Luuka 19

Jheesu alikusangaana na Sakaajho

Jheesu ghajhingila mu lugho lwa Jheeliko, ghabha nahitile. 2 Mu loolo lugho, mukabheele muntu ghumwi, akabheele najhitilwe Sakaajho. Unyene akabheele mukulu ghwa bhakanya kulīhiisya makomo, kabhili akabheele mutunsi. 3 Muntu ghoogho ghabha nalikuhensa kumulōla Jheesu kubha ti ni muntu ghwa bhuti. Tukubha ghakapootwanga kumulōla bhukohela akabheele mutofu, kabhili bhantu bhakabheele bhengi nkana. 4 Kundi ghaajha lubhilo, ha mbele jhya mulēgha, ghatanda ku siti sya likuuku, akulinga amulōle Jheesu bhwalobha nahitile halya. 5 Jheesu bhoghakafīkanga halya, ghakūnga ku lughamba ku siti, ghamulōla Sakaajho, ghaabhala, “Sakaajho, tikila bhwangu! Bhukohela bhwalelo une nankusīngwa mu nyumba mumobhe.” 6 Sakaajho ghatikila bhwangu, ghamusangaanila Jheesu ku lugho kumwajhe nasangabheele.

7 Bhantu bhonse bhakamulōlanga Jheesu nalikujhingila moomo, bhasumbula kung'wing'a, bhalikubhala, “Mm! Ghaajha mu kwīkala kwa muntu kanya bhubhi kwa Kabhumba!” 8 Tukubha Sakaajho ghajhughalala, ghamulomba Sifwe Bhusya ghaabhala, “Ee Taata Bhusya, nonwe fintu fyane ndoghabhula hakati, luhande ndobhaha bhapīina. Kabhili muntu ghondobha namughanyuka syosyonse, ndomuheleesisya myelelo ine.” 9 Jheesu ghamulomba ghaabhala, “Bhwalelo, kusābhuka kwajhisa ku bhantu bha mu jhinu nyumba. Bhukohela, muntu ghooghu naagho ni ghwa bhukwa bhweke Bhulahimu. 10 Bhukohela, Mwana ghwa Muntu ghajhisa mu kuhensela no mu kusābhula bhantu bhakataajhika.”

Lughēlo lwa bhasya bhakahebhwanga mpijha

(Matajhu 25:14-30)

11 Bhantu ^bhakabheele bhamuhulikiisye Jheesu bhakabheele bhalikulanganyia kubhala ti, Bhwami bhweke Kabhumba bhulakwisa ku mulongo, ku bhukohela akabheele ha bhwihi kufīka ku Jhelusalemu. Seesyo gho syakasūlanga Jheesu abhalombe lughēlo 12 kubhala, “Akabheeleho muntu ghumwi ghwa bhukwa bhwa bhaami. Ghoogho ghakajhanga ku sihugho sya hale akulinga aheebhwe sitebhe sya bhwami bhwa mu sihugho syajhe, kundi aheleele.

13 Mukubha nasyali kubhuuka, ghabheeta ikumi mu bhasya bhaajhe kila muntu ghaamuha ihela ikulu, ghabhalomba ghaabhala, ‘Mwakosya mahela ghaagha ku kufyasilisya mpaka naheleela.’ 14 Tukubha bhantu bha mu sihugho syajhe, bhakabheele bhamughājhile, bhalaghiila bhakinso mu sihugho silya sya hale kubhala, ‘Muntu ghooghu, tetuhensile abhe mwami ghwetu!’ 15 Bhoghakabhanga ghaheleela, ghakaheebhwa sitebhe sya bhwami, ghabhajhita bhalya bhasya bhoghakaheekesyanga mpijha, akulinga amānye kila muntu ghafyasilisya bhuti.

16 Musya ghwa nyinambele ghafīka, ghamulomba ghaabhala, ‘Ee mwami, ihela lyoghwakampanga nanfyasilisya, bhusabhaghala bhwajhe ni mahela ikumi.’ 17 Ghulya mwami ghamulomba ghaabhala, ‘Ghwajhīla fisogha, ughwe uli musya musogha. Bhukohela ukabheele mutendeke ku sintu sitooli nkana, nankukuheekesya ujhime ngo ikumi.’ 18 Musya ghwa bhubhili naagho ghafīka, ghamulomba ghaabhala, ‘Ee mwami, ihela lyoghwakampanga, nanfyasilisya, bhusabhaghala bhwajhe ni mahela ataanu.’ 19 Mwami ghamulomba no ghoogho ghaabhala, ‘Noghwe, nankukuheekesya ujhime ngo itaanu.’

20 Musya ghundi ghafīka ghaabhala, ‘Ee mwami, ihela lyobhe leeli haaha. Nankalihambanga kwi ilebhe, akulinga lisitaajhiki. 21 Nankēlanga teetyo bhukohela nkughubheehe, ughwe uli muntu mughughu. Ukotwala fyosibhiikile, kabhili ukosuughula fyosibhyele.’

22 Mwami ghamulomba ghaabhala, ‘Ale musya mubhi ughwe! Nonwe, ndikukukalila ku maghāmbo ghoobhe ghwenyene. Ghwakamānyanga kubha ti une ndi muntu mughughu, nkotwala fyonsibhiikile, kabhili nkosuughula fyonsibhyele. 23 Kubha ni teetyo nasi bhosyakabhikanga ihela lyane ku bhakanya kufyasilisya akulinga intwale hamwi no bhusabhaghala bhwaghungilika?’

24 Kundi ghabhalomba bhantu bhakabheele bhajhughalele halya ghaabhala, ‘Mughanyuke ihela lyajhe, mukamuheekesye ghoogho ghakafyasilisya mahela ikumi.’ 25 Tukubha bheene bhamulomba bhabhala, ‘Ee mwami, ghulya ali nagho ikumi!’

26 Ghaabhala, ‘Ndikumilomba kubhala, muntu ghoghonse ali ne sintu, aloghungilisibhwa ne findi. Tukubha muntu asili ne sintu, kumwi ne silya sitooli syali nasyo aloghanyukwa. 27 Nonwe, bhalya bhemba bhaane bhasikabheele bhalikuhensa une imbe mwami ghwabho, bhalente haaha mubhehaghe ha mbele jhyane!’”

Jheesu alikujhingila mu Jhelusalemu ku kajhombe

(Matajhu 21:1-11; Maaliko 11:1-11; Jhohana 12:12-19)

28 Jheesu bhoghakahwanga kutenda ghaagho, ghalombola kujha ku Jhelusalemu. 29 Bhoghakabhanga ghakolelela lugho lwa Bhesifaghe no lwa Bhesania, mu musosi ghujhitilwe ghwa Miselituni, ghalaghiila bhabhili mu bhahemba bhaajhe, 30 ghabhalomba ghaabhala, “Kajhe mu lugho luli ha mulombolo ghwenyu. No mukubha mulikwingila moomo, mulomulōla mwana ghwa sihōngo nahambilwe, asinalyātilweko na muntu ghoghonse. Muhambulule, munentele haaha. 31 Kubha muntu ghamubhasya ti, ‘Ku bhuti mulikumuhambulula?’ mwamulomba mwabhala, ‘Sifwe Bhusya ali na mulīmo naajhe.’”

32 Kundi bhalya bhahemba bhaajha, bhalōla ghonse kobhe Jheesu bhwakabheele ghabhalomba. 33 Mukubha bhalikumuhambulula ghulya mwana ghwa sihōngo, bheene naajhe bhabhabhasya bhabhala, “Ku bhuti mulikumuhambulula ghoogho mwana ghwa sihōngo?” 34 Bhabhalomba bhabhala, “Sifwe Bhusya ali na mulīmo naajhe.” 35 Bhamufelela Jheesu, bhaghānsa myenda jhyabho ku lughamba na sihōngo, bhamutansyako Jheesu.

36 Jheesu mukubha najhiile, bhantu bhakabheele bhalikughānsa myenda jhyabho mu nsīla. 37 Mukubha nali ha bhwihi ne nsooka jhya Musosi ghwa Miselituni, mulēgha ghonse ghwa bhahemba bhaajhe bhasangabhala, bhasumbula kumulumba Kabhumba ku silongo sikulu, ku maleebha ghonse gho bhakalōlanga nalikughakola Jheesu. Bhabha bhalikumulumba nkana 38 bhalikubhala,

“Apambulilwe mwami ajhisile kwi isiina lyeke Sifwe Bhusya.

Maholo ghabheeho mwi ighūlu ne mpunda nkulu kwa Kabhumba.”

39 Bhandi Bhafalisaajho bhakabheelemo mu ghulya mulēgha, bhamulomba Jheesu bhabhala, “Ikota, bhakabhe bhahemba bhoobhe, bhalēke kutenda ghaagho!” 40 Jheesu ghabhahindula, “Ndikumilomba, kubha bhaabha bhahumbula, mabhwe ghaagha ghalotangiila ku silongo sikulu!”

Jheesu alikululīlila lugho lwa Jhelusalemu

41 Jheesu mukubha nali ha bhwihi no lugho lwa Jhelusalemu, nalubhwene, ghasumbula kululīlila, 42 ghaabhala, “Unabhe nojhinsi bhwalelo ghahenseelwe akulinga ubhe na maholo! Tukubha nonwe ghafisilwe mu menso ghoobhe. 43 Nfuku silojhisa syakukabha, bhemba bhoobhe bhaloghubhaka lukande lusiipe kuniengela lugho loobhe lonse, haaho bhalokujhīghalisya honse. 44 Bhalokughwisya hansi, ughwe, bhabhajhihagha na bhaana bhoobhe bhonse. Tebhakulēkele singa tu ibhwe lya kusīibha ku lughamba jhya lindi, bhukohela tukabheele nojhinsi liima lyoghakabhanga Kabhumba ghajhisa kumoobhe!”

Jheesu alikujhingila mu Nyumba Nkulu jhya Ipeelelo

(Matajhu 21:12-17; Maaliko 11:15-19; Jhohana 2:13-22)

45 Jheesu ghajhingila mu lusinga lwa Nyumba Nkulu jhya Ipeelelo, ghasumbula kubhīnga bhantu bhakabheele bhalikughūsya fintu moomo. 46 Ghabhalomba ghaabhala, “Finyeghilwe kubhala, ‘Nyumba jhyane, jhilobha nyumba jhya kutendajhyukilamo.’ Tukubha umwe, mwajhīilako ‘ikelo lya bheefi.’ ”

47 Jheesu ghabha nalikulāngulula bhantu nfuku syonse mu Nyumba Nkulu jhya Ipeelelo. Mafuku ghaagho bhapeesi bhakulu, hamwi na bhamakota bha Kabhāngo keke Musa na bhaghosibhakulu bha Bhajhahudi, bhabha bhalikuhensa nsīla jhya kumwihagha. 48 Tukubha tebhakajhilōlanga, bhukohela bhantu bhonse ^bhakabheele bhamulōnsile, bhakabheele bhateghile matwi nensa.