Bhalikubhasya mpasi jhyeke Jheesu
(Matajhu 21:23-27; Maaliko 11:27-33)
20
Jheesu akabheele nalikulāngulula bhantu mu lusinga lwa Nyumba Nkulu jhya Ipeelelo, nalikubhalomba Sikūla Sisogha ya Bhwami bhweke Kabhumba. Lyalikabha ifuku limwi, bhapeesi bhakulu, bhamakota bha Kabhāngo keke Musa, na bhaghosibhakulu bha Bhajhahudi bhamujhiila, 2 kundi bhamubhasya bhabhala, “Tubhalile, ulikukola ghaagha ku mpasi jhyeke ghanyi? Ni ghanyi akuhele jheejhi mpasi?”3 Ghabhalomba ghaabhala, “None ndikumubhasya. Munombe, 4 kubhatisya bhantu kweke Jhohana kwakafumanga mwi ighūlu ajhe ku bhantu?” 5 Haaho, bhasumbula kutensanyia bheene ku bheene bhalikubhala, “Kubha twabhala ti, ‘Kwakafumanga mwi ighūlu,’ alobhala, ‘Nasi musyakamwisighanga?’ 6 No kubha twabhala ti, ‘Bhwakafumanga ku bhantu,’ bhantu bhonse bhaabha bhalakutuhuula na mabhwe, bhukohela bhesighile kubha ti Jhohana akabheele mughwelaghu.” 7 Kafumilo ka haaho, bhamuhindula bhabhala, “Tetujhinsi kobhwakafumanga.” 8 Jheesu naagho ghabhalomba ghaabhala, “None, nsilakumilomba kubhala ti ndikukola ghaagha ku mpasi jhyeke ghanyi.”
Lughēlo lwa bhakanya kulīma bhasili bhasogha
(Matajhu 21:33-46; Maaliko 12:1-12)
9 Kundi Jheesu ghasumbula kubhalomba bhantu lughēlo loolu, ghaabhala, “Akabheeleho muntu ghumwi, ghakabhyalanga misabhibhu mwi ibhāla lyajhe. Ghalitiisya ku bhakanya kulīma, kundi unyene ghaajha lwēndo lwa hale, kooko ghajhīkala nfuku singi. 10 Liima lya kusuughula mukubha lyafīka, ghalaghiila mukola milīmo ghwajhe ku bhalya bhakanya kulīma, akubha bhamuheekesye luhande lwajhe lwa fisuughulwa. Tukubha, bhalya bhakanya kulīma bhamuhuula bhanamubhīnga, ghaheleela mabhoko ghamwenga.
11 Kanya ibhāla, ghalaghiila musya ghundi. Tukubha naagho bhamuhuula bhamufwisya nsonyi, kundi bhamubhīnga ghaheleela mabhoko ghamwenga. 12 Ghalaghiila ghwa bhutatu. Ghoogho naagho bhamufulasya, bhamuteela kunse ne ibhāla.
13 Kafumilo ka haaho, kanya ibhāla ghaabhala, ‘Nonwe nankwīla si? Nankumulaghila mwanaane ntone! Hamwi ghooghu bhalomunywamika.’ 14 Tukubha bhantu bhalya mukubha bhamulōla, bhajha kutensanyia bhalikubhala, ‘Ghooghu gho muhyanyi ghwa leeli ibhāla. Nonwe tumwihaghe, akulinga bhuhyana bhubhe bhwakwetu.’ 15 Bhamutambila kunse ne ibhāla, bhamwihagha.”
Kundi Jheesu ghabhabhasya, “Nonwe kanya ibhāla ghulya alobhēela si bhalya bhakanya kulīma? 16 Alojhisa, ghabhajhihagha, kundi ibhāla leelyo, ghabhaha bhandi!” Bhantu mukubha bhahulika maghāmbo ghaagho, bhabhala, “Ghaagho ghasitufīkiko!” 17 Jheesu ghabhatembeekesya, ghabhabhasya ghaabhala, “Langaanyie, maghāmbo ghaagha, mughajhinsi bhuti?
‘Ibhwe lyobhakatunanga bhaghubhaki,
nonwe gho ibhwe ikulu lya ku kapako.’ab
18 Muntu ghoghonse kubha ghaghwila ku leelyo ibhwe, alofunaghuka, kabhili muntu ghoghonse ghwakubha lyamughwila, lilomusya bhuliko.”
19 Kundi bhamakota bha Kabhāngo keke Musa hamwi na bhapeesi bhakulu, bhamānya kubha ti lulya lughēlo lukabheele lulikubhabhala bheene. Kundi bhabha bhalikuhensa kumunigha haahoe, tukubha bhakaghubhahanga mulēgha ghwa bhantu.
Kulīha ikooli kwa Kalisaali, mwami ghwa Bhaluumi
(Matajhu 22:15-22; Maaliko 12:13-17)
20 Kundi bhaabho, bhabha bhalikumubhwelamila Jheesu. Bhalaghiila bhantu bha kubhasilisya bhakukabha bhalikwijhīsya kobhe bhantu bha bhwene, akulinga bhamunighe ku maghāmbo ghaajhe, bhamufele ku bhwami bhamukalile. 21 Kundi bhantu bhalya bhamubhasya Jheesu bhabhala, “Sifwe bhuhemba, tujhinsi kubha ti ulikutenda no kulāngulula gha bhwene. Kabhili tukokūnga ntighili jhya muntu, ulikulāngulula bhwene ku bhantu kulōnda nsīla jhyeke Kabhumba. 22 Teeti, Kabhāngo keke Kabhumba kaswele ufwe kulīha ikooli kwa Kalisaali?”c
23 Tukubha Jheesu ghamānya mutegho ghwabho, ghabhalomba ghaabhala, 24 “Munānsye ihela. Bhusyu bhwa muntu ali kwi ihela leelyo, ni bhweke ghanyi? Kabhili, isiina leeli ni lyeke ghanyi?” Bhamuhindula bhabhala, “Ni fyeke Kalisaali.” 25 Kundi Jheesu ghabhalomba ghaabhala, “Nonwe, fyeke Kalisaali, ketemwamuha Kalisaali, ne fyeke Kabhumba ketemwamuha Kabhumba.”
26 Bhantu bhalya bhalikosa mahi nkana kuhindula kweke Jheesu, bhahumbula nakele. Bhabhulwa nfūno jhya kumunighila, ku maghāmbo ghoghatenda ha mbele jhya bhantu.
Kusyuka kufuma ku bhafu
(Matajhu 22:23-33; Maaliko 12:18-27)
27 Bhakabheeleho bhandi bhantu bhakabheele bhajhitilwe Bhasadukaajho.d Bhaabho bhakolāngulula kubha ti hatuhu kusyuka kwa bhafu. Bhamwisila Jheesu, bhamubhasya bhabhala, 28 “Ikota, Musa ghakatunyeghelanga ilaghi kubhala, kubha muntu ghasumaalika, ghaalēka mukasi bhusila mwana, mutoghwajhe ghamuhyana ghulya mulekwa, akulinga amufyalile bhaana ghwamughana ghwajhe. 29 Nonwe, bhakabheeleho bhanamuntu ndwi. Ghwa nyinambele ghatoola mukeema, ghasumaalika bhusila kufyala mwana. 30 No ghwa bhubhili,e 31 kundi ghwa bhutatu naagho ghamuhyana. Fyabha teetyo ku bhonse ndwi. Bhanamuntu bhonse bhabha bhamutoola ghulya mwanamukeema, tukubha bhonse bhakasumalikanga bhusila kulēka mwana. 32 Ku bhuhela, ghulya mwanamukeema naagho ghasumaalika. 33 Nonwe, ghoogho mwanamukeema alokabha muka ghanyi ifuku lya kusyuka, bhukohela bhonse ndwi bhakamutolanga?”
34 Jheesu ghabhalomba ghaabhala, “Linonwe bhantu bhalikutoola bhanatoolwa. 35 Tukubha bhantu bhakukabha bhalaasilwe kubhamo mu bhweleelo bhwisile no kusyulwa kufuma ku bhafu, bhaabho tebhalokatoola, ajhe kutoolwa. 36 Hamwi na ghaagho bhaabha tebhakafwe kabhili, bhukohela bhalobha kobhe misambwa. Bhalobha bhaana bheke Kabhumba, bhukohela bhasyulwa kufuma ku bhafu.
37 Singa tu Musa ghakalānsyanga mwi Ighāmbo lyeke Kabhumba kubha ti, bhafu bhalokasyuka, ku lughēlo lwa lilya itukutuku likabheele lilikughaka mulīlo bhusila kuhwa. Haaho ghakabhalanga Taata Bhusya Kabhumba, ‘gho Kabhumba ghweke Bhulahimu, Isaka no Jhakobho.’f 38 Kabhumba te Kabhumba ghwa bhafu, tukubha ni ghwa bhali bhupanga. Gho kutenda, kumwajhe bhantu bhaajhe bhonse ni bhapanga.” g
39 Haaho, bhamakota bhandi bha Kabhāngo keke Musa bhabhala, “Ikota, ghwatenda matendeke!” 40 Kusumbulila haaho, hatuhu ghakasimyanga kumubhasya ighāmbo lyolyonse.
Muhosya ni mwana ghanyi?
(Matajhu 22:41-46; Maaliko 12:35-37)
41 Kundi Jheesu ghabhabhasya ghaabhala, “Teeti ni ku bhuti bhantu bhakobhala ti, Muhosyah ni mwana ghweke mwami Daudi? 42 Daudi nyene, ghakanyeghanga mu sitaabhu sya Sabhuli, ghaabhala,
‘Sifwe Bhusya Kabhumba ghakamulombanga Taata Bhusya,
“Jhīkala luhande lwane lwa kwene,
43 mpaka nambabhiika bhemba bhoobhe heefo jhya maghūlu ghoobhe.”’ij
44 Kubha Daudi nalikumwitako Muhosya Sye Bhusya, ku teetyo Muhosya te mwanajhe bhuhela, tukubha ni Sye Bhusya.”
Bhe mubhengile na bhamakota bha Kabhāngo
(Matajhu 23:1-36; Maaliko 12:38-40; Luuka 11:37-54)
45 Bhantu bhonse mukubha bhamuhulikisye Jheesu, ghabhalomba bhahemba bhaajhe ghaabhala, 46 “Mwabha mubhengile na bhamakota bha Kabhāngo keke Musa, bhatēhile kulyāta bhafwite nkanjo nsogha akulinga bhantu bhabhe bhalikubhasukamila mu maghulilo. Mukubha bhali mu majhumba gha kusangaanilamo, bhalikuhensa kwīkala ku makonko gha ha mbele. No mu mibhāla bhēkeele ku makonko gha bhaghosibhakulu. 47 Bhantu bhaabha bhalikughanyuka ngo sya bhalekwa! No mu kuhensa ti bhalōleke ku bhantu, bhalikwijhīsya kutendajhyuka fibhalwa fileehe. Bhantu kobha bhaabho, Kabhumba alobhakalila fikulu nkana!”