwa Muntu.”
37 Mu nfuku seesyo isyubha, Jheesu akabheele nalikulāngulula bhantu mu lusinga lwa Nyumba Nkulu jhya Ipeelelo. Bhufuku, akabheele ghaajha mu kulaala mu Musosi ghwa Miselituni. 38 Ne nfuku syonse, bhantu bhonse bhakabheele bhahalamuka mulāabho mulāabho kujha mu Nyumba Nkulu jhya Ipeelelo, mu kumuhulikisya.