Lughēlo lwa mulekwa no hakimu
18
Jheesu ghabhalomba bhahemba bhaajhe lughēlo kubhala, jhilikuhenselwa bhabhe bhalikumusēegha Kabhumba nfuku syonse, bhusila kukima. 2 Ghabhalomba ghaabhala, “Hakabheele hakimu mu lugho lumwi bhoobhu. Ghoogho hakimu, tyakabheele namughubhehe Kabhumba, kabhili tyakabheele ghalisinga bhantu. 3 Mu lugho loolo, mukabheele mulekwa ghumwi ghwakubha keteghaajha kumwajhe nalikubhala, ‘Ndikusēegha utukalile no mwimba ghwane.’4 Nfuku singi syakahitanga, ghulya hakimu akabheele nalikutuna kumufūnaanila ghulya mulekwa. Kundi ku bhuhela, ghalanganyia mu mwēgho ghwajhe ghaabhala, ‘Une nsimughubhehe Kabhumba, nsikolisinga bhantu. 5 Tukubha bhukohela mulekwa ghooghu alikunsanfya nkana, nonwe nankukala ighāmbo lyajhe, akulinga aalēke kunjumisya kabhili ku kookuli kubha nalikunjisila!’”
6 Kundi Sifwe Bhusya ghaabhala, “Liijhighe kwa hakimu ghulya mubhi, bhuli bhoghabhala! 7 Nonwe! Kabhumba, alolēka kubhakalila fibhalaasile bhantu bhaajhe bhwakabheele ghasāaghula bhakukabha bhalikumulīlila isyubha no bhufuku? Anatinda kubhafūnaanila? 8 Ndikumilomba kubhala, Kabhumba alobhakalila bhwangu fyonse fibhalaasile bhantu bhaajhe. Tukubha, Mwana ghwa Muntu bhwalobha nahelesile, alobhalōla bhantu bhamwisighile ha bhweleelo?”
Lughēlo lwa Mufalisaajho no kanya kulīhiisya makomo
9 Kundi Jheesu ghabhalomba ku lughēlo bhantu bhakabheele bhebhwene kubhala ti ni bhaghololoke myēgho na bhakabheele bhahambasisye bhandi bhonse, ghaabhala, 10 “Bhantu bhabhili bhakajhanga mukatendajhyuka ku Nyumba Nkulu jhya Ipeelelo,a ghumwi akabheele Mufalisaajho, ghundi akabheele kanya kulīhiisya makomo. 11 Ghulya Mufalisaajho ghajhughalala ghongwa ha mbali, ghasumbula kutendajhyuka ghaabhala, ‘Ee Kabhumba, nankusīima, bhukohela une nsili kobhe bhantu bhandi, bheefi, bhakanya bhubhi, bhaswanyi, ajhe, kobhe ghooghu kanya kulīhiisya makomo! 12 Une mu nyuma jhimwi nkosīngwa bhusila kulya myelelo ibhili mukubha nendikutendajhyuka. Kabhili, nkokufumisya mpeesi ifungo limwi mu mafungo ikumi mwi ipato lyane.’ 13 Tukubha ghulya kanya kulīhiisya makomo, ghakajhughalalanga hale. Teghakahensanga singa tu kubhuusya menso mwi ighūlu, kooku nalikwipampamula itundu lyajhe ku bhulanda, ghaabhala, ‘Ee Kabhumba, nfwile sighōngo, une ndi kanya bhubhi!’” 14 Kundi Jheesu ghaabhala, “Ndikumilomba kubhala, kanya kulīhiisya makomo ghakaheleelanga ku lugho kumwajhe, Kabhumba ghamubhiika mu bhaghololoke myēgho. Tu ghulya ghundi Kabhumba teghakamubhiikanga mu bhaghololoke myēgho! Bhukohela, muntu ghoghonse ghwakukabha nalikwikusya, Kabhumba alomusoosya. Tukubha muntu ghwakubha nalikwisoosya, Kabhumba alomutansya.”
Jheesu alikubhapambulila bhaana bhatooli
(Matajhu 19:13-15; Maaliko 10:13-16)
15 Ifuku limwi bhantu bhakabheele bhalikumulentela Jheesu bhaana bhatooli, akulinga abhabhiikeko mabhoko ghaajhe abhapambulile. Bhahemba bhaajhe bhobhakalōlanga ghaagho, bhasumbula kubhakabha bhalya bhantu. 16 Tukubha Jheesu ghabhajhita bhalya bhaana, ghaabhala, “Bhalēke bhaana bhese ku mwane, musibhalēsi, bhukohela Bhwami bhweke Kabhumba ni bhwa bhantu bhali kobhe bhaana bhaabha. 17 Fyene ndikumilomba, muntu ghoghonse ghwakubha nasilikubhupokeela Bhwami bhweke Kabhumba kobhe mwana, tyanamwingila singa tu ifuku limwi mu bhoobho Bhwami.”
Mukulu ghumwi mutunsi
(Matajhu 19:16-30; Maaliko 10:17-31)
18 Mukulu ghumwi, ghamubhasya Jheesu ghaabhala, “Ee taata bhuhemba, injīle bhuti akulinga imbe no bhupanga bhwa nfuku syonse?” 19 Jheesu ghamuhindula ghaabhala, “Ku si kunjitako mutendeke? Tyaliko mutendeke, kubhula kulahila Kabhumba ghongwa bhuhela! 20 Ughajhinsi malaghi gheke Kabhumba: ‘Nosiswani, nosihaghani, nosijhibhi, nosibhi kalōla ghwa malami, mutiikisye so no nyoko.’”b 21 Kundi ghahindula ghaabhala, “Malaghi ghaagha ghonse, nganighile kufuma bhutwana bhwane.”
22 Jheesu bhoghakahulikanga ghaagho, ghamulomba ghaabhala, “Hasyali, ghwasehelwa sintu simwi. Kajhe ukaghūsye fintu fyonse fyoli nafyo, kundi mahela ghaagho ghwabhaghabhulila bhapīina, haaho ulobha ne mbiika mwi ighūlu. Haaho jhisa unōnde.” 23 Ghulya mukulu, bhoghakahulikanga ghaagho, ghalijhinamila nkana, bhukohela akabheele mutunsi nkana. 24 Jheesu bhoghakabhanga ghamulōla bhoghalijhinamila, ghaabhala, “Ni fikaka nkana bhatunsi kujhingila mu Bhwami bhweke Kabhumba! 25 Ni fihaafu nkana ngamila kuhita mwi ihulu lya lusinge, hali mutunsi kwingila mu Bhwami bhweke Kabhumba!”
26 Bhantu bhakahulikanga ghaagho, bhabhala, “Ni ghanyilo nonwe, alosābhulwa?” 27 Tukubha Jheesu ghabhalomba ghaabhala, “Ghasinakobholeka ku bhantu, kwa Kabhumba ghanakobholeka.”
28 Haaho, Petelo ghamulomba Jheesu ghaabhala, “Kūnga, ufwe twafilēka fintu fyetu fyonse, twakulōnda ughwe!” 29 Jheesu ghaabhala, “Ndikumilomba fyene kubhala, muntu ghoghonse ghwakukabha ghaalēka lugho lwajhe, ajhe mukasi, ajhe bhamughana ghwajhe, ajhe bhafyasi bhaajhe, ajhe bhaana bhaajhe, ku kulōnda Bhwami bhweke Kabhumba, 30 ghoogho mukubha nasyali ha bhweleelo haaha alokapokeela fingi kusumba fyoghakalēkanga. Kabhili, liima lilya lisile, aloheebhwa bhupanga bhwa nfuku syonse.”
Jheesu alikutenda kabhili kufwa no kusyuka kwajhe
(Matajhu 20:17-19; Maaliko 10:32-34)
31 Jheesu ghabhatwala mintengwe bhaajhe ikumi na bhabhili, ghajha nabho sibhelo, kundi ghabhalomba ghaabhala, “Kūnge! Tujhiile ku Jhelusalemu. No kooko, ghonse bhuli bhaghwelaghu ghobhakanyeghanga ghajhikenyie no Mwana ghwa Muntu, ghalokwila. 32 Bhukohela alobhiikwa mu mabhoko gha bhantu bhasili Bhajhahudi. Haaho bhalomusyenteka no kumutuka, no kumufuulila mate, 33 bhalomuhuula na minyefu, bhalomwihagha, ne ifuku lya bhutatu, alosyuka.”
34 Tukubha bhahemba bhaajhe tebhakaghamānyanga singa tu fise ghwakabheele nalikubhalomba, bhukohela ghaagha maghāmbo ghakafiswanga kumwabho. Tebhakamānyanga kubhala ti alikutenda sintu si.
Jheesu alikumusisya muhofu
(Matajhu 20:29-34; Maaliko 10:46-52)
35 Jheesu mukubha nali ha bhwihi no lugho lwa Jheeliko, muntu ghumwi ^akabheele muhofu, ghakēkalanga ha mbalimbali mu nsīla, nalikusōna fintu ku bhantu. 36 Bhoghakahulikanga bhantu bhengi bhalikuhita, ghabhasya ghaabhala, “Kuli si?” 37 Bhamulomba bhabhala, “Jheesu ghwa ku Nasaleti alikuhita.” 38 Kundi ghatangiila nkana ghaabhala, “Ee Jheesu, Mwana ghweke mwami Daudi,c nfwile sighōngo!” 39 Bhantu ^bhakabheele ha mbele jhyeke Jheesu, bhabha bhalikumukabha ahumbule. Tukubha unyene ghasunfya tu kumutangiila ghaabhala, “Ee mwana ghweke mwami Daudi, nfwile sighōngo!”
40 Jheesu ghajhughalala, ghalaghiila bhamulente ha mbele jhyajhe. Ghulya muhofu mukubha ghakoleela, Jheesu ghamubhasya ghaabhala, 41 “Ulikuhensa inkujhīlile si?” Ghaabhala, “Ee Taata Bhusya, ndikuhensa kulōla.” 42 Jheesu ghamulomba ghaabhala, “Kooko lōla! Kwisigha koobhe kwakusisya.” 43 Ikunka leelyoe ghulya muhofu ghaalōla, kundi ghabha nalikumulōnda Jheesu kooku nalikumulumba nkana Kabhumba. Bhantu bhonse, bhobhakabhanga bhalōla ghaagho, naagho bhamulumba Kabhumba.